1, 2. ¿Mbaʼérepa iñimportánte ñandéve g̃uarã Salmo 45?

PETEĨ rréi hekomimbipáva osẽ ikavaju ári oñorairõ hag̃ua pe añetegua ha tekojoja rehehápe. Oganamba rire iñenemigokuérape ha omohuʼã rire iñorairõ, omenda peteĩ nóvia neporãvare. Ko rréi rehe opavavénte imanduʼáta ha oñembotuicháta chupe opa árare. Koʼã mbaʼére oñeñeʼẽ Salmo 45-pe.

² Upéicharõ jepe, Salmo 45 ndahaʼéi omombeʼúnteva peteĩ istória oñemohuʼã porãva. Umi mbaʼe oĩva pype iñimportanteterei avei ñandéve g̃uarã. Oñeʼẽ hína heta mbaʼe oikóvare koʼág̃a ha oikótavare ñane renonderãme. Upévare, ñahesaʼỹijo porãmína koʼã mbaʼe.

3, 4. a) ¿Mbaʼépa hína pe “mbaʼe neporãva” iñimportantetéva ñandéve g̃uarã, ha mbaʼéichapa ñamombeʼu vaʼerã upéva? b) ¿Mbaʼe mensáhepa ñameʼẽ ‘peteĩ rréigui’? c) ¿Mbaʼéicha javépa ñande juru “haʼete pe punsón oiporúva oskrivi hag̃ua peteĩ kopísta ikatupyrýva”?

³ (Elee Salmo 45:1.) Pe salmísta oikuaa “peteĩ mbaʼe neporãva” peteĩ rréigui ha ‘ipyʼarory’ opytávo. Upéva omokyreʼỹeterei chupe ha ijuru “haʼete pe punsón oiporúva oskrivi hag̃ua peteĩ kopísta ikatupyrýva”.

⁴ Peichaite avei pe marandu porã oñeʼẽva pe Rréino Mesiánikore  haʼe “peteĩ mbaʼe neporãva” opokóva ñane korasõre. Ko mensáhe koʼýte ‘iporãvéntema’ áño 1914-pe. ¿Mbaʼérepa jaʼe upéva? Upe áño guive noñeñeʼẽvéima peteĩ goviérno oútavare, síno peteĩ Rréino oisãmbyhýmavare yvágape. Ko mensáhe haʼe hína pe “marandu porã oñeʼẽva Ñandejára Rréinore” japredikáva “oparupiete ko yvy ape ári, ojekuaa hag̃ua opa tetãrupi” (Mat. 24:14). ¿‘Ñanembopyʼarorýpa’ avei ko mensáhe? ¿Japredikápa kyreʼỹme pe marandu porã oñeʼẽva Ñandejára Rréinore? Pe salmístaicha avei, ñande ñañeʼẽ “peteĩ rréire”. Ñamombeʼu opárupi Jesucrístogui oikoha Rréi pe Rréino Mesiánikope. Avei ñainvita opavavépe, umi mburuvichápe jepe, oñemoĩ hag̃ua Cristo goviérno poguýpe (Sal. 2:1, 2, 4-12). Ha jaiporu jave Ñandejára Ñeʼẽ japredika hag̃ua, ñande juru “haʼete pe punsón oiporúva oskrivi hag̃ua peteĩ kopísta ikatupyrýva”.

5. a) ¿Mbaʼérepa ikatu jaʼe Jesús haʼe hague peteĩ kuimbaʼe ‘iporãitereíva’? b) ¿Mbaʼéichapa Jesús oiporu “umi ñeʼẽ neporã porãva”, ha mbaʼéichapa ikatu ñahaʼanga chupe?

⁵ (Elee Salmo 45:2.) La Bíbliape noñemombeʼúi oimépa Jesús iporã rakaʼe. Péro haʼe perfékto vaʼekue, upévare ikatu jaʼe ‘iporãitereíne’ hague. Upéicharõ jepe, oĩ ambue mbaʼe omoporãvéntemava chupe: iñeʼẽrendu Jehovápe opaite mbaʼépe. Hiʼarive oiporu “umi ñeʼẽ neporã porãva” oñemongeta jave umi héntendi pe Rréinore (Luc. 4:22; Juan 7:46). ¿Ñañehaʼãpa jasegi Jesús ehémplo japredika jave ha jaiporu umi ñeʼẽ opokóva ñande rapicha korasõre? (Col. 4:6.)

6. ¿Mbaʼéichapa Jehová ovendesi Jesúspe “opa árare”?

⁶ Jesús iñeʼẽrendu Jehovápe ipyʼaite guive, upévare Jehová ovendesi hembiapo ko yvy ape ári ha ohepymeʼẽ chupe ontrega rire hekove sakrifísioramo. Apóstol Pablo ohai: “Oikórõ guare chugui yvypóra haʼe oñemomirĩ ha iñeʼẽrendu omano meve, ha omano pe yvyra pohýire. Upévare voi Ñandejára ombotuicha Jesúspe, omeʼẽ chupe peteĩ puésto ijyvatevéva, ha pyʼaporãme omeʼẽ chupe pe téra iporãvéva entéro umi ótro téragui. Péicha, Jesús rérape oñesũta enterovéva (umi oĩva yvágape, umi oĩva yvy ape ári ha umi oĩva yvyguýpe), ha enterovéva ohechakuaáta Jesucristo haʼeha ñande Ruvicha, ha péicha oñembotuicháta ñande Ru Ñandejárape” (Filip. 2:8-11). Jehová ovendesi Jesúspe “opa árare” omoingove jeývo chupe ha ojapóvo chugui peteĩ tekove ikatuʼỹva omano (Rom. 6:9).

7. ¿Mbaʼéichapa Jehová ombotuichave Jesúspe ‘iñirũnguéragui’?

⁷ (Elee Salmo 45:6, 7.) Jesús ningo ohayhueterei pe tekojoja ha ndaijaʼéi opa mbaʼe ikatúvare omongyʼa Itúva réra. Upévare Jehová oiporavo chupe Rréi pe Rréino Mesiánikope g̃uarã. Jehová ‘ombotuichave [Jesúspe] iñirũnguéragui’, térã entéro umi rréi oúva David ñemoñarégui ogoverna vaʼekue Judá. Avei onombra chupe “pe aséite oporombovyʼáva rupive”. ¿Mbaʼépa heʼise koʼã mbaʼe? Primero, Jehová voi oiporavo Jesúspe. Segundo, ndahaʼéi onombráva chupe Rreirã añónte, síno avei oservi hag̃ua Saserdóte Guasúramo (Sal. 2:2; Heb. 5:5, 6). Tercero, Jehová ndoiporúi aséite oiporavo hag̃ua Jesúspe, síno  onombra chupe espíritu sánto rupive. Ha cuarto, Jesús goviérno ndahaʼéi ko yvy ape arigua, síno yvagapegua.

8. a) ¿Mbaʼérepa jaʼekuaa Jesús goviérno poguýpe oĩtaha tekojoja? b) ¿Mbaʼérepa ikatu jaʼe Ñandejára haʼeha Jesús “tróno”?

⁸ Áño 1914-pe Jehová omoĩ Itaʼýrape ogoverna hag̃ua pe Rréino Mesiániko. Ñandejára Ñeʼẽ heʼi Jesús rehe: “Ne Rréino haʼe peteĩ Rréino ogovernátava tekojojápe”. Jahechaháicha, Jesús omoĩta hustísia ha otratáta opavavépe peteĩchapa. La Biblia heʼi avei: “Ñandejára hína ne tróno”. Upéicharõ, ikatu jaʼe Jesucristo orekoha derécho ogoverna hag̃ua, Jehová voi haʼe rupi pe omopyendáva igoviérno. Avei Jesús tróno opytáta “opa ára g̃uarã”. ¡Ajépa javyʼaite jaservi haguére Jehovápe, Jesucristo poguýpe, pe Rréi ipoderósova haʼe voi onombra vaʼekue!

9, 10. a) ¿Arakaʼépa Cristo omoĩ ijespáda ikuʼáre, ha maʼerãpa oiporu? b) ¿Mbaʼéichapa Jesús oiporúta ijespáda amo gotyove?

⁹ (Elee Salmo 45:3.) Jehová omanda pe Rréi haʼe voi oiporavóvape ‘omoĩ hag̃ua ijespáda ikuʼáre’. Péicha omeʼẽ chupe permíso oñorairõ hag̃ua opavave omboykéva ndive Jehová goviérno ha ohundi hag̃ua chupekuéra (Sal. 110:2). Jesús ningo peteĩ Rréi Gerréro ha ndaipóri ipuʼakáva hese, upévare ojeʼe hese ‘ipoderosoitereiha’. Haʼe omoĩ ijespáda ikuʼáre áño 1914-pe. Upérõ oñorairõ Satanás ha idemoniokuéra ndive yvágape ha oity chupekuéra ko yvy ape ári (Apoc. 12:7-9).

¹⁰ Upe áñope pe Rréi oñepyrũ ogana iñenemigokuérape, péro oho hína “omohuʼã hag̃ua iñorairõ” (Apoc. 6:2). Ofalta gueteri ohundi opa mbaʼe oĩva Satanás múndope. Avei oñapytĩ vaʼerã Satanás ha idemoniokuérape anive hag̃ua oreko ipoguýpe yvyporakuérape. Ñepyrũrã ohundíta Babilonia Guasu, térã entéro rrelihión japu. Jehová oiporúta umi mburuvicha oĩvape ko múndope ohundi hag̃ua ko ‘kuña rekovai’ (Apoc. 17:16, 17). Upe rire pe Rréi oñorairõta umi polítiko kóntrape ha ohundíta avei chupekuéra. Ha ipahápe Jesucristo omohuʼãta iñorairõ oitývo Satanás ha idemoniokuérape pe yvykua pypukúpe. Crístore ojeʼe voi haʼeha pe “ánhel orekóva ikárgope pe yvykua pypuku” (Apoc. 9:1, 11; 20:1-3). Jahechamína mbaʼéichapa ojeprofetisa koʼã mbaʼe Salmo 45-pe.

11. ¿Mbaʼéichapa Cristo osẽ oñorairõ pe “añetegua [...] rehehápe”?

¹¹ (Elee Salmo 45:4.) Pe Rréi Gerréro noñorairõi ojagarra hag̃ua yvy ni omoĩ hag̃ua ipoguýpe heta puévlo, síno ohupyty hag̃ua ambue mbaʼe iñimportantevéva. Osẽ ikavaju ári oñorairõ hag̃ua “añetegua, tekomirĩ ha tekojoja rehehápe”. ¿Mbaʼéichapa oñorairõ pe “añetegua [...] rehehápe”? Pe añetegua iñimportantevéva pe Rréi odefende vaʼerã haʼe hína pe derécho Jehová orekóva ogoverna hag̃ua opa mbaʼe ári. Péro opuʼãrõ guare Ñandejárare, Satanás ontendeka kuri Jehová ndorekoiha derécho ñanesãmbyhy hag̃ua. Upe guive, heta demónio ha yvypóra osegi otaky Jehová goviérnore. Péro pe Rréi Ñandejára oiporavo vaʼekue odefendéta pe añetegua opa ára g̃uarã, ha og̃uahẽmbaitéma pe tiémpo ojapo hag̃ua upéva.

12. ¿Mbaʼéichapa pe Rréi osẽ oñorairõ pe “tekomirĩ [...] rehehápe”?

¹² Pe Rréi osẽ avei oñorairõ hag̃ua “tekomirĩ [...] rehehápe”. Jesús ningo Ñandejára Raʼy peteĩete, ha ohechauka vaʼekue hekomirĩ ha oñemoĩha ipyʼaite guive Itúva goviérno poguýpe (Is. 50:4, 5; Juan 5:19). Opavave oñemoĩva pe Rréi poguýpe osegi vaʼerã iñehémplo. Tekotevẽ avei hekomirĩ  ha oñemoĩ ipyʼaite guive Jehová goviérno poguýpe. Umi ojapóva upéicha añoite ikatúta oikove Ñandejára múndo pyahúpe (Zac. 14:16, 17).

13. ¿Mbaʼérepa jaʼekuaa Cristo osẽha oñorairõ pe “tekojoja rehehápe”?

¹³ Cristo osẽ avei oñorairõ hag̃ua pe “tekojoja rehehápe”. ¿Mbaʼépa pe tekojoja haʼe odefendéva? Upéva hína Ñandejára hustísia, térã opa umi mbaʼe Jehová odesidíva oĩ porã térã oĩ vaiha (Rom. 3:21; Deut. 32:4). Isaías heʼi vaʼekue Rréi Jesucristo rehe: “Og̃uahẽta peteĩ tetã ruvicha guasu oisãmbyhýtava hustísia reheve” (Is. 32:1, ÑÑB). Oñepromete haguéicha, Jesús goviérno oguerúta “yvága ha yvy ipyahúva”, ha upépe “akóinte oĩta tekojoja” (2 Ped. 3:13). Opavave oikóva pe múndo pyahúpe okumpli vaʼerã Jehová ojeruréva (Is. 11:1-5).

14. ¿Mbaʼe mbaʼépa hína “umi mbaʼe tuichaitereíva” Jesús ojapótava ipo deréchape? (Ehecha pe taʼanga oĩva iñepyrũme.)

¹⁴ Pe Rréi ohóva ikavaju ári, ogueraha ijespáda ikuʼáre (Sal. 45:3). Péro oguenohẽta pe espáda ha oiporúta ipo deréchape. Pe salmísta oprofetisa Jesús ojapotaha “umi mbaʼe tuichaitereíva” ipo deréchape (Sal. 45:4, NM). Armagedónpe, Jesucristo ohóvo ikavaju ári oñorairõ hag̃ua iñenemigokuéra ndive, ojapóta “umi mbaʼe tuichaicháva”. Ndajaikuaái ningo mbaʼe mbaʼépa haʼe oiporúta ohundi hag̃ua ko múndo aña oĩva Satanás poguýpe. Péro umi mbaʼe ojapótava katuete omongyhyjéta opavave nopenái vaʼekuépe pe avíso Ñandejára omeʼẽvare ha noñemoĩriva pe Rréi poguýpe (elee Salmo 2:11, 12). Omeʼẽrõ guare pe profesía oñeʼẽva umi ára paháre, Jesús heʼi: “Umi kuimbaʼe katu odesmajáta kyhyjégui ohaʼarõ rupi umi mbaʼe oúva hína ko yvy ape ári; ha opa mbaʼe oĩva yvágape oñembokachapaitéta. Upévo ohecháta hikuái Yvypóra Raʼýpe ouha umi arai ári, tekomimbipa ha podér reheve” (Luc. 21:26, 27).

15, 16. ¿Máva mávapa oĩta pe ‘ehérsitope’ omoirũva Crístope oñorairõ hag̃ua?

¹⁵ Apóstol Juan omombeʼu avei pe Rréi outaha “tekomimbipa ha podér reheve” ohundi hag̃ua iñenemigokuérape. Haʼe heʼi: “Ahecha pe yvága ojavriha ha ¡péina!, peteĩ kavaju morotĩ. Ha pe oguapýva hiʼári héra Jeroviaha ha Añeteguáva, ha haʼe oporohusga ha oñorairõ tekojojápe. Avei umi ehérsito yvagapegua oho hapykuéri kavaju morotĩ ári, ha haʼekuéra omonde ao de líno iporã, ipotĩ ha morotĩva. Ijurúgui osẽ peteĩ espáda ipukúva ha hakuáva, haʼe oikutu hag̃ua umi tetãnguérape upe espádape. Ha haʼe ogovernáta chupekuéra vastón de iérro reheve. Avei haʼe opyrũ umi parrál rehe pe yvykua oñeñamiháme parrál rykue, orrepresentáva Ñandejára Ipuʼakapáva pochy rendy” (Apoc. 19:11, 14, 15).

¹⁶ ¿Máva mávapa oĩ umi “ehérsito” yvagapeguápe ohóva Cristo rapykuéri oñorairõ hag̃ua? Haʼe omoĩrõ guare primera ves ijespáda ikuʼáre oity hag̃ua Satanás ha idemoniokuérape yvágagui, omoirũ vaʼekue chupe “hiʼanhelkuéra” (Apoc. 12:7-9). Upévare ikatu jaʼe umi ánhel marangatu oĩtaha Cristo ehérsitope haʼe oñorairõ vove Armagedónpe. Péro, ¿oĩvétapa omoirũva chupekuéra upe ehérsitope? Jesús ojapo vaʼekue ko promésa umi iñermáno unhídope: “Pe oganáva ha ojapóvape che haʼéva ipahaite peve, ameʼẽta autorida ogoverna hag̃ua umi tetãnguérare. Haʼe oiporúta peteĩ vastón de iérro ogoverna hag̃ua umi héntepe, ha ohundíta chupekuéra. Haʼekuéra ojekapaitéta haʼeramoguáicha peteĩ kambuchi ojejapóva ñaiʼũgui. Peichagua autorida arresivi che Túvagui” (Apoc. 2:26, 27). Upéicharõ, Cristo ermanokuéra  unhído, oĩmbátamava yvágape upe tiémpope g̃uarã, oĩta avei ijehérsitope. Haʼekuéra oĩta ijykére haʼe ojapo vove “umi mbaʼe tuichaicháva”, ogovernávo umi tetãme vastón de iérro reheve.

17. a) ¿Mbaʼépa heʼise Cristo ohoha peteĩ kavaju morotĩ ári? b) ¿Mbaʼépa orrepresenta pe espáda ha pe árko?

¹⁷ (Elee Salmo 45:5.) Pe Rréi oho peteĩ kavaju morotĩ ári. Upéva heʼise pe ñorairõ ipotĩ ha ihustoha Ñandejára resa renondépe (Apoc. 6:2; 19:11). Pe Rréi ogueraha peteĩ espáda, ha avei peteĩ árko. La Biblia omombeʼu: “¡Péina!, ahecha peteĩ kavaju morotĩ, ha pe oguapýva hiʼári oreko peteĩ árko ha oñemeʼẽ chupe peteĩ koróna. Haʼe osẽ ipuʼaka hag̃ua iñenemigokuérare ha omohuʼã hag̃ua iñorairõ”. Pe espáda ha pe árko orrepresenta umi mbaʼe Cristo oiporútava ohundi hag̃ua iñenemigokuérape.

18. ¿Mbaʼérepa jaʼe pe ‘flécha hakuataha’ ág̃a pe Rréi oñorairõ vove?

¹⁸ Pe salmísta omombeʼu pe Rréi oiporutaha ‘flécha hakuáva’, oikututaha iñenemigokuérape ikorasõme ha ‘umi puévlo hoʼataha henondépe’. Heʼiháicha proféta Jeremías, ojejukáta hetaitereípe: “Umi Ñandejára ojukátava upe árape, opytáta ojepyso peteĩ yvy [apýragui] ambue [ijapýra] peve” (Jer. 25:33). Ha ótra profesía oñekumplítava avei upe tiémpope heʼi: “Avei ahecha peteĩ ánhel oñemboʼýva hína kuarahýpe, ha haʼe osapukái hatã ha heʼi entéro umi guyra ovevévape yvágare: ‘Peju koʼápe, peñembyaty Ñandejára karu guasurã, ikatu hag̃uáicha peʼu umi rréi roʼo, umi komandánte militár roʼo, umi kuimbaʼe imbaretéva roʼo, umi kavaju roʼo, umi kavaju arigua roʼo, ha entéro roʼo, tahaʼe umi orekóva liverta térã tembiguái, umi michĩva ha umi tuicháva’” (Apoc. 19:17, 18).

19. ¿Mbaʼéichapa Cristo osẽ ‘ogana hag̃ua’ ha omohuʼã hag̃ua iñorairõ?

¹⁹ Ohundi rire ko múndo aña oĩva Satanás poguýpe, Jesucristo, pe Rréi ‘ojajaipáva’ osegíta oñorairõ ‘ogana hag̃ua’ (Sal. 45:4, NM). Haʼe omohuʼãta iñorairõ oitývo Satanás ha idemoniokuérape pe yvykua pypukúpe, ha upépe haʼekuéra opytáta Cristo ogoverna aja Mil Áñore (Apoc. 20:2, 3). Ku omanoramoguáicha, pe Diablo ha hiʼanhelkuéra ndaikatumoʼãvéima ojapo mbaʼevete. Péicha opavave yvypóra isãsóta chuguikuéra ha ikatúta iñeʼẽrendu pe Rréi omohuʼã porãvape iñorairõ. Upéicharamo jepe, oiko mboyve ko Yvýgui peteĩ lugár neporãmba jepéva, entéro yvypóra ikatútama ovyʼa pe Rréi ha umi unhído ndive. Pe artíkulo oúvape jahecháta mbaʼépa hína pe ombovyʼaitétava opavavépe.