KESTYON SORTI KOT NOU LEKTER . . .

Akoz Bondye i permet bann ki for abiz lo bann ki feb?

Labib i mansyonn detrwa lensidan enkyetan kot bann for i abiz lo bann ki feb. Mazin sa ki ti arive avek Nabot. * Dan dizyenm syek A.N.L., Lerwa Aab, ti les son madanm Zezabel pour fer touy Nabot ek son bann garson pour ki sa lerwa ti kapab pran son plantasyon rezen. (1 Lerwa 21:1-16; 2 Lerwa 9:26) Akoz Bondye ti permet en tel kalite labi pouvwar arive?

Annou konsantre lo en rezon enportan: Bondye pa zanmen manti. (Tit 1:2) Ki sa i annan pour fer avek labi pouvwar? Depi o konmansman, Bondye ti averti limanite ki rebelyon kont li ti pou anmenn en move konsekans e sa se lanmor. Zis parey Bondye ti dir, bann imen in eksperyans lanmor depi sa rebelyon dan zarden Edenn. Anfet, sa premye lanmor ti arive akoz en labi, kan Kaen ti touy son frer Abel.​—Zenez 2:16, 17; 4:8.

Depi o konmansman listwar imen ziska prezan, Parol Bondye in rezim sa koumsa: “Zonm in domin zonm e sa in fer ditor zot menm.” (Eklezyast 8:9) Eski sa parol i en realite? Zeova ti’n averti son pep, nasyon Izrael, ki zot bann lerwa ti pou abiz lo zot e fer zot kriy Bondye. (1 Samyel 8:11-18) Menm Lerwa Salomon ki ti saz ti fer lavi dir pour son pep. (1 Lerwa 11:43; 12:3, 4) Bann move lerwa, parey Aab ti abiz en kantite lo bann dimoun. Reflesir: Si Bondye ti’n anpes tou sa bann kalite labi, an realite pa I ti pou pe koz manti?

Rapel osi, ki Satan i dir ki dimoun pe servi Bondye zis pour bann rezon egois. (Zob 1:9, 10; 2:4) Si Bondye ti protez tou son bann serviter kont tou kalite labi pouvwar, pa sa ti pou montre ki sa ki Satan in dir i vre? E si Bondye ti anpes bann labi pouvwar lo bann dimoun, pa i ti pou responsab pour en pli gran mansonz? Si Bondye ti protez dimoun dan sa fason, bokou ti pou krwar ki imen i kapab diriz zot prop lekor san led Bondye. Me Parol Bondye i dir ki zonm pa kapab diriz zot prop lekor. (Zeremi 10:23) Nou bezwen ki Rwayonm Bondye i vini parski zis li ki pou retir bann lenzistis.

Me, eski sa i vedir ki Bondye pa pe fer nanryen konsernan labi pouvwar? Non. Annou vwar de keksoz ki i fer: Premyerman, i ed nou pour konpran ki si sa labi pouvwar. Par egzanp, son Parol i devwal tou laspe sa konplo ki Zezabel ti fer kont Nabot. Labib i osi montre ki en dirizan pwisan ki oule kasyet son lidantite, i par deryer sa bann move aksyon. (Zan 14:30; 2 Korentyen 11:14) Labib i montre ki sa se Satan oubyen Dyab. Par devwal lemal ek kwa ki fer labi pouvwar enkli sa enn ki par deryer tousala, Bondye i ed nou pour reste lwen avek sa bann move keksoz. Dan sa fason I osi protez nou lavenir eternel.

Dezyenmman, Bondye i donn nou lespwar ki i pou met en lafen avek labi pouvwar. Lafason ki i ti devwal, ziz e pini Aab ek Zezabel ensi ki lezot ki ti fer parey zot, i fer nou annan konfyans dan son promes ki en zour i pou pini tou bann move dimoun. (Psonm 52:1-5) Bondye i osi promet bann ki kontan li, ki tre byento i pou retir tou bann move lefe ki lemal in anmennen. * Nabot, sa zonm ki ti fidel ek son bann garson pou byento viv dan en paradi lo later kot pou annan lazistis pour touzour.​—Psonm 37:34.

[Not anba lo paz]

[Ekstre lo paz 11]

“Zonm in domin zonm e sa in fer ditor zot menm.”​—Eklezyast 8:9.

“Bondye . . . pa zanmen manti.”​—Tit 1:2