Salye Kris sa Lerwa glorye!
Salye Kris sa Lerwa glorye!
“Dan ou splander ale pour ranport laviktwar.”—PS. 45:4.
PWEN ENPORTAN POUR MAZINEN
Dan ki fason Zeova ti apwent Zezi plis ki “lezot lerwa”?
Kan ki Kris ti met son lepe dan son kote, ki mannyer i ti servi li pour premye fwa e kan i pou servi li ankor?
Ki sa pli gran laverite ki Zezi Kri sa Lerwa e Gerye i defann?
1, 2. Akoz Psonm 45 i enteres nou?
EN LERWA glorye i mont son seval pour defann laverite ek ladrwatir e i ale pour ranport laviktwar lo son lennmi. Apre ki i ranport laviktwar final lo zot, i marye avek en zoli nouvel marye. Tou zenerasyon ki pou vini pou rapel e loue sa lerwa. Sa i tenm Psonm 45.
2 Me, Psonm 45 pa zis en zistwar eksitan ki annan en zoli finisyon. Bann levennman ladan i annan en sinifikasyon enportan pour nou. I relye avek nou lavi la konmela, ensi ki nou lavenir. Alor, avek bokou latansyon, annou egzamin o profon sa psonm.
“EN BON KEKSOZ IN TOUS MON LEKER”
3, 4. (a) Ki sa “bon keksoz” ki enteres nou e ki lefe sa i annan lo nou leker? (b) Dan ki fason ‘nou kantik i konsernan en lerwa’ e dan ki sans nou lalang i koz parey sa ki en sekreter kalifye i ekrir?
3 Lir Psonm 45:1. * Sa “bon keksoz” ki’n tous leker sa psalmis oubyen motiv li i konsernan en lerwa. Dan langaz Ebre, sa lekspresyon ki’n ganny tradwir “touse” ti literalman vedir “bwi.” Se konmsi sa keksoz ti fer leker sa psalmis bwi avek lantouzyasm e fer son lalang koz parey “sa ki en sekreter kalifye [ti pou] ekrir.”
4 Me nou? Sa bon nouvel konsernan sa Rwayonm kot Kris pe dirize konman Lerwa i en bon keksoz ki tous nou leker. Sa mesaz Rwayonm in sirtou vin “bon” an 1914. Depi sa letan, sa mesaz i nepli pe koz lo en Rwayonm dan lavenir, me sa Rwayonm i en vre gouvernman ki deza pe fonksyonnen dan lesyel. Sanmenm sa “Bonn Nouvel Rwayonm” ki nou pe prese “partou dan lemonn pour tou dimoun konnen.” (Mat. 24:14) Eski sa mesaz Rwayonm i ‘tous’ nou leker? Eski nou pres sa bon nouvel lo Rwayonm avek devouman? Parey sa psalmis, nou “kantik i konsernan en lerwa,” setadir nou Lerwa Zezi Kri. Nou anonse ki Zezi pe aprezan dirize konman Lerwa dan sa Rwayonm. An plis ki sa, nou envit tou dimoun, dirizan konman sitwayen, pour soumet avek son dominasyon. (Ps. 2:1, 2, 4-12) Nou lalang i koz parey “sa ki en sekreter kalifye i ekrir” dan sa sans ki nou vreman servi byen Labib dan predikasyon.
‘PAROL AGREAB I SORTI DAN LABOUS LERWA’
5. (a) Dan ki sans Zezi ti “zoli”? (b) Dan ki fason ‘parol ekstraordiner ti sorti dan labous sa Lerwa’ e ki mannyer nou kapab fer zefor pour imit son legzanp?
5 Lir Psonm 45:2. * Labib pa dir bokou konsernan laparans fizik Zezi. Konman en zonm parfe, sirman i ti “zoli.” Me, sa ki ti fer li pli zoli se son fidelite ek lentegrite anver Zeova. Deplis, Zezi ti koz bann “parol ekstraordiner” ler i ti pres sa mesaz Rwayonm. (Lik 4:22; Zan 7:46) Eski personnelman nou pe fer zefor pour imit son legzanp dan predikasyon e swazir byen nou parol pour tous leker lezot?—Kol. 4:6.
6. Ki mannyer Bondye in beni Zezi “pour touzour”?
6 Lefet ki Zezi ti servi Bondye avek tou son leker, Zeova ti beni li pandan son minister lo later e i ti rekonpans li apre ki i ti’n sakrifye son lavi. Zapot Pol ti ekrir: “Konman en zonm, i [Zezi] ti aksepte viv dan limilite e montre li obeisan ziska lanmor, menm lanmor lo [“en poto martir,” NW], pour sa rezon Bondye in elev li pli o ki tou, e donn li en non pli enportan ki tou lezot non, pour ki devan non Zezi tou sa ki dan lesyel, lo later e dan lemonn pli ba ki later i tonm azenou, E ki tou lalang i proklanmen, ki Zezi-Kri i Senyer pour laglwar Bondye, Papa.” (Fili. 2:8-11) Zeova in beni Zezi “pour touzour” par resisit li pour en lavi imortel dan lesyel.—Rom. 6:9.
SA LERWA I GANNY MET PLI O KI “LEZOT LERWA”
7. Dan ki fason Bondye ti apwent Zezi plis ki “lezot lerwa”?
7 Lir Psonm 45:6, 7. * Lefet ki Zezi ti annan en gran lanmour pour ladrwatir e i ti ay okenn keksoz ki ti kapab anmenn laont lo non son Papa, Zeova ti swazir li konman Lerwa sa Rwayonm. Zezi ti ganny apwente avek “delwil lazwa” plis ki “lezot lerwa,” setadir bann lerwa Zida ki sorti dan desandans David. Ki mannyer? En rezon se ki Zeova li menm ki ti apwent Zezi. Deplis, Zeova ti apwent li konman Lerwa ek Gran Pret. (Ps. 2:2; Ebr. 5:5, 6) An plis ki sa, Zezi pa ti ganny apwente avek delwil, me avek lespri sen e son Rwayonm i dan lesyel e non pa lo later.
8. Dan ki sans i kapab ganny dir ki ‘Bondye i tronn Zezi’ e akoz nou kapab asire ki son dominasyon i drwat?
8 Zeova ti etablir son Garson konman Lerwa son Rwayonm dan lesyel an 1914. ‘Baton ou rwayonm i en baton ladrwatir,’ alor nou kapab asire ki son dominasyon pou enn ki drwat e rezonnab. Vi ki ‘Bondye i son tronn,’ i annan drwa pour annan sa lotorite. Andotmo, Zeova ki’n apwent li lerwa sa Rwayonm. Deplis, tronn Zezi pou dire “pour touzour.” Pa ou fyer pour servi Zeova anba gidans sa Lerwa pwisan ki Bondye in apwente?
SA LERWA I ‘MET SON LEPE DAN SON KOTE’
9, 10. (a) Kan ki Kris ti met son lepe dan son kote e ki mannyer i ti servi li deswit? (b) Ki mannyer Kris pou servi son lepe dan lavenir?
9 Lir Psonm 45:3. * Zeova i demann son Lerwa pour ‘met son lepe dan son kote.’ Dan sa sans, i pe donn lotorizasyon Zezi pour lager avek tou bann ki opoz souvrennte Bondye e egzekit Son zizman lo zot. (Ps. 110:2) Vi ki Kris i en Lerwa e Gerye pwisan, i ganny apele “sa enn pwisan.” I ti met son lepe dan son kote an 1914 e i ti ranport laviktwar lo Satan ek son bann demon ler i ti tir zot dan lesyel e zet zot dan zalantour later.—Rev. 12:7-9.
10 Sa ti zis konmansman laviktwar pour sa Lerwa. I reste li zis pour konplet son “laviktwar.” (Rev. 6:2) I reste pour Zeova egzekit zizman lo tou bann eleman lemonn Satan lo later e lenfliyans Satan ek son bann demon i bezwen ganny retire. Premye pour ganny detri se Gran Babilonn, setadir tou bann fo larelizyon. Zeova pou servi bann dirizan politik pour detri sa move “prostitye.” (Rev. 17:16, 17) Apre sa, sa Lerwa e Gerye pou atak sistenm politik Satan e detri li konpletman. Apre, Kris ki osi ganny apele “lanz labim” pou konplet son laviktwar par met Satan ek son bann demon dan labim. (Rev. 9:1, 11; 20:1-3) Annou vwar ki mannyer Psonm 45 ti profetiz sa bann levennman eksitan.
SA LERWA I MONT SON SEVAL “POUR DEFANN LAVERITE”
11. Dan ki fason Kris i mont son seval “pour defann laverite”?
11 Lir Psonm 45:4. * Sa Lerwa e Gerye pa lager pour en teritwar ouswa pour domin lo en serten group dimoun. I annan bann bon rezon pour lager pour ladrwatir. I mont son seval “pour defann laverite ek limilite ek ladrwatir.” Sa pli gran laverite ki merit ganny defann i souvrennte iniversel Zeova. Satan ti kestyonn drwa Zeova pour dirize ler i ti rebel kont Li. Depi sa, bann demon ek imen in fer parey. La aprezan, ler in arive pour Lerwa Zeova ki i’n swazir mont son seval pour prouve enn fwa pour tou ki Zeova i sa enn ki annan drwa pour dirize.
12. Dan ki fason sa Lerwa i mont son seval ‘pour defann limilite’?
12 Sa Lerwa i osi mont son seval ‘pour defann limilite.’ Konman sel Garson Bondye, i’n kit en bon legzanp limilite e i’n fidelman soumet avek souvrennte son Papa. (Iza. 50:4, 5; Zan 5:19) Tou sitwayen fidel sa Lerwa i devret swiv son legzanp e avek limilite soumet anver souvrennte Zeova dan tou keksoz. Zis sa bann ki fer li ki pou kapab viv dan sa nouvo lemonn ki Bondye in promet.—Zeka. 14:16, 17.
13. Dan ki fason Kris pou mont son seval ‘pour defann ladrwatir’?
13 Kris i osi mont son seval ‘pour defann ladrwatir.’ Sa ladrwatir ki sa Lerwa i defann se “ladrwatir Bondye,” setadir standar Zeova konsernan sa ki byen ek mal. (Rom. 3:21; Det. 32:4) Izai ti profetiz sa konsernan Lerwa Zezi Kri: “En lerwa pou rennyen pour ladrwatir.” (Iza. 32:1) Renny Zezi pou anmenn en “nouvo lesyel” ek “nouvo later” ki’n ganny promet kot pou annan ladrwatir. (2 Pyer 3:13) Tou zabitan sa nouvo lemonn pou bezwen viv annakor avek bann standar Zeova.—Iza. 11:1-5.
SA LERWA I AKONPLI “BANN KEKSOZ EKSTRAORDINER”
14. Ki mannyer lanmen drwat Kris pou akonpli “bann keksoz ekstraordiner”? (Vwar portre lo paz 3.)
14 Anmezir i ale lo son seval, sa Lerwa i annan en lepe ki’n ganny mete dan son kote. (Ps. 45:3) Me ler in arive pour li pran son lepe e byen servi li avek son lanmen drwat. Sa psalmis ti profetize: “Ou lanmen drwat pou akonpli bann keksoz ekstraordiner.” (Ps. 45:4) Kan Zezi Kri i mont son seval pour egzekit zizman Zeova zour Armagedon, i pou akonpli “bann keksoz ekstraordiner” kont son bann lennmi. Nou pa konnen ki i pou servi pour detri lemonn Satan. Me sa aksyon ki i pou pran pou fer per bann zabitan later ki pa’n ekout lavertisman Bondye pour soumet avek dominasyon sa Lerwa. (Lir Psonm 2:11, 12. *) Dan son profesi konsernan letan lafen, Zezi ti dir ki dimoun ti pou “tonm feb avek lafreyer dan lenkyetid konsernan sa ki pou arive lo later; akoz bann pisans dan lesyel pou’n dekontrole.” I ti osi azoute: “Zot pou war Fis-de-Lonm vini dan en nyaz avek gran pisans ek gran laglwar.”—Lik 21:26, 27.
15, 16. Lekel ki pou form parti “bann larme” ki swiv Kris dan batay?
15 Pour anons larive sa Lerwa avek “pwisans ek gran laglwar” pour egzekit zizman, liv Revelasyon i dir: “Mon ti war lesyel ouver, e la en seval blan ti aparet. Sa ki ti pe mont li ti apel Fidel e Vre. I zize e konbat avek lazistis. Bann larme lesyel, abiye dan linenn blan e pir, i swiv li lo bann seval blan. Dan son labous i sorti en lepe byen koupe ki i pou servi pour frap bann nasyon avek, e i pou renny lo zot avek en baton an-fer. Avek son lipye i pou pil dan preswar, diven gran lakoler Bondye Toupisan.”—Rev. 19:11, 14, 15.
16 Lekel ki pou lager akote sa gerye e form parti “bann larme” lesyel ki swiv li dan batay? Ler i ti met son lepe dan son kote pour premye fwa pour tir Satan ek bann demon dan lesyel, “bann lanz” ti akonpanny Zezi. (Rev. 12:7-9) I fer sans pour konklir ki zour Armagedon i pou annan bann lanz dan larme Kris. Eski i pou annan lezot osi? Zezi ti fer sa promes avek son bann frer swazir: “Sa ki ranport laviktwar, sa ki kontinyen mon travay ziska lafen, mon pou donn li pouvwar lo bann nasyon, parey mwan, mon’n resevwar avek mon Papa. I pou diriz zot avek en baton feray, parey bann po later ki ganny kas par morso.” (Rev. 2:26, 27) Alor larme Kris dan lesyel pou osi enkli son bann frer swazir ki sa letan pou’n resevwar zot rekonpans dan lesyel. Sa bann ki pou diriz ansanm avek Kris pou lo son kote kan i akonpli “bann keksoz ekstraordiner” anmezir ki i diriz bann nasyon avek son baton feray.
SA LERWA I KONPLET SON LAVIKTWAR
17. (a) Ki sa seval blan ki Kris i monte i reprezante? (b) Ki sa lepe ek fles i reprezante?
17 Lir Psonm 45:5. * Sa Lerwa pe mont en seval blan e sa i reprezant en lager pir e drwat dan lizye Zeova. (Rev. 6:2; 19:11) An plis ki annan en lepe, i osi annan en fles. Nou lir: “Mon ti war en seval blan. Sa ki ti pe mont li ti annan en fles dan son lanmen, e zot ti donn li en kouronn; i ti ale konman en venker e pour ganny laviktwar.” Sa lepe ek fles i reprezant sa mwayen ki Kris pou servi pour egzekit zizman lo son bann lennmi.
18. Dan ki fason “bann dart” Kris pou “pwent”?
18 Dan en langaz poetik, sa psalmis i profetize ki bann dart sa Lerwa ‘i pwent e zot pik leker son bann lennmi’ e ‘fer bann pep tonbe devan li.’ I pou annan gran versman disan partou lo later. Zeremi ti profetize: “Sa bann ki Zeova i touye pou depi en bout later ziska en lot bout later.” (Zer. 25:33) En profesi ki preski parey i dir: “Mon ti war en lanz debout dan soley. I ti kriy avek en lavwa for, avek tou bann zwazo dan lezer, ‘Rasanble pour sa gran festen Bondye. Vini pour manz laser bann lerwa, laser bann zeneral, bann gran, laser bann seval ek zot kavalye, laser tou dimoun: lib konman lesklav, pti konman gran.’”—Rev. 19:17, 18.
19. Ki mannyer Kris pou “ale pour ranport laviktwar”?
19 Apre ki i’n detri move sistenm Satan lo later, Kris ‘dan son splander’ pou “ale pour ranport laviktwar.” (Ps. 45:4) I pou ganny laviktwar konplet ler i met Satan ek son bann demon dan labim pandan sa Mil An ki i pou dirize. (Rev. 20:2, 3) Vi ki Satan ek son bann demon sa letan pou dan en leta inaktif, dan zar konmsi zot in mor, bann zabitan later pou’n ganny libere avek lenfliyans Satan e zot pou kapab soumet antyerman avek zot Lerwa ki’n ranport laviktwar. Avan ki zot kapab vwar later gradyelman transformen pour vin en paradi, zot pou annan en lot rezon pour zwaye ansanm avek zot Lerwa ek son bann asosye. Sa levennman zwaye pou ganny diskite dan lartik ki swiv.
[Not anba lo paz]
^ par. 3 Psonm 45:1: “En bon keksoz in tous mon leker. Mon pe dir: ‘Sa ki mon fer i annan pour fer avek en lerwa.’ Ki sa ki mon lalang i dir i parey sa ki en sekreter kalifye i ekrir.”
^ par. 5 Psonm 45:2: “Vreman ou pli zoli ki bann garson zonm. Bann parol agreab i sorti dan ou labous. Pour sa rezon Bondye in beni ou pour touzour.”
^ par. 7 Psonm 45:6, 7: “6 Bondye i ou tronn pour en letan endefini, wi pour touzour, baton ou rwayote i en baton ladrwatir. 7 Ou’n kontan ladrwatir e ou ay sa ki mal. Pour sa rezon Bondye, ou Bondye in vers delwil lazwa lo ou latet plis ki lezot lerwa.”
^ par. 9 Psonm 45:3: “Ou sa enn pwisan, met ou lepe dan ou kote avek dinyite ek splander.”
^ par. 11 Psonm 45:4: “E dan ou splander ale pour ou ganny laviktwar; mont ou seval pour defann laverite ek limilite ek ladrwatir. Ou lanmen drwat pou akonpli bann keksoz ekstraordiner.”
^ par. 14 Psonm 2:11, 12: “11 Servi Zeova avek lakrent e tranble avek lazwa. 12 Anbras son garson, pour ki i pa ankoler e pour ki zot pa mor lwen avek sa semen, parski son lakoler i mont fasilman. Byennere tou bann ki pran refiz dan li.”
^ par. 17 Psonm 45:5: “Ou bann dart i pwent e zot pou pik leker bann lennmi lerwa e fer bann pep tonbe lanmenm la devan ou.”
[Kestyon]
[Ekstre lo paz 4]
Nou anons sa bon nouvel konsernan nou Lerwa Zezi Kri avek lazwa
[Portre lo paz 7]
Bann zwazo pou ganny apele pour netway later (Vwar paragraf 18)
