1. Ka burí katei buiti asuseredubei lidan habagari saragu nibureintiña kristiánugu?

 WAWINWANDUÑA lidan aban dan súdiniti. Míñunu gürigia lídangiñetiña sun néchani, hánharuña lun áhuduraguni inarüniti lidan dan le sügǘ lau lidan amu dan (Aruf. 7:9, 10). Saragu nibureintiña hawinwanduña sügǘ le buíduburiti lau híderaguniña gürigia lun gunfuranda hamani le tarufudahabei Bíbülia luma lun hesefuruni habagari (Aruf. 22:17). Añahein íchugutiña aturiahani tídangiñe Bíbülia le abuiduragüdübalin habagari aturiahatiña; añahein amu apurichihatiña lau ubebeni lidan fulasu le ñein lumuti layanuhóua amu iñeñein (Sal. 110:3; Isa. 52:7). Wadagimanu le hadügübei lumutuniña Heowá ruti saragu ugundani. Nibureinti, ida luba bawadigimaridun lidan?

2. Ida liña larufuduni lani Timotéu hénpulu gayara lan líchugun Heowá buligasion súdiniti houn nibureintiña? (Ariha huméi dibuhu le lídanbei lagumeseha arütíkulu.)

² Uguñe weyu gayarati badügün katei burí le lunbei ladügün lun bibihin saragu chansi lidan eseriwiduni lun Bungiu ámuñegü. Saminabá luagun Timotéu, le meha aganóubei uburugu Lísütüra. Chóuruti desidírü lan buidu ani gániti efekütu lidan libagari lau lásügürün dan. Háfuga kéiburi 20 irumu lau dan le misioneru lubéi (Adü. 16:1-3). Genegeti fiúrügü lan hati lárigiñe, dan le mosu lubéi lanurahan Pábulu ígiralei iseri damuriguaü le Tesalónikabei ladüga lanarime  éibaahouni, aba lóunahani Pábulu Timotéu lun líchugun erei houn íbirigu ñein (Adü. 17:5-15; 1 Tesa. 3:1, 2, 6). Saminabá san ida liña lan meha lasandiragun Timotéu lungua dan le libihini wadagimanu súdiniti ligía!

3. a) Ka katei súdinitimati lunbei desidírü bani lidan bibagari? b) Ka dan buídutimabei lun badügüni?

³ Dan le nibureingiña gürigia lunti desidírü hamá luagu saragu katei súdiniti. Gama lumoun, anihein aban katei súdinitimati lunti desidírü hamani: heseriwidun lun Heowá. Ka san dan buídutimabei lun desidírü humani katei le? Ariñagati Heowá: “Haritaguabá luagu Bungiu guentó lau nibureingidibu lan” (Apur. 12:1). Ida luba “baritagun” luagun Heowá? Lau beseriwidun lun tau sun banigi (2 Lur. 10:12). Ligía katei súdinitimati le lunbei desidírü bani, lugundun ligía amakürübalin üma le lunbei bafalaruni ñéingiñe lun lubaruaguóun (Sal. 71:5).

4. Ka burí katei súdiniti lidan bibagari gayarabei gani lan efekütu lidan beseriwidun lun Bungiu?

⁴ Mámarügübei desidírü ban beseriwidun lun Heowá gani efekütu lidan bibagari ámuñegü. Kei hénpulu, mosu desidírü ban anhein busén bubéi bamarieidun luma kaba lan uma bamarieida, luma kaba lan buadigimari lun bawinwandun. Gama lumoun, íbini súdini lan lira, buídubei lun bálügüdagun bungua furumiñe anhein busén bubéi beseriwidun lun Heowá tau sun buani (2 Lur. 30:19, 20). Ka uagu? Ladüga yarafaguati bián katei le. Le lunbei desidírü bani luagu maríei luma luagu wadagimanu gánibei efekütu lidan beseriwidun lun Bungiu (konpararü huméi luma Lúkasi 14:16-20). Ani gánibei beseriwidun lun Heowá efekütu lidan le lunbei desidírü bani luagu maríei luma luagu wadagimanu. Ligíati desidirübá furumiñe kaba lan katei súdinitimati lidan bibagari (Filip. 1:10).

5, 6. Abahüdaha humá aban sügǘ le arufudubalin dan le lan desidírü wamá buidu gayara lan ladaaruni üma lun waganwoundagüdüni weseriwidun.

⁵ Danme le desidírühadibu beseriwidun lun Bungiu, álügüdaguaba bungua ka lan labusenrubei Bungiu badügün ani desidirübá ida luba lan beseriwidun lun. Abürühati aban íbiri haponna: “Dan le katorusu lubéi irumu nau, aba náfuridun apurichiha luma aban wéiyaali lidan afiñeni, ani ariha lumuti nuagu luagu magundan nan lidan ministeriu. Aba lariñagun nun lau ínsiñeni: ‘Yuichiro, giribugubeibá húbiñoun. Bachülürünme, ábame bañuurun asaminara luagu le adüga láalibei Heowá buagu’. Ítara liña nadügüni. Sigitina asaminara saragu weyu ani furíei au. Murusun murusun aba nasansiruni nigaburi ani aba línsiñedun nun neseriwidun lun Heowá. Kei le hínsiñe lubéi nun naliihan sügǘ burí hawaguti misionerugu, aba nagumeserun asaminara neseriwidun lun Bungiu sunsuinagubei”.

⁶ Sigiti Yuichiro ariñaga: “Aba desidírü nan nadügün katei le lunti líderagunina lun gayara lan neseriwidun lun Heowá lidan amu ageiraü. Kei hénpulu, aba naturiahan inglesi. Dan le lásurun naturiahan, aba nuadigimaridun fiú oura luagu weyu arufudaha inglesi lun gayara lan neseriwidun kei prekursoru. Dan le 20 irumu nau aba nagumeserun afurendeira mongol ani aba nibihin chansi lun nidin bisida aban sétanu lidan iñeñein mongol. Bián irumu lárigiñe, lidan irumu 2007 aba nidin Mongolia. Dan le náfuridunbei apurichiha hama fiú prekursorugu, ariha numuti háluahañein lan saragu gürigia inarüni, aba nabuserun náguyun lidoun fulasu ligía, ligía aba lubéi nagiribudun Japón lun naransehani sun katei. Lúmagiñe lidan gádürü-hati irumu 2008 neseriwiduña kei prekursoru Mongolia. Hénrenguti ibagari ya, gama lumoun hánharuña saragu gürigia lun uganu buiti, ani níderaguñanu lun hayarafadun lun Heowá. Chouru naali luagu anúadira nani ibagari le buídutimabei”.

7. a) Ka lunbei desidírü lani kada aban wádangiñe? b) Ka hénpulu líchugubei Moisesi woun?

⁷ Kada gefenti luagu Heowá lunti desidírü lan kaba lan ladüga lau libagari (Hos. 24:15). Siñati wariñagun bun lun bamarieidun o lun mamarieidun ban, ni kaba lan uma bamarieida o kaba lan wadagimanu báluaha. Banúadahaba san  aban wadagimanu le memegeirunti lun baturiahan saragu? Saragu hídangiñe, huguya nibureintiña hínsiñewatiña, lidan fulasu gudemeti hawinwanda; híbiri lidan fulasu awanseti. Sun huguya ámuñegueinarügüti higaburi, hubafu, hásügürün lidan hibagari, ámuñegueinarügüti katei le habusenrubei hadügün. Háfuga susereti ligiaméme hun kei houn nibureintiña ebüréu lidan binadu Ehiptu: Gíbeti meha chansi ligibugiñe Moisesi tidan luban urúei, ani híbiri nibureintiña músugu meha (Afu. 1:13, 14; Adü. 7:21, 22). Ítara kei huguya, wínwantiña meha lidan aban dan súdiniti (Afu. 19:4-6). Kada aban hádangiñe mosu meha desidírü lan anhein leseriwiduba lubéi lun Heowá tau sun lanigi. Ani Moisesi buiti meha le desidírü lubéi (aliiha huméi Ebüréu 11:24-27).

8. Kaba íderaguaña nibureintiña ha asaminarubaña kaba lan hadüga lau habagari?

⁸ Íderagua lumutibu Heowá lun desidírü ban lau lichú aau lau nibureingidibu lan. Ruti adundehani bun le gayarabei bayusuruni lidan furumiñeguarügü sügǘ lidan bibagari (Sal. 32:8). Híderagubadibu giñe bagübürigu ha gefentiña luagu Heowá hama wéiyaaña lidan afiñeni ha lídanbaña damuriguaü lun barihini ida luba lan bayusuruni adundehani le tídanbei Bíbülia lidan bibagari (Ari. 1:8, 9). Akutiha wamá ǘrüwa adundehani tídangiñeti Bíbülia le lunbei gayara lan líderagunibu ámuñegü.

9. a) Ida liña líchugun Heowá uéiriguni woun? b) Ka chansi hibihibei ha áluahabalin Larúeihan Bungiu furumiñe?

⁹ Áluahabei Larúeihan luma liricha Bungiu furumiñe (aliiha huméi Matéu 6:19-21, 24-26, 31-34). Ruti Heowá uéiriguni woun lau líchugun líbürei woun lun desidírü wamá. Mariñagun lumuti bun átiribei lan dan básügürün lidan apurichihani. Gama lumoun ru lumuti Hesusu adundehani woun lun wáluahani Larúeihan Bungiu furumiñe. Anhein basigira, badariruba saragu chansi lun barufuduni bínsiñehabu luagu Bungiu, bínsiñehabu hawagu amu luma beteingiradi luagu emenigini lánina ibagari magumuchaditi. Lidan luáguti maríei luma wadagimanu, barufuduba san lau le desidírü bubéi luagu súdinitima lan Larúeihan Bungiu bun luma liricha sügǘ lau umegeguni luma seinsu?

10. Ka meha agundaaragüdübalin Hesusu, ani kaba agundaaragüdabu?

¹⁰ Gundaabá eseriwida houn amu (aliiha huméi Adügaü 20:20, 21, 24, 35). Arufudaha lumuti Hesusu katei le woun lau ínsiñeni. Gúndaati meha ladüga adüga lani lugundan Lúguchi lubaragiñe ladügüni lugundan guánarügü. Gúndaati meha dan le larihiniña gürigia ha harumabaña anigi eresibirei uganu buiti (Luk. 10:21; Huan 4:34). Gayarati sandibaali lan ugundani le lanügübei hiderawagún amu. Anhein gabaroun ban adundehani le meha larufudahabei Hesusu danme le desidírü ban luagu katei súdiniti lidan bibagari, gúndaabadibu ani bagundaaragüdübei giñe Heowá (Ari. 27:11).

11. Ka uagu leferidirei Baruku lugundan, ani ka lariñagubei Heowá lun?

¹¹ Lídangiñe leseriwidúniwa lun Heowá liabin ugundani wéiritimati le wasandirubei (Ari. 16:20).Genegeti bulíei lani meha Baruku, le íderagubalin Heremíasi, katei le. Chülüti meha dan lun magundarunhali lan lau leseriwidun lun Bungiu, ligía aba lubéi lariñagun Heowá lun: “Busentibu san bamuriahan somu katei bungua le hanarimeguti? Málugagubeibei lugundun nóunaha lamiselu hawagun sun gürigia, gama lumoun mígirunbadina lun bounwen le ñeinhin lumuti bidin” (Her. 45:2, 3, 5). Ka bisaminanbei? Kaba hamuga adüga lun gúndaatima lan Baruku? Láluahan katei hanarimeguti lungua, o lásügürün lau ibagari lídangiñe lagünrinchawagun Herusalén ladüga leseriwidun lun Bungiu lau úaraguni? (Sant. 1:12.)

12. Ka desidírü lubéi Ramiro ladarirunbei saragu ugundani lidan libagari?

¹² Ramiro, ligía aban íbiri le gúndaabei lau leseriwidun houn amu, ariñagati: “Lídangiñe aban familia gudemeti niabin, lídangiñe aban liraüraü ageiraü wübüagu los Andes. Ligíati,  dan le lariñagunbei nati nun líderaguadina lan lun naturiahan tidan luban furendei íñuti, ibihatina aban óunwenbu chansi. Gama lumoun, málügili meha lúmagiñe nabadiseirun ani ibihaadina meha ábanya chansi: amisuraha láadina meha aban prekursoru lun nidin apurichiha luma lidan aban liraüraü ageiraü. Aba nidin luma, aba nafurendeirun ásaha ani aba nadaarun aban tiraüraü bísinisi lánina ásahani lun nanuriagun nungua. Besafu gürigia gúndaatiña lun haturiahanu Bíbülia wama. Dan lárigiñe, aba nidin eseriwida lidan aban iseri damuriguaü lidan aban iñeñein terencha. Lárigiñe neseriwidun lidan dan dayarüti luagu diisi irumu, subudi naali úati lan amu katei gayarati líchugun saragu ugundani nun kei níderaguniña gürigia gunfurandei uganu buiti lidan hererun guánarügü”.

13. Ka uagu lunti lubéi beseriwidun lun Heowá dan le nibureingidibu?

¹³ Gundaabá lau beseriwidun lun Heowá lidan nibureingidibu lan (aliiha huméi Apurichihati 12:1). Masaminarabá mosu lan bibihin aban wadagimanu buiti lubaragiñe baganwoundagüdüni beseriwidun lun Heowá. Anihán dan le buídutimabei lun beseriwidun lun sunsuinagubei, lubaragiñe gani ban buligasion lidan familia, dan le buídugili bátuadi ani héregidibu lun badügün wadagimanu le hénrenguti. Ka babusenrubei badügün luagu Heowá lidan nibureingidibu lan? Beseriwidun kei prekursoru? Bapurichihan houn gürigia lidan amu iñeñein? O háfuga busentibu baganwoundagüdüni beseriwidun lidan damuriguaü le ñein bubéi? Meberesenga ka lan babusenrubei badügün lidan beseriwidun lun Bungiu, mégeibadibu badügün somu katei lun bawinwandun. Kaba san buadigimari? Kaba baturiaha lun gayara lan buadigimaridun?

14. Ka lunbei hóunigiruni nibureintiña danme le hasaminaruni kaba lan hadüga lau habagari ámuñegü?

¹⁴ Ǘrüwa adundehani tídangiñeti Bíbülia le akutiha wamaalibei gayarati líderagunibu  arihei ka burí lan wadagimanu buídutimabei bun. Chóuruti subuditima hamani máisturugu ha tídanbaña bileskuelan ka burí lan wadagimanu ménrenguntimabei ladarirún lidan fulasu le ñein lubéi bawinwanda. O háfuga anuhein lan somu óundaruni lani urúei le ñein lubéi gayara lan lariñawagún bun ka lan wadagimanu gayarabei badariruni ñein lubéi beredera o le ñein lubéi basaminara bawinwandun. Ariñahani le gayarabei bibihini lídangiñe fulasu burí le gayarati lahuudun, gama lumoun lunti duari ban. Ha mínsiñehabubaña lun Heowá gayarati hadügün lun línsiñedun ubóu bun (1 Huan 2:15-17). Ani ánhabu hamuga araramagua aríaguei o asaminara luagun katei le gayarabei bibihini ubouagugiñe, gayarabei teyeedunibu banigi lau lumenrengun (aliiha huméi Ariñawagúni 14:15; Her. 17:9).

15, 16. Kátaña san gayarabei híchuguni adundehani le buídutimabei bun luagu wadagimanu?

¹⁵ Danme le gunfuranda baali ka burí lan wadagimanu gayarabei badariruni, mégeibadibu adundehani le buiti (Ari. 1:5). Ka gayarabei líderagunibu arihei ka lan lídangiñe buídutimabei según adundehani le tídanbei Bíbülia? Aganbabaña gürigia ha hínsiñeti Heowá houn, hínsiñetibu houn ani subudi hamuti gádantibu. Híderagubadibu akutihei katei burí le biyaraabei adüga luma lébuna babusenrun badügüni. Háfuga ladügün dimurei le lunbei hariñaguni bun lun basaminaruni buidu kaba lan badüga. Wéiriti abinirúni le bibihibei anhein gefén habéi bagübürigu luagu Heowá! Wéiyaaña lidan afiñeni ha lídanbaña damuriguaü wéiriti hasubudin tuagu Lererun Bungiu ani gayarabei hadundehanibu. Gayarati giñe bayanuhan hama prekursorugu luma hama óunigirutiña sirkuitu. Ka ínchahabadün lun heseriwidun lidan dan dayarüti? Ida liña hagumeserun eseriwida kei prekursoru, ani ka hadügübei lun hanuriagun houngua? Ka abinirúni líchugubei hani ministeriu houn? (Ari. 15:22.)

¹⁶ Gürigia ha subuditibu houn gayarati híchugun adundehani bun lau lichú aau. Kei hénpulu, saminabá san lun hamuga busén ban bígiruni bileskuelan lun beseriwidun kei prekursoru dan le aweirideina biña lan luéirügü báfaagun lun baturiahan. Gürigia ha hínsiñetibu houn gayarati híchugun fe ka lan lébunabei mabusenrun ban baturiahan ani gayarabei híderagunibu lun gunfuranda bani gayara lan tíderagunibu bileskuelan lun mabuchadun lan buagu lau lumenrengun, aban igaburi súdiniti anhein busén bubéi beseriwidun lun Heowá sunsuinagubei (Sal. 141:5; Ari. 6:6-10).

17. Ka burí katei lunbei ua lan desidírü wamá wadügüni?

¹⁷ Lunti wasubudiruni sun lan wagía le eseriwidubei lun Heowá geyegu waña lau óuchawaguni le gayarabei ladügün lun wadisedun luéi Heowá (1 Ko. 15:33; Kol. 2:8). Gama lumoun, anihein wadagimanu le peligurutimati luéi amu. Subuditibu san somu íbiri le ‘féridi lumuti lafiñen’ ladüga lánharun lun somu wadagimanu? (1 Tim. 1:19.) Ka wafurendeirubei lídangiñe le? Mosu lan duari ban lun ua lan desidírü ban somu katei le gayarabei lagadeiruni bumadagua luma Heowá (Ari. 22:3).

18, 19. Ka gayarabei ladügüni aban nibureinti anhein mínchahan tubalin lanigi lun leseriwidun lun Bungiu?

¹⁸ Anhein busén bubéi beseriwidun lun Heowá, ragübei sun chansi le badarirun guentó lau nibureingidibu lan. Desidirübá luagu katei le gayarabei líderagunibu lun beseriwidun lun lidan dan súdiniti le (Sal. 148:12, 13).

¹⁹ Ánheinti mínchahan tubalibu banigi lun beseriwidun lun Bungiu? Mabuchadalá buagu ani sigiba áfaagua lun béredagüdüni bafiñen. Lárigiñe layanuhan Pábulu luagu áfaaguni burí le ladügübei lun lawinwandun aban ibagari le gayarabei labiniruni Bungiu luagu, abürühati: “Anhaün asaminara lidan amu luwuyeri lidan somu katei, larufudubei giñe Bungiu katei le hun. Lau sun luwuyeri, lunti wabagaridun úaragua luma katei le furendei wamaalibei” (Filip. 3:15, 16). Haritaguabá súnwandan weiri lan bínsiñe lun Heowá. Raramaguabá asaminara luagu ladundehan. Úati amu le gayarati líderagunibu desidírü buidu lidan nibureingidibu lan luéidigia Heowá.