Kum za kal taah khân, tlangvâl maktaduai têlte chuan an in leh lo kalsanin, indona lam an pan a. Ram leh hnam hmangaihnain a chawh phûr avângin, châk takin an thawk chhuak a ni. “Hun ropui tak lo la thleng tûrte avângin ka hlimin, kan phûr tak zet a ni,” tiin kum 1914-a indonaa tel America sipai pakhat chuan a ziak a ni.

Mahse, an phûrna chu lungngaihnaah a chang ta thuai a. Chûng sipai tam takte chu Belgium leh France ram chirhdiakah a kum têlin an khawsa ang tih rêng tuman an dâwn pha lo. Khatih lai khân mite chuan chu indona chu “Indona Ropui” tiin a ko va. Tûn laiah chuan khawvêl indopui pakhatna tiin kan sawi tawh a ni.

Khawvêl indopui pakhatnaah khân thi leh hliam an tam hle a. Mi ṭhenkhat chhût dân phei chuan mi maktaduai 10 vêl an thi a, maktaduai 20 vêl ramtuileilovin a siam a ni. Chu chu fîmkhur loh avânga thil tihsual lian tak vânga thleng pawh a ni. Europe ram hruaitute chuan ram hrang hrang inkâra innghirnghona awm chu khawvêl indonaa chang lo tûrin an dang thei lo. A aia pawi zâwk chu “Indona Ropui” chuan ser lian tak a hnutchhiah kha a ni a. Khawvêl a tihdanglam dân chuan tûn thlengin nghawng a la nei a ni.

Khawvêl indopui pakhatna a lo chhuah chhan chu thil chhût sual vâng a ni a. Europe khawmuala politics leh sakhaw hruaitute, leh sipai hotute chuan an thu tlûkna siamin khawvêl pumah chhiatna a thlen dâwn tih an hre lo tih The Fall of the Dynasties—The Collapse of the Old Order 1905-1922 lehkhabu chuan a sawi.

Austria ram milian (archduke) tihhlum a nih hnu chawlhkâr rei lo têah Europe khawmuala ram thiltithei zawng zawngte chu an duh loh indonaah an tel ta a. Indona a chhuah hnu rei lo têah German ram hruaitu chu “Engtin nge hêng thil zawng zawng hi a thlen?” tia zawh a ni a. “Ah, hria ila ka ti ngawt mai,” tiin lungngai takin a chhâng a ni.

Indona thlentu thu tlûkna siamtu hruaitute chuan a sawhkhâwk tûrte chu an hre hauh lo. Mahse, indona hmuna awm sipaite chuan thil nih dân chu an hre ta thuai a. An ram hruaitute chuan anni chu an tihlawhchham a, an sakhaw hruaitute chuan an bumin, an sipai hotute chuan an phatsan a ni tih an hmu chhuak a ni. Engtin nge?

Ram hruaitute chuan indonain khawvêl thar leh ṭha zâwk neih theihna kawng a hawng dâwn niin thu an tiam a. German ram hruaitu chuan: “Hun râlmuang taka kan lo thawhrimna rahchhuah te, kan hun ropui kal tawha kan rochan te, leh kan nakin hun atân kan indo a ni,” a ti. America President Woodrow Wilson-a chuan indonain “mipui rorêlna atân khawvêl him a siam” dâwn tih auh hla lâr tak chu a chher chhuak a ni. Britain-ah pawh mite’n chu indona chu “indona titâwptu tûr indona” a nih an ring a ni. An va hre sual hlawm tak êm!

Sakhaw hruaitute chuan indona chu phûr takin an thlâwp a. “Pathian thu zirtîrtu tûrte chuan mite chu indonaa kal tûrin an fuih a. Chakai kaw tâwpa ṭang anga indona chu khawvêl pum huap inhuatnaah a chang a ni,” tiin The Columbia History of the World chuan a sawi. Tin, sakhaw hruaitute chuan inhuatna tihreh aiin an tisosâng zâwk mah a. A History of Christianity tih lehkhabu chuan: “Sakhaw hruaitute chuan ram leh hnam aiin Kristian rinna chu an dah pawimawh zâwk thei lo va, an dah hmasa duh lo a ni. Tam tak chuan kawng awlsam zâwk chu zawhin, Kristianna chu ram leh hnam hmangaihna nêna ang khatah an dah a. Kristian pâwl hrang hrang aṭanga sipaia ṭangte chu an Chhandamtu hminga inthat tawn tûra fuih an ni,” tiin a sawi.

Sipai hotute chuan awlsam tak leh rang taka hnehna chan an tiam a; mahse, chutiang chu a ni si lo. Rei a rial hmain, hneh zâwk tûr awm thei lovin, hahthlâk takin an indo ta a. Chu mi hnu chuan, thilthleng chanchin ziaktu pakhatin “tisa leh rilru lama mihring tawrh tawh azawnga râwng ber leh nasa ber a ni hial ang,” tia a sawi chu sipai maktaduai têlte chuan an hmachhawn a. Hmuh hrehawm khawpa an tlâwm chung pawhin, sipai hotute chuan indaidanna thîr hlîng nei lamah leh silai mu sûr kârah an sipaite chu hma an tâwntîr zawm zêl a. Sipaite zîngah nasa taka helna a chhuak pawh hi a mak lo ve.

Engtin nge khawvêl indopui pakhatna chuan mihringte nun a nghawng? Hmân lai chanchin ziahna pakhat chuan sipai hrâng hluiin: “Indona chuan . . . chhuan khat chhûnga mite ngaihtuahna leh mizia chu a tichhia a ni,” tia sawi angin a târ lang. Chu indona avângin lalram zawng zawng chu a bo ta. Chu indona râpthlâk tak chu mihringte la hriat ngai loh khawpa nasa thisen chhuahna kum zabi inṭanna a lo ni ta a. Sawrkâr laka helna leh nawrhnate chu hmun tin deuhthawah hmuh theihin a awm ta a ni.

Engvângin nge indona chuan khawvêl chu a thlâkthleng thawk? Tihpalh thila lo chhuak a ni tak zet em? A chhânna chuan kan nakin hun tûr chungchâng engemaw tal a târ lang em? (w14-E 02/01)