Bibilia nĩ ya mwanya mũno, o ta ũrĩa tũngĩrĩgĩrĩra Kiugo kĩa Ngai gĩkorũo gĩtariĩ. Bibilia bilioni nyingĩ nĩ icabĩtwo na thiomi nyingĩ. Ũtaaro ũrĩa ũkoragwo Bibilia-inĩ nĩ ũrĩ ũhoti wa gũthondeka mĩtũũrĩre ya andũ.—Thoma 1 Athesalonike 2:13; 2 Timotheo 3:16.

Tũmenyaga atĩ Bibilia nĩ Kiugo kĩa Ngai, tondũ ĩrathĩte ũhoro wa mahinda mokĩte ĩtekũhĩtia. Gũtirĩ mũndũ ũngĩhota gwĩka ũguo. Kwa mũhaano, ta wĩcirie ũhoro wa ibuku rĩa Isaia. Kobĩ ya ibuku rĩu ya makĩria ma mĩaka 100 Jesu atanaciarũo, nĩ yonekire ngurunga-inĩ, hakuhĩ na Iria rĩa Cumbĩ. Yugaga atĩ itũũra rĩa Babuloni rĩtingĩgaacoka gũtũũrũo o na rĩ. Ũndũ ũcio wahingire rĩa mbere mĩaka mĩingĩ thutha wa Jesu gũcoka kũrĩa igũrũ.—Thoma Isaia 13:19, 20; 2 Petero 1:20, 21.

Bibilia yaandĩkirũo kwa ihinda ta rĩa mĩaka 1,600. Andũ ta 40 arĩa maandĩkire Bibilia, marĩrĩirie o ũndũ ũmwe, na maũndũ marĩa maandĩkire nĩ marĩ ũiguano. Ũndũ ũcio wahotekekire atĩa? Ngai nĩwe wamatongoririe.—Thoma 2 Samueli 23:2.

Rĩmwe Ngai aaragia na aandĩki acio kũgerera araika, cioneki, kana iroto. Ngai aaingĩragia rĩciria rĩake meciria-inĩ mao, na akareka mahũthĩre ciugo ciao ene gũkinyĩria andũ ndũmĩrĩri ĩyo yake.—Thoma Kũguũrĩrio 1:1; 21:3-5.