1, 2. Mfumo wa Xikwembu wu ta endla yini, naswona ha yini hi tiyiseka leswaku Mfumo wolowo wu ta ta?

LOKO Yesu Kreste a ri entshaveni ekusuhi ni le Kapernawume hi ximun’wana xa 31 C.E., u dyondzise valandzeri vakwe ku khongela va ku: “Mfumo wa wena a wu te.” (Mat. 6:10) Namuntlha, vanhu vo tala va kanakana loko Mfumo wolowo wu ta kala wu ta. Hambiswiritano, ha tiyiseka leswaku swikhongelo swa hina leswi humaka embilwini swa leswaku Mfumo wa Xikwembu wu ta, swi ta hlamuriwa.

² Yehovha u ta tirhisa Mfumo wolowo ku endla leswaku ndyangu wakwe wa le tilweni ni wa laha misaveni wu va ni vun’we. Xikongomelo xolexo xa Xikwembu xi ta hetiseka. (Esa. 55:10, 11) Entiyisweni, Yehovha se i Hosi enkarhini wa hina! Swiendlakalo leswi tsakisaka leswi endlekeke emalembeni ya 100 lama hundzeke i vumbhoni bya sweswo. Xikwembu xi endlela malandza ya xona yo tshembeka ya timiliyoni mintirho leyikulu ni leyi hlamarisaka. (Zak. 14:9; Nhlav. 15:3) Hambiswiritano, ku va Yehovha a va Hosi swi hambanile ni ku ta ka Mfumo wa Xikwembu, lowu Yesu a hi dyondziseke leswaku hi wu khongelela. Swiendlakalo leswi swi hambana njhani naswona swi hi vuyerisa njhani?

3. (a) Yesu u vekiwe rini ku va Hosi, naswona u vekiwe kwihi? (b) U nga swi kombisa njhani leswaku Mfumo wa Xikwembu wu sungule ku fuma hi 1914? (Vona nhlamuselo ya le hansi.)

³ Loko ka ha sale malembe ya 20 leswaku ku fika lembe ra 1900, malandza ya Xikwembu ma sungule ku twisisa vuprofeta lebyi tsariweke  hi Daniyele malembe yo tlula 2 500 lama hundzeke, lebyi nge: “Emasikwini ya tihosi teto Xikwembu xa le tilweni xi ta veka mfumo lowu wu nga ta ka wu nga lovisiwi.” (Dan. 2:44) Swichudeni swa Bibele swi hete makume ya malembe swi vula leswaku lembe ra 1914 a ri ta va ra nkoka. Vanhu vo tala va le nkarhini wolowo a va langutele vumundzuku hi ntsako. Mutsari un’wana u te: “Misava ya 1914 a yi tele hi ntshembo ni switiyisekiso.” Hambiswiritano, loko ku sungula Nyimpi yo Sungula ya Misava endzhakunyana hi lembe rero, vuprofeta bya le Bibeleni byi hetisekile. Tindlala, ku tsekatseka ka misava ni mintungu leyi veke kona swin’we ni vuprofeta byin’wana bya le Bibeleni lebyi hetisekeke byi swi kombise kahle leswaku Yesu Kreste a a sungule ku fuma etilweni tanihi Hosi ya Mfumo wa Xikwembu hi 1914. * Leswi Yehovha a vekeke N’wana wakwe ku va Hosi leyi nga Mesiya, u ve Hosi hi ndlela leyi hambaneke.

4. Hosi leyi a ya ha ku vekiwa yi rhange yi endla yini naswona endzhaku ka sweswo yi endle yini?

⁴ Nchumu wo sungula lowu Hosi leyi a ya ha ku vekiwa hi Xikwembu yi wu endleke a ku ri ku lwa nyimpi na Sathana, Nala lonkulu wa Tata wa yona. Yesu ni tintsumi takwe va hlongole Diyavulosi ni madimona yakwe etilweni. Sweswo swi endle leswaku ku va ni ntsako lowukulu etilweni kambe emisaveni a ku ta va ni ku xaniseka lokukulu swinene. (Hlaya Nhlavutelo 12:7-9, 12.) Endzhaku ka sweswo, Hosi yoleyo yi sungule ku basisa, ku dyondzisa ni ku hlela malandza ya yona ya laha misaveni leswaku ma ta endla ku rhandza ka Xikwembu. A hi voneni ndlela leyi ku yingisa ka wona nkongomiso wa Yesu swi hi vekelaka xikombiso lexinene ha yona namuntlha.

5. I ku basisiwa kwihi loku endlekeke exikarhi ka 1914 ni le ku sunguleni ka 1919?

⁵ Endzhaku ka loko Hosi leyi vekiweke yi suse nkucetelo wo biha wa Sathana ni madimona yakwe etilweni, Yehovha u lerise Yesu leswaku a kambela a tlhela a tengisa xiyimo xa moya xa valandzeri vakwe va laha misaveni. Muprofeta Malakiya u vule leswaku loku a ku ri ku basisiwa hi tlhelo ra moya. (Mal. 3:1-3) Matimu ma kombisa leswaku leswi swi endleke exikarhi ka 1914 ni le ku sunguleni ka 1919. * Leswaku hi va xiphemu xa swivumbiwa swa Yehovha leswi nga ni vun’we, hi fanele hi va lava baseke kumbe hi kwetsima. (1 Pet. 1:15, 16) Vugandzeri bya hina a byi fanelanga byi thyakisiwa hi vukhongeri bya mavunwa kumbe hi tipolitiki ta misava leyi.

6. Swakudya swa moya swi phameriwa njhani, naswona ha yini swi ri swa nkoka?

⁶ Endzhaku ka sweswo Yesu u tirhise vulawuri byakwe tanihi Hosi a veka “hlonga ro tshembeka ni ro tlhariha.” Hlonga leri a ri ta va phamela swakudya swa moya nkarhi na nkarhi vanhu hinkwavo lava vumbaka “ntlhambi wun’we” lowu khathaleriwaka hi Yesu. (Mat. 24:45-47; Yoh. 10:16) Ku sukela hi 1919, ntlawa lowutsongo wa vamakwerhu lava totiweke wu byi hetisise hi ku tshembeka vutihlamuleri bya nkoka bya ku phamela “va yindlu.” Swakudya swo tala swa moya leswi lunghiseleriwaka hi hlonga leri, swa hi khutaza leswaku ripfumelo ra hina ri kula. Swi endla hi tiyimisela swinene ku tshama hi basile hi tlhelo ra moya, emahanyelweni, emianakanyweni ni le mirini. Swakudya leswi swa moya swi tlhela swi hi dyondzisa ni ku hi endla hi lunghekela ku tirha hi matimba entirhweni wa nkoka swinene lowu endliwaka emisaveni namuntlha. Xana u swi dya nkarhi na nkarhi swakudya leswi swa moya?

7. Hi wihi ntirho wa nkoka lowu Yesu a wu sunguleke loko a ri laha misaveni, naswona a wu ta endliwa ku fika rini?

⁷ Loko Yesu a sungula ku chumayela emisaveni, u te: “Ni le ka miti yin’wana ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Ku ringana malembe manharhu  ni hafu, Yesu u wu teke wu ri wa nkoka swinene ntirho lowu. U lerise vadyondzisiwa vakwe a ku: “Loko mi ri karhi mi famba, chumayelani, mi ku, ‘Mfumo wa matilo wu tshinele.’” (Mat. 10:7) Endzhaku ka loko a pfuxiwile eku feni, Yesu u profete leswaku valandzeri vakwe a va ta chumayela rungula leri “ku ya fika endhawini ya le kule swinene ya misava.” (Mint. 1:8) U va tshembise leswaku u ta va seketela entirhweni lowu wa nkoka ku fika emakumu ka mafambiselo lawa.—Mat. 28:19, 20.

8. Hosi yi va khutaze njhani valandzeri va yona leswaku va ya chumayela?

⁸ Hi 1919, ku chumayeriwa ka ‘mahungu lamanene ya mfumo’ se a ku vonaka kahle. (Mat. 24:14) Hosi se a yi fuma etilweni naswona a yi hlengelete ntlawa lowutsongo wa valandzeri va yona va laha misaveni lava basisiweke. Wu xi yingise hi ku hiseka xileriso xa Yesu lexi nga erivaleni lexi nge: Chumayelani emisaveni hinkwayo mahungu lamanene ya Mfumo wa Xikwembu lowu sunguleke ku fuma etilweni! (Mint. 10:42) Hi xikombiso, hi September 1922, vaseketeri va Mfumo va kwalomu ka 20 000 va hlengeletanile entsombanweni wa matiko le Cedar Point, eOhio, le U.S.A. Anakanya ndlela leyi a va tsake ha yona loko Makwerhu Rutherford a nyikela nkulumo leyi nga ni nhloko-mhaka leyi nge “Mfumo,” kutani a ku: “Vonani, Hosi ya fuma! N’wina mi vayimeri va yona. Hikwalaho, twarisani, twarisani, twarisani Hosi ni mfumo wa yona.” Hi siku leri tlhandlamaka, vapfhumba va 2 000 va ye ensin’wini naswona van’wana va fambe tikhilomitara ta kwalomu ka 72 ku suka laha ntsombano a wu ri kona va ya eku chumayeleni. Mupfhumba un’wana loyi a susumetelekeke ku teka goza u te: “A ndzi nge pfuki ndzi xi rivarile xirhambo xa ku twarisa Mfumo ni ndlela leyi ntshungu lowu a wu hlengeletanile a wu hiseka ha yona!” Ni van’wana vo tala va titwe hi ndlela leyi fanaka.

9, 10. (a) I malunghiselelo wahi lama endliweke yo letela vahuweleri va Mfumo? (b) U vuyeriwe njhani eka ndzetelo lowu?

⁹ Hi 1922, a ku ri ni vahuweleri va Mfumo vo tlula 17 000 lava a va chumayela ematikweni ya 58 emisaveni hinkwayo. Kambe, a va fanele va leteriwa. Loko Hosi leyi Hlawuriweke ya ha ri laha misaveni, yi nyike vadyondzisiwa va yona swileriso leswi nga erivaleni malunghana ni leswi a va fanele va swi chumayela, laha a va fanele va chumayela kona ni ndlela leyi a va fanele va chumayela ha yona. (Mat. 10:5-7; Luka 9:1-6; 10:1-11) Hilaha ku fanaka namuntlha, Yesu wa tiyiseka leswaku vanhu hinkwavo lava endlaka ntirho wo chumayela hi Mfumo va leteriwa naswona va ni switirhisiwa leswi nga ta va pfuna ku va vadyondzisi lavanene. (2 Tim. 3:17) Yesu u tirhisa vandlha ra Vukreste leswaku a letela valandzeri vakwe leswaku va kota ku chumayela. Ndlela yin’wana leyi a va letelaka ha yona i ku tirhisa Xikolo xa Vutirheli bya le Tilweni, lexi fambisiwaka emavandlheni yo tlula 111 000 emisaveni hinkwayo. Hi ku pfuniwa hi xikolo lexi, vahuweleri vo tlula nkombo wa timiliyoni va dyondzisiwe ndlela yo chumayela ni ku dyondzisa hi ndlela leyi nga ta pfuna “vanhu va mixaka hinkwayo.”—Hlaya 1 Vakorinto 9:20-23.

¹⁰ Ku engetela eka Xikolo xa Vutirheli bya le Tilweni, ku ni swikolo swin’wana swa Bibele laha  ku leteriwaka vakulu va vandlha, maphayona, vamakwerhu lava nga tekangiki, mimpatswa leyi nga Vakreste, swirho swa Komiti ya Rhavi ni vasati va swona, valanguteri va miganga ni va swifundzha swin’we ni vasati va vona ni varhumiwa. * Swichudeni swa ntlawa wun’wana wa Xikolo Xa Bibele Xa Mimpatswa Leyi Nga Vakreste swi vule marito lawa yo kombisa ku tlangela xikolo lexi: “Ndzetelo lowu hi wu kumeke wu kurise ndlela leyi hi rhandzaka Yehovha ha yona naswona wu hi endle hi lunghekela ku pfuna van’wana.”

11. Vahuweleri va Mfumo va swi kotise ku yini ku tiyisela ku nga khathariseki nkaneto?

¹¹ Nala Sathana wa ma vona matshalatshala lawa hinkwawo yo chumayela ni ku dyondzisa hi Mfumo. U tirhisa minhlaselo leyi kongomeke swin’we ni leyi tumbeleke eka rungula ra Mfumo ni le ka vachumayeri va rona leswaku a ringeta ku yimisa ntirho lowu. Kambe matshalatshala ya nala loyi a ma nge humeleli. Yehovha u veke N’wana wakwe “ehenhla swinene ka hulumendhe yin’wana ni yin’wana ni vulawuri ni matimba ni vuhosi.” (Efe. 1:20-22) Leswi Yesu a nga Hosi, u tirhisa vulawuri byakwe ku sirhelela ni ku kongomisa vadyondzisiwa vakwe leswaku a tiyiseka leswaku ku rhandza ka Tata wakwe ka endliwa. * Mahungu lamanene ma le ku chumayeriweni naswona vanhu va timiliyoni va timbilu letinene va dyondzisiwa tindlela ta Yehovha. Mawaku lunghelo leri hi nga na rona ro hlanganyela entirhweni lowu lowukulu!

12. Hlamusela ku cinca kun’wana loku endliweke enhlengeletanweni leyi ku sukela loko Mfumo wu sungule ku fuma.

¹² Ku sukela loko Mfumo wu sungule ku fuma hi 1914, Hosi leyi yi basise ndlela leyi malandza ya Xikwembu ma hleriweke ha yona leswaku ma ta endla ku rhandza ka Tata wa yona. (Hlaya Esaya 60:17.) Hi 1919, evandlheni rin’wana ni rin’wana a ku hlawuriwa mukongomisi wa ntirho leswaku a rhangela entirhweni wo chumayela. Ntirho wo chumayela hi yindlu ni yindlu nkarhi na nkarhi hi Tisonto wu hleriwe hi 1927. Vaseketeri va Mfumo va susumeteleke ku endla leswi engetelekeke hi 1931 loko va sungula ku tirhisa vito leri sekeriweke eMatsalweni ra Timbhoni ta Yehovha. (Esa. 43:10-12) Hi 1938, ku hlawuriwa hi ndlela ya xidemokrati ka vavanuna lava a va rhangela emavandlheni ku siviwe hi ku hlawuriwa hi ndlela ya le tilweni. Hi 1972, vutihlamuleri byo langutela mavandlha byi nyikiwe tihuvo ta vakulu ematshan’weni ya leswaku ma languteriwa hi nkulu un’we. Vavanuna hinkwavo lava a va fanelekela ku va vakulu ni malandza ya vutirheli va khutaziwe ku tiyimisela ku pfuna eku ‘riseni ka ntlhambi wa Xikwembu lowu khathaleriwaka hi vona.’ (1 Pet. 5:2) Hi 1976, swirho swa Huvo leyi Fumaka swi aviwe swi va tikomiti ta tsevu leti a ti ta langutela ntirho wa Mfumo emisaveni hinkwayo.  Swi fanerile leswi Hosi leyi vekiweke hi Yehovha yi hleleke valandzeri va yona hakatsongo-tsongo leswaku va endla swilo hi ndlela leyi kongomisiwaka hi Xikwembu.

13. U vuyeriwe njhani hi swilo leswi endliweke hi Mfumo wa Mesiya emalembeni ya 100 lama hundzeke?

¹³ Anakanya hi leswi Hosi leyi nga Mesiya yi swi endleke eka malembe yo sungula ya 100 ya mfumo wa yona. Yi basise ntlawa wa vanhu leswaku va va vayimeri va Yehovha. Yi kongomisa ntirho wo chumayela mahungu lamanene ya Mfumo ematikweni ya 239 naswona yi dyondzise vanhu va timiliyoni tindlela ta Yehovha. Yi endle leswaku valandzeri va yona vo tshembeka lava tlulaka timiliyoni ta nkombo va va ni vun’we naswona va tinyikela hi ku swi rhandza leswaku va endla ku rhandza ka Tata wa yona. (Ps. 110:3) Yehovha u tirhise Mfumo wa Mesiya leswaku a endla swilo swo hlamarisa. Ka ha ta endleka swilo leswi tsakisaka enkarhini lowu taka.

14. (a) Loko hi khongela hi ku: “Mfumo wa wena a wu te,” hi kombela leswaku Xikwembu xi endla yini? (b) Ndzimana ya hina ya lembe ya 2014 yi ri yini, naswona ha yini yi fanela?

¹⁴ Hambileswi Yehovha a vekeke Yesu Kreste, N’wana wakwe leswaku a va Hosi leyi nga Mesiya hi 1914, xikhongelo xa hina lexi nge “Mfumo wa wena a wu te” a xi si hlamuriwa hi ku helela. (Mat. 6:10) EBibeleni ku profetiwe leswaku Yesu a a ta ‘famba a ya hlula exikarhi ka valala vakwe.’ (Ps. 110:2) Tihulumendhe ta vanhu leti lawuriwaka hi Sathana ta ha lwisana ni Mfumo wa Xikwembu. Loko hi khongelela Mfumo wa Xikwembu leswaku wu ta, hi kombela Xikwembu leswaku Hosi leyi nga Mesiya swin’we ni vafumi-kulobye na yona va ta va ta herisa tihulumendhe ta vanhu va tlhela va herisa lava lwisanaka ni Mfumo wa xona laha misaveni. Goza rolero ri ta hetisisa marito lama nga eka Daniyele 2:44 ya leswaku Mfumo wa Xikwembu “wu ta pfotlosa kutani wu herisa mimfumo leyi hinkwayo.” Wu ta herisa tihulumendhe leti nga valala va Mfumo lowu. (Nhlav. 6:1, 2; 13:1-18; 19:11-21) Nkarhi wolowo wu le kusuhi swinene. Endzhaku ka malembe ya 100 Mfumo wa Xikwembu wu sungule ku fuma etilweni, swa fanela leswi ndzimana ya hina ya lembe ya 2014, yi nga le ka Matewu 6:10 leyi nge: “Mfumo wa wena a wu te”!

15, 16. (a) Hi swihi swilo swo tsakisa leswi nga ta endleka hi nkarhi wa Mfumo wa Gidi ra Malembe? (b) Hi wihi nchumu wo hetelela lowu Yesu a nga ta wu endla loko a ri Hosi leyi nga Mesiya, naswona sweswo swi ta vula yini malunghana ni xikongomelo xa Yehovha hi swivumbiwa swa yena hinkwaswo?

¹⁵ Endzhaku ka loko Hosi leyi nga Mesiya yi lovise valala va Xikwembu, yi ta lahlela Sathana ni madimona yakwe ekheleni ro enta yi va pfalela malembe ya gidi. (Nhlav. 20:1-3) Leswi nkucetelo wolowo wo homboloka wu nga ta va wu nga ha ri kona, Mfumo wolowo wu ta ya emahlweni wu pfuna vanhu leswaku va vuyeriwa eka gandzelo ra nkutsulo ra Yesu naswona wu ta ku herisela makumu ku onhaka loku vangiweke hi xidyoho xa Adamu. Hosi leyi yi ta pfuxa vanhu va timiliyoni lava feke naswona yi ta hlela nongonoko wo dyondzisa vanhu emisaveni hinkwayo malunghana na Yehovha. (Nhlav. 20:12, 13) Misava hinkwayo yi ta va paradeyisi yo fana ni ntanga wa Edeni. Vanhu hinkwavo vo tshembeka va ta va va endliwe lava hetisekeke.

¹⁶ Loko Mfumo wa Kreste wa Gidi ra Malembe wu heta ku fuma, xikongomelo xa Yehovha xi ta va xi hetisisiwile. Kutani Yesu u ta tlherisela Mfumo eka Tata wakwe. (Hlaya 1 Vakorinto 15:24-28.) A ku nge he laveki munhu la nga ta hi yimela emahlweni ka Yehovha. Vana hinkwavo va Xikwembu va le tilweni ni va laha misaveni va ta va ni vun’we ni Tata wa vona wa le tilweni va ri xiphemu xa ndyangu wa xona.

17. U tiyimisele ku endla yini malunghana ni Mfumo?

¹⁷ Swiendlakalo swo tsakisa leswi endlekeke emalembeni ya 100 ya ku fuma ka Mfumo wa Xikwembu swi hi tiyisekisa leswaku Yehovha u le ku lawuleni ni leswaku xikongomelo xakwe malunghana ni misava xi ta hetiseka. Onge hi nga ya emahlweni hi n’wi tirhela hi ku tshembeka naswona hi twarisa Hosi ni Mfumo wa yona. Ha tiyiseka leswaku ku nga ri khale Yehovha u ta hlamula xikhongelo xa hina lexi humaka embilwini lexi nge: “Mfumo wa wena a wu te.”