E ese le Tusi Paia mai i isi tusi, ma o le mea moni lenā. E faitau piliona kopi ua uma ona lomia i le faitau selau o gagana. O le atamai o loo i le Tusi Paia e mafai ona suia ai olaga o tagata.​—Faitau le 1 Tesalonia 2:13; 2 Timoteo 3:16.

E tatou te iloa o le Tusi Paia e mai i le Atua, ona e saʻo aʻiaʻi valoaga o loo iai e faatatau i le lumanaʻi. E lē mafai e se tagata ona faia lenā mea. Seʻi manatu i le tusi o Isaia. Na tusia se kopi o lenei tusi i le silia ma le senituri a o leʻi fanau mai Iesu, ma na maua i se ana e lata i le Sami Mate. Na taʻua ai i lenā tusi, o le a lē toe aināina le aai o Papelonia. O le faataunuuga o lenā valoaga, na tupu i le tele o tausaga mulimuli ane talu ona māeʻa le faiva a Iesu i le lalolagi.​—Faitau le Isaia 13:19, 20; 2 Peteru 1:20, 21.

Na tusia le Tusi Paia i se vaitaimi e sili atu i le 1,600 tausaga. Pe tusa ma le toʻafā sefulu tusitala na tusia, ma e tasi le feʻau e faaautū i ai e aunoa ma le feteenaʻi o manatu o le tasi i le isi. E faapefea ona tupu lenā mea? Na taʻitaʻia i latou e le Atua.​—Faitau le 2 Samuelu 23:2.

O nisi taimi, e fetalai atu ai le Atua i nei tusitala e ala i agelu, faaaliga po o ni miti. E tuu e le Atua ona manatu i o latou mafaufau, ma faataga i latou e filifili upu e faamatalaina ai lana feʻau.​—Faitau le Faaaliga 1:1; 21:3-5.