1. Inuusuttorpassuit misigisat nuannersut suut nuannaarutigisarpaat?

PIFFISSAMI pissanganartumi inuuvugut. Oqaluttuarisaanermi aatsaavissuaq inuit millionillit inuiaqatigiinnit tamaneersut Jehovamik pallorfiginneqatigiipput. (Saqq 7:9, 10) Inuusuttorpassuit allat sallusuissutinik annassutaasinnaasunik Biibilimeersunik paasinninnissaannut ikiorneranni pissanganartunik misigisaqartarput. (Saqq 22:17) Inuusuttut taakkua inuit Biibilimik atuaqqissaarnissaannut inuunerminnillu pitsanngorsaanissaannut ikiortarpaat. Allat sumiiffinni allamiusut oqaluffiusuni nutaarsiassamik nuannersumik aallussilluarlutik oqaluusseqataasarput. (Tuss 110:3; Es 52:7) Suliami tamatumani nalerisimaalersitsisartumi suleqataanerujumallutit susariaqarpit?

2. Timotheusi pillugu oqaluttuamit qanoq erserpa Jehovap inuusuttut akisussaaffeqalernissaat kissaatigigaa? (Allaaserisap aallaqqaataani assiliaq takuuk).

² Siunissami Jehovamut kiffartorninni periarfissaqarnerulissutigisannik maanna aalajangiisinnaavutit. Assersuutigalugu Timotheusi silatusaartumik aalajangiisarami inuusuttuaraajunnaalerluni 20-lluunniit sinnilaarlugit ukioqarluni ajoqersuiartortitanngornissaminut piareerpoq. (ApS 16:1-3) Tamatuma qaammatit arlaqanngitsut kingornaagunartoq peqqarniitsumik malersuisoqarnera pissutigalugu apustilip Paulusip Thessalonikami ilagiit  pilersinneqaqqammersut qimattariaqaleramigit Timotheusi inuusuttoq Thessalonikamut uterluni qatanngutinik nakussatsitsinissamik suliassinneratigut pingaarutilimmik akisussaaffilerpaa. (ApS 17:5-15; 1 Th 3:1, 2, 6) Timotheusi taamatut suliassinneqarami qanoq misigisimassasoq takorloorsinnaaviuk?

3. Suna aalajangigassavit pingaarnerpaartaraat, tamannalu qaqugu aalajangiiffigissaviuk?

³ Inuusuttuutillutit pingaarutilinnik aalajangigassaqarputit. Jehovamulli kiffartorniarluni aalajangerneq aalajangigassannit tamanit pingaaruteqarnerpaavoq. Qaqugu taamatut aalajangerfissanngussava? Jehova ima oqarpoq: “Pinngortitsisit eqqaamaniaruk inuusuttuunerpit ulluini.” (Oqal 12:1) Jehova uummatikkut iluunngarluta kiffartorfigineratiguinnaq ‘eqqaamasinnaavarput’. (5 Mos 10:12) Tamanna inuunivit sinneranut sunniuteqassammat aalajangigassavit pingaarnerpaartaraat. — Tuss 71:5.

4. Aalajangigassat pingaarutillit suut Guutimut kiffartorninnut sunniuteqassappat?

⁴ Soorunami Jehovamut kiffartorniarlutit aalajangernivit saniatigut allanik inuuninnut sunniuteqartussanik aalajangigassaqarputit. Katinniarnerlutit, kina aappartaarissanerit qanorlu ittumik suliffeqalerniarlutit aamma aalajangertussaavat. Taakku aalajangigassat pingaarutilerujussuupput, siullertulli Jehovamut uummatikkut iluunngarlutit kiffartorniarlutit aalajangertariaqarputit. (5 Mos 30:19, 20) Sooq? Aalajangigassatit taakku tamarmik imminnut ataqatigiilluinnaramik. Katinnermut suliffimmullu tunngatillugu aalajangiinitit Guutimut kiffartorninnut sunniuteqassapput. Guutimullu kiffartorusunnerit katinnermut suliffimmullu tunngatillugu aalajangiininnut sunniuteqassaaq. (Lukasi 14:16-20 naleqqiuguk) Taamaattumik inuuninni suna pingaarnerpaassanersoq aalajangeruk. — Fil 1:10.

5, 6. Eqqortumik aalajangiisarnerit Jehovamut kiffartornitsinni periarfissaqarnerulissutigisinnaagivut Yuichirop misigisimasaanit qanoq erserpa? (Aamma takuuk atuagassiami matumani allaaserisaq “Meeraaninni aalajangernera”).

⁵ Jehovamut kiffartorniarlutit aalajangerit, taassuma sumik piumaffigineraatit paasiniaruk tamatumalu kingorna qanoq inuuniarnerlutit aalajangeruk. Qatanngut Japanimiu ima oqarpoq: “14-inik ukioqarlunga utoqqaanertap oqaluusseqatigisama oqaluussininnik nuannarinninnginnera malugaa. Inussiarnersumik ima oqarfigaanga: ‘Yuichiro, angerlarlutit ingeriarlutit Jehovap ilinnut qanoq iliorsimanera eqqarsaatigeqqissaaruk.’ Oqarneratut iliorpunga. Ullunilu arlalinni eqqarsaqqissaarlungalu qinusarpunga. Isiginnittaasera allanngortikkiartuaarpara. Sivitsunngitsoq Jehovamut kiffartorfiginninnermik nuannarinninnera paasivara. Ajoqersuiartortitat pillugit atuarneq nuannaralugulu Guutimut kiffartorninni iliuuseqarnerorusulerpunga.”

⁶ Yuichiro silatusaartumik aalajangiisalerami nunami allami Jehovamut kiffartorsinnaanngorpoq. Ima oqarpoq: “Assersuutigalugu tuluttut ilinnialerpunga. Naammassigama pioneriusinnaajumallunga tuluttut ilinniartitsisutut ullup affaani sulisalerpunga. 20-nik ukioqarlunga Mongoliamiusut ilinnialerpunga oqaluussisartoqatigiillu Mongoliamiusut oqaasillit tikeraarnissaannut periarfissaqalerlunga. Ukiut marluk qaangiummata, 2007-imi, Mongoliamut tikeraarlunga. Pionerit oqaluusseqatigalugit inuit sallusuissummik ujaasinerat malugigakku Mongoliamut nuullunga ikiuukkiartorusulerpunga. Japanimut uteqqikkama pilersaarusiulerpunga. 2008-mi apriilimiit ulloq manna tikillugu Mongoliami pionerioreerpunga. Maani inuuneq ajornaatsuinnaanngilaq. Inuilli nutaarsiassamut nuannersumut ajunngitsumik periartarmata Jehovamut qanillinissaannut ikiorsinnaavakka. Misigivunga aalajangiinera pitsaanerpaamik inooriaaseqalissutigisimallugu.”

7. Suut nammineq aalajangiiffigisariaqarpigit, aamma Mosesi qanoq ilinniarfigisinnaavarput?

 ⁷ Jehovamut kiffartorninni qanoq inuuniarnerlutit nammineq aalajangertussaavat. (Jos 24:15) Kateqqusinnaanallu oqarfigisinnaanngilatsigit kina aappartaarissagit. Qanoq ittumik suliffittaassanersutit oqarfigisinnaanngilatsigit. Sivisuumik ilinniarsimasuunissamik piumasaqaateqanngitsumik atorfinissavit? Ilasi piitsoqarfimmi najugaqarput allallu illoqarfinni pigissaarfiusuni najugaqarlutik. Tamassi pissusisi, pikkoriffisi, ilinniagarisimasasi, soqutigisasi anersaakkullu anguniakkasi assigiinngillat. Mosesip atugai hebræerit inuusuttut Egyptenimiittut atugaannit assigiinngitsiginerattut ilissi inuunermi atukkasi assigiinnginnerat ilimanarpoq. Mosesi kunngip paniata ernerimmani pisuujuvoq, hebræerilli inuusuttut allat inussiaataapput. (2 Mos 1:13, 14; ApS 7:21, 22) Taakku ilittut piffissami pissanganartumi inuupput. (2 Mos 19:4-6) Tamarmilli qanoq inooriaaseqarusunnerlutik aalajangertussaavaat. Mosesi Jehovap piumasaatut iliorusunnermigut eqqortumik aalajangiivoq. — Hebræerit 11:24-27 atuakkit.

8. Silatusaartumik aalajangiisarnissannut suut iluaqutigisinnaavigit?

⁸ Jehovap silatusaartumik aalajangiisarnissannut ikiortarpaatit. Qanoq ikiortaramitit? Najoqqutassianik Biibilimeersunik pissutsini qanorluunniit ittuni maleruarsinnaasannik ilinniartittarpaatit. (Tuss 32:8) Najoqqutassiat taakku qanoq maleruassanerlugit nalornissutigigukku angajoqqaannut utoqqaanertanulluunniit ikioqqusinnaavutit. (Uss 1:8, 9) Najoqqutassiat Biibilimeersut pingasut maannangaaq silatusaartumik aalajangiisarnissannut iluaqutigisinnaasatit sammeriartigit.

9. (a) Piffissatsinnik qanoq atuinissatsinnut nammineq aalajangiisinnaatinnitsigut Jehovap qanoq ataqqinarsisippaatigut? (b) Naalagaaffimmik noqqaassutiginninneqqaarnerit qanoq iluaqutigissaviuk?

⁹ Guutip naalagaaffia naapertuilluassuserlu taassuma pia siulliullugit noqqaassutigikkit. (Matthæusi 6:19-21, 24-26, 31-34 atuakkit). Jehovap piffissannik qanoq atuiniarnerlutit nammineq aalajangiisinnaatinnikkut ataqqinartippaatit. Oqarfiginngilaatit piffissat tamaat oqaluussinermut atussagit. Jiisusilli Guutip naalagaaffianik noqqaassutiginninneqqaarnissatta pingaaruteqassusianik ilinniartippaatigut. Guutip naalagaaffia siulliullugu noqqaassutigigukku periarfissarpassuaqalissaatit. Assersuutigalugu Jehovamik tullinnillu asanninninnik naassaanngitsumillu inuuneqalernissamik neriuuteqarninnik qujamasuutiginninnermik ersersitsinissannut periarfissarpassuaqassaatit. Katinnermut suliffimmullu tunngatillugu aalajangiinitit naalagaaffimmik naapertuilluassusermillu taassuma pianik noqqaassutiginneqqaarnermit pigisannik pingaartitsineruninnik ersersitsippat?

10. Jiisusip suna pillualissutigaa, uagullu pilluarumalluta susariaqarpugut?

¹⁰ Allanik kiffartuussineq pilluaatigiuk. (Apustilit Suliaat 20:20, 21, 24, 35 atuakkit). Tamanna inuunermi najoqqutassiaavoq tunngaviusoq. Jiisusip tamanna ilisimaarilluaramiuk Ataatami piumasaatut iliornermigut nutaarsiassarlu nuannersoq allanut ilinniartitsissutigineratigut Ataataminut kiffartorpoq. Tamanna pillualissutigaa. (Luk 10:21; Joh 4:34) Allanik kiffartuussinikkut pilluarneq tamanna misigereersimassavat. Taamaattumik aalajangiisarnitit Jiisusip ilinniartitsissutigisaanik tunngaveqartittakkit. Taamaaliornerit nammineq pilluassutigissallugulu Jehovap pilluassutigissavaa. — Uss 27:11.

11. Sooq Baruki nuannaarunnaarpa, Jehovamillu qanoq siunnersorneqarpa?

¹¹ Jehovamut kiffartorneq pilluarnarnerpaavoq. (Uss 16:20) Barukip, Jeremiap allattaata, tamanna puiorsimagunaramiuk piffissap ilaani Jehovamut kiffartornerminik nuannaarutiginnikkunnaarpoq. Jehovap Baruki ima oqarfigaa: “Illit ujarpat angisooq. Taamaalioqinak! Uanga inuit tamaasa perlummik aallartitsivigissavakka, ... kisiannili illit inuuginnartissavakkit sumiikkaluaruilluunnit.” (Jer 45:3, 5) Barukip suna pilluarnerulissutigissavaa?  Nammineq piumasatut iliorneq pissutigalugu suujunnaarsitaaneq, imaluunniit Jehovap piumasaatut iliorneq Jerusalemillu suujunnaarsitaaneranit aniguineq? — Jaak 1:12.

12. Ramiro pilluarnissaminut iluaqutigisaminik qanoq aalajangiiva?

¹² Qatanngutip Ramirop allanik kiffartuussineq pillualissutigaa. Ima oqarpoq: “Andesip qaqqarsuini illoqarfimmi ilaqutariinni piitsuni peroriartorpunga. Taamaattumik ilisimatusarfimmi ilinnialernissannut angajunnit akiliunneqarumagama periarfissatsialassuaqalerpunga. Jehovalli Nalunaajaasuisut kuisernaajuvunga pionerimillu illoqarfeeqqamut oqaluussiartoqatiserineqarnikuullunga. Illoqarfeeqqamukarama imminut pilersorsinnaajumallunga nujalerineq ilinniariarlugu unngiiaasarfimmik ammaavunga.” Illoqarfimmeersut amerlasuut Biibilimik atuaqqissaartalerput. Kingusinnerusukkut ilagiinni pilersinneqaqqammersuni nunaqavissut oqaasii atorlugit oqaluttuni kiffartulerpoq. Taamaattumik Ramiro aalajangerpoq ilagiinnut taakkununnga ilaalerniarluni, maannalu ukiut qulissaanni ilagiinni tassani kiffartorpoq. Inuit ilitsoqqussaralugu oqaasii atorlugit Biibilimik paasinninnissaannut ikiuineq sulianit tamanit Ramirop nalerisimaarnarnerpaanerarpaa.

13. Sooq massakkut Jehovamut uummatikkut iluunngarlutit kiffartornissannut piffissaalluarpa?

¹³ Jehovamut kiffartorneq nuannaarutigiuk. (Oqaluussisartup oqaasii 12:1 atuaruk). Pionerinngorsinnaajumallutit suliffigissaaleqqaartariaqartutut misigissanngilatit. Massakkut, ilaquttanut tunngasunik akisussaaffeqalinnginninni, Jehovamut uummatikkut iluunngarlutit kiffartornissannut piffissaalluarpoq. Unamminiarnartunik suliassinneqarnissannut piukkunnarseruttorputit. Qanoq Jehovamut kiffartorusuppit? Imaassinnaavoq pionerinngorusuttutit, inunnut allamiunut oqaluussisalerusuttutit imaluunniit ilagiinni iliuuseqarnerusinnaasutit. Qanorluunniit ittumik anguniagaqaraluaruit inuussutissarsiorumallutit sulisariaqarputit. Imminut ima aperigit: ‘Qanoq ittumik suliffittaarusuppunga  qanorlu sivisutigisumik ilinniagaqartariaqarpunga?’

14. Suliffissarsiorninni suut mianersuutigisariaqarpigit?

¹⁴ Najoqqutassiat Biibilimeersut pingasut sammeriikkavut suliffiit qanoq ittut ilinnut naleqqunnersut nalilersornissaannut iluaqutigisinnaavatit. Atuarfimmi siunnersortivit suliffissarsiuussisarfimmiluunniit sumiiffimmi kiffartorfigerusutanni illoqarfigisanniluunniit sumi suliffittaartoqarsinnaanersoq nalussanngilaat. Inuit taakku ikiuilluarsinnaapput, mianersussaatilli. Inuit Jehovamik asanninngitsut silarsuarmik asannilersinniarsinnaavaatsit. (1 Joh 2:15-17) Silarsuup neqeroorutigisartagaanut tunngatillugu uummatinnit tammartinneqariaannaanerit eqqaamasassavat. — Ussatit 14:15 atuaruk; Jer 17:9.

15, 16. Suliffimmut tunngatillugu kikkut silatusaartumik siunnersorsinnaavaatsit?

¹⁵ Sumi suliffittaarsinnaanerit paasereerukku atoriaannaasunik siunnersorneqarnissat pisariaqartippat. (Uss 1:5) Najoqqutassiat Biibilimeersut iluaqutigalugit suliffittaarisinnaasannik nalilersuinissannut kikkut ikiorsinnaavaatsit? Inuit Jehovamik ilinnillu asannittut illillu atukkannik ilisimannilluartut tusarnaakkit. Pikkoriffinnut pissutiginiakkannullu tunngatillugu imminut unneqqariffiginissannut taakkua ikiorsinnaavaatsit. Imaassinnaavoq oqaaserisaat anguniakkannik nalileeqqinnissannut iluaqutigisinnaagitit. Angajoqqaatit Jehovamik asannikkunik ilinnik ikiuilluarsinnaapput. Ilagiinni utoqqaanertat aamma ilinnik siunnersuilluarsinnaapput. Pionerit nakkutilliisullu angalasartut sooq piffissartik tamaat Jehovamut kiffartornermut atorniarlugu aalajangersimanersut aperikkit. Pionerinngorumallutik susariaqarsimappat? Qanoq ittunik suliffeqarpat? Qanoq pilluaqquneqarsimappat? — Uss 15:22.

¹⁶ Ilinnik ilisarisimannilluartut silatusaartumik siunnersuisinnaapput. Assersuutigalugu takorlooruk ilinniarfimmi piumasaqaatit sukannerpallaarsorigakkit ilinniarnertuunngorniarfimmi ilinniarunnaariarlutit pionerinngorusullutit. Ilinnik asannittup pissutiginiakkatit paasisinnaallugillu ilinniakkannik unitsitsinnginnissannut ikiorsinnaavaatit. Tamannalu tunniutiinnartannginnissamik, pissusermik Jehovamut uummatikkut iluunngarluni kiffartornermi pingaaruteqarluinnartumik, ilinniarnissamut iluaqutigissavat. — Tuss 141:5, 1900; Uss 6:6-10.

17. Suliffiit qanoq ittut ingalassimasariaqarpigit?

¹⁷ Jehovamut kiffartortut tamarmik uppernerminnik sanngiillissutigisinnaasaminnik Jehovamillu ungasillissutigisinnaasaminnik nalaataqartarput. (1 Kor 15:33; Kol 2:8) Suliffiit ilaat suliffinnit allanit illit upperninnik navianartorsiortitsinerusinnaapput. Qatanngutit ilaat aalajangersimasunik suliffeqalereernermik kingorna upperunnaarsimasut maluginiarsimassavatit. (1 Tim 1:19) Suliffiit Jehovamik ikinnguteqarunnaassutigisinnaasatit ingalassimagukkit silatusaassaatit. — Uss 22:3.

18, 19. Guutimut kiffartornermi suli iliuuseqarnerorusulersimanngikkuit susinnaavit?

¹⁸ Jehovamut kiffartornissat kissaatigilluinnarukku inuusuttutut Guutimut kiffartornermi periarfissatit nuannaarutigikkit. Massakkut piffissami pissanganartumi inuuffitsinni Guutimut kiffartornermi nuannaalissutigisassannik aalajangiisarit. — Tuss 148:12, 13.

¹⁹ Taavami Jehovamut kiffartornermik suli nuannaarutiginnilersimanngikkuit? Jehovamut upperninnik nakussatsitsiniarnermut tunngatillugu tunniutiinnanngisaannarit. Paulusip Jehovamit pilluaqquneqarumalluni qanoq iliorsimanini ima oqarluni nassuiarpaa: ‘Taama isumaqanngikkaluarussi Guutip tamatuminngattaaq nassuerfigiumaarpaasi. Killigisarpulli naapertorlugu toraagaq ataaseq ornillugu ingerlaannarta.’ (Fil 3:15, 16, 1936) Eqqaamajuk Jehovamit asaneqaravit. Taassuma siunnersuutai pitsaanerpaapput. Massakkut inuusuttuuninni aalajangiisarnermut tunngatillugu taassumannga ikiorneqartigit.