Bible kekɔ l’ɛkɔndɔ w’anto amɔtshi waki la wolo wakasoya wanɛ waki komonga la wolo. Ɛnyɛlɔ kaki Nabɔtɛ toyɛka ntondo lo yimba. * Ahaba, laki nkumekanga l’Isariyɛlɛ lo ntambe ka dikumi N.T.D., akatshike dia wadɛnde Jezabɛlɛ ndjakisha Nabɔtɛ nde l’anande dia nkumekanga mbɔsa ekambɔ kawɔ ka vinyɔ. (1 Khumi ya Dikanga 21:1-16; 2 Khumi ya Dikanga 9:26) Lande na kakatshike Nzambi dia nkumekanga nkamba la lowandji lande lo yoho ya kɔlɔ shɔ?

Tɔsɛdingole ɔkɔkɔ ɔmɔtshi w’ohomba: Nzambi hakoke mbuta kashi. (Tito 1:2) Ngande wɔtɔnganɛ dui sɔ la woho wakasoyama anto amɔtshi? Oma k’etatelo, Jehowa akahɛmɔla anto ɔnɛ naka vɔ mbɔtɔmbɔkwɛ, kete wayonga l’etombelo wa kɔlɔ, mbuta ate nyɔi. Dia mɛnya mɛtɛ ka dui sɔ, anto wekɔ lo mvɔ ntatɛ oma l’ɔtɔmbɔkwɛlɔ wakonge lo ekambɔ k’Ɛdɛna. Osoyelo mbaki lo kiɔkɔ ya nyɔi k’onto la ntondo lakadiakema, mbuta ate Abɛlɛ lakadiakema oma le Kɛna k’ɔnango.—Etatelu 2:16, 17; 4:8.

Lo kɛnɛ kendana l’ɔkɔndɔ w’ana w’anto oma k’etena kɛsɔ, Ɔtɛkɛta wa Nzambi mbutaka lo tshena pe ɔnɛ: “Untu mbulela[ka] unyandi dia mbusuya.” (Undaki 8:9) Onde ɛtɛkɛta ɛsɔ wekɔ mɛtɛ? Jehowa akahɛmɔla wodja ande w’Isariyɛlɛ, ɔnɛ nkumi ya dikanga yawɔ yayowasoya ndo yayowakonya dia ndelɛ Nzambi. (1 Samuele 8:11-18) Kaanga Sɔlɔmɔna nkumekanga ka lomba akasoya wodja ande lo mbafutsha elambo wambotamba olelo. (1 Khumi ya Dikanga 11:43; 12:3, 4) Nkumi ya dikanga ya kɔlɔ, ɛnyɛlɔ Ahaba wakasoya anto heyama. Ohokanyiya yema: Otondonga Nzambi akekɛ lonya diaha anto asɔ nsoya anto akina, shi otɛnama oko nde ambota kashi?

Tohɛke nto dia Satana akasɛmɛ ɔnɛ anto wekɔ lo kambɛ Nzambi paka l’ɔtɛ w’eyango wa lokaki. (Jobo 1:9, 10; 2:4) Naka Nzambi nkokɛ ekambi ande tshɛ oma lo weho tshɛ w’osoyelo, shi dui sɔ diayosukɛ ɛsɛmɔ waki Satana? Ndo nto, otondonga Nzambi akekɛ lonya diaha anto soyama, shi nde otɔsama oko kanga kashi? Ndo naka nde nkokɛ anto lo yoho shɔ, kete anto efula mbeyaka ndjɔfɔnya ɔnɛ anto koka ndjalɔmbɔla dimɛna aha l’ekimanyielo ka Nzambi. Koko otshikitanyi l’ekanelo kɛsɔ, Ɔtɛkɛta wa Nzambi mbutaka ɔnɛ onto hakoke ndjalɔmbɔla ndaamɛ. (Jeremiya 10:23) Tekɔ l’ohomba wa Diolelo dia Nzambi ndja nɛ dia paka diɔ mbayokomiya awui wa wɛngiya.

Onde kɛsɔ nembetshiyaka dia Nzambi hasale ndooko dui lo kɛnɛ kendana l’osoyamelo? Keema. Tɔsɛngingole awui ahende wakandasale: Ntondotondo, nde akatondja awui wa ngala sɛkɛ. Ɛnyɛlɔ, Ɔtɛkɛta ande wakatondja sɛkɛ sheke yakɔtwɛ Jezabɛlɛ Nabɔtɛ. Bible mɛnyaka nto dia omboledi ɔmɔtshi wa wolo wayashɛ, mbaki lo kiɔkɔ y’awui wa kɔlɔ asɔ tshɛ. (Joani 14:30; 2 Kɔrɛtɔ 11:14) Bible mbeelɛka ɔnɛ Satana Diabolo. Lo ntondja kɔlɔ ndo osoyamelo la onto lele lo kiɔkɔ ya wɔ sɛkɛ, Nzambi tokimanyiyaka dia sho ndjalama oma l’awui wa kɔlɔ asɔ. Ndo nto, nde ayotokokɛ lo nshi yaso yayaye ya pondjo.

Dui dia hende ele, Nzambi toshaka elongamelo ka mɛtɛ ɔnɛ osoyamelo wayoshila. Woho wakandatondja kɔlɔ kaki Ahaba nde la Jezabɛlɛ sɛkɛ, wakandaalombosha, wakandawasha dilanya ndo anto akina wele oko vɔ, toshikikɛka ɔnɛ daka diande dia mbisha anto wa kɔlɔ tshɛ dilanya lushi lɔmɔtshi diayokotshama. (Osambu 52:1-5) Nzambi toshaka nto elongamelo ɔnɛ kem’edja, nde ayokomiya shɛngiya yele l’anto wa kɔlɔ le anto wawoka ngandji. * Nabɔtɛ kanga kɔlamelo ayolwama nde la nkumbo kande dia ndjɔsɛna pondjo pondjo lo paradiso ka la nkɛtɛ kahatosoyama anto nto.—Osambu 37:34.