1, 2. Liuhusi ninia Ukun, Jeová sei halo saida? Tanbasá ita bele fiar katak Maromak nia Ukun sei toʼo mai?

 IHA tinan 31, iha foho ida besik Kafarnaum, Jesus hanorin ninia dixípulu sira atu harohan: “Halo Ita-nia Ukun toʼo mai.” (Mateus 6:10, MF) Ohin loron, ema barak duvida katak Maromak nia Ukun sei mai duni, maibé ita fiar metin katak Jeová sei hatán ba ita-nia orasaun neʼebé husu ninia Ukun atu toʼo mai.

² Liuhusi ninia Ukun, Jeová sei halo ninia kriatura iha lalehan no rai sai família ida deʼit. Sin, nia sei kumpre duni ninia hakarak neʼe. (Isaías [Yesaya] 55:10, 11) Tuir loloos, Jeová sai ona Liurai iha ita-nia tempu! Ita bele hatene ida-neʼe liuhusi buat neʼebé akontese iha tinan 100 nia laran. Nia halo daudaun buat neʼebé boot no furak ba ninia atan rihun ba rihun. (Zacarias 14:9; Apokalipse 15:3) Klaru katak Jeová sai ona Liurai, maibé ida-neʼe laʼós katak Maromak nia Ukun toʼo mai ona hodi tuir orasaun neʼebé Jesus hanorin ita. Tanbasá? No oinsá mak ida-neʼe sei kona ita?

3. (a) Horibainhira no iha neʼebé mak Jesus sai Liurai? (b) Oinsá mak ita bele hatene katak Jesus komesa ona ninia ukun iha tinan 1914? (Haree nota iha kraik.)

³ Maizumenus iha tinan 1880, Maromak nia atan sira komesa  komprende Daniel nia profesia neʼebé hakerek iha tinan 2.500 liubá, neʼebé dehan: “Iha liurai sira-neʼe nia loron Maromak lalehan nian sei harii ukun ida neʼebé sei nunka lakon.” (Daniel 2:44) No durante tinan 20 liu, Estudante Bíblia sira fó sai katak tinan 1914 mak tinan neʼebé importante tebes. Maibé iha tempu neʼebá, ema barak hanoin katak mundu neʼe sei sai diʼak liután ba beibeik. Ema ida hakerek: “Iha tinan 1914, ema barak fiar katak iha futuru sei nakonu ho buat neʼebé diʼak.” Maibé, iha tinan 1914 nia rohan, Funu Mundiál Primeiru hahú no profesia husi Bíblia sai loos. Hamlaha, rai-nakdoko no moras oioin hatudu ho klaru katak Jesus Kristu hahú ninia ukun iha lalehan nuʼudar Liurai iha tinan 1914. a (Haree nota iha kraik.) Sin, kuandu Jeová foti ninia Oan nuʼudar Liurai ba Ninia Ukun, Jeová sai Liurai iha dalan neʼebé foun.

4. Kuandu Jesus sai Liurai, ulukliu nia halo saida? Tuirmai saida mak nia halo?

⁴ Kuandu Jesus sai Liurai, ulukliu, nia halo funu hasoru ninia Aman nia inimigu Satanás. Jesus ho ninia anju sira duni sai Diabu ho ninia anju aat hotu husi lalehan. Ida-neʼe lori haksolok boot iha lalehan maibé lori susar no terus ba mundu. (Lee Apokalipse 12:7-9, 12.) Tuirmai, Liurai Jesus mós komesa hamoos, hanorin no organiza ninia atan sira iha mundu atu sira bele halaʼo Maromak nia hakarak. Mai ita haree oinsá mak sira hatudu ezemplu diʼak kona-ba halo tuir Jesus nia matadalan.

5. Saida mak akontese husi tinan 1914 toʼo 1919 foin hahú?

⁵ Bainhira Jesus duni sai tiha Satanás ho anju aat sira husi lalehan, Jeová haruka nia atu halo revista, ka haree didiʼak ba ninia dixípulu sira iha mundu hodi hadiʼa sira. Profeta Malaquias fó-hatene nanis kona-ba neʼe nuʼudar tempu hamoos nian. (Malaquias [Maleakhi] 3:1-3) Istória hatudu katak ida-neʼe akontese husi tinan 1914 toʼo 1919 foin hahú. b (Haree nota iha kraik.) Hodi bele sai parte husi Jeová nia família, ita presiza sai santu, ka moos. (1 Pedro 1:15, 16) Sin, ita-nia adorasaun tenkesér dook husi relijiaun falsu no polítiku sira.

6. Husi neʼebé mak ita simu ai-han espirituál? Ai-han neʼe importante tanbasá?

⁶ Tuirmai, Jesus uza ninia kbiit nuʼudar Liurai atu foti ‘atan laran-metin no matenek’ hodi fó knaar atu fahe ai-han espirituál ba ninia bibi sira neʼebé sai “luhan ida deʼit”. (Mateus 24:45-47; Joao 10:16) Husi tinan 1919, atan laran-metin no matenek mak halaʼo knaar importante neʼe atu fó ai-han ba Jesus nia “atan sira”. Ai-han diʼak husi irmaun kose-mina sira-neʼe hametin ita-nia fiar. Ida-neʼe mós aumenta ita-nia hakarak atu sai moos nafatin iha ita-nia adorasaun, hahalok, hanoin no isin. Ai-han espirituál neʼe mós hanorin no prepara ita atu hola parte iha knaar neʼebé importante liu iha mundu tomak, katak serbisu haklaken. Ita simu beibeik ai-han espirituál neʼe ka lae?

7. Bainhira Jesus sei iha rai, nia hahú serbisu importante saida? Serbisu neʼe kontinua toʼo bainhira?

⁷ Bainhira Jesus hahú ninia knaar iha rai, nia hatete: “Haʼu sei haklaken mós lia-foun diʼak Maromak nia reinu nian ba rai seluseluk; tan neʼe mak haʼu mai.” (Lucas 4:43) Durante tinan tolu ho balu, Jesus tau uluk serbisu neʼe iha ninia moris. Nia hatete ba nia dixípulu sira: “Tuir dalan, haklaken bá katak reinu lalehan besik ona.”  (Mateus 10:7) Kuandu Jesus moris hiʼas fali, nia fó-hatene nanis katak ninia dixípulu sira sei habelar lia-menon neʼe iha mundu tomak. (Apostolu 1:8) Nia promete ba sira katak nia sei tau matan nafatin ba serbisu importante neʼe toʼo mundu nia rohan.—Mateus 28:19, 20.

8. Oinsá mak Liurai book ninia povu iha mundu atu haklaken?

⁸ Iha tinan 1919, “lia-foun reinu nian neʼe” sai espesiál liután. (Mateus 24:14) Liurai ukun ona iha lalehan, no nia halibur ona povu neʼebé moos maski uitoan deʼit. Sira ho laran-manas halo tuir Jesus nia mandamentu atu haklaken iha mundu tomak katak Maromak nia Ukun hahú ona! (Apostolu 10:42) Porezemplu, iha Setembru 1922, besik naʼin-20.000 neʼebé apoia Maromak nia Ukun, halibur iha reuniaun boot internasionál iha Cedar Point, Ohio, Estadus Unidus. Hanoin toʼok, oinsá mak sira sente bainhira irmaun Rutherford hatoʼo ninia diskursu ho tema “Maromak nia Ukun iha lalehan besik ona” no hatete: “Haree bá, Liurai neʼe ukun daudauk ona! Imi mak ninia atan sira neʼebé atu fó sai kona-ba neʼe. Tan neʼe, haklaken, haklaken, haklaken, kona-ba Liurai no ninia ukun.” Loron tuirmai, ema naʼin-2.000 neʼebé simu konvite neʼe hola parte iha serbisu haklaken, balu bá dook kilómetru 72 husi reuniaun-fatin. Irmaun ida hatete: “Haʼu sei nunka haluha liafuan husi diskursu-naʼin atu haruka ami hodi bá haklaken Maromak nia Ukun no haree oinsá mak rona-naʼin sira neʼebé halibur iha neʼebá sai laran-manas!”

9, 10. (a) Eskola saida deʼit mak fó treinu ba ita atu haklaken? (b) Oinsá mak Ita rasik hetan ajuda husi treinu neʼe?

⁹ Toʼo tinan 1922, haklaken-naʼin sira aumenta toʼo naʼin-17.000 iha rai hamutuk 58. Maibé, sira presiza hetan treinu. Bainhira Jesus sei iha rai, nia fó matadalan ba ninia dixípulu sira kona-ba oinsá no iha neʼebé mak atu haklaken. (Mateus 10:5-7; Lucas 9:1-6; 10:1-11) Hanesan neʼe mós ho ohin loron, Jesus tau matan ba sira hotu neʼebé hola parte iha serbisu haklaken no fó matadalan no buat neʼebé sira presiza atu haklaken didiʼak. (2 Timoteo 3:17) Liuhusi kongregasaun, Jesus treinu ninia povu atu haklaken. Dalan ida mak Eskola Serbisu Kristaun, neʼebé halaʼo iha kongregasaun hamutuk 111.000 iha mundu tomak. Eskola neʼe hanorin haklaken-naʼin sira hamutuk 7.000.000 liu atu bele haklaken no hanorin iha dalan neʼebé book ema oioin nia laran.—Lee 1 Korinto 9:20-23.

¹⁰ Liután neʼe, ita mós iha eskola sira seluk neʼebé fó treinu ba katuas sira iha kongregasaun, pioneiru sira, irmaun klosan sira, kaben-naʼin kristaun sira, irmaun sira neʼebé serbí iha Grupu Koordenadór ba Sukursál ho sira-nia feen, irmaun sira neʼebé  vizita kongregasaun sira ho sira-nia feen, no mós misionáriu sira. c (Haree nota iha kraik.) Estudante sira husi klase ida iha Eskola Bíblia ba Kaben-Naʼin Kristaun fó-agradese ba arranju neʼe hodi hatete: “Treinu espesiál neʼebé ami hetan halo ami-nia domin ba Jeová sai kleʼan liu no prepara ami hodi sai prontu atu ajuda ema seluk.”

11. Oinsá mak Jesus nia dixípulu sira kontinua haklaken maski Satanás ataka sira?

¹¹ Inimigu Satanás haree ita-nia hakaʼas-an atu haklaken no hanorin liafuan diʼak. Nia koko atu hapara serbisu haklaken hodi uza dalan oioin atu hanetik mensajen kona-ba Maromak nia Ukun no ataka haklaken-naʼin sira. Maibé Satanás sei la hetan susesu. Jeová foti ninia Oan “aas liu liurai sira hotu, naʼi-ulun sira, kbiit-naʼin sira, ukun-naʼin sira hotu”. (Efeso 1:20-22) Nuʼudar Liurai, Jesus uza ninia kbiit atu proteje no tau matan ba ninia dixípulu sira hodi halaʼo ninia Aman nia hakarak. d (Haree nota iha kraik.) Tan neʼe, liafuan diʼak sei habelar nafatin, no ema rihun ba rihun neʼebé laran-diʼak sei aprende daudauk oinsá atu adora Jeová. Ita iha knaar espesiál duni atu hola parte iha serbisu furak neʼe!

12. Husi tinan 1914, oinsá mak Liurai Jesus hadiʼa dalan neʼebé Maromak nia atan sira organiza an?

¹² Husi tinan 1914, Liurai Jesus hadiʼa dalan neʼebé Maromak nia atan sira organiza an atu halaʼo Ninia hakarak. (Lee Isaías [Yesaya] 60:17. e) Porezemplu iha tinan 1919, irmaun ida husi kongregasaun ida-idak hetan knaar atu toma konta ba serbisu haklaken. Iha tinan 1927, kongregasaun sira hahú atu haklaken loron-domingu. Iha tinan 1931, Jeová nia atan sira komesa temi sira-nia an nuʼudar Testemuña ba Jeová, no ida-neʼe fó laran-manas liután ba sira atu haklaken. (Isaías [Yesaya] 43:10-12) Husi tinan 1938, irmaun sira komesa hetan knaar atu tau matan ba kongregasaun laʼós tanba ema mak vota, maibé tanba Maromak nia organizasaun mak hili. Iha tinan 1972, kongregasaun ida-idak komesa iha grupu katuas nian duké iha katuas ida deʼit atu tau matan. Irmaun hotu neʼebé tuir kritériu atu sai katuas no atan ba kongregasaun hetan laran-manas atu tau matan ba Maromak nia bibi sira. (1 Pedro 5:2) Iha tinan 1976, Grupu Administradór halo komisaun neen hodi toma konta ba serbisu  haklaken iha mundu tomak. Sin, Jesus nafatin organiza ninia povu atu laʼo ba oin hodi tuir Maromak nia hakarak.

13. Buat neʼebé Mesias nia Ukun mak halo ona kona Ita rasik nia moris oinsá?

¹³ Hanoin toʼok kona-ba buat hotu neʼebé Liurai Mesias mak halo ona durante tinan 100 nia laran. Nia hamoos no hadiʼa povu ida atu lori Jeová nia naran. Nia dirije serbisu atu haklaken Maromak nia Ukun iha rai 239 no hanorin ema barak atu moris tuir Jeová nia dalan. Nia halibur ona ninia povu naʼin-7.000.000 liu neʼebé fó sira-nia an atu halaʼo Aman nia hakarak. (Salmo [Mazmur] 110:3) Loos duni, liuhusi Mesias nia Ukun, Jeová halo ona hahalok neʼebé boot no furak tebes. Maibé buat neʼebé diʼak liután sei akontese iha futuru!

14. (a) Kuandu ita halo orasaun: “Halo Ita-nia Ukun toʼo mai”, tuir loloos ita husu saida? (b) Ita-nia eskritura tinan nian ba tinan 2014 mak saida? Tanbasá?

¹⁴ Maski Jeová foti ninia Oan Jesus Kristu nuʼudar Liurai iha tinan 1914, ita-nia orasaun “Halo Ita-nia Ukun toʼo mai” seidauk sai loos iha dalan neʼebé kompletu. (Mateus 6:10) Bíblia fó-hatene nanis katak Jesus sei hahú ninia ukun ‘iha inimigu sira-nia leet’. (Salmo [Mazmur] 110:2) Ema nia governu sira neʼebé iha Satanás nia ukun okos sei kontra hasoru Maromak nia Ukun. Tan neʼe, kuandu ita halo orasaun atu Maromak nia Ukun toʼo mai, ida-neʼe katak ita husu Jesus no ema naʼin-144.000 iha lalehan mak sei halakon ema nia ukun hotu hamutuk ho sira neʼebé kontra Maromak nia Ukun. Ida-neʼe sei kumpre profesia iha Daniel 2:44 neʼebé dehan katak Maromak nia Ukun “sei harahun no halakon ukun sira-neʼe hotu”, neʼebé kontra hasoru Maromak. (Apokalipse 6:1, 2; 13:1-18; 19:11-21) Ida-neʼe besik ona akontese. Tan neʼe, eskritura tinan nian ba tinan 2014 mak foti husi Mateus 6:10 (MF), neʼebé hatete: “Halo Ita-nia Ukun toʼo mai.” Loos duni, tinan 100 liu tiha ona husi tempu neʼebé Jesus hahú ninia ukun iha lalehan!

15, 16. (a) Durante Kristu nia Ukun ba Tinan Rihun Ida, buat furak saida deʼit mak sei akontese? (b) Ikusliu, Jesus sei halo saida? Oinsá mak ida-neʼe sei kona Jeová nia hakarak?

¹⁵ Kuandu Jesus halakon tiha Maromak nia inimigu sira, nia sei soe tun Satanás no anju aat sira iha rai-kuak neʼebé kleʼan ba tinan 1.000. (Apokalipse 20:1-3, MF) Kuandu halakon tiha buat aat hotu, Maromak nia Ukun sei ajuda ninia povu atu hetan bensaun liuhusi Jesus nia sakrifísiu hodi halo sira sai livre husi Adão nia sala. Liurai sei fó moris-hiʼas ba ema rihun ba rihun neʼebé iha rate laran, no nia mós sei halo arranju atu sira bele aprende kona-ba Jeová. (Apokalipse 20:12, 13) Mundu tomak sei sai paraízu hanesan jardín Eden, no ema hotu neʼebé halo tuir Jeová sei sai ema neʼebé perfeitu.

¹⁶ Kuandu Kristu nia Ukun ba Tinan Rihun Ida ramata, Jeová nia hakarak ba mundu neʼe sei sai loos. Ikusliu, Jesus sei entrega ninia Ukun ba ninia Aman. (Lee 1 Korinto 15:24-28.) Iha tempu neʼebá, ita sei la presiza tan atu halo orasaun liuhusi Jesus, maibé ita bele hakbesik kedas ba Jeová. Maromak nia oan hotu iha lalehan no rai sei sai família ida deʼit ho Aman Jeová.

17. Ita hakarak atu halo saida ba Maromak nia Ukun?

¹⁷ Buat neʼebé akontese ona durante tinan 100 nia laran hatudu katak Jeová sei tau matan ba buat hotu, no nia sei kumpre duni ninia hakarak ba mundu neʼe. Tan neʼe, mai ita kontinua serbí Jeová ho laran-metin hodi haklaken kona-ba ninia Liurai no ninia Ukun neʼe. Sin, ita fiar metin nafatin katak lakleur tan Jeová sei hatán ba ita-nia orasaun: “Halo Ita-nia Ukun toʼo mai.”