Ɛ nye la kɛ Nyamenle Edwɛkɛ ne bayɛ ngakyile, Baebolo ne le zɔ bɔkɔɔ. Bɛyɛ ye mgbe mgbe wɔ aneɛ dɔɔnwo anu. Baebolo ne anu nrɛlɛbɛ ne lɛ tumi mɔɔ maa menli kakyi yɛ kpalɛ a.—Kenga 1 Tɛsalonaekama 2:13; 2 Temɔte 3:16.

Yɛze kɛ Baebolo ne vi Nyamenle ɛkɛ ɔluakɛ ɔka kenlebie edwɛkɛ mɔɔ le nɔhalɛ la. Sonla biala ɛnrɛhola ɛnrɛyɛ zɔ. Suzu Ayezaya buluku ne anwo, fa yɛ neazo. Bɛnwunle bie mɔɔ bɛyɛle na ɔbole ɛvoya kolaa na bɛawo Gyisɛse la wɔ bolɛbɔne bie mɔɔ bikye Nyevile Wulera ne la anu. Ɔhanle kɛ Babelɔn sua ne bayɛ suadu. Gyisɛse azɛlɛ ye azo ɛzonlenlɛ gyima ne anzi ɛvolɛ dɔɔnwo anu yɛɛ ɛhye rale nu a.—Kenga Ayezaya 13:19, 20; 2 Pita 1:20, 21.

Bɛvale mɔɔ bo ɛvolɛ kɛyɛ 1,600 a bɛhɛlɛle Baebolo ne a. Baebolo kɛlɛvolɛma 40 ne vale edwɛkɛtile kokye ala a hɛlɛle mɔɔ biala ɛngo ɛntia ɔ gɔnwo a. Kɛzi bɛholale bɛyɛle ɛhye ɛ? Nyamenle a hilele bɛ mɔɔ ɔwɔ kɛ bɛkɛlɛ a.—Kenga 2 Samoɛle 23:2.

Mekɛ bie mɔ anu Nyamenle luale anwumabɔvolɛma, ɛnyelɛzodeɛnwunlɛ anzɛɛ ɛlalɛ zo dendɛle hilele Baebolo kɛlɛvolɛma. Nyamenle ta fa adwenle ne wula kɛlɛvolɛ ne ati anu na yeamaa yeakpondɛ edwɛkɛ mɔɔ ɔbava yeaha Nyamenle nrɛlaleɛ ne la.—Kenga Yekile 1:1; 21:3-5.