Hama ia mivu ku dima, mazunda a minzangala a mala a xisa o mabhata mâ ia ai ku ita. Ai mu ita mu vondadi iâ phala ku zokela o ixi iâ. Saí diiala ua ile mu ita mu vondadi iê, mukua América, ua soneka ku muvu 1914: “Nga sanguluka kiavulu mukonda dia izuua iambote ia mu kuíza ku pholo.”

Maji o ku sanguluka kuê kua bhu. Maji se-ku muthu uejidile kuila o ifuxi ienioió eji bhânga mudiâ mu mivu iavulu ku ixi ia Belgica ni ku ixi ia França. Mu thembu ienioió, o athu a ixanene, “Ita ia Dikota.” Lelu tu i xana, o Ita ia Dianga ia bhiti ku Mundu Uoso.

O ita ia dianga, iexile ia dikota mukonda ia bheka hadi iavulu. O ita íii ia jibha 10 dia mazunda a athu ndenge ni 20 a mazunda a athu a kituka inema. Kiki kia bhiti mukonda dia kiluezu kia dikota. O jingana ja Europa ka tenene ku fidisa o jinvunda ku jixi joso ja bheka o ita ku mundu uoso. Maji tua tokala kuijiia kuila “o Ita ia Dikota” ia lungulula o mundu mu ukexilu uoso. Mukonda dia kiki, katé lelu tu tala hadi iavulu.

O ia bhekesa o ita ia dianga ia bhiti ku Mundu Uoso, o ku kamba ku batula kiambote o maka. O jingana ja Europa exile kála, “athu a mu kuenda ni ku boua ia a di bhukana ku ditadi sé ku kijiia o ibhidi ieji kuíza ku muvu uenhó ua paze ni ku sanguluka ua 1914.” Kiene kia jimbulula o divulu: The Fall of the Dynasties—The Collapse of the Old Order 1905-1922.

Mu ku bhita semana, o ufuilu ua arquiduque mukua Austria ia bhangesa o jixi ja makota ja Europa ku bhânga mudiâ. O mutuameni ua ixi ia Alemanha a mu ibhuidisa kioso kia mateka o ita: “Kiki kia bhiti kiebhi?” Muéne ua tambuijila: “Manhi, ki ngejiia.”

O jingana ja kexile ku pholo mu ku batula o maka, kejidile o ibhidi ieji kuíza ku pholo. Maji o masoladi akexile mu ita, ejidile se ihi ia kexile mu bhita. Ene a mono kuila, o jingana jâ a luezele, o atuameni a jingeleja ni tubhitangu tuâ a a nganale. Kiebhi-phe?

O jingana a kanene o athu kuila, o ita ieji bheka kutululuka ni ku sanguluka ku mundu uoso. O mutuameni ua Alemanha, uambe: “Tua mu bhângela o kutululuka kuetu, o undundu uetu ua xahulu, ni hádia ietu.” O mukulundu mukua América, ngana Woodrow Wilson ua xikina mu izuelu íii, mu kuzuela kuila o ita ieji “bhangesa o ixi ku kala kididi kia kondama, athu oso eji kala ni ufôlo.” Ku ixi ia Grã-Bretanha, o athu akexile mu banza kuila ioio ieji kala “o ita phala ku zubha o ita.” Ene a di nganale.

O atuameni a jingeleja akexile mu suínisa o ita. O divulu, A História do Mundo da Colombia, di zuela: “O atuameni a jingeleja a tokalele ku longa o Bibidia, a mu suínisa o athu kuia mu ita. Athu oso a di bhakula mu ita ni mauta mâ oso.” O atuameni a jingeleja mu veji dia ku kuatekesa mu ku sosolola o unguma, akexile mu u suínisa dingi. O divulu, A História do Cristianismo, di zuela: “O atuameni a jingeleja, ka tenene, ka kexile uá ni vondadi ia ku ta o kixikanu kia ukidistá ku pholo, o ku zokela o ixi ndenge. Athu avulu akexile mu sokesa o Ukidistá ni ku zokela o ixi mu kuila a soko ngó. Masoladi oso exile jikidistá, a a tendelesa ku di jibha kala muthu ni mukuá mu dijina dia Nzambi.”

O tubhitangu tua masoladi a kanena kuila, o ita ki ieji nangenena, maji ia nangenena kiavulu. Ki kua bhiti thembu iavulu o masoladi a mukuá, ka tenene dingi ku luua ita. Mazunda a masoladi a dibhana ni maka, o mukua musoso ua i jimbulula kala “o polova ia beta o kuiibha ia di bhanene na-iu o athu.” Sumbala ni ibhidi íii, o tubhitangu tua masoladi a suluka ni ku tumikisa o maiala mâ ku pholo dia ita. Kiki kia bhekesa dingi jinvunda javulu.

Ihi ia bhange o ita ia dianga ku athu? Saí divulu dia misoso, di tumbula o izuelu ia diiala uexile disoladi, diambe: “O ita . . . ia lungulula o ibanzelu ni ukexilu ua athu.” Mukonda dia ita ienioió, avulu afú. O ita ioio ia londekesa o dimatekenu dia mivu ia ku di jibha-jibha ni kuila athu nuka a i muene tunde ku dimatekenu dia mundu. O jinvunda ni jinguvulu, ni athu ku dituna o kuia ku salu, ja kexile mu ididi ioso.

Mukonda diahi o ita ia lungulula kiavulu o mundu? O kuila kiki, kiexile ngó kiluezu kia dikota? O kuila o itambuijilu i tu kuatekesa kuijiia o ima ia-nda bhita ku hádia?