1. Eaha te mau tupuraa oaoa mau ta e rave rahi Kerisetiano apî e ite nei?

 TE ORA nei tatou i te anotau faufaa mau. A tahi ra e mirioni taata no te mau nunaa atoa e farii ai i te haamoriraa mau. (Apo. 7:9, 10) Te ite nei te feia apî e rave rahi i te mau tupuraa oaoa mau a tauturu ai ratou ia vetahi ê ia taa i te pue parau mau Bibilia o te faaora. (Apo. 22:17) Te tauturu nei vetahi o ratou i te taata ia haapii i te Bibilia e ia haamaitai i to ratou oraraa. Area te tahi atu, te poro nei ïa i te parau apî maitai i roto i te mau tuhaa fenua reo ê. (Sal. 110:3; Isa. 52:7) E nafea oe e nehenehe ai e apiti atu â i ta te nunaa o Iehova e rave nei?

2. E nafea te hiˈoraa o Timoteo e faaite ai e te hinaaro ra Iehova e horoa i te hopoia i te feia apî? (A hiˈo i te hohoˈa matamua.)

² E nehenehe oe e rave i te mau maitiraa e matara ˈi ia oe te mau uputa i roto i te taviniraa a te Atua. Ei hiˈoraa, ua rave Timoteo i te mau maitiraa î i te paari. I muri aˈe, e 20 matahiti paha to Timoteo, ua riro o ˈna ei mitionare. (Ohi. 16:1-3) Tau avaˈe noa paha i muri aˈe, ua tono Paulo ia ˈna i Tesalonia no te faaitoito i te mau taeae o te amuiraa apî. Ua faarue hoi Paulo i tera oire na mua ˈtu no te patoiraa uˈana. (Ohi.  17:5-15; Tes. 1, 3:1, 2, 6) A feruri na i to Timoteo huru a tonohia ˈi oia.

3. Eaha te maitiraa faufaa roa ˈˈe o to oraraa, e eaha te taime maitai aˈe no te rave i te reira?

³ Teie te taime no te rave i te mau maitiraa faufaa. O teihea te mea faufaa roa ˈˈe? O ta oe faaotiraa e tavini ia Iehova. Te faaite mai ra Iehova eaha te taime maitai aˈe no te rave i tera faaotiraa: “E haamanaˈo i tei Hamani ia oe i to apîraa ra.” (Koh. 12:1) Te ravea otahi no te “haamanaˈo” ia Iehova, o te taviniraa ïa ia ˈna ma te aau atoa. (Deut. 10:12) Tera te maitiraa faufaa roa ˈˈe. E ohipa te reira i nia i to oe a muri aˈe.—Sal. 71:5.

4. O teihea ˈtu â mau maitiraa faufaa te ohipa i nia i ta oe taviniraa i te Atua?

⁴ E ere noa ta oe maitiraa e tavini ia Iehova te ohipa i nia i to a muri aˈe. Teie te tahi atu mau faaotiraa faufaa: E faaipoipo anei au? E faaipoipo vau ia vai? Eaha ta ˈu ohipa? Teie râ, e haerea paari ia faaoti na mua e e tavini anei oe ia Iehova ma to aau atoa. (Deut. 30:19, 20) No te aha? Ua taaihia hoi teie mau maitiraa atoa. E itehia te faahopearaa o ta oe mau faaotiraa no nia i te faaipoiporaa e te ohipa i nia i ta oe taviniraa i te Atua. (A hiˈo i te Luka 14:16-20.) Oia atoa, e itehia te faahopearaa o to hinaaro e tavini i te Atua i nia i ta oe mau faaotiraa no nia i te faaipoiporaa e te ohipa. A faaoti ïa eaha te mea faufaa aˈe.—Phil. 1:10.

5, 6. A faataa na e nafea e itehia ˈi te mau tupuraa au mau a rave ai i te mau maitiraa maitai. (A hiˈo atoa i te tumu parau “Ta ˈu i faaoti i to ˈu tamariiraa!” i roto i teie vea.)

⁵ A maiti ai oe i te tavini i te Atua, a feruri eaha ta ˈna e hinaaro ia rave oe a faaoti atu ai e nafea oe e tavini ai ia ˈna. Ua papai te hoê taeae Tapone o Yuichiro te iˈoa: “I te 14raa o to ˈu matahiti, ua poro vau e te hoê matahiapo tei ite e aita vau e au ra i te pororaa. Ua parau mai oia ma te mǎrû ia hoˈi i te fare, ia parahi e ia feruri i ta Iehova i rave no ˈu. O ta ˈu iho â ïa i rave. Ua tamau noa vau i te feruri e i te pure tau mahana. Ua taui mǎrû noa to ˈu haerea. Aita i maoro, ua oaoa aˈera vau i te tavini ia Iehova. Mea au mau na ˈu ia taio i te aamu o te mau mitionare e ua haamata vau i te tavini atu â ia Iehova.”

⁶ Ua haamata Yuichiro i te rave i te mau maitiraa o tei aratai ia ˈna ia tavini ia Iehova i te fenua ê. Te na ô ra o ˈna: “Ei hiˈoraa, ua faaoti au e haapii i te reo Beretane. I te otiraa ta ˈu tau haapiiraa, ua maiti au i te ohipa tau hora i te hebedoma no te haapii i te reo Beretane i te tahi atu. E nehenehe ïa vau e riro ei pionie. I te 20raa o to ˈu matahiti, ua haapii au i te reo Mongolie e ua tia ia ˈu ia farerei i te hoê pǔpǔ taata poro reo Mongolie. E piti matahiti i muri iho, i 2007, ua reva vau i Mongolie. A poro ai e te tahi mau pionie, ua ite au e mea rahi te taata te imi nei i te parau mau. Ua hinaaro vau e faaea i ǒ no te tauturu. Ua hoˈi ïa vau i Tapone no te faanaho i te reira. Te tavini nei au ei pionie i Mongolie mai Eperera 2008. E ere te oraraa i te mea ohie i ǒ nei. Mea rahi râ te taata e farii nei i te parau apî maitai e e nehenehe ta ˈu e tauturu ia ratou ia haafatata ˈtu ia Iehova. Te manaˈo nei au e ua maiti au i te huru oraraa maitai roa ˈˈe.”

7. Eaha te mau maitiraa ta tatou e rave no tatou iho, e eaha te hiˈoraa ta Mose i vaiiho mai?

⁷ Na te taata taitahi e maiti e nafea e faaohipa ˈi i to ˈna oraraa ei Ite no Iehova. (Ios. 24:15) Eita matou e nehenehe e  parau atu ia oe ia faaipoipo aore ra eiaha, ia faaipoipo ia vai aore ra ia maiti i teihea ohipa. E maiti anei oe i te hoê ohipa o te titau i te faaineineraa poto noa? Te ora nei vetahi o outou i roto i te oire iti veve, area te tahi atu i roto i te mau oire ruperupe. Mea taa ê to oe huru i to te tahi, to oe aravihi, ite e hinaaro. Oia atoa ta oe mau fa pae varua. I Aiphiti i tahito, mea taa ê atoa te oraraa o te feia apî Hebera, tei faatîtîhia na, i te oraraa fanaˈo o te taurearea ra o Mose i te aorai. (Exo. 1:13, 14; Ohi. 7:21, 22) I tera tau, i titauhia na ia rave ratou i te mau faaotiraa faufaa. Hoê â atoa no tatou i teie mahana. (Exo. 19:4-6) Na te taata taitahi i faaoti e tavini ia Iehova ma te aau atoa aore ra aita. Ua rave Mose i te maitiraa maitai.—A taio i te Hebera 11:24-27.

8. Eaha te tauturu ta te feia apî e fanaˈo nei a feruri ai i te mau maitiraa ta ratou e rave i roto i te oraraa?

⁸ Te tauturu ra Iehova ia oe ia rave i te maitiraa maitai i to apîraa ma te horoa i te mau aratairaa ta oe e nehenehe e pee i roto i to oe iho tupuraa. (Sal. 32:8) E nehenehe atoa to oe mau metua Kerisetiano e te mau matahiapo e tauturu ia oe ia feruri i te ravea e pee ai i te reira. (Mas. 1:8, 9) E hiˈo anaˈe e toru aratairaa Bibilia o te tauturu ia oe ia rave i te mau maitiraa î i te paari e maitai ai to a muri aˈe.

9. (a) E nafea Iehova e haamaitai ai ia tatou maoti te tiamâraa e maiti? (b) Eaha te mau maitai ia imi na mua i te Basileia?

⁹ E imi na mua i te Basileia o te Atua e ta ˈna parau-tia. (A taio i te Mataio 6:19-21, 24-26, 31-34.) Te haamaitai nei Iehova ia tatou maoti te tiamâraa e maiti. Aita o ˈna e parau ra ehia hora e poro i te Basileia. Teie râ te aratairaa faufaa ta Iesu i horoa mai: e mata na i te imi aore ra e imi na mua i te Basileia. Ia na reira oe, e ite oe i te ravea no te faaite i to here i te Atua, to anaanatae i to taata-tupu e to mauruuru no te tiaturiraa o te ora mure ore. E faaite ta oe mau maitiraa no nia i te faaipoiporaa e te ohipa i to oe haapeapearaa rahi no te mau ohipa materia aore ra i to oe itoito rahi no te Basileia o te Atua e ta ˈna parau-tia.

10. Na te aha i faaoaoa ia Iesu, e eaha te mau faaotiraa e rave e oaoa ˈi oe?

¹⁰ E oaoa ma te tavini ia vetahi ê. (A taio i te Ohipa 20:20, 21, 24, 35.) Te aratairaa faufaa ïa ta Iesu i haapii atu. E taata oaoa mau o ˈna no te mea ua rave o ˈna i te hinaaro o to ˈna Metua, eiaha i to ˈna iho. Ua oaoa o ˈna i te ite i te taata haehaa ia farii i te parau apî maitai. (Luka 10:21; Ioa. 4:34) Peneiaˈe ua oaoa atoa oe a tauturu ai ia vetahi ê. Ia niu oe i ta oe mau faaotiraa i nia i te mau aratairaa ta Iesu i horoa, e oaoa oe e o Iehova atoa.—Mas. 27:11.

11. No te aha aita ˈi Baruka i oaoa faahou, e eaha te aˈoraa ta Iehova i horoa ˈtu?

¹¹ E oaoa ˈtu â tatou a tavini ai ia Iehova. (Mas. 16:20) E au ra e ua moehia te reira ia Baruka, te papai parau a Ieremia. I te hoê taime, aita o ˈna i oaoa faahou i te tavini i te Atua. Ua parau Iehova ia ˈna: “Te imi râ oe i te maitai rahi na oe iho? eiaha e imihia; inaha hoi, te hopoi mai nei au i te ino i nia i te taata atoa ra, . . . e horoa ˈtu râ vau i te ora no oe ei taoˈa, i te mau vahi atoa ta oe e haere na.” (Ier. 45:3, 5) Eaha to oe manaˈo? Eaha te faaoaoa ia Baruka? Te imiraa i te maitai rahi na ˈna iho aore ra te oraraa mai i te haamouraa o Ierusalema ei tavini taiva ore a te Atua?—Iak. 1:12.

12. Eaha te faaotiraa ta Ramiro i rave i oaoa ˈi o ˈna i to ˈna oraraa?

 ¹² O Ramiro te tahi taeae tei ite i te oaoa a tavini ai ia vetahi ê. Ua paari o ˈna i roto i te hoê utuafare veve i Bolivia. Te na ô ra o ˈna: “E fanaˈoraa mau ïa no ˈu a parau mai ai to ˈu tuaane e e aufau o ˈna i ta ˈu haapiiraa tuatoru. Teie râ, no bapetizo-noa-hia ˈtura vau ei Ite no Iehova e ua titau manihini mai te hoê pionie ia poro e o ˈna i te hoê oire nainai. Ua haere au i ǒ e no te amo i ta ˈu mau haamâuˈaraa, ua haapii au e nafea ia tâpû i te rouru e ua matara mai ta ˈu fare tâpûraa rouru. Mea rahi tei farii i te hoê haapiiraa Bibilia. I muri aˈe, ua apiti au i te hoê amuiraa apî e paraparau ra i te tahi reo no ǒ. E tavini taime taatoa vau a ahuru matahiti i teie nei. Aita ˈtu ohipa te horoa mai i te oaoa ta ˈu e ite nei a tauturu ai i te taata ia haapii i te parau apî maitai na roto i to ratou iho reo.”

13. No te aha e taime maitai ai te apîraa no te tavini ia Iehova ma te aau atoa?

¹³ E oaoa i te tavini ia Iehova i to apîraa. (A taio i te Koheleta 12:1.) Eiaha e manaˈo e e titauhia ia noaa na mua i te ohipa hou a tavini ai ia Iehova. E taime maitai te apîraa no te tavini ia Iehova ma to aau atoa. Mea iti te hopoia utuafare o te rahiraa o te feia apî e te itoito noa râ ratou no te amo i te mau hopoia fifi. Eaha ta oe e hinaaro e rave no Iehova i to apîraa? Peneiaˈe e riro ei pionie, e tavini i roto i te hoê tuhaa fenua reo ê aore ra e tavini atu â i roto i ta oe amuiraa. Noa ˈtu eaha ta oe fa i roto i te taviniraa a te Atua, mea faufaa ia amo oe i ta oe mau haamâuˈaraa. Eaha te ohipa ta oe e maiti? E ehia maororaa te titauhia no te haapii i te reira?

14. Ia vai ara i te aha a imi ai i te ohipa?

¹⁴ E tauturu mai na aratairaa Bibilia e toru ta tatou i hiˈopoa iho nei a imi ai i te ohipa. Aita e hape e ua ite te mau orometua aore ra te hoê pu a te Hau i te ohipa e vai ra i to oe vahi aore ra i roto i te tuhaa ta oe e hinaaro ra. Noa ˈtu e e tauturu ta ratou mau haamaramaramaraa ia oe, a ara. E tamata paha te taata o te ore e here ra ia Iehova i te tuu i te hinaaro i teie nei ao i roto i to aau. (Ioa. 1, 2:15-17) E nehenehe to aau e haavare ohie ia oe a hiˈopoa ˈi oe i ta te ao e pûpû maira.—A taio i te Maseli 14:15; Ier. 17:9.

15, 16. O vai te nehenehe e aratai maitai aˈe ia oe a maiti ai i te hoê ohipa?

¹⁵ A ite ai oe eaha te ohipa e vai ra, e hinaaro oe i te aˈoraa î i te paari. (Mas. 1:5) O vai te nehenehe e tauturu ia oe ia rave i te maitiraa maitai ia au i te mau aratairaa Bibilia? A faaroo i te taata o te here ra ia Iehova e ia oe e o tei matau maitai ia oe e i to oe tupuraa. E tauturu mai ratou ia hiˈopoa i ta oe e nehenehe e rave e i to oe mau manaˈo turai. Peneiaˈe e tauturu mai ta ratou mau parau ia feruri â i ta oe mau fa. Auê atoa haamaitairaa ia here to mau metua ia Iehova! E nehenehe atoa te mau matahiapo o ta oe amuiraa e aratai ia oe. A paraparau i te mau pionie e tiaau ratere. No te aha ratou i maiti ai i te taviniraa taime taatoa? Mea nafea ratou i te haamataraa i te taviniraa pionie, e te aha nei ratou no te amo i ta ratou mau haamâuˈaraa? Eaha te mau maitai ta ratou e ite nei i roto i ta ratou taviniraa?—Mas. 15:22.

¹⁶ E horoa mai te feia o tei matau maitai ia oe i te mau aˈoraa î i te paari. Ei hiˈoraa, a feruri na e te hinaaro ra oe e faarue i te haapiiraa e e rave i te taviniraa pionie no te mea aita oe e au ra i te ohipa ta te haapiiraa e titau maira. E haaferuri mai paha te hoê taata o te here ra ia oe e o tei ite i to oe mau manaˈo turai ia taa e e tauturu mai te haapiiraa ia faaite i te tuutuu ore. E huru maitai faufaa mau teie ia hinaaro oe e tavini roa ˈtu â ia Iehova.—Sal. 141:5; Mas. 6:6-10.

17. Eiaha roa ˈtu e maiti i teihea huru ohipa?

¹⁷ E faaruru te mau tavini atoa a Iehova i te mau tupuraa o te nehenehe e haafifi i to ratou faaroo a faarue atu ai ia Iehova. (Kor. 1, 15:33; Kol. 2:8) Mea atâta aˈe râ vetahi mau ohipa no to tatou mau taairaa e o Iehova. Ua matau anei oe i te hoê Kerisetiano tei ere i te faaroo a maiti ai i te tahi ohipa taa ê? (Tim. 1, 1:19) E haerea î i te paari ia ore e maiti i te ohipa e fifihia ˈi to mau taairaa e te Atua.—Mas. 22:3.

18, 19. Eaha te rave ia ore â oe e hinaaro e tavini atu â ia Iehova?

¹⁸ Ia hinaaro atu â oe e tavini ia Iehova, a faaohipa maitai i to apîraa ei tavini na ˈna. Teie te taime no te rave i te mau maitiraa e oaoa ˈi oe i te tavini ia Iehova.—Sal. 148:12, 13.

¹⁹ Ia aha ia ore â oe e hinaaro e tavini atu â ia Iehova? A tutava noa i te haapuai i to faaroo, eiaha e tuu. I muri iho i te faataaraa i ta ˈna mau tutavaraa no te pee i te hoê huru oraraa ta te Atua e haamaitai, ua papai te aposetolo Paulo: “O te Atua tei ohipa i roto ia outou i te hinaaro e te rave i te maitai ta ˈna iho e hinaaro ra.” (Phil. 2:13) A haamanaˈo i to te Atua here e i ta ˈna mau aˈoraa î i te paari. E tauturu o ˈna ia oe ia rave i te mau maitiraa maitai roa ˈˈe i to apîraa.