1, 2. Mɛni heje nɛ e sa kaa wa bua nɛ jɔ La 45 ɔ he ɔ?

MATSƐ ko nɛ e hɛ mi ngɛ nyami hi okpɔngɔ nɔ kɛ yaa ta konɛ e ya fã anɔkuale kɛ dami sane he. E maa ye e he nyɛli ɔmɛ a nɔ kunimi. Ke e gbe e kunimi yemi ɔ nya a, e maa kpee ayɛflo ko nɛ he ngɛ fɛu. A ma kai matsɛ nɛ ɔ daa, nɛ a maa wo e hɛ mi nyami kɛ ya neneene. Enɛ ɔ ji munyutso titli nɛ ngɛ La 45 ɔ mi.

² Pi sane ngɔngɔɛ ko kɛkɛ nɛ ba nyagbe ngɛ bua jɔmi mi nɛ ngɛ La 45 ɔ mi. Nɔ́ nɛ ya nɔ nɛ a bɔ he amaniɛ ngɛ La 45 ɔ he hia wɔ, ejakaa e saa wa si himi he mwɔnɛ ɔ, nɛ e maa sa wa he hwɔɔ se hulɔ. Wa ma susu la nɛ ɔ mi munyu ɔmɛ a he. Be mi nɛ wa ngɛ jã pee ɔ, nyɛ ha nɛ wa susu e mi munyu ɔmɛ a he saminya.

3, 4. (a) Mɛni ji “nɔ́ kpakpa” nɛ la polɔ ɔ tu he munyu ɔ, nɛ kɛ jamɛ a nɔ́ ɔ náa wa tsui nɔ he wami ha kɛɛ? (b) Mɛni blɔ nɔ wa “la a kɔɔ matsɛ ko he” ngɛ, nɛ ngɛ mɛni blɔ nɔ hu nɛ wa lilɛ peeɔ kaa womi ngmalɔ kpakpa ningma tso?

³ “Nɔ́ kpakpa ko ná ye tsui nɔ he wami. I ngɛ dee ke: ‘Ye la a kɔɔ matsɛ ko he.’ Ha ye lilɛ nɛ pee kaa womi ngmalɔ kpakpa  ningma tso.” (La 45:1, NW.) “Nɔ́ kpakpa” nɛ la polɔ ɔ tsɔɔ kaa e ‘ná e tsui nɔ he wami’ ɔ kɔɔ matsɛ ko he. Hebri munyu nɛ a tsɔɔ sisi ke ‘ná nɔ he wami’ ɔ tsɔɔ “nɔ́ ko nɛ ngɛ fiae.” Nɔ́ kpakpa nɛ ɔ wo la polɔ ɔ gɛjɛmi nɛ lɔɔ ha nɛ e lilɛ pee kaa “womi ngmalɔ kpakpa ningma tso.”

⁴ Wɔ hu nɛɛ? Sane kpakpa nɛ kɔɔ Mesia Matsɛ Yemi ɔ he ɔ ji nɔ́ kpakpa nɛ náa wa tsui nɔ he wami. Matsɛ Yemi sɛ gbi ɔ ba plɛ “nɔ́ kpakpa” kɛ ha wɔ, titli ɔ, ngɛ jeha 1914 ɔ mi. Mɛni heje? Ejakaa Matsɛ Yemi ɔ ba ngɛ jamɛ a jeha a mi. E ji Matsɛ Yemi nitsɛnitsɛ nɛ e ngɛ nɔ yee ngɛ hiɔwe. Wa fiɛɛɔ ‘sane kpakpa nɛ kɔɔ matsɛ yemi nɛ ɔ he ɔ kɛ kpaa je ɔ mi tsuo, bɔnɛ pee nɛ je ma amɛ tsuo nɛ a nu.’ (Mat. 24:14) Anɛ Matsɛ Yemi sɛ gbi ɔ ‘náa wa tsui nɔ he wami’ lo? Anɛ wa fiɛɛɔ Matsɛ Yemi ɔ he sane kpakpa a kɛ kã lo? Kaa bɔnɛ e ji ngɛ la polɔ ɔ blɔ fa mi ɔ, wɔ hu wa “la a kɔɔ matsɛ ko he.” Matsɛ nɛ ɔ ji Matsɛ Yesu Kristo. Wa fiɛɛɔ kɛ tsɔɔ nihi kaa amlɔ nɛ ɔ, Yesu ngɛ matsɛ yee ngɛ hiɔwe kaa Mesia Matsɛ Yemi ɔ nya Matsɛ. Jehanɛ se hu ɔ, wa tsɔɔ je nɛ ɔ mi matsɛmɛ ɔmɛ kɛ nihi tsuo kaa a ba a he si kɛ ha Mesia Matsɛ Yemi ɔ. (La 2:1, 2, 4-12) Ke waa kɛ Baiblo ɔ tsuɔ ní ngɛ wa fiɛɛmi nítsumi ɔ mi ɔ, wa lilɛ maa pee kaa “womi ngmalɔ kpakpa ningma tso.”

5. (a) Yesu “he ngɛ fɛu” ngɛ mɛni blɔ nɔ? (b) Mɛni blɔ nɔ ‘munyu ngɔngɔɛ jeɔ Yesu nya mi’ ngɛ, nɛ kɛ wa ma plɛ kɛ kase lɛ ha kɛɛ?

⁵ “O he ngɛ fɛu pe nɔ tsuaa nɔ. Munyu ngɔngɔɛ jeɔ o nya mi. Enɛ ɔ heje nɛ Mawu jɔɔ mo daa a nɛ.” (La 45:2, NW.) Ngmami ɔ tui Yesu nɔmlɔtso he munyu fuu. Se wa ma nyɛ ma de ke e “he ngɛ fɛu,” ejakaa e ye mluku. Se anɔkuale nɛ e ye Yehowa kɛ nɔ́ nɛ da nɛ e pee ɔ ji nɔ́ titli nɛ ha nɛ e he ngɛ fɛu ɔ nɛ. Jehanɛ se hu ɔ, Yesu kɛ “munyu ngɔngɔɛ” fiɛɛ Matsɛ Yemi sɛ gbi ɔ kɛ tsɔɔ nihi. (Luka 4:22; Yoh. 7:46) Anɛ wa bɔɔ mɔde kaa wa maa kase lɛ lo? Ke wa ngɛ fiɛɛe ɔ, anɛ wa tuɔ munyu ɔ konɛ e sɛ nihi a tsui mi lo?—Kol. 4:6.

6. Mɛni blɔ nɔ Mawu jɔɔ Yesu “daa” ngɛ?

⁶ Akɛnɛ Yesu suɔ Yehowa nɛ e ye lɛ anɔkuale heje ɔ, Yehowa jɔɔ e zugba a nɔ sɔmɔmi nítsumi ɔ nɔ. Benɛ e ngɔ e wami hu kɛ sã afɔle ɔ se ɔ, Yehowa jɔɔ lɛɛ. Bɔfo Paulo ngma ke: ‘Yesu ba e he si, nɛ e bu tue hluu kɛ ya su gbeje tete; e gbo sɛumi tso nɔ gbenɔ. Enɛ ɔ heje nɛ Mawu wo e nɔ gojoo, nɛ e ha lɛ biɛ nɛ kle pe biɛhi tsuo. Kɛkɛ ɔ, he tsuaa he nɛ a maa wo e biɛ ta ngɛ ɔ, nihi nɛ ngɛ hiɔwe kɛ ni nɛmɛ nɛ ngɛ zugba a nɔ, kɛ ni nɛmɛ nɛ ngɛ zugba a sisi ɔ, mɛ tsuo a ma kpla si ha Yesu, nɛ a maa jaje paa ke, Yesu ji Nyɔmtsɛ; a maa pee jã kɛ wo Tsɛ Mawu hɛ mi nyami.’ (Filip. 2:8-11) Yehowa jɔɔ Yesu “daa” kɛ gu si nɛ e tle lɛ nɛ e ha lɛ wami nɛ gbenɔ be mi ɔ nɔ.—Rom. 6:9.

7. Ngɛ mɛni blɔhi a nɔ nɛ Matsɛ nɛ Mawu wo Yesu ɔ ha nɛ Yesu ná bua jɔmi pe “matsɛmɛ ɔmɛ tsuo” ɔ?

⁷ Kane La 45:6, 7. Akɛnɛ Yesu suɔ nɔ́ nɛ da nɛ e hĩɔ níhi tsuo nɛ ngɔɔ he guɛ gbemi kɛ baa e Tsɛ ɔ nɔ heje ɔ, Yehowa pɔ lɛ nu kaa Mesia Matsɛ Yemi ɔ nya Matsɛ. Matsɛ nɛ Yehowa wo Yesu ɔ ha nɛ Yesu ‘ná bua jɔmi pe matsɛmɛ’ kpa amɛ tsuo nɛ a je David weku ɔ mi ɔ. Ngɛ mɛni blɔ nɔ? Kekleekle ɔ, Yehowa nitsɛ nɛ pɔ lɛ nu. Nɔ́ nɛ ji enyɔ ɔ, Yehowa pɔ lɛ nu  konɛ e sɔmɔ kaa Matsɛ kɛ Osɔfo Nɔkɔtɔma tsuo. (La 2:2; Heb. 5:5, 6) Nɔ́ nɛ ji etɛ ɔ, pi nu nitsɛ nɛ Mawu kɛ pɔ Yesu nu ɔ, se mohu mumi klɔuklɔu. Nɛ nɔ́ nɛ ji eywiɛ ɔ, hiɔwe e maa hi kɛ ye matsɛ, se pi zugba a nɔ.

8. Mɛni heje nɛ wa ma nyɛ ma de ke Mawu ji “matsɛ sɛ” nɛ Yesu hi nɔ ɔ? Mɛni heje nɛ wa ma nyɛ ma ná nɔ mi mami kaa a maa ye dami sane ngɛ e nɔ yemi ɔ mi ɔ?

⁸ Yehowa wo e Bi ɔ matsɛ ngɛ hiɔwe kaa Mesia Matsɛ ngɛ jeha 1914 ɔ mi. ‘E matsɛ tso ɔ ji dami sane yemi he okadi,’ enɛ ɔ he ɔ, wa ma nyɛ ma ná nɔ mi mami kaa a maa ye dami sane ngɛ e nɔ yemi ɔ mi. E ngɛ he blɔ nɛ e yeɔ Matsɛ, ejakaa Mawu ji e “matsɛ sɛ” ɔ nɛ. Lɔɔ tsɔɔ kaa Yehowa ji nɔ nɛ wo lɛ matsɛ ɔ nɛ. Jehanɛ se hu ɔ, Yesu matsɛ yemi ɔ maa hi si kɛ maa ya “neneene.” Anɛ o bua jɔɛ kaa o ngɛ Yehowa sɔmɔe ngɛ Matsɛ nɛ ɔ sisi lo?

9, 10. (a) Mɛni be Kristo ngɔ e klaate ɔ kɛ wo e fiɔ he, nɛ kɛ e kɛ tsu ní amlɔ nɔuu ha kɛɛ? (b) Mɛni blɔ nɔ Kristo maa ngɔ e klaate ɔ kɛ tsu ní hwɔɔ se ngɛ?

⁹ Kane La 45:3. Yehowa fã e Matsɛ ɔ konɛ e ‘ngɔ e klaate ɔ kɛ wo e fiɔ he.’ Enɛ ɔ nɛ e de Yesu ɔ tsɔɔ kaa e ha Yesu he blɔ konɛ e kɛ nihi tsuo nɛ a teɔ si kɛ woɔ Yehowa nɔ yemi ɔ nɛ to ní. (La 110:2) Akɛnɛ Kristo ji Matsɛ Tatsɛ nɛ nɔ ko be nyɛe maa ye e nɔ kunimi heje ɔ, a tsɛɛ lɛ ke “Matsɛ nguaa.” E ngɔ e klaate ɔ kɛ wo e fiɔ he ngɛ jeha 1914 ɔ mi, nɛ e ye Satan kɛ e daimonio ɔmɛ a nɔ kunimi. E sake mɛ kɛ je hiɔwe ba fɔ zugba a nɔ.—Kpoj. 12:7-9.

¹⁰ Enɛ ɔ ji kekleekle kunimi kɛkɛ nɛ Matsɛ ɔ ye ngɛ blɔ nɛ e hia kɛ yaa hwu ta a mi. Se kɛ̃ ɔ, e sa nɛ e ‘gbe e kunimi yemi ɔ nya.’ (Kpoj. 6:2) Yehowa mwɔ e yi mi kpɔ kaa e ma kpata Satan nɔ́ tsuaa nɔ́ nɛ ngɛ je ɔ mi ɔ hɛ mi, konɛ e je Satan kɛ e daimonio ɔmɛ kɛ je je ɔ mi. Kekleekle ɔ, a ma kpata Babilon Ngua a nɛ ji je ɔ lakpa jami blɔ nya tomi ɔ hɛ mi. Yehowa to e yi mi kaa e ma ha nɛ ma nya dali ɔmɛ nɛ a kpata “yo ajuama” yiwutsotsɛ ɔ hɛ mi. (Kpoj. 17:16, 17) Lɔɔ se ɔ, Matsɛ Tatsɛ ɔ ma kpata ma kudɔmi blɔ nya tomi ɔmɛ a hɛ mi. Nyagbe ɔ, Kristo nɛ a tsɛɛ lɛ ke “bɔfo nɛ ngɛ muɔ voo ɔ nya a,” maa nu Satan kɛ e daimonio ɔmɛ kɛ wo muɔ voo ɔ mi. Ke e pee jã pɛ kɛkɛ e gbe e kunimi yemi ɔ nya. (Kpoj. 9:1, 11; 20:1-3) Nyɛ ha nɛ waa hyɛ bɔnɛ La 45 ɔ gba munyu nɛ ɔ kɛ fɔ si ha.

11. Mɛni blɔ nɔ Kristo ‘hi okpɔngɔ nɔ kɛ yaa fã anɔkuale he’ ngɛ?

¹¹ “Moo je kpo kaa nɔ ko nɛ e hɛ mi ngɛ nyami konɛ o ya ye kunimi; hii okpɔngɔ nɔ kɛ ya fã anɔkuale kɛ he si bami kɛ dami sane he, nɛ o hiɔ nine ma tsu nyakpɛ ní nguanguahi.” (La 45:4, NW.) Pi mahi aloo nyɔguɛhi nɛ Matsɛ Tatsɛ ɔ ngɛ hlae ma kpɔ kɛ ha e nɔ yemi ɔ heje nɛ e maa hwu ta a ngɛ. E maa hwu ta a ngɛ yi mi tomi kpakpahi a heje. E ‘hi okpɔngɔ nɔ kɛ yaa fã anɔkuale kɛ he si bami kɛ dami sane he.’ Anɔkuale nɛ he hia pe kulaa nɛ e sa kaa a fã he ji nɔ́ nɛ kɔɔ Yehowa je mluku ɔ nɔ yemi ɔ he ɔ. Satan tsɔ Yehowa hɛ mi atua nɛ e tsɔɔ kaa pi Yehowa nɛ e sa kaa e ye je mluku ɔ nɔ. Kɛ je jamɛ a be ɔ mi kɛ ma nɛ ɔ, daimoniohi kɛ adesahi tsɔɔ kaa nɔ́ nɛ Satan de ɔ ji anɔkuale. Amlɔ nɛ ɔ, be su nɛ e sa kaa Matsɛ nɛ Yehowa pɔ lɛ nu ɔ nɛ e je kpo konɛ e ya ma nɔ mi si kake nyɔngloo kaa Yehowa ngɛ he blɔ kaa e yeɔ je mluku ɔ nɔ.

12. Ngɛ mɛni blɔ nɔ nɛ Matsɛ ɔ hi okpɔngɔ nɔ ‘kɛ yaa fã he si bami he’?

¹² Jehanɛ se hu ɔ, Matsɛ ɔ ‘hi okpɔngɔ  nɔ kɛ yaa fã he si bami he.’ Yesu ba e he si nɛ e pee tue bumi kɛ ha e Tsɛ ɔ. E sa nɛ waa kase lɛ. (Yes. 50:4, 5; Yoh. 5:19) E sa nɛ Matsɛ ɔ se nyɛɛli tsuo nɛ a kase Matsɛ ɔ konɛ a ba a he si nɛ a pee tue bumi kɛ ha Yehowa nɔ yemi ɔ ngɛ nɔ́ tsuaa nɔ́ mi. Nihi nɛ a peeɔ jã a pɛ nɛ a maa ngmɛ mɛ blɔ konɛ a sɛ je ehe nɛ Mawu wo he si ɔ mi.—Zak. 14:16, 17.

13. Ngɛ mɛni blɔ nɔ nɛ Matsɛ ɔ hi okpɔngɔ nɔ ‘kɛ yaa fã dami sane he’?

¹³ Kristo hi okpɔngɔ nɔ ‘kɛ yaa fã dami sane he’ hulɔ. Matsɛ ɔ ma fã ‘Mawu dami sane he.’ Lɔɔ ji Yehowa mlaa nɛ kɔɔ nɔ́ nɛ da kɛ nɔ́ nɛ dɛ he. (Rom. 3:21; 5 Mose 32:4) Yesaya gba kɛ fɔ si kɛ kɔ Matsɛ Yesu Kristo he ke: ‘Matsɛ ko maa ye tsɛ ngɛ dami sane nya.’ (Yes. 32:1) Yesu nɔ yemi ɔ maa ngɔ “hiɔwe he” kɛ “zugba he” nɛ “a yeɔ dami sane” ngɛ mi ɔ kɛ ba. (2 Pet. 3:13) Enɛ ɔ tsɔɔ kaa a maa hyɛ blɔ kaa nɔ tsuaa nɔ nɛ maa hi je ehe ɔ mi ɔ nɛ ye Yehowa mlaahi a nɔ.—Yes. 11:1-5.

14. Mɛni blɔ nɔ Kristo hiɔ nine ma tsu “nyakpɛ ní nguanguahi” ngɛ? (Moo hyɛ foni nɛ ngɛ nikasemi ɔ sisije ɔ.)

¹⁴ Matsɛ ɔ ngɔ e klaate ɔ kɛ wo e fiɔ he benɛ e hi okpɔngɔ ɔ nɔ kɛ yaa a. (La 45:3) Se be su nɛ e sa kaa e ngɔ e hiɔ nine kɛ hia e klaate ɔ konɛ e kɛ tsu ní. La polɔ ɔ gba kɛ fɔ si ke: “O hiɔ nine ma tsu nyakpɛ ní nguanguahi.” (La 45:4) Ke Yesu Kristo hi okpɔngɔ nɔ kɛ yaa konɛ e ya kpata Satan hɛ mi ngɛ Harmagedon ɔ, e ma tsu “nyakpɛ ní nguanguahi” kɛ si e he nyɛli ɔmɛ. Wa li blɔ tutuutu nɛ e maa gu nɔ kɛ kpata Satan je ɔ hɛ mi. Se wa le kaa enɛ ɔ maa wo nihi nɛ a bui kɔkɔ bɔmi nɛ Mawu kɛ ngɛ mɛ hae ɔ tue nɛ a bɛ a he si hu kɛ ha we Matsɛ ɔ a he gbeye. (Kane La 2:11, 12.) Yesu tsɔɔ ngɛ gbami nɛ e gba kɛ fɔ si kɛ kɔ nyagbe ligbi ɔ he ɔ mi kaa “níhi nɛ ma je ɔ mi ɔ maa wo nihi a he gbeye, nɛ a maa hɛli, ejakaa he wamihi nɛ ngɛ hiɔwe ɔ, a maa fie mɛ kɛ je a blɔ hehi.” E de hu ke: “Kɛkɛ ɔ, a maa na Nɔmlɔ Bi ɔ hɛ mi ngɛ bɔku mi kɛ he wami, kɛ hɛ mi nyami babauu.”—Luka 21:26, 27.

15, 16. Mɛnɔmɛ maa piɛɛ Kristo “ta buli” nɛ a kɛ lɛ maa ya ta a he?

¹⁵ Kpojemi womi ɔ tu bami nɛ Matsɛ ɔ maa ba kɛ “he wami kɛ hɛ mi nyami babauu” ɔ he munyu ke: ‘I na nɛ a bli hiɔwe nya, kɛkɛ nɛ ma hyɛ ɔ, okpɔngɔ hiɔ ko ji nɛ. Nɔ nɛ hii si ngɛ nɔ ɔ biɛ ji Anɔkualetsɛ kɛ Dalɔ; dami nya e kojoɔ, nɛ e hwuɔ ta. Hiɔwe ta buli ɔmɛ wo tade nɛ a kɛ kploba hiɔ ngmingmiingmi nɛ ngɛ kpɛe klaiklai kpɛ, nɛ a hi okpɔngɔ hiɔhi a nɔ kɛ nyɛɛ e se. Klaate nɛ nya ba je e nya mi, nɛ lɔɔ e kɛ maa fia je ma amɛ ní, nɛ e maa ye a nɔ kunimi. E maa ye tsɛ ngɛ a nɔ kɛ he wami kpetekpleenyɛ. E kɛ Mawu Ope ɔ we abofu, kɛ mi mi la ma kple a nɔ kaa bɔnɛ a ngaa wai mi ngɛ wai ngami nɔ́ mi ɔ.’—Kpoj. 19:11, 14, 15.

¹⁶ Mɛnɔmɛ maa pee hiɔwe “ta buli” nɛ a nyɛɛ Kristo se kɛ yaa ta a? Benɛ Yesu ngɔ e klaate ɔ kɛ wo e fiɔ he nɛ e fiee Satan kɛ e daimonio ɔmɛ kɛ je hiɔwe ɔ, Yesu “bɔfo ɔmɛ” piɛɛ e he. (Kpoj. 12:7-9) Enɛ ɔ he ɔ, sisi numi ngɛ he kaa wa ma de ke Kristo bɔfo klɔuklɔu ɔmɛ maa piɛɛ e he kɛ hwu Harmagedon ta a. Anɛ ni kpa komɛ hu maa piɛɛ e he lo? Yesu wo e nyɛmimɛ nɛ a pɔ mɛ nu ɔ si ke: “Ni nɛmɛ nɛ maa ye kunimi, ni nɛmɛ nɛ maa ya nɔ maa pee ye suɔmi nya ní kɛ yaa si nyagbe ɔ, he blɔ nɛ Tsaatsɛ ngɔ ha mi ɔ, imi hu ma ha mɛ. Ma ha nɛ a maa ye je ma amɛ a nɔ kɛ kɔni si wami, nɛ a ma tsɔtslɔɔ a mi kaa buɛ nɛ ywia tsɔkɔtsɔkɔ.” (Kpoj. 2:26, 27) Enɛ ɔ he ɔ, Kristo nyɛmimɛ nɛ a pɔ mɛ nu nɛ a ho hiɔwe ya a hu maa piɛɛ Kristo he kɛ hwu  Harmagedon ta a. Ke Kristo ngɛ “nyakpɛ ní nguanguahi” tsue nɛ e kɛ dade tso ngɛ je ma amɛ kudɔe ɔ, nihi nɛ a pɔ mɛ nu nɛ a maa piɛɛ e he kɛ ye Matsɛ ɔ maa hi Kristo kasa nya.

17. (a) Okpɔngɔ hiɔ nɛ Kristo hi nɔ ɔ tsɔɔ mɛni? (b) Mɛni klaate kɛ kɛ̃ɛ̃ ɔ daa si kɛ ha?

¹⁷ Kane La 45:5. Matsɛ ɔ hi okpɔngɔ hiɔ ko nɔ. Okpɔngɔ hiɔ nɛ Matsɛ ɔ hi nɔ ɔ tsɔɔ kaa ta nɛ e yaa hwumi ɔ da, nɛ Mawu kplɛɛ nɔ. (Kpoj. 6:2; 19:11) Matsɛ ɔ hɛɛ kɛ̃ɛ̃ hu ngɛ e dɛ. Wa kaneɔ ke: “Benɛ i kɛ i hyɛɛ ɔ, nyumu ko ji nɛ ɔ nɛ hii si ngɛ okpɔngɔ hiɔ ko nɔ kɛ e dɛ mi kɛ̃ɛ̃. A ha lɛ jlasi, nɛ e je kpo kaa kunimi yelɔ nɛ yaa nɛ e ya ye kunimi.” Klaate ɔ kɛ kɛ̃ɛ̃ ɔ tsuo daa si kɛ ha blɔ nɔ nɛ Kristo maa gu kɛ kpata e he nyɛli ɔmɛ a hɛ mi.

18. Ke Kristo kɛ e “kɛ̃ɛ̃” ɔ tsu ní ngɛ Harmagedon ta a mi ɔ, mɛni maa ba?

¹⁸ La polɔ ɔ gba kɛ fɔ si nɛ e tsɔɔ kaa Matsɛ ɔ “kɛ̃ɛ̃ mi bi ɔmɛ a nya ba,” nɛ e ‘guu e he nyɛli ɔmɛ a tsui mi,’ nɛ e yeɔ a nɔ kunimi. Ta a ma puɛ ní ngɛ je ɔ mi tsuo. Yeremia gba kɛ fɔ si ke: “Jamɛ a ligbi ɔ, nihi nɛ Yehowa maa gbe ɔ, a ma sake mɛ kɛ fɔ he kɛ maa je je ɔ nyagbe he kake kɛ maa ya nyagbe he kake.” (Yer. 25:33) Gbami kpa ko hu nɛ kɔɔ sane nɛ ɔ nɔuu he ɔ de ke: “Jehanɛ ɔ, i na bɔfo ko nɛ daa si ngɛ pu ɔ nɔ. E kpa ngmlaa wawɛɛ, nɛ e tsɛ lohwe pɛlitsɛmɛ tsuo nɛ teɔ ngɛ kɔɔhiɔ mi ɔ, nɛ e de mɛ ke, ‘Nyɛɛ ba nɛ nyɛ ba bua ngɛ Mawu we okplɔɔ nguaa a he! Nyɛɛ ba nɛ nyɛ ba ye matsɛmɛ, asafoatsɛmɛ, ta buli, kɛ okpɔngɔhi kɛ a nɔ hili a lo. Nyɛɛ ba nɛ nyɛ ba ye nimli tsuo a lo, nyɔguɛ, kɛ odehe, nimli wawi, kɛ nimli nguahi!’”—Kpoj. 19:17, 18.

19. Ngɛ mɛni blɔ nɔ Kristo ma “ya ye kunimi” nɛ e maa gbe e kunimi yemi ɔ nya?

¹⁹ Ke Kristo nɛ ji Matsɛ nɛ hɛ mi ngɛ nyami ɔ kpata Satan je yaya nɛ ɔ hɛ mi ta a, e ma “ya ye kunimi.” (La 45:4) E maa gbe e kunimi yemi ɔ nya kɛ gu Satan kɛ e daimonio ɔmɛ nɛ e ma sake mɛ kɛ wo muɔ voo ɔ mi ɔ nɔ. Ngɛ Kristo Jeha Akpe Nɔ Yemi ɔ mi tsuo ɔ, Satan kɛ e daimonio ɔmɛ maa hi muɔ voo ɔ mi. (Kpoj. 20:2, 3) Ke a sake Abosiami kɛ e daimonio ɔmɛ kɛ wo muɔ voo ɔ mi ɔ, ngɛ blɔ ko nɔ ɔ, a maa pee kaa nihi nɛ a gbo, ejakaa a be nyɛe maa ye nɔ ko awi. Nihi tsuo nɛ a maa hi zugba a nɔ ɔ, ma ná Matsɛ ɔ nɔ yemi ɔ he se, ejakaa Satan be a nɔ he wami nae hu. Loko zugba a tsuo maa pee paradeiso ɔ, nɔ́ kpa ko hu ngɛ nɛ ma ha nɛ wa ma nya Matsɛ ɔ kɛ nihi 144,000 ɔ a nɔ yemi ɔ he. Wa ma susu jamɛ a nɔ́ ɔ he ngɛ munyu nɛ nyɛɛ se ɔ mi.