Ka ce Baibul obedo Lok pa Lubanga, ci omyero obed pat adada ki bukke mukene-ni ducu. Dok lok ada tye ni pat. Kityeko goyo Baibul i wel ma romo bilion mapol dok i leb ma romo miya mapol. Ryeko ma i Baibul tye ki teko me loko kwo pa dano me doko maber.​—Kwan 1 Jo Tecalonika 2:13; 2 Temceo 3:16.

Wangeyo ni Baibul obedo buk mua ki bot Lubanga pien tito jami ma bitimme i anyim ci bene gicobbe kakare. Pe tye ngat mo ma romo timo meno pire kene. Me lapore, nen kong buk pa Icaya. Bute ma kicoyo wacon ma peya kinywalo Yecu kinongo i boro mo ma tye cok ki Dead Sea [nam me Araba]. Bute man waco ni gang me Babilon bibedo obur matwal. Lok man ocobbe i nge mwaki mapol ma Yecu otyeko kwede ticce me pwony i lobo.​—Kwan Icaya 13:19, 20; 2 Petero 1:20, 21.

Baibul kicoyo pi kare ma romo mwaki 1,600. Dano ma romo 40 aye gucoyo Baibul, dok bene gutiyo ki wi lok madit acel keken ma rwatte. Meno otwere nining? Lubanga aye otirogi.​—Kwan 2 Camuel 23:2.

I kine mukene, Lubanga oloko ki luco Baibul kun tiyo ki lumalaika, ginanyuta, nyo lek. Pol kare, Lubanga obedo ka keto tamme i wi ngat moni ma tye ka coc-ci, ci en dong yero nyig lok mene ma myero eti kwede me nyuto tam pa Lubanga.​—Kwan Niyabo 1:1; 21:3-5.