1, 2. Dahaka dainai ita dekenai Salamo karoa 45 be mai anina bada?

 KING hereadaena ta be hosi ai ia heau lao. Ia be hereva momokani bona kara maoromaoro totona do ia tuari. Ena inai taudia ia halusia bona ia kwalimu murinai, hahine hairaina ta ia adavaia. Unai king be uru ibounai ese idia laloatao, bona hanamoa ela bona hanaihanai. Unai be Salamo karoa 45 ena hereva badana.

² To, Salamo karoa 45 be gori ta sibona lasi. Hari bona vaira negana ai, ita dekenai unai karoa ese ia herevalaia gaudia be mai anina bada. Hari, Salamo karoa 45 do ita stadilaia bona laloa dobu.

3, 4. (a) “Hereva namo herea” be dahaka, bona edena dala ai iseda kudouna ia hamarerea diba? (b) Edena dala ai ‘king ta totona ane ita abia’? Edena dala ai iseda malana be “sivarai torea dekenai ia manada herea tauna ena peni” bamona ai ia lao?

³ Salamo 45:1 duahia. Salamo torea tauna be “hereva namo herea” ta ese ena kudouna ia “hahonua.” Unai be king ta ena sivarai. Unai sivarai dainai, salamo torea tauna ena kudouna be moale amo ia honu, bona ena malana be “sivarai torea dekenai ia manada herea tauna ena peni” bamona.

⁴ Ita be edena bamona? Iseda kudouna be Mesia Basileiana ena  sivarai namo hereana ese ia hamarerea danu. Lagani 1914 ai, Basileia ena sivarai be ia “namo herea” ia lao. Dahaka dainai? Badina unai lagani amo, unai sivarai be do ia mai Basileiana ia herevalaia lasi, to ia be hari guba ai ia lohia vadaeni gavamani ta ia herevalaia. Unai “Basileia ena sivarai namona be tanobada ibounai dekenai” ita harorolaia noho. (Mat. 24:14) Iseda kudouna be Basileia ena sivarai ese ia “hahonua,” a? Mai eda ura bada ida unai Basileia ena sivarai namona ita harorolaia, a? Salamo torea tauna bamona, ita be ‘king ta totona ane ita abia’—ia be King Iesu Keriso. Ita haroro ita gwau ia be guba ai Mesia Basileiana ena King. Ita ese taunimanima ibounai, bona lohia taudia danu, ita boiridia Iesu ena Basileia idia abia dae totona. (Sal. 2:1, 2, 4-12) Bona haroro gaukara ai Baibel ita gaukaralaia neganai, iseda malana be “sivarai torea dekenai ia manada herea tauna ena peni” bamona ai ia lao.

5. (a) Edena dala ai Iesu be mai ena ‘hairai’? (b) Edena dala ai ‘King ena uduna amo hereva namodia idia mai,’ bona edena dala ai ia ita tohotohoa diba?

⁵ Salamo 45:2 duahia. Baibel ese Iesu ena toana ia herevalaia momo lasi. To, ita gwau diba ia be mai ena ‘hairai,’ badina ia be goevadae tauna. Iena hairai be bada badina, ia be mai abidadama ida Iehova ia badinaia ela bona hanaihanai. Danu, Iesu be “hereva namodia” amo Basileia ena sivarai namona ia harorolaia. (Luka 4:22; Ioa. 7:46) Ita danu be ia ita tohotohoa bona haroro gaukara ai taunimanima edia kudouna idia hamarerea herevadia ita gaukaralaia, a?—Kol. 4:6.

6. Edena dala ai Dirava ese Iesu ia hanamoa “ela bona hanaihanai”?

⁶ Tanobada ai Iesu be mai ena kudouna ibounai ida Tamana ia hesiai henia, unai dainai Iehova ese ena gaukara ia hanamoa, bona ena mauri ia bouboulaia murinai hahenamo badana ia henia. Aposetolo Paulo ia gwau: “Ma danu, ia be taunimanima ta bamona ia hedinarai neganai, ia sibona ia hamanaua bona kamonai karana ia hahedinaraia ela bona mase, oibe, hisihisi auna dekenai ia mase. Unai badina dainai, Dirava ese ia dekenai dagi hereadaena ia henia bona ena hariharibada amo, ia ese ia dekenai ladana ibounai ia hereaia ladana ia henia. Vadaeni guba, tanobada, bona tano henunai idia noho taudia ibounai be Iesu ena ladanai do idia tui diho. Bona namona be taunimanima ibounai ese do idia gwauraia hedinarai, Iesu Keriso be Lohiabada, unai amo Dirava iseda Tamana do idia hanamoa.” (Fili. 2:8-11) Iehova ese Iesu ia hatorea isi lou bona mase diba lasi maurina ia henia, unai amo ia hanamoa “ela bona hanaihanai.”—Roma 6:9.

7. Edena dala ai Dirava ese Iesu ia horoa karana ese “king ma haida” ia hereaia?

⁷ Salamo 45:6, 7 duahia. a Iesu be kara maoromaoro ia ura henia bona ena Tamana ena ladana idia hadikaia gaudia ia inai henia dainai, Iehova ese Mesia Basileiana ena King ai ia halaoa. Dirava ese Iesu be ‘moale dehorona amo ia horoa,’ bona unai ese “king ma haida,” hegeregere Davida ena bese amo idia vara Iuda king idauidau ia hereaia. Edena dala ai? Gau ginigunana  be, Iehova sibona ese Iesu ia horoa. Iharuana be, Iehova ese King bona Hahelaga Tauna Badana ai ia halaoa. (Sal. 2:2; Heb. 5:5, 6) Ihatoina be, Iehova ese Iesu be dehoro amo lasi, to lauma helaga amo ia horoa. Ginigabena be, Iesu be tanobada ai lasi, to guba amo ia lohia.

8. Edena dala ai ita diba Iesu ena lohia dalana be maoromaoro? Dahaka dainai ita gwau diba ‘Dirava be Iesu ena terona’?

⁸ Iehova ese lagani 1914 ai Iesu be ena Mesia Basileiana ena King ai ia halaoa. Ena ‘basileia ena kepata be kara maoromaoro ena kepata,’ unai dainai ita diba Iesu ena lohia dalana be maoromaoro bona taunimanima be maka tamona ai do ia kara henidia. Iesu ia lohia be maoro, badina ‘Dirava be iena terona.’ Unai ena anina be Iehova ese Iesu be King ai ia halaoa. Ma danu, Iesu ena terona be do ia noho “ela bona hanaihanai.” Ita moale badina, Iesu, Iehova ese ia abia hidi King goadana henunai, Iehova ita hesiai henia noho.

9, 10. (a) Edena negai Iesu ese ena tuari kaia be ena gaba gauna ai ia kwatua, bona edena dala ai ia gaukaralaia? (b) Vaira negana ai, edena dala ai Iesu ese ena tuari kaia do ia gaukaralaia?

⁹ Salamo 45:3 duahia. Iehova ese ena King ia hamaoroa ena tuari kaia be ena gaba gauna ai do ia kwatua. Unai ese ia hahedinaraia Ia ese Iesu dekenai gwaumaoro ia henia, Iena lohia siahuna idia dadaraia taudia do ia tuari henia bona hadikaia ore totona. (Sal. 110:2) Keriso be ia lusi diba lasi Tuari King dainai, idia gwauraia “King mai goadana.” Lagani 1914 ai, ia ese ena tuari kaia ia kwatua. Unai negai ia kwalimu, badina Satani mai ena demoni ida be guba amo tanobada dekenai ia negea diho.—Apok. 12:7-9.

¹⁰ Unai be Iesu ena kwalimu karana ena matamana sibona. To, namona be ena “kwalimu” karana do ia hagugurua. (Apok. 6:2) Iehova ena ura be Satani ena tanobada do ia haorea, bona Satani bona ena demoni do ia kokidia. Ginigunana be, Babulonia Badana, tomadiho koikoi oreadia ibounai unai, do ia hadikaia ore. Ia ese gavamani lohia taudia do ia gaukaralaia unai “ariara hahine” idia haorea totona. (Apok. 17:16, 17) Unai murinai, Keriso ese Satani ena tanobada politikol oreadia do ia haorea. Bena, Keriso, “guri dobu masemase ena aneru,” ese Satani bona ena demoni be guri dobu masemasena lalonai do ia negea diho. Unai ia karaia neganai ena kwalimu karana do ia guguru. (Apok. 9:1, 11; 20:1-3) Salamo karoa 45 ese unai gaudia ia herevalaia dalana mani ita itaia.

11. Edena dala ia Keriso be “hereva momokani” gimaia totona do ia tuari?

¹¹ Salamo 45:4 duahia. Tuari King be tano abia o taunimanima biagudia totona ia tuari lasi. To, ia be badina namona ta dainai ia tuari. Ia be “hereva momokani, [“manau,” NW] bona kara maoromaoro gimaia totona” tuari ia lao. Ia ura ia gimaia mai anina bada hereva momokanina be inai: Iehova be mai ena maoro tanobada bona guba ia lohiaia totona. Satani ia gwau-edeede neganai, ia hahedinaraia Iehova be maoro lasi tanobada bona guba ia lohiaia totona. Unai nega amo, demoni bona taunimanima ese unai hereva momokani badana idia dadaraia. Nega ia ginidae vadaeni, Dirava ese ia horoa King be Iehova ena lohia siahuna ena maoro hamomokania totona do ia tuari.

12. Edena dala ai King be ‘manau gimaia totona’ do ia tuari?

¹² King be ‘manau gimaia totona’ do ia tuari danu. Dirava sibona ese ia havaraia Natuna tamona be haheitalai namona, badina ia manau bona ena Tamana ena lohia siahuna ia badinaia. (Isa. 50:4, 5; Ioa. 5:19) Namona be King ese ia lohiaia taudia ibounai be ia idia tohotohoa bona gau ibounai lalonai, mai manau ida Iehova ena lohia siahuna idia badinaia. Unai  bamona taudia sibona be Dirava ese ia gwauhamatalaia tanobada matamata lalonai do idia vareai.—Sek. 14:16, 17.

13. Edena dala ai Keriso be ‘kara maoromaoro gimaia totona’ do ia tuari?

¹³ King be ‘kara maoromaoro gimaia totona’ ia tuari danu. Unai be “Dirava ena kara maoromaoro,” o Iena taravatu dahaka be maoro bona dahaka be kerere dekenai. (Roma 3:21; Deu. 32:4) Isaia ese King Iesu Keriso ia perovetalaia ia gwau: “King ta ese kara maoromaoro momokani dekena amo iena taunimanima do ia gunalaia.” (Isa. 32:1) Iesu ena lohia henunai “guba matamata bona tanobada matamata” do ia havaraia, bona unuseniai “kara maoromaoro sibona do ia noho.” (2 Pet. 3:13) Unai tanobada matamatana ai do idia noho taudia ibounai ese Dirava ena taravatu do idia badinaia be namo.—Isa. 11:1-5.

14. Edena dala ai Keriso ena imana idibana ese “hoa karadia mai garidia” do ia karaia? (Laulau ginigunana itaia.)

¹⁴ King be hosi amo ia heau lao lalonai, ena tuari kaia be gaba gauna dekenai ia kwatua. (Sal. 45:3) Bena ia ese iena imana idibana amo tuari kaia ia abia isi bona ia gaukaralaia. Salamo torea tauna ia gwau: “Oiemu [“imana idibana goadana,” BHḡ] ese, hoa karadia mai garidia danu do ia hedinaraia.” (Sal. 45:4) Aramagedono ai Iesu ese Iehova ena hahemaoro karana do ia karaia neganai, ia ese ena inai taudia dekenai “hoa karadia mai garidia” do ia karaia. Ita diba lasi edena dala ai Satani ena tanobada do ia hadikaia ore. To, Iesu ese do ia karaia gaudia be Dirava ena hereva idia kamonai lasi bona King ena lohia siahuna idia dadaraia taudia do ia hagaria. (Salamo 2:11, 12 duahia.) Iesu be dina gabedia ia herevalaia neganai, ia gwau: “Taunimanima do idia gari dikadika bona edia goada do ia ore, tanobada dekenai kahirakahira do idia vara gaudia dainai bona guba ena siahu gaudia be do idia mareremarere.” Ma ia gwau: “Idia ese taunimanima ena Natuna do idia itaia, mai ena siahu bona hairai bada ida ori lalonai do ia mai.”—Luka 21:26, 27.

15, 16. Iesu ena murinai do idia heau “tuari oreadia” be daidia?

¹⁵ Apokalupo bukana ese king be ‘mai ena hairai bona siahu’ ida do ia mai bona hahemaoro karana do ia karaia ia herevalaia, ia gwau: “Lau itaia guba ia kehoa, bona hosi kurokurona ta ia hedinarai. Bona unai hosi latanai ia helai tauna ena ladana be Abidadama bona Momokani, bona ia be kara maoromaoro dalanai ia hahemaoro bona ia tuari. Danu, guba ena tuari oreadia be hosi kurokurodia amo ia murinai idia lao, bona idia ese dabua namo hereadia idia hahedokilaia, unai dabua be idia kurokuro bona idia goeva. Bona iena uduna amo tuari kaia latana mai matana ia raka-lasi, unai tuari kaia amo tanobada besedia do ia tuari henia, bona ia ese auri itotohi amo idia do ia lohiaia. Danu, ia ese vain huahua moia gabuna do ia moia, unai be Siahu Ibounai Diravana ena badu siahuna.”—Apok. 19:11, 14, 15.

¹⁶ Iesu ena murinai do idia heau “guba ena tuari oreadia” be daidia? Matamanai, Iesu ese ena kaia be gaba gauna ai ia kwatua bona Satani bona ena demoni be guba amo ia negedia diho neganai, “aneru” ese Iesu idia durua. (Apok. 12:7-9) Unai dainai ita gwau diba Aramagedono tuarina ai, Iesu ena tuari oreana lalonai aneru helagadia do idia noho danu. Unai tuari oreana lalonai ma haida do idia noho danu, a? Iesu ese ena horoa tadikaka dekenai ia gwauhamata, ia gwau: “Ia kwalimu bona egu kara ia badinaia ela bona dokona tauna dekenai, siahu do lau henia bese idauidau ia lohiaia totona, egu Tamana amo siahu lau abia hegeregerena, bona ia ese auri itotohi amo taunimanima do ia lohiaia, vadaeni uro hegeregerena idia do ia makohia maragimaragi.” (Apok. 2:26, 27) Unai dainai Iesu ena tuari oreana lalonai, iena horoa tadikaka do idia noho danu, unai  negai guba ai edia ahuna idia abia vadaeni. Iesu ese “hoa karadia mai garidia” ia karaia ore murinai, bona auri itotohi amo taunimanima ia lohiaia lalonai, ia ida idia lohia horoa tadikaka be ia badinai do idia gini.

17. (a) Keriso ia helai hosi kurokurona ese dahaka ia laulaulaia? (b) Tuari kaia bona peva ese dahaka idia laulaulaia?

¹⁷ Salamo 45:5 duahia. King be hosi kurokurona ta latanai ia helai. Iehova ena matanai unai hosi ese tuari goevana bona maoromaorona ia laulaulaia. (Apok. 6:2; 19:11) King be mai ena tuari kaia bona peva. Apokalupo 6:2 ia gwau: “Vadaeni lau itaia, hosi kurokurona ta, bona ia latanai ia helai tauna be mai ena peva bona Dirava ese ia dekenai korona ta ia henia. Vadaeni ia lao bona ena inai taudia ia hadarerea, bena ia kwalimu.” Tuari kaia bona peva be Keriso ese ena inai taudia do ia hahemaoro henia karana idia laulaulaia.

18. Keriso ese ena “peva” ia gaukaralaidia neganai, dahaka do ia vara?

¹⁸ Salamo torea tauna ia gwau, King ena ‘peva ena diba be mai edia matana, idia ese king ena inai taudia, edia kudouna idia gwadaia’ bona ‘bese idauidau taudia be iena aena henunai idia hamorua.’ Unai dika be tanobada hegegemadai lalonai do idia vara. Ieremia ia peroveta ia gwau: “Unai neganai Lohiabada ese ia alaia ore vadaeni taudia edia tauanidia be tanobada ena dokona gabuna ela bona tanobada ena dokona gabuna dekenai do idia hekure.” (Ier. 25:33) Unai bamona peroveta herevana ma ta ia gwau: “Lau itaia danu, aneru ta be dina dekenai ia gini, ia boiboi badabada bona guba ai idia roho manudia dekenai ia gwau: ‘Umui mai, Dirava ena aria badana totona umui haboua. Vadaeni umui ese king edia tauanina, tuari biagudia edia tauanina, goada taudia edia tauanina, hosi edia tauanina, bona hosi latanai idia helai taudia edia tauanina, bona taunimanima ibounai edia tauanina, ura kwalimu taudia bona igui hesiai taudia, bona ladana maragi bona ladana bada taudia edia tauanina do umui ania.’”—Apok. 19:17, 18.

19. Edena dala ai Keriso ‘do ia kwalimu’?

¹⁹ King hereadaena Iesu Keriso be Satani ena tanobada dikana ia haorea murinai, mai siahu ida do ia lao bona ‘do ia kwalimu.’ (Sal. 45:4) Iena kwalimu karana ia hagugurua totona, Satani bona ena demoni be guri dobu masemase lalonai do ia guidia ela bona Lagani 1,000 Lohia Negana ia ore. (Apok. 20:2, 3) Unai negai, Diabolo bona ena demoni be idia mase bamona dainai taunimanima do idia hakaua kerere lasi, bona taunimanima be King ena lohia namona henunai do idia noho. To, tanobada be paradaiso ai ia do lao lasi neganai, badina ma ta dainai taunimanima be edia King bona 144,000 taudia ida do idia moale hebou. Stadi gabena ai unai do ita herevalaia.