A dart el rak er a uchei, e a rebetok el miliol el mekekerei el sechal a chiloit a ungil el delengcheklir e mlo er a mekemad. Te uluusemeriar el mong, el omdasu el kmo a belurir a kuk ngarbab er a bebil er a beluu. Sera 1914 e a ta el soldau er a Merikel a milluches el kmo: “Ngmera el dmeu a renguk e mera el semeriar el kirel aika el merael el mei el klebesei.”

A klemeriarreng er tir el kirel tia el tekoi a kmal di mle mereched el obult el mo klsiberreng. Ngdimlak a rechad el medengei el kmo tirka el soldau a kmal mo meringel er tir el kiei er a beluu er a Belgium me a France el betok el rak. Ngar seikid el taem, e a rechad a ulemekedong er ngii el “Klou el Mekemad.” Chelecha el taem, e kede omekedong er ngii el kot el mekemedil a beluulechad.

Sel kot el mekemedil a beluulechad a mlo uchul a kodellir a rebetok el chad. A bebil er a omerriter a ochotii el kmo te mla er ngii a 10 el miliol el chad el mlad e mla er ngii a 20 el miliol el miltemall. Ngdirrek el mlo er ngii el oeak a betok el cheleuid el tekoi. A rengarbab el chad er a balatiks er a Europe a dimlak el sebechir el merrob a tekoi el duubech me lak bo luchul a klou el mondai er a beluulechad el rokir. E a kot el klou a ultutelel er ngii a kmo, tia el “Klou el Mekemad” a mlo uchul a meklou el tellemall er a beluulechad. Ngildechii a beluulechad er seikid el taem, e kid a dirk melechesuar aika el omelodech er chelechang.

A kot el mekemedil a beluulechad a mlo er ngii e le rechad a mlo mekngit el melilt a tekoi. A babier el mesaod er a reksi el The Fall of the Dynasties​—The Collapse of the Old Order 1905-1922 a mesaod el kmo, a remengeteklel a kabelment er aike el beluu er a Europe a “mle ua rechad el di omerruul” me ngdimlak lomelechesiu el kmo a omelilt el loruul a mo uchul a klou el tellemall er a beluulechad el rokir.

A kesai el sandei er a uriul, e a kodellel a ngarbab el chad er a Austria a mlo uchul e tirke el mesisiich el merreder a kabelment er aike el beluu er a Europe a mlo kaumekemad alta e ngdimlak el sorir. Te mla er ngii a oker er a Merreder er a beluu er a Germany el kmo, “Ngera uchul me ngdilubech a chouaisei el tekoi?” Me ngika el chad a ulenger el kmo, “Ulekum me ngar er ngii a medengelii a uchul e ngmlo uaisei.”

Tirke el mengeteklel a kabelment el millilt a tekoi el mlo uchul a mekemad a dimlak a ngera el mengesang er a ukltkir. Engdi tirka el soldau a mocha medengei el kmo ngera dubechang. Te mlo medengei el kmo a rengarbab el merreder er a belurir a dimlak loltaut a telbilir, e a remengeteklel a klechelid a milengeblad er tir, me a remerreder er a resoldau me te dirrek el ulumulak er tir. El oeak a ngera el rolel?

A rengarbab el merreder er a beluu a tilbir el kmo tia el mekemad a mo uchul e ngmo er ngii beches e ungil el beluulechad. Ngike el merreder er a beluu er a Germany a dilu el kmo: “Kede oumekemad el kirel a budech, me a siukang me a rolel a klengar er kid er a irechar, me a dirrek el klengar er kid er a ngar medad el klebesei.” A President er a beluu er a Merikel el Woodrow Wilson a dilbechii a merael a chisel el omelekoi el kmo a mekemad a mo “rullii a beluulechad me ngulekerreu el kirel a democracy.” E ngar er a beluu er a Britain, e a rechad a ulemdasu el kmo tia el “mekemad a mo uchul e ngmo diak a mekemad.” Engdi ngkmal mle cheleuid a uldesuir.

Tirke el mengeteklel a klechelid a kmal millisiich er a mekemad. A babier el The Columbia History of the World a melekoi el kmo: “Tirke el mengkar er a tekingel a Dios a uleba medal a omerael el kirel a mekemad. Tia el mekemad el rokir a mlo uchul a klauketui.” E tirka el mengeteklel a klechelid a bai millisiich a klauketui er a bai lolasem el merrob er ngii. A babier el A History of Christianity a kmo: “A remengeteklel a klechelid a dimlak el sebechir, e oumesingd el taem e ngmle chetirir el nguu a klaumerang er a Klekristiano el mo ngaruchei er a rechad. A oumesingd er tir a di mle sorir el meruul er a mo beot er tir e ulemekesiu er a Klekristiano el mo er a blakerreng el mo er a beluu. A Rekristiano el soldau el mle kakerous a klechelid er tir a lulengelechel er tir el mo omekoad el ngar er a ngklel ngike el Osebelir.”

Tirke el merreder er a resoldau a tilbir el kmo ngkmal di mo beot er tir a mo kats, engdi ngdimlak bo leuaisei. A omerollel a taem el mong e aika el eru el beluu el kaumekemad a mlo diak a mo kats er tir. A ta el chad er a reksi a millekoi el kmo a uriul, e a rebetok el miliol el soldau a mlo chelebangel er a “kmal klou e mekngit el tekoi el sebechel a chad el mo chelebangel er ngii.” Me alta e te betok a remlad, engdi a remerreder er a resoldau a di ulerrimel er a resoldau er tir el mo tmurk er aike el kakine me a kelel a boes. Me ngdiak lemechas a rengud el kmo tirka el soldau a ulebult e mlo oldechelakl er a remerredelir.

Ngerang ngrirellii a kot el mekemedil a beluulechad el mo er a klechad? A ta el chad er a reksi a ouchais a tekingel a chad el mle soldau er sel taem el kmo: “Tia el mekemad . . . a tilemall a uldesuir me a blekerdelir a rechad.” Me nguaisei, tia el mekemad a mlo uchul e a bebil el meklou el renged a di mlo nguemed, e dirrek el mlo uchelel a kot el merserasech el taem er a reksi er a klechad. E a ultok a ua di blo el tekoi er a bek el sils.

Ngera uchul me tia el mekemad a ngildechii a beluulechad? Tia el tekoi ngkora di mle kiul duubech? A nger el kirel aika el ker ngochotii a ngerang el kirel a ngar medad el klebesei?