Nairekord iti Biblia ti dadduma a nakalkaldaang a pasamak maipapan iti panangirurumen dagiti nabileg kadagiti nakapuy. Maysa kadagitoy ti napasamak ken Nabot. * Ni Acab ti ari ti Israel idi maikasangapulo a siglo B.C.E. Kayatna a tagikuaen ti kaubasan ni Nabot, isu a pinalubosan ni Acab ti asawana a ni Jezebel a mangipamuspusan iti pannakapapatay ni Nabot ken dagiti annakna. (1 Ar-ari 21:1-16; 2 Ar-ari 9:26) Apay nga impalubos ti Dios ti kasta a nakaro a panangabuso iti autoridad?

Usigentayo ti maysa a napateg a rason: Ti Dios saan nga agulbod. (Tito 1:2) Ania ti pakainaigan dayta iti panangirurumen? Sipud idi damo, pinakdaaranen ti Dios dagiti tattao a ti panagrebeldeda ket mangyeg iti nakalkaldaang a resulta, ti ipapatay. Sigun iti Biblia, sipud panagrebelde idiay Eden, nangrugin a matay ti tao. Kinapudnona, ti panangirurumen ti nakaigapuan ti umuna nga ipapatay, idi pinatay ni Cain ti kabsatna a ni Abel.—Genesis 2:16, 17; 4:8.

Sipud idin, kastoy ti kuna ti Biblia maipapan iti pakasaritaan ti tao: “Ti tao dinominaranna ti tao iti pakadangrananna.” (Eclesiastes 8:9) Pudno kadi dagita a sasao? Pinakdaaran ni Jehova ti ilina, ti nasion ti Israel, nga irurumento ida dagiti arida, isu nga umasugdanto Kenkuana. (1 Samuel 8:11-18) Uray ti masirib a ni Ari Solomon ket nagsingir iti nangato a buis kadagiti masakupanna. (1 Ar-ari 11:43; 12:3, 4) Ad-adda pay a manangirurumen dagiti nadangkes nga ari a kas ken Acab. Panunotenyo: No linapdan ti Dios ti kasta a panangirurumen, saan kadi nga agparang nga agul-ulbod?

Laglagipentayo met a kinuna ni Satanas nga agserserbi laeng dagiti tattao iti Dios gapu iti inaagum a panggep. (Job 1:9, 10; 2:4) No sinalakniban ti Dios dagiti adipenna iti amin a kita ti panangirurumen, saan kadi a paneknekan dayta a pudno ti kinuna ni Satanas? Ken no linapdan ti Dios ti amin a kita ti panangirurumen, saan ngata nga agparang a nakarkaro a kinaulbod dayta? No sinalaknibanna ti tao, mabalin nga ipapan ti adu a sibaballigi a maiturayanda ti bagbagida uray awan ti Dios. Ngem ibagbaga ti Biblia a talaga a saan a kabaelan ti tao nga iturayan ti bagina. (Jeremias 10:23) Tapno agpatingga ti kinaawan hustisia, kasapulan nga umay ti Pagarian ti Dios.

Kayat kadi a sawen dayta nga awan ti ar-aramiden ti Dios maipapan iti panangirurumen? Adda. Usigentayo ti dua a banag. Umuna, ibutaktakna no ania a talaga ti panangirurumen. Kas pagarigan, impalgak ti Saona ti amin a detalye ti gandat ni Jezebel a mangpatay ken Nabot. Imbaga pay ti Biblia a dagita a dakes nga aramid ket gapuanan ti nabileg nga agturay a mangilimlimed iti kinasiasinona. (Juan 14:30; 2 Corinto 11:14) Ipalgak ti Biblia a ni Satanas a Diablo dayta. Tultulongannatayo ti Dios a mangliklik iti kinadakes gapu ta impalgakna ti kinadakes ken panangirurumen agraman ti makinggapuanan iti dayta. Salsalaknibanna ngarud ti manayon a masakbayantayo.

Maikadua, masiguradotayo a pagpatinggaen ti Dios ti panangirurumen. No kasano nga imbutaktakna, inukomna, ken dinusana da Acab ken Jezebel agraman ti dadduma pay, agtalektayo met iti karina a dusaennanto dagiti agar-aramid iti dakes. (Salmo 52:1-5) Mangipaay met ti Dios iti mapagtalkan a namnama kadagiti mangay-ayat kenkuana a dandaninan pukawen dagiti di nasayaat nga epekto ti kinadakes. * Dumtengto ti tiempo a ti matalek a ni Nabot ken dagiti annakna ket agbiagdanto nga agnanayon iti paraiso a daga nga addaan kinahustisia.—Salmo 37:34.