Myaka kitota kimo kyapitapo, bansongwalume bavula bafumine pa mazubo ne kuya ku nkondo. Na mambo a kutemwa bingi kyalo kyabo, bakebeshe bingi kwikizhikijila. Mu mwaka wa 1914, mwanamulume wa ku America wipaine kwingila mingilo imo waambile’mba, “Nji bingi na lusekelo mambo moba a kulutwe akekala a mutende.”

Bino moba o baketekejilenga kechi ajinga a mutende ne. Kafwako wayukile kuba’mba mu kuya kwa moba mazhita akalukuka kyalo kya Belgium ne France ne kulwa pa myaka yavula ne. Pa kyokya kimye, bantu beitelele ino nkondo amba “Nkondo Ikatampe.” Lelo jino, twayuka kuba’mba yajinga nkondo itanshi ya ntanda yonse.

Mu ino nkondo itanshi, mwajinga bantu bavula bafwile. Bamo baamba’mba bantu nobe mamilyoni 10 bo bafwile, kabiji mamilyoni 20 bo balemene. Bino byamwekele mambo bantangi kechi bafukwile bulongo ne. Bamulwila ntanda baku Europe bakankelwe kupwisha milukuchi yajinga pakachi ka byalo ayo yalengejile nkondo ya ntanda yonse. Kyakijilemo kutama ke kya kuba’mba, ino “Nkondo Ikatampe” yalengejile ntanda kutaminako kikupu. Kabiji yapimpwile bwikalo bwa bantu kufikatu ne lelo jino.

Nkondo itanshi ya ntanda yonse yatendekele mambo kechi bafukwilenga bulongo bintu ne. Buku wa kuba’mba The Fall of the Dynasties—The Collapse of the Old Order 1905-1922 waamba’mba, “Bantangi ba ku Europe kechi bayukile kuba’mba bintu byo baubilenga bikalengela nkondo ya ntanda yonse ne.”

Pa milungutu icheche, baipayile kinemanga wa Austria, kabiji kino kyalengejile byalo bya ku Europe kutendeka kulwa nkondo yo babujile ne kuketekela. Byo papichile moba acheche, Kinemanga wa ku German bamwipwizhe buno bwipuzho panyuma ya kutendeka nkondo amba “Kyajinga byepi?” Wakumbwile amba “Kechi twayukile amba bintu byo bikekala ne.”

Bintu byafuukwilepo bantangi kuba kechi bayukile kuba’mba mukafuma bintu byatama bikalengela nkondo ne. Bino na mambo a bashilikale bajinga mu bimbo, bayukile kuba’mba bintu byatama. Bayukile kuba’mba bamulwilantanda bakankelwe kwibakwasha, bantangi ba bupopweshi bebajimbaikilenga kabiji bakulumpe ba bashilikale bebafutukilemo. Mu ñanyi jishinda?

Bamulwila ntanda balayile kuba’mba nkondo ikalengela bintu mu ntanda kuwama. Kinemanga wa ku German waambile’mba: “Ene mambo o tubena kulwila ino nkondo tukeba bya busulu kwendanga bulongo, kabiji kulutwe bukatwajijile.” Ndamakyalo mwina America aye Woodrow Wilson ye watendekele byambo byaya nkuwa bya kuba’mba nkondo “ikalengela ntanda kwikala bulongo kupichila mu kusala bantangi bo babena kukeba pa kuvota.” Kabiji bena Britain balangulukilenga kuba’mba ino “nkondo ikapwisha nkondo.” Bonse balangulukijilengatu mungi.

Bantangi ba bupopweshi batundaikilenga bingi ino nkondo. Buku wa The Columbia History of the World waamba’mba, “Bantangi ba bupopweshi bafwainwe kufunjisha mambo a Lesa bo batundaikilenga bantu kuya ku nkondo. Baingijishenga bunonshi bwa kyalo kutundaika nkondo kabiji kino kyalengejile bantu kushikwa bingi bantangi ba kafulumende.” Kabiji bantangi ba bupopweshi batundaikilenga bantu kwishikwa. Buku wa A History of Christianity wamba kuba’mba, Bantangi ba bupopweshi bakankelwe kubuula bantangi ba kafulumende bwikalo bwa bena Kilishitu byo bwafwainwa kwikala.” “Bavula balondejile bya bumulwilantanda mu kifulo kya kwikala bwikalo bwa bena Kilishitu. Bashilikale bajinga bena Kilishitu ba mu machechi onse batendekele kwiipaya bene na bene kwingijisha jizhina ja Mupulushi wabo.”

Bakulumpe ba bashilikale balayile kuba’mba bakashinda, bino bakankelwe. Kechi papichile ne kimye ne, mazhita bakankelwe kumvwañana pa kuba’mba bapwishe nkondo. Panyuma, bashilikale bavula bamwene malwa akabotoka, kwesakana na byaambile umo unemba pa bya mpito amba “kino kyo kimye bantu kyo bapitamo mu malwa akatampe mu bwikalo bwabo.” Nangwa kya kuba bayukile amba kechi bakashinda ne, kechi balekele kutuma bashilikale ku nkondo ne. Kino kyalengejile bunsatuki kuvula bingi.

Nanchi nkondo ya ntanda yonse itanshi yalengejile bwikalo bwa bantu kwikala byepi? Buku umo wa bya mpito waamba pa muntu umo wajinga mu ino nkondo amba: “Nkondo yalengejile bantu kwikala na byubilo ne ndangulukilo yatama.” Na mambo a ino nkondo, makafulumende avula bulume bwapwile. Ino yo nkondo yaipayile bantu bavula bingi mu bwikalo bwa bantu yabujile kumwekapo kala. Kwimvwanga mu bya bumulwilantanda kwakumbenetu ntanda yonse.

Mambo ka nkondo o yapimpwijile bwikalo bwa bantu? Nanchi ino nkondo yajingatu kintu kya kukumya kyaubiwe nyi? Nanchi mikumbu isololapo bintu biji byonse pa bikamweka kulutwe nyi?