Ni nga lavhelela uri Ipfi ḽa Mudzimu ḽi vhe ḽo khetheaho, Bivhili yo tou ralo. Ho no gandiswa kopi dza dzibilioni nga nyambo nnzhi. Vhuṱali vhu re Bivhilini vhu na maanḓa a u shandula vhathu uri vha tshile nga nḓila ya khwine.—Vhalani 1 Vhathesalonika 2:13; 2 Timotheo 3:16.

Ri a zwi ḓivha uri Bivhili i bva ha Mudzimu ngauri i amba ngoho nga ha vhumatshelo hu tshee nga phanḓa. A hu na muthu ane a nga ita zwenezwo nga eṱhe. Sa tsumbo, ṱhogomelani bugu ya Yesaya. Kopi yayo ye ya ṅwalwa miṅwahani i fhiraho ḓana Yesu a sa athu bebwa, yo waniwa bakoni tsini na Lwanzhe lwo Faho. I amba uri muḓi wa Babele wo vha u tshi ḓo vha shubi. Zwenezwo zwo thoma u ḓadzea miṅwahani minzhi nga murahu ha vhuḓinḓa ha Yesu kha ḽifhasi.—Vhalani Yesaya 13:19, 20; 2 Petro 1:20, 21.

Ho fhela miṅwaha i fhiraho 1 600 hu tshi khou ṅwalwa Bivhili. Ho vha hu na vhaṅwali vha Bivhili vha ṱoḓaho u vha 40 nahone vho ṅwala nga ha thero nthihi vha sa hanedzani. Zwenezwo zwo konadzea hani? Vho vha vha tshi khou livhiswa nga Mudzimu.—Vhalani 2 Samuele 23:2.

Nga zwiṅwe zwifhinga Mudzimu o amba navho a tshi shumisa vharuṅwa, mabono kana miloro. Kanzhi Mudzimu o dzhenisa mahumbulele awe kha mihumbulo ya muṅwali nahone a mu tendela uri a khethe maipfi ane a nga a shumisa u amba mulaedza wa Mudzimu.—Vhalani Nzumbululo 1:1; 21:3-5.