Le Bibliaoʼ tiʼ Dios u taal, le oʼolal minaʼan uláakʼ libro beyoʼ. U millonesil copiaʼob tsʼoʼok u jóoʼsaʼal ich u cientosil idiomaʼob. Le baʼax ku yaʼalik le Bibliaoʼ ku páajtal u kʼexik u kuxtal máak. (Xok 1 Tesalonicailoʼob 2:13; 2 Timoteo 3:16.)

K-ojel tiʼ Dios u taal le Bibliaoʼ tumen ku yaʼalik baʼax jach tu jaajil ku taal u kʼiin. Chéen wíinikeʼ maʼ tu páajtal u beetik leloʼ. Tuukulnen tiʼ u libroil Isaías. Junpʼéel u copiail kaxtaʼab ichil junpʼéel áaktun naatsʼ tiʼ le Kimen Kʼáaʼnáaboʼ maas tiʼ cien jaʼaboʼob u bin u síijil Jesús ka tsʼíibtaʼabi. Le juʼunoʼ ku yaʼalikeʼ yaniliʼ u pʼáatal chéen x-tokoy luʼum u noj kaajil Babiloniaeʼ. Lelaʼ béeychaj yaʼab jaʼaboʼob kíimik Jesús. (Xok Isaías 13:19, 20; 2 Pedro 1:20, 21.)

Le Bibliaoʼ tsʼíibtaʼab tu yáamil kex mil seiscientos jaʼaboʼob. Kex cuarenta máakoʼob tsʼíibte, tʼaanajoʼob tiʼ junpʼéeliliʼ baʼal, yéetel mix juntúul aʼal wa baʼax ka xiʼik tu contra u maasiloʼ. ¿Baʼaxten? Tumen Dios nuʼuktoʼob. (Xok 2 Samuel 23:2.)

Dioseʼ jejeláas bix tʼaanajik yéetel le máaxoʼob tsʼíibt le Bibliaoʼ: yéetel angeloʼob bey xan tiʼ wayakʼoʼob wa náayoʼob. Baʼaleʼ yaʼab u téeneleʼ, tu chaʼaj u yéeyikoʼob baʼax tʼaaniloʼob kun meyajtiʼob utiaʼal u tsʼíibtikoʼob le baʼax tu tsʼáaj tu tuukuloʼoboʼ. (Xok Apocalipsis 1:1; 21:3-5.)