Labib mansionn bann sitiasion kot bann dimounn for inn fer dominer ar bann feb. Sa fer nou rapel lexanp Naboth. a Dan diziem siek Avan Nou Lepok ti ena enn lerwa an Israël ki ti apel Ahab. Sa lerwa-la ti permet so madam Jézabel fer touy Naboth ek so bann garson, pou ki li kapav pran karo rezin Naboth. (1 Rois 21:1-16; 2 Rois 9:26) Kifer Bondie ti permet Ahab abiz so pouvwar?

Anou aret nou lor enn rezon inportan: Bondie pa kapav koz manti. (Tite 1:2) Ki rapor sa ena avek bann dominer ki ena dan lemond? Ofet, depi koumansman listwar, Bondie ti averti bann dimounn ki si zot rebel kont Li, sa ti pou amenn enn move konsekans​—lamor. Parey kouma Bondie ti dir, depi ki nou premie paran inn rebele dan zardin Éden, bann dimounn inn konn lamor. Ofet, lamor premie zom ti arive akoz enn aksion kriel​—Caïn ti touy so frer Abel.​—Genèse 2:16, 17; 4:8.

Konsernan listwar limanite depi sa lepok-la, Parol Bondie dir: “Dimounn finn dominn dimounn pou zot prop maler.” (Ecclésiaste 8:9) Eski li vre sa bann parol-la? Jéhovah ti averti nasion Israël, so pep, ki zot bann lerwa ti pou fer dominer ar zot, ek sa ti pou fer zot kriy ver Bondie. (1 Samuel 8:11-18) Mem lerwa Salomon, ki ti saz, ti fer dominer ar so pep kan li ti fer zot pey tax plis ki bizin. (1 Rois 11:43; 12:3, 4) Bann move lerwa kouma Ahab ti fer ankor plis dominer. Reflesi enn kout: Si Bondie ti anpes bann aksion dominer koumsa, eski an realite, Limem Li pa ti pou montre ki seki Li ti dir ti fos?

Nou bizin pa bliye osi, ki Satan ti pretann ki bann dimounn servi Bondie zis pou bann rezon egois. (Job 1:9, 10; 2:4) Si Bondie ti protez tou so bann serviter kont tou kalite dominer, eski dan enn sertenn fason sa pa ti pou konfirme ki Satan ena rezon? Ek si Bondie ti protez tou dimounn kont tou kalite dominer, eski sa pa ti pou montre ki Li’nn koz enn pli gran manti? Si Bondie ti protez bann dimounn koumsa, kitfwa boukou ti pou panse ki bann dimounn kapav diriz zot par zotmem, san led Bondie. Me Parol Bondie dir tou lekontrer​—enn dimounn pa kapav diriz li par limem. (Jérémie 10:23) Fode Rwayom Bondie vini; lerla pou nepli ena linzistis.

Me, eski sa vedir ki Bondie pa pe fer nanye konsernan bann dominer ki ena? Non. Anou get de kitsoz ki Li fer: Premierman, Li fer kone ki savedir vremem fer dominer. Par exanp, so Parol montre tou bann detay konsernan plan ki Jézabel ti fer kont Naboth. Labib al pli lwin kan li fer kone ki ena enn dirizan pwisan ki deryer sa bann move aksion la, ek ki anvi kasiet so lidantite. (Jean 14:30; 2 Corinthiens 11:14) Labib fer nou kone ki sa dirizan pwisan la se Satan Lediab. Kan Bondie fer kone ki ete lemal ek ki savedir fer dominer, ek kisannla ki deryer tousala, Li ed nou pou ki nou pa fer bann move kitsoz. Kan Li fer sa, Li protez nou lavenir pou nou viv pou touletan.

Deziemman, Bondie donn enn lespwar solid ki enn zour dominer pou disparet. Fason ki Li ti fer konn bann move aksion, ziz, ek pini Ahab ek Jézabel​—ek osi bann ki ti fer parey kouma zot​—donn nou lasirans ki enn zour Li pou pini tou bann move dimounn kouma Li’nn promet. (Psaume 52:1-5) Bondie donn osi tou bann ki kontan Li lasirans ki biento Li pou repar tou bann dega ki finn ena akoz lemal. b Lerla Naboth, ki ti fidel, ansam avek so bann garson pou kapav viv pou touletan lor later ki pou vinn enn paradi ek kot pa pou ena linzistis.​—Psaume 37:34.