1, 2. Mɛni hewɔ esa akɛ wɔsusu Lala 45 lɛ he lɛ?

ANUNYAM maŋtsɛ ko tá okpɔŋɔ nɔ kɛyawu jalɛ kɛ anɔkwale he ta eshi ehenyɛlɔi. Beni eye amɛnɔ kunim kɛmɔ shi lɛ, ekpee ayemforo fɛfɛo ko. Akai nɔ ni maŋtsɛ lɛ fee lɛ, ni awo ehiɛ nyam kɛtee naanɔ. Enɛ ji sane titri ni Lala 45 lɛ wieɔ he.

² Shi nibii babaoo yɛ ni wɔbaanyɛ wɔkase kɛjɛ sane ni yɔɔ Lala 45 lɛ mli. Esaa wɔhe ŋmɛnɛ, ni ebaasa wɔhe wɔsɛɛ hu. Belɛ, nyɛhaa wɔsusua lala nɛɛ he jogbaŋŋ wɔkwɛa.

3, 4. (a) Mɛni ji “wiemɔ kpakpa” ni wɔshiɛɔ lɛ, ni te ebaanyɛ ená wɔtsui nɔ hewalɛ eha tɛŋŋ? (b) Mɛɛ gbɛ nɔ ‘nɔ ni wɔfeɔ lɛ kɔɔ maŋtsɛ ko he’? Mɛni haa wɔlilɛi feɔ tamɔ woloŋmaanɔ?

³ Nyɛkanea Lala 45:2. “Wiemɔ kpakpa” ní “eyi” lalatsɛ lɛ tsuiŋ “eteke nɔ” lɛ kɔɔ maŋtsɛ ko he. Sane nɛɛ ha lalatsɛ lɛ tsui yi kɛteke nɔ kɛ ekãa, ni eha elilɛi fee tamɔ “niŋmalɔ ni he yɔɔ oya woloŋmaanɔ.”

⁴ Ni wɔ hu? Mesia Maŋtsɛyeli lɛ he sane kpakpa lɛ ji wiemɔ kpakpa ko ni taa wɔtsuiŋ waa. Maŋtsɛyeli lɛ he sane lɛ bafee wiemɔ “kpakpa,” titri lɛ, yɛ afi 1914 mli.  Kɛjɛ nakai beaŋ kɛbaa nɛɛ, sane lɛ kɔɔɔ Maŋtsɛyeli ko ni baaba wɔsɛɛ lɛ he dɔŋŋ, shi moŋ ekɔɔ nɔyeli ko ni yɔɔ shihilɛ mli amrɔ nɛɛ yɛ ŋwɛi lɛ he. Enɛ ji “maŋtsɛyeli lɛ he sane kpakpa” ni wɔshiɛɔ ‘wɔtsɔɔ je nɛŋ fɛɛ, ní wɔkɛyeɔ jeŋmaji lɛ fɛɛ odase’ lɛ. (Mat. 24:14) Ani wɔ hu ‘wɔtsui eyi eteke nɔ’ kɛ Maŋtsɛyeli lɛ he sane lɛ? Ani wɔkɛ ekãa shiɛɔ Maŋtsɛyeli lɛ he sane kpakpa lɛ? Taakɛ eji yɛ lalatsɛ lɛ gbɛfaŋ lɛ, wɔ hu ‘nɔ ni wɔfeɔ lɛ kɔɔ maŋtsɛ ko he’—Yesu Kristo, wɔ-Maŋtsɛ lɛ. Wɔjajeɔ akɛ, lɛ ji mɔ ni awo akɛ Mesia Maŋtsɛyeli lɛ nɔ Maŋtsɛ yɛ ŋwɛi. Kɛfata he lɛ, wɔkɛɔ mɛi fɛɛ—nɔyelɔi kɛ mɛi ni ayeɔ amɛnɔ lɛ—akɛ amɛba amɛhe shi amɛha enɔyeli lɛ. (Lala 2:1, 2, 4-12) Kɛ́ wɔkɛ Nyɔŋmɔ Wiemɔ ni aŋma lɛ tsu nii yɛ shiɛmɔ nitsumɔ lɛ mli lɛ, wɔlilɛi feɔ tamɔ “niŋmalɔ ni he yɔɔ oya woloŋmaanɔ.”

5. (a) Mɛɛ nibii ha Yesu ‘he fee fɛo’? (b) Mɛɛ gbɛ nɔ ‘duromɔ wiemɔi jɛ Maŋtsɛ lɛ naa,’ ni te wɔɔfee tɛŋŋ wɔkase lɛ lɛ?

⁵ Nyɛkanea Lala 45:3. Nɔ ko fioo pɛ Ŋmalɛ lɛ wieɔ yɛ bɔ ni Yesu he yɔɔ fɛo ha beni eyɔɔ shikpɔŋ lɛ nɔ lɛ he. Akɛni eji adesa ni eye emuu hewɔ lɛ, eka shi faŋŋ akɛ ‘ehe yɛ fɛo.’ Shi anɔkwa ni eye Yehowa kɛyawula shi lɛ ji nɔ ni ha ehe fee fɛo waa lɛ. Kɛfata he lɛ, Yesu kɛ “duromɔ wiemɔi” tsu nii beni ejajeɔ Maŋtsɛyeli lɛ he sane lɛ. (Luka 4:22; Yoh. 7:46) Akɛ aŋkroaŋkroi lɛ, ani wɔbɔɔ mɔdɛŋ akɛ wɔbaakase lɛ yɛ wɔshiɛmɔ nitsumɔ lɛ mli, ní wɔkɛ wiemɔi ni baashɛ mɛi atsui he lɛ atsu nii?—Kol. 4:6.

6. Mɛɛ gbɛ nɔ Nyɔŋmɔ jɔɔ Yesu kɛtee “naanɔ”?

⁶ Akɛni Yesu jɛ etsui muu fɛɛ mli esɔmɔ Nyɔŋmɔ hewɔ lɛ, Yehowa jɔɔ lɛ yɛ eshikpɔŋ nɔ sɔɔmɔ nitsumɔ lɛ mli, ni ejuro lɛ beni ekɛ ewala eshã afɔle lɛ sɛɛ. Bɔfo Paulo ŋma yɛ Yesu shihilɛ akɛ gbɔmɔ lɛ he akɛ: “Eba ehe shi ni ebo toi kɛtee gbele mli, kɛtee sɛŋmɔtso nɔ gbele mli tete. Enɛ hewɔ hu ni Nyɔŋmɔ wó enɔ gojoo, ni eduro lɛ gbɛ́i ní tá gbɛ́i fɛɛ gbɛ́i nɔ, koni mɛi ni yɔɔ ŋwɛi kɛ mɛi ni yɔɔ shikpɔŋ lɛ nɔ kɛ mɛi ni yɔɔ shikpɔŋ lɛ shishi lɛ anakutso fɛɛ nakutso akula shi yɛ Yesu gbɛ́i lɛ amli, ní lilɛi fɛɛ lilɛi agbá mli kpoo ákɛ Yesu Kristo ji Nuŋtsɔ kɛwo tsɛ Nyɔŋmɔ lɛ hiɛ nyam.” (Fil. 2:8-11) Yehowa jɔɔ Yesu kɛtee “naanɔ” kɛtsɔ shi ni etee lɛ ni eduro lɛ wala ni anyɛŋ hiɛ akpata lɛ nɔ.—Rom. 6:9.

7. Mɛɛ gbɛ nɔ Nyɔŋmɔ fɔ Yesu mu fe ‘enanemɛi’ lɛ?

⁷ Nyɛkanea Lala 45:7, 8. Akɛni Yesu sumɔɔ jalɛ waa, ni enyɛɔ nɔ fɛɛ nɔ ni wooo e-Tsɛ lɛ hiɛ nyam hewɔ lɛ, Yehowa fɔ lɛ mu akɛ Mesia Maŋtsɛyeli lɛ nɔ Maŋtsɛ. Akɛ “mlifilimɔ mu” fɔ lɛ fe ‘enanemɛi’ lɛ fɛɛ, ni ji maŋtsɛmɛi ni jɛ David wekutɔkpaa lɛ mli ni ye nɔ yɛ Yuda lɛ. Yɛ mɛɛ gbɛ nɔ? Klɛŋklɛŋ kwraa lɛ, Yehowa diɛŋtsɛ fɔ Yesu mu. No sɛɛ lɛ, Yehowa fɔ lɛ mu akɛ Maŋtsɛ kɛ Osɔfonukpa fɛɛ. (Lala 2:2; Heb. 5:5, 6) Kɛfata he lɛ, jeee mu folo ko kɛkɛ  akɛfɔ Yesu, shi moŋ, mumɔ krɔŋkrɔŋ, ni ebaaye maŋtsɛ yɛ ŋwɛi, shi jeee shikpɔŋ lɛ nɔ.

8. Mɛɛ gbɛ nɔ abaanyɛ akɛɛ akɛ ‘Nyɔŋmɔ ji Yesu maŋtsɛsɛi,’ ni mɛni hewɔ wɔbaanyɛ wɔná nɔmimaa akɛ ebaaye jalɛ sane lɛ?

⁸ Yehowa wó e-Bi lɛ Mesia Maŋtsɛyeli lɛ nɔ Maŋtsɛ yɛ ŋwɛi yɛ afi 1914. ‘Emaŋtsɛyeli tso lɛ, jalɛ tso ni,’ no hewɔ lɛ wɔyɛ nɔmimaa akɛ ebaaye jalɛ sane, ni ekwɛŋ mɛi ahiɛaŋ. Hegbɛ ni ekɛyeɔ nɔ lɛ sa, ejaakɛ ‘Nyɔŋmɔ ji emaŋtsɛsɛi.’ Enɛ tsɔɔ akɛ, Yehowa ji mɔ ni to emaŋtsɛyeli lɛ shishi. Kɛfata he lɛ, Yesu maŋtsɛsɛi lɛ baama shi kɛya “naanɔi anaanɔ.” Ani eŋɔɔɔ onaa akɛ oosɔmɔ Yehowa yɛ Maŋtsɛ ni yɔɔ hewalɛ tamɔ nɛkɛ, ni Nyɔŋmɔ diɛŋtsɛ hala lɛ lɛ shishi?

9, 10. (a) Mɛɛ be Kristo kɛ eklante lɛ ŋmɔ ehɛ, ni te ekɛtsu nii amrɔ nɔŋŋ eha tɛŋŋ? (b) Mɛni ekoŋŋ Kristo kɛ eklante lɛ baatsu wɔsɛɛ?

⁹ Nyɛkanea Lala 45:4. Yehowa kɛɛ e-Maŋtsɛ lɛ koni ‘ekɛ eklante aŋmɔ ehɛ,’ ni tsɔɔ akɛ efã Yesu ni ewu ta eshi mɛi fɛɛ ni teɔ shi woɔ Nyɔŋmɔ nɔyeli lɛ, ni ekpata amɛhiɛ. (Lala 110:2) Akɛni Kristo ji Maŋtsɛ Tabilɔ ni anyɛɛɛ enɔ kunim aye hewɔ lɛ, atsɛ lɛ “Ekãalɔ.” Ekɛ eklante lɛ ŋmɔ ehɛ yɛ afi 1914, ni eye Satan kɛ edaimonioi lɛ anɔ kunim, ni eshɛrɛ amɛ eshwie kɛjɛ ŋwɛi kɛba shikpɔŋ lɛ niiaŋ.—Kpoj. 12:7-9.

¹⁰ Ta ni Maŋtsɛ lɛ fã koni eyaye kunim lɛ shishijee kɛkɛ nɛ. Shi esa akɛ “eye kunim” kɛyawula shi. (Kpoj. 6:2) Kpaako kwraa abaatsu Yehowa kojomɔi ahe nii ashi Satan nibii agbɛjianɔtoo ni yɔɔ shikpɔŋ lɛ nɔ lɛ, ni abaatsĩ Satan kɛ edaimonioi lɛ anaa koni amɛkaná mɛi anɔ hewalɛ dɔŋŋ. Klɛŋklɛŋ lɛ, abaakpata Babilon Kpeteŋkpele lɛ, ni ji apasa jamɔi fɛɛ ni yɔɔ je lɛ mli lɛ hiɛ kwraa. Eji Yehowa yiŋtoo akɛ, ebaatsɔ je lɛŋ nɔyelɔi lɛ anɔ ekpata “ajwamaŋ” nɛɛ hiɛ. (Kpoj. 17:16, 17) No sɛɛ lɛ, Maŋtsɛ Tabilɔ lɛ baawu eshi Satan maŋkwramɔŋ gbɛjianɔtoo lɛ, ni ebaakpata hiɛ butuu. Kɛkɛ lɛ, Kristo, ni atsɛɔ lɛ “bu kwɔŋkwɔŋ lɛ mli bɔfo lɛ” baagbe ekunimyeli lɛ naa kɛtsɔ Satan kɛ edaimonioi lɛ ni ekɛ amɛ baawo bu kwɔŋkwɔŋ lɛ mli lɛ nɔ. (Kpoj. 9:1, 11; 20:1-3) Nyɛhaa wɔkwɛa bɔ ni Lala 45 lɛ wieɔ saji ni yɔɔ miishɛɛ nɛɛ ahe.

11. Mɛɛ gbɛ nɔ Kristo fãa “anɔkwale” he ta?

¹¹ Nyɛkanea Lala 45:5. Maŋtsɛ Tabilɔ lɛ wuuu ta koni ekɛye maji babaoo anɔ kunim, ní ená mɛi babaoo ni eye amɛnɔ. Moŋ lɛ, ewuɔ jalɛ he ta yɛ yiŋtoi kpakpai ahewɔ. Efãa “anɔkwale kɛ mlijɔlɛ [heshibaa, NW] kɛ jalɛ” he ta. Anɔkwale ni he hiaa fe fɛɛ ni esa akɛ afã he ji, anɔkwale ni kɔɔ Yehowa jeŋ muu fɛɛ nɔyeli lɛ he lɛ. Beni Satan tse Yehowa hiɛ atua lɛ, ete shi ewo hegbɛ ni Yehowa yɔɔ akɛ eyeɔ nɔ lɛ. Kɛjɛ nakai beaŋ kɛbaa nɛɛ, daimonioi kɛ adesai hu ete shi amɛwo hegbɛ ni Yehowa yɔɔ akɛ eyeɔ nɔ lɛ. Amrɔ nɛɛ, be eshɛ ni Maŋtsɛ ni Yehowa efɔ lɛ mu lɛ baafã ta koni ekɛha anɔkwale ni kɔɔ hegbɛ ni Yehowa yɔɔ akɛ eyeɔ nɔ lɛ he lɛ afee faŋŋ shi kome nyɔŋlo.

12. Mɛɛ gbɛ nɔ Maŋtsɛ lɛ fãa “heshibaa” he ta?

¹² Maŋtsɛ lɛ fãa “heshibaa” hu he ta. Akɛ Nyɔŋmɔ Bi koome lɛ, Yesu ba ehe shi, ni efi e-Tsɛ lɛ sɛɛ akɛ jeŋ muu fɛɛ nɔyelɔ, ni ekɛ enɛ fee nɔkwɛmɔnɔ ni sa jogbaŋŋ eha wɔ. (Yes. 50:4, 5; Yoh. 5:19) Esa akɛ mɛi fɛɛ ni fiɔ Maŋtsɛ lɛ  sɛɛ lɛ akase enɔkwɛmɔnɔ lɛ, ni amɛba amɛhe shi amɛha Yehowa nɔyeli lɛ yɛ nɔ fɛɛ nɔ mli. Mɛi ni feɔ nakai lɛ pɛ abaaha amɛhi jeŋ hee ni Nyɔŋmɔ ewo he shi lɛ mli.—Zak. 14:16, 17.

13. Mɛɛ gbɛ nɔ Kristo wuɔ “jalɛ” he ta?

¹³ Kristo wuɔ “jalɛ” hu he ta. Jalɛ ni Maŋtsɛ lɛ fãa he lɛ ji, “Nyɔŋmɔ jalɛ,” ni ji Yehowa shishitoo mlai ni kɔɔ nɔ ni ja kɛ nɔ ni ejaaa he lɛ. (Rom. 3:21; 5 Mose 32:4) Yesaia gba yɛ Maŋtsɛ Yesu Kristo he akɛ: “Maŋtsɛ ko baaye maŋtsɛ yɛ jalɛ naa.” (Yes. 32:1) Yesu nɔyeli lɛ kɛ “ŋwɛi hee” kɛ “shikpɔŋ hee” ni “jalɛ hiɔ mli” ni awo he shi lɛ baaba. (2 Pet. 3:13) Enɛ tsɔɔ akɛ, esa akɛ mɛi fɛɛ ni baahi nakai jeŋ hee lɛ mli lɛ ahi shi yɛ Yehowa jalɛ shishitoo mlai lɛ anaa.—Yes. 11:1-5.

14. Mɛɛ gbɛ nɔ Kristo ninejurɔ baatsu “nii ni yɔɔ gbeyei”? (Kwɛmɔ mfoniri ni yɔɔ nikasemɔ lɛ shishijee lɛ.)

¹⁴ Beni Maŋtsɛ lɛ tá okpɔŋɔ lɛ, klante ŋmɔ ehɛ. (Lala 45:4) Shi be eshɛ ni esa akɛ ekɛ eninejurɔ afã klante lɛ, ni ekɛtsu nii. Lalatsɛ lɛ gba akɛ: ‘Oninejurɔ aaatsɔɔo nii ní yɔɔ gbeyei!’ (Lala 45:5) Kɛ́ Yesu Kristo fã koni ebakpata Satan je lɛ hiɛ yɛ Harmagedon lɛ, ebaatsu “nii ni yɔɔ gbeyei” eshi ehenyɛlɔi lɛ. Wɔleee gbɛ tuuntu ni ebaatsɔ nɔ ekpata Satan nibii agbɛjianɔtoo lɛ hiɛ. Shi nakai hiɛkpatamɔ lɛ baaha shikpɔŋ lɛ nɔ bii ni booo kɔkɔ ni Nyɔŋmɔ ha abɔ akɛ aba he shi aha Maŋtsɛ lɛ toi lɛ atsui afã. (Nyɛkanea Lala 2:11, 12.) Yɛ Yesu gbalɛ ni kɔɔ naagbee be lɛ he lɛ mli lɛ, ewie akɛ: “Nɔ̃ aaanyɔnyɔɔ gbɔmɛi anɔ yɛ gbeyei kɛ nibii ní baa je lɛŋ lɛ agbɛkwɛmɔ hewɔ; ejaakɛ aaahoso ŋwɛi hewalɛi lɛ tete.” Ni ekɛfata he akɛ: “Kɛkɛ lɛ amɛaana gbɔmɔ bi lɛ akɛ eeba yɛ atatuŋ kɛ hewalɛ kɛ anunyam babaoo.”—Luka 21:26, 27.

15, 16. Namɛi ji “tai” ni baafata Kristo he kɛwu lɛ?

¹⁵ Beni Kpojiemɔ wolo lɛ bɔɔ bɔ ni Maŋtsɛ lɛ baaba “kɛ hewalɛ kɛ anunyam babaoo” ní ebakpata ehenyɛlɔi lɛ ahiɛ lɛ he amaniɛ lɛ, ewie akɛ: “Mina ní agbele ŋwɛi naa, ni naa, okpɔŋɔ yɛŋ, ni mɔ ni tá nɔ lɛ, atsɛ́ɔ lɛ akɛ: Heyelilɔ kɛ Anɔkwafo; ni jalɛ naa ekojoɔ ni ewuɔ ta. Ni tai ní yɔɔ ŋwɛi lɛ tara okpɔŋɔi yɛji anɔ kɛnyiɛ esɛɛ, ni amɛwo klala yɛŋ ní he tse. Ni tsi ní naa ba jɛɔ edaaŋ, koni ekɛ no atswia jeŋmajiaŋbii lɛ anii; ní ekɛ dadetso akpala amɛ. Ni lɛ nɔŋŋ enaanaa Nyɔŋmɔ Ofe lɛ mlifu ní naa wa lɛ weinŋãa nɔ̃ lɛ nɔ.”—Kpoj. 19:11, 14, 15.

¹⁶ Namɛi ji “tai” ni yɔɔ ŋwɛi ni nyiɛ Kristo sɛɛ ni baafata ehe kɛyawu lɛ? Beni Yesu kɛ eklante lɛ ŋmɔ ehɛ klɛŋklɛŋ kwraa ni eshwie Satan kɛ edaimonioi lɛ kɛjɛ ŋwɛi lɛ, no mli lɛ “ebɔfoi lɛ” fata ehe. (Kpoj. 12:7-9) Belɛ nilee yɛ mli akɛ wɔɔmu sane naa akɛ, yɛ Harmagedon ta lɛ mli lɛ, bɔfoi krɔŋkrɔŋi lɛ baafata Kristo he kɛwu. Ani mɛi krokomɛi hu baafata ehe kɛyawu? Yesu wo enyɛmimɛi ni afɔ amɛ mu lɛ shi akɛ: “Kunimyelɔ lɛ kɛ mɔ ni toɔ minitsumɔi lɛ kɛyashiɔ naagbee lɛ, maha lɛ hegbɛ yɛ jeŋmaji lɛ anɔ, ni ekɛ dadetso aaakpala amɛ ni eeejwara amɛ tamɔ ajwaraa sũ-gbɛi lɛ, taakɛ bɔ ni mi hu miná kɛjɛ mitsɛ ŋɔɔ lɛ.” (Kpoj. 2:26, 27) No hewɔ lɛ, Kristo nyɛmimɛi ni afɔ amɛ mu ni no mli lɛ amɛ fɛɛ amɛnine eshɛ amɛŋwɛi juromɔnɔ lɛ nɔ lɛ hu baafata ehe kɛwu. Mɛi ni afɔ amɛ mu ni baafata ehe kɛye  nɔ lɛ baafata ehe kɛtsu “nii ni yɔɔ gbeyei” beni ekɛ dadetso kpalaa jeŋmaji lɛ.

17. (a) Mɛni okpɔŋɔ yɛŋ ni Kristo tá nɔ lɛ tsɔɔ? (b) Mɛni klante kɛ gãi lɛ fɛɛ damɔ shi kɛha?

¹⁷ Nyɛkanea Lala 45:6. Maŋtsɛ lɛ tá okpɔŋɔ yɛŋ nɔ, ni tsɔɔ akɛ, ta ni ewuɔ lɛ he tse ni eja yɛ Yehowa hiɛ. (Kpoj. 6:2; 19:11) Ehiɛ gãi hu kɛfata klante lɛ he. Biblia lɛ kɛɔ akɛ: “Mikwɛ, ni naa, okpɔŋɔ yɛŋ; ni mɔ ni tá enɔ lɛ hiɛ gãi, ni aha lɛ akekre, ni eje kpo eeye kunim, koni esaa eye kunim.” Klante kɛ gãi lɛ fɛɛ damɔ shi kɛha gbɛ ni Kristo baatsɔ nɔ ekpata ehenyɛlɔi lɛ ahiɛ lɛ.

18. Kɛ́ Kristo kɛ ‘egãimlibii’ lɛ tsu nii lɛ, mɛni baaba?

¹⁸ Lalatsɛ lɛ gba akɛ, Maŋtsɛ lɛ ‘gãimlibii lɛ anaa ba, ni amɛtsurɔɔ ehenyɛlɔi lɛ atsuiiaŋ,’ ni ehaa ‘maji tswiatswiaa shi yɛ ehiɛ.’ Hiɛkpatamɔ lɛ baaya nɔ yɛ shikpɔŋ muu lɛ fɛɛ nɔ. Yeremia gba akɛ: “Mɛi ní Yehowa aaagbe yɛ nakai gbi lɛ nɔ lɛ aaakamɔ shi kɛaajɛ shikpɔŋ lɛ naagbeehe kome kɛaatee shikpɔŋ lɛ naagbeehe kroko.” (Yer. 25:33) Gbalɛ kroko ni wie nɔ kome too lɛ he lɛ hu kɛɛ akɛ: “Ni mina bɔfo ko damɔ hulu mli, ni ebo kɛ gbee wulu ekɛɛ loofɔji ní filikiɔ yɛ ŋwɛi lɛ fɛɛ akɛ: Nyɛbaa ní nyɛbabuaa nyɛhe naa yɛ Nyɔŋmɔ okpɔlɔ kpeteŋkpele lɛ he, koni nyɛbaye maŋtsɛmɛi aloo kɛ asafoiatsɛmɛi aloo kɛ hewalɔi aloo kɛ okpɔŋɔi aloo kɛ mɛi ní tara amɛnɔ lɛ aloo kɛ odehei kɛ nyɔji kɛ mɛi bibii kɛ mɛi wuji fɛɛ aloo.”—Kpoj. 19:17, 18.

19. Mɛɛ gbɛ nɔ Kristo baaya eyaye kunim, ni egbe ekunimyeli lɛ naa kwraa?

¹⁹ Beni Kristo ekpata Satan nibii agbɛjianɔtoo fɔŋ lɛ hiɛ yɛ shikpɔŋ lɛ nɔ lɛ, ebaafã yɛ ‘egbojee lɛ mli’ ni eyaye kunim. (Lala 45:5) Ebaagbe ekunimyeli lɛ naa kɛtsɔ Satan kɛ edaimonioi lɛ ni ekɛbaawo bu kwɔŋkwɔŋ lɛ mli kɛyashi Afii Akpe Nɔyeli lɛ naagbee lɛ nɔ. (Kpoj. 20:2, 3) Kɛ́ atsĩ Abonsam kɛ edaimonioi lɛ anaa awo bu kwɔŋkwɔŋ lɛ mli lɛ, amɛnyɛŋ amɛfee nɔ ko nɔ ko dɔŋŋ. Akɛni Satan nyɛŋ ená mɛi ni yɔɔ shikpɔŋ lɛ nɔ lɛ anɔ hewalɛ dɔŋŋ hewɔ lɛ, amɛbaanyɛ amɛba amɛhe shi amɛha amɛnunyam Maŋtsɛ ni eye kunim lɛ agbɛnɛ. Shi dani shikpɔŋ muu lɛ fɛɛ baatsɔ paradeiso lɛ, shikpɔŋ lɛ nɔ bii nɛɛ baaná yiŋtoo kroko ni amɛbaadamɔ nɔ amɛkɛ Maŋtsɛ lɛ kɛ ehefatalɔi ni yɔɔ ŋwɛi lɛ aná miishɛɛ. Wɔbaasusu nakai miishɛɛ be lɛ he yɛ nikasemɔ ni nyiɛ sɛɛ lɛ mli.