1. Soahng kaperen dah kan me me pwulopwul tohto kin lelohng?

 KITAIL mihmi ni ahnsou kesempwal kei. Saikinte pak ehu nan poadopoad me meh rar rar kei sang wehi kan koaros kohdohng kaudokiong Siohwa. (Kaud. 7:9, 10) Soahng kaperen kan kin lelohng me pwulopwul tohto ni ar luke meteikan en “ale pilen komour nin duwen kisakis ehu.” (Kaud. 22:17) Me pwulopwul pwukat sewese aramas en onop Paipel oh en kamwahwihala arail mour. Ekei kin ngoangki sukuhlki ehu lokaia tohrohr oh iang kalohki rongamwahwo nan sahpw pwukat. (Mel. 110:3; Ais. 52:7) Dahme ke anahne wia pwehn iang kisehn doadoahk wet?

2. Ia duwen mehn kahlemeng en Timoty eh kasalehda me Siohwa ketin kupwurki ketikihong me pwulopwul kan pwukoa kan? (Menlau kilang tepin kilel.)

² Ke kak wiahda pilipil kan met me kak mwuhr kihong uhk ahnsou mwahu pwehn kalaudehla ahmw papah Siohwa. Karasepe,Timoty wiahda pilipil mwahu ni eh pwulopwul, oh ni eh sounpar 19 de 20 ape, e kakehr wia emen misineri. (Wiewia 16:1-3) Mwein sounpwong keite mwuri me Pohl peki rehn Timoty en kohla ni mwomwohdiso kapw en Deselonika wasa me Kristian ko kin ale kalokolok laud. Pohl anahne kohkohlahsang wasao, ahpw e likih me Timoty pahn kakehlahda Kristian kan mwo. (Wiewia 17:5-15;  1 Des. 3:1, 2, 6) Medewehla ia uwen peren en Timoty ahnsou me e alehdi pwukoa wet.

3. Pilipil dah me keieu kesempwal me ke pahn wiahda nan ahmw mour? Iahd me ke anahne wiahda pilipil wet?

³ Met iei ahnsou en wiahda pilipil kesempwal kan erein ahmw wie pwulopwulte. Pilipil dah me keieu kesempwal ken wiahda? Iei ahmw pilipil en papah Siohwa. Iahd me keieu mwahu en wiahda pilipil wet? Siohwa mahsanihong uhk ken tamataman ih ni ahmw pwulopwulte. (Ekl. 12:1) Ihte ahl me ke kak tamataman Siohwa iei ni ahmw papah ih sang ni ahmw mohngiong unsek. (Deud. 10:12) Met iei pilipil me keieu kesempwal me ken wiahda. E pahn wekidala mwomwen ahmw mour.​—Mel. 71:5.

4. Pilipil kesempwal dah kan pahn kamwakid mwomwen ahmw papah Koht?

⁴ Mehlel, kaidehn ihte ahmw pilipil en papah Siohwa me pahn kamwakid mwomwen ahmw mour. Ke pil pahn anahne pilada ma ke pahn pwopwoud, ihs me ke pahn pwoudiki oh doadoahk dah ke pahn ahneki. Pilipil pwukat inenen kesempwal, ahpw ke anahne mahs pilada en papah Siohwa sang mohngiongomw unsek. (Deud. 30:19, 20) Dahme kahrehda? Pwehki pilipil pwukat koaros kin dokpene. Ahmw pilipil duwen pwopwoud oh doadoahk pahn kamwakid mwomwen ahmw papah Koht. Ahmw ineng en papah Koht pahn kamwakid ahmw pilipil en pwopwoud oh doadoahk. (Pil kilang Luk 14:16-20.) Eri pilada dahme pahn keieu kesempwal nan ahmw mour.​—Pil. 1:10.

5, 6. Dahme wiawihong Yuichiro me kasalehda me wiahda pilipil pwung kak kihong kitail ahnsou mwahu en kalaudehla atail papah Siohwa?

⁵ Pilada papah Siohwa, rapahki dahme e ketin kupwurki ken wia oh kowe eri pilada ia duwen ahmw pahn mourki ahmw mour. Emen brother sang Sapan ntingihedi: “Ahnsou me I sounpar 14, I iang emen elder kalohk oh e tehkada me I sohte perenki doadoahk en kalohk. Ni kamantik e ndaiong ie: ‘Kohla imwomwo, Yuichiro. Mwohndi ni ahmw tehpelo oh medemedewe kanahieng dahme Siohwa ketin wiahionguhkehr.’ I wia dahme e ndaiong ie. Ni mehlel I pousehlahte medemedewe oh kapakapki rahn kei. Kedekedeo, ahi madamadau wekila. Sohte pwand, I diarada me I perenki papah Siohwa. I perenki wadek duwen misineri kan oh I tapiada medemedewe duwen ahi pahn kalaudehla ahi papah Siohwa.”

⁶ Yuichiro tapiada wiahda pilipil mwahu kan. Pwehki met, mwuhr e kakehr papah Siohwa nan ehu sahpw tohrohr. E nda: “Karasepe, I pilada en sukuhlki lokaiahn wai. Ahnsou me I neksang pwihn kaeisek riau, I pilada doadoahk en lepin ahnsou en kasukuhlih lokaiahn wai pwe I en kak pioneer. Ni ahnsou me I sounpar 20, I sukuhlki lokaiahn Mongolia oh kohla iang pwihn en sounkalohk kei me kin doadoahngki lokaiahn Mongolia. Sounpar riau mwuri, nan pahr 2007, I mwemweitla Mongolia. Ni ahi iang pioneer ko kalohk oh kilang me aramas tohto raparapahki padahk mehlel, I men keseula mwo oh iang sawas. I pwurala Sapan pwehn wiahda ei koasoandi kan. I pioneer nan Mongolia sangete April 2008. Mour sohte mengei wasaht. Ahpw aramas akan kin men rong duwen rongamwahwo oh I kakehr sewese irail en karanihala Siohwa. I pehm me dahme I piladahro iei me keieu mwahu.”

7. Soangen pilipil dah kan me ke anahne wiahda oh dahme kitail kak sukuhlki sang Moses?

⁷ Kumwail me pwulopwul kan anahne wiahda pein amwail pilipil duwen amwail pahn doadoahngki amwail mour en papah Siohwa. (Sos. 24:15) Se sohte kak ndaiong kumwail ma kumwail anahne pwopwoudla de ihs me kumwail pahn pwoudiki. Se sohte kak ndaiong kumwail soangen doadoahk dah me kumwail anahne wia. Ia duwe, kumwail pahn  ale doadoahk ehu me sohte anahne kasukuhl laud? Ekei kumwail mihmi nan wasa me semwehmwe oh ekei mi nan kahnimw kepwehpwe. Kumwail koaros wekpeseng, pil amwail koahiek, kasukuhl, dahme kumwail perenki oh amwail pwoson wekpeseng. Amwail mour mwein weksang ahn ekei mour, duwehte mouren Moses eh weksang mouren mehn Ipru pwulopwul kan nan Isip. Pwehki ih me nein nanmwarkio serepeino nah pwutak, Moses uhdahn kepwehpwe, ahpw mehn Ipru pwulopwul teiko wia lidu kei. (Eks. 1:13, 14; Wiewia 7:21, 22) Duwehte kumwail, re mihmi ni ahnsou ehu me re anahne wiahda pilipil kesempwal kan. (Eks. 19:4-6) Ahpw emenemen kitail anahne pilada dahme e pahn wiahiong eh mour. Moses wiahda pilipil pwung en wia kupwuren Siohwa.​—Wadek Ipru 11:24-27.

8. Ia wasa me ke kak diar sawas pwehn wiahda pilipil mwahu kan?

⁸ Siohwa kin ketikihong uhk kaweid pwehn seweseiuk wiahda pilipil mwahu kan. Ia duwen eh kin ketin wia met? E ketin padahkihong uhk kaweid kan en Paipel me ke kak doadoahngki nan soangen irair koaros me ke mi loale. (Mel. 32:8) Ma ke sohte nohn ese ia duwen ahmw pahn doadoahngki kaweid pwukat, ke kak idek rehn ahmw pahpa nohno de elder kan ren seweseiuk. (Lep. Pad. 1:8, 9) Kitail kilang kaweid en Paipel siluh me kak seweseiuk wiahda pilipil mwahu kan ahnsou wet.

9. (a) Ia duwen Siohwa eh ketin kawauwih kitail ni eh ketikihong kitail saledek en wiahda pilipil kan? (b) Ia duwen ahmw pahn paiekihda ma ke rapahki mahs Wehin Koht?

⁹ Rapahki mahs Wehin Koht oh dahme e kin ketin kupwurki. (Wadek Madiu 6:19-21, 24-26, 31-34.) Siohwa kin ketin kawauwih uhk ni eh ketikihong uhk saledek en pilada ia duwen ahmw pahn doadoahngki ahmw ahnsou. E sohte ketin mahsanihong uhk ken kihong ahmw ahnsou koaros ong kalohk. Ahpw Sises ketin padahkihong kitail kesempwalpen rapahki mahs Wehin Koht. Ni ahmw kin rapahki mahs Wehin Koht, soahng tohto pahn langada ong uhk. Karasepe, ke pahn ahneki ahnsou mwahu tohto en kasalehda ahmw limpoak ong Siohwa oh mehn mpomw kan oh pil kasalehda ahmw kalahnganki koapworopwor en mour soutuk. Ia duwe, ahmw pilipil kan me pid pwopwoud oh doadoahk kin kasalehda me ke kin pwunodki ahmw kepwe kan laudsang ahmw “rapahki mahs Wehin Koht oh dahme e kin ketin kupwurki”?

10. Dahme kin kaperenda Sises oh dahme ke anahne wia pwe ken peren?

¹⁰ Diar peren ni omw papah meteikan. (Wadek Wiewia 20:20, 21, 24, 35.) Kaweid wet wia ire mehlel ehu nan atail mour. Sises mwahngih duwen met, eri e kin ketin papah Semeo ni eh kin kapwaiada Kupwure. Oh e kin ketin papah meteikan sang eh padahkihong irail rongamwahwo. Met kin kaperenda ih. (Luk 10:21; Sohn 4:34) Mwein ke ahneki soangen peren ohte ni ahmw papah meteikan. Eri ken wiahda ahmw pilipil kan me pahn poahsoankihda dahme Sises ketin padahngki. Ni ahmw wia met, ke pahn peren oh e pil pahn kaperenda Siohwa.—Lep. Pad. 27:11.

11. Dahme kahrehda Paruk sohla peren? Kaweid dahieu me Siohwa ketikihong ih?

¹¹ Peren me keieu laud kin kohsang atail papah Siohwa. (Lep. Pad. 16:20) E mwomwen me nein Seremaia sekteri Paruk sohla ahneki peren ahnsou kis nan eh mour. Paruk tepida medemedewe laud dahme e mwahuki laudsang dahme Siohwa ketin kupwurki. Siohwa ketin mwahngih duwen met oh ketin mahsanihong Paruk en uhdihsang “raparapahki ehu kamwahu” ong pein ih. Ma e peikiong, e pahn pitsang kasohrlahn Serusalem. (Ser. 45:3, 5) Dahme pahn kaperenda Paruk? En wia dahme e men wia oh iang sohrala, de en wia dahme Siohwa kupwurki oh pitsang kasohrlahn Serusalem?​—Seims 1:12.

12. Pilipil dah kan me Ramiro wiahda pwehn sewese ih en peren?

 ¹² Emen brother me diar peren ni eh papah meteikan iei Ramiro. E nda: “I kohsang peneinei semwehmwe ehu nan kousapw ehu nan nahna kan en Bolivia. Eri ni ahnsou me riei pwutak laudo nda me e pahn pwain ie kohla iang sukuhl laud, e wia mehkot laud ong ie. Ahpw I ahpwtehn papidaisla nin duwen emen Sounkadehdehn Siohwa kan, oh pioneer men luke ie en iang ih kalohk nan kahnimw tikitik ehu. I kohla wasao, sukuhlkihdi seisei oh tapiada ahi pesines en wasahn seisei ehu pwehn kak apwalih ie.” Aramas tohto nan kisin kahnimwo men onopki Paipel. Mwuri, mwomwohdiso kapw ehu wiawihda me doadoahngki lokaiahn wasao, lokaia ohte me Ramiro kin doadoahngki. Eri e pilada en iang mwomwohdiso wet oh e papah wasao erein sounpar eisek. E nda me sohte doadoahk ehu me kak kihong ih peren laud sang eh kin sewese aramas en sukuhlki Paipel ni pein arail lokaia.

13. Dahme kahrehda met wia ahnsou mwahu ken papah Siohwa sang ni mohngiongomw unsek?

¹³ Perenki papah Siohwa. (Wadek Eklesiasdes 12:1.) Dehr leme me ke anahne rapahkihda mahs doadoahk mwahu ehu mwohn ahmw kak tepida doadoahk en pioneer. Ahnsou me keieu mwahu en tepida papah Siohwa sang mohngiongomw unsek iei ahnsou wet, mwohn ahmw ahneki pwukoa kan en peneinei. Ke ahneki roson oh kehl en wia pwukoa laud kan. Dahme ke pahn men wia ong Siohwa? Mwein ahmw mehn akadei iei en wia pioneer men, de mwein ke men kalohk ong aramas akan ni ehu lokaia tohrohr. Mwein ke kak kalaudehla ahmw iang sawas nan ahmw mwomwohdiso. Sohte lipilipil mehn akadei dah me ke pilada, ke anahne doadoahk pwe ken kak apwalih pein uhk. Pein idek rehmw: ‘Soangen doadoahk dah me I  pahn pilada, oh ia uwen laud en kasukuhl me ien ale pwehn wia doadoahk wet?’

14. Dahme ke anahne kanahieng ni ahmw rapahki doadoahk ehu?

¹⁴ Kaweid en Paipel siluh me kitail koasoiapene pahn kaweid uhk ni ahmw pilada mehnia doadoahk me pahn mwahu ong uhk. Sounkaweid kan en sukuhl de prokram en koperment kan ele ese doadoahk dah kan me mie nan ahmw wasao de wasa me ke kasik ken papah ie. Aramas pwukat kak sawas, ahpw kanahieng. Aramas akan me sohte poakohng Siohwa ele kin song en kahrehiong uhk ken poakohngala sampah wet. (1 Sohn 2:15-17) Ni ahmw kilang dahme sampah wet kin kihda, dehr manokehla me ahmw mohngiong kak mwadangete pitihiukedi.​—Wadek Lepin Padahk 14:15; Ser. 17:9.

15, 16. Ihs me kak kihong uhk kaweid loalokong me pid doadoahk en mwohni?

¹⁵ Ni ahnsou me ke esehier mehnia doadoahk me mie, ke anahne kaweid mwahu. (Lep. Pad. 1:5) Ihs me kak seweseiuk kasawih mehnia doadoahk me ke pahn pilada ni ar doadoahngki kaweid en Paipel? Rong irail kan me kin poakohng Siohwa, me poakohng uhk oh wehwehki mwahu duwen kowe oh ahmw irair kan. Re pahn seweseiuk ken ese ni mehlel dahme ke uhdahn kak wia oh dahme ke mwahuki wia. Mwein dahme re nda pahn seweseiuk ken pwurehng medewe ahmw mehn akadei kan. Ma ahmw pahpa oh nohno poakohng Siohwa, re kak wia sawas laud ong uhk. Elder kan nan ahmw mwomwohdiso pil pahn kihong uhk kaweid mwahu. Idek rehn pioneer kan oh sounapwalih kan me kin seiloak dahme kahrehda re pilada en doadoahngki pali laud en arail ahnsou ong papah Siohwa. Ia duwen arail tepida? Soangen doadoahk dah me re wia? Soangen kapai dah kan me re alehdi?​—Lep. Pad. 15:22.

¹⁶ Irail kan me uhdahn wehwehkin uhk me kak kihong uhk kaweid loalokong. Karasepe, ia duwen ma ke men sohla sukuhl oh tepida pioneer pwehki ke sohte perenki wia doadoahk laud me ke anahne wia nan sukuhl? Emen me poakohng uhk pahn uhdahn wehwehki dahme kahrehda ke men sohla sukuhl. Eri e kak seweseiuk ken wehwehki me nannanti nan sukuhl pahn kaiahne iuk ken dehr mwadang uhdi sang wia mehkot. Irair wet anahn ma ke men papah Siohwa kohkohlahte.​—Mel. 141:5; Lep. Pad. 6:6-10.

17. Soangen doadoahk dah me ken soikala?

¹⁷ Koaros me kin papah Siohwa pahn lelohng irair kan me kak kaluwetehla arail pwoson oh kadohwanewei irail sang Siohwa. (1 Kor. 15:33; Kol. 2:8) Ekei doadoahk mwein pahn keper ong ahmw nanpwungmwahu rehn Siohwa sang ekei doadoahk. Mwein ke tehk me ekei sohla arail pwoson mwurin arail pilada soangen doadoahk ehu. (1 Tim. 1:19) E wia elen loalokong en soikala soangen doadoahk sohte lipilipil me pahn kak kauwehla ahmw nanpwungmwahu rehn Siohwa.​—Lep. Pad. 22:3.

18, 19. Ma ke saikinte men pioneer, dahme ke kak wia?

¹⁸ Ma ke uhdahn inengieng papah Siohwa, doadoahngki ahnsou mwahu me E ketikihong uhk erein ahmw pwulopwulte. Met iei ahnsou en wiahda pilipil kan me pahn mweidohng uhk en perenki papah Siohwa.​—Mel. 148:12, 13.

¹⁹ Ia duwen ma ke saikinte men kalaudehla ahmw papah Siohwa? Dehr uhdihsang ahmw nannanti en kakehlakahla ahmw pwoson Siohwa. Wahnpoaron Pohl nda: “Koht kin ketin wie doadoahk loalamwail ahnsou koaros, pwe kumwail en materek oh kak kapwaiada kupwure.” (Pil. 2:13) Tamataman me Siohwa ketin poakohng uhk. Sapwellime kaweid me keieu mwahu. Mweidohng ih en ketin seweseiuk wiahda pilipil kan me keieu mwahu met, ni ahmw pwulopwulte.