1, 2. Ɛbɛ yɔɔ pɩwɛɛ se ɖɩmaɣzɩ tɔm ndʋ tɩwɛ Keɣa 44 taa yɔ, tɩ-yɔɔ?

 WIYAƲ ɖoŋ tʋ nɔɔyʋ caɣ kpaŋnʋ yɔɔ nɛ ɛlʋkɩ toovenim nɛ siɣsiɣ tɔm pɔ-yɔɔ, nɛ ɛlɩɩ se ɛwa e-koyindinaa. Ɛtɛzɩɣ wabʋ e-koyindinaa lɛ, ɛ nɛ asɛyʋ kʋsɔɔlʋ nɔɔyʋ pɔɖɔkɩ nesi. Pakaɣ tɔzʋʋ Wiyaʋ ɛnʋ ɛ-yɔɔ nɛ pɛɖɛyɩ-ɩ pɩnzɩ nɛ pɩnzɩ. Tɔm ndʋ Keɣa 44 yɔɔdʋʋ.

² Ɛlɛ, Keɣa 44 taa tɔm tɩkɛ kɛdaɣ kɩbaŋa ŋga kɛtɛmnɩ koboyaɣ tɔm yem yɔ. Tɔm ndʋ pɛkɛdɩ keɣa ŋga ka-taa yɔ, tɩwazɩɣ-ɖʋ. Pitukuuni ɖe-wezuu caɣʋ lɛɛlɛɛyɔ nɛ cee wayɩ. Iyele nɛ ɖɩkpaɣ alɩwaatʋ nɛ ɖɩtazɩ keɣa ŋga ka-taa camɩyɛ nɛ ɖɩna.

3, 4. (a) Ɛbɛ kɛnɩ ‘tɔm kɩbandʋ’ ndʋ titukuuni ɖa-laŋa yɔ? (b) Ɛzɩma tɩyɛ ‘ɖɩmakɩ keɣa se ɖɩɖɛyɩ ɖe-Wiyaʋ’? (c) Nɛ ɛzɩma ɖa-nzʋlʋmɩyɛ lakɩ tʋmɩyɛ ɛzɩ mayʋ ewosiye yɔ?

³ Kalɩ Keɣa 44:2. Wiyaʋ nɔɔyʋ yɔɔ tɔm kɛnɩ ‘tɔm kɩbandʋ’ ndʋ titukuni keɣa maɖʋ laŋɩyɛ nɛ ɛ-taa la “leleŋ” yɔ. Ebree tɔm piye nɖɩ pɛɖɛzaa se “man-taa labɩ leleŋ” yɔ, kiɖe tɛɛ lɛ ɖɩ-tɔbʋʋ lɛ se ‘ma-laŋɩyɛ taa wasɩɣ ɛzɩ lɩm  wasʋʋ miŋ yɔɔ yɔ.’ Wiyaʋ yɔɔ tɔm ndʋ, tiyeba nɛ taa leleŋ wasɩɣ keɣa maɖʋ laŋɩyɛ taa ɛzɩ lɩm wasʋʋ miŋ yɔɔ yɔ. Tiyeba ɖɔɖɔ nɛ ɛ-nzʋlʋmɩyɛ lakɩ tʋmɩyɛ “kɛlɛʋ ɛzɩ mayʋ ewosiye yɔ.”

⁴ Nɛ ɖa yɔ? Pɩtʋʋ fɛyɩ se Mesiya Kewiyaɣ laŋhɛzɩyɛ tɔm kɛnɩ tɔm kɩbandʋ ndʋ titukuuni ɖa-laŋa yɔ. Kewiyaɣ tɔm pɩsɩ tɔm kɩbandʋ siŋŋ pɩnaɣ 1914 taa. Kpaɣnɩ pɩnaɣ ŋga lɛ, Ɛsɔ Kewiyaɣ paɣzɩ ka-tʋmɩyɛ ɛsɔdaa nɛ pɩtɩtasɩ kɛʋ mbʋ pɩwɛɛ se ɖɩɖaŋ cee wayɩ yɔ. Nɛ “Kewiyaɣ tɔm kɩbandʋ” ndʋ ɖisusuu “ɛjaɖɛ kpeekpe taa, se ɛyaa kpeekpe ɩnɩɩ.” (Mat. 24:14) Ða-taa wɛ “leleŋ” nɛ Kewiyaɣ tɔm na? Ðisusuu Kewiyaɣ laŋhɛzɩyɛ tɔm nɛ kpekpeka na? Ɛzɩ keɣa maɖʋ yɔ, ‘ɖɩcaɣ se ɖɩma keɣa nɛ ɖɩɖɛyɩ ɖe-Wiyaʋ’ Yesu Krɩstʋ. Ðisusuu se ɛpɩsɩ Mesiya Kewiyaɣ Wiyaʋ ɛsɔdaa. Pɩtasɩ lɛ, ɖɩyaɣ tɛtʋ yɔɔ awiya nɛ pɛ-ɛyaa se poluzi pa-tɩ e-kewiyaɣ tɛɛ. (Keɣa 2:1, 2, 4-12) Nɛ ɖa-nzʋlʋmɩyɛ lakɩ tʋmɩyɛ “kɛlɛʋ ɛzɩ mayʋ ewosiye yɔ,” pʋ-tɔbʋʋ lɛ se ɖɩlakɩnɩ Masɩ tʋmɩyɛ sakɩyɛ ɖɔ-tɔm susuu taa.

5. (a) Hɔɔlɩŋ weyi taa Yesu kaaɖewa? (b) Ɛzɩma tɩyɛ ‘tɔm kɩbandʋ’ lɩɣaɣnɩ Yesu nɔɔ taa? (c) Nɛ ɛzɩma ɖɩpɩzɩɣ nɛ ɖɩmaɣzɩnɩ ɛ-kɩɖaʋ?

⁵ Kalɩ Keɣa 44:3. Bibl tɩyɔɔdɩ tɔm caaa Yesu ɛzɩdaa wɛtʋ yɔɔ. Ɛzɩma ɛɛkɛ ɛyʋ weyi ɛtalɩ pilim yɔ, pɩtʋʋ fɛyɩ se eeɖewa. Ɛlɛ e-keɖeɣa sɔsɔɔ lɛ e-tisuu nɛ e-siɣsiɣ wɛtʋ. Pɩtasɩ lɛ, ‘tɔm kɩbandʋ ɖeke’ lɩɣaɣnɩ Yesu nɔɔ taa alɩwaatʋ ndʋ esusaɣ Kewiyaɣ tɔm yɔ. (Luka 4:22; Yoh. 7:46) Ðɩñakɩ pana se ɖɩtɩŋ ɛ-kɩɖaʋ ɖɔ-tɔm susuu taa? Ðɩñakɩ pana se ɖɩyɔɔdɩ tɔm ndʋ titukuuni ɛyaa laŋa yɔ?—Kol. 4:6.

6. Ɛzɩma tɩyɛ Ɛsɔ wazɩ Yesu nɛ “wazaɣ maatɛŋ”?

⁶ Yesu labɩ Yehowa sɔɔlɩm nɛ laŋɩyɛ pilim, nɛ pʋyɔɔ lɛ Yehowa wazɩ-ɩ alɩwaatʋ ndʋ esusaɣ tɔm tɛtʋ yɔɔ yɔ; ɛwazɩ-ɩ ɖɔɖɔ ɛ-sɩm wayɩ. Apostoloo Pɔɔlɩ mawa se: “Ɛlabɩ ɛyʋ lakasɩ lɛ, ɛtasɩ ɛ-tɩ luzuu, ɛña pɩkɔɔ pɩtalɩ sɩm wiye, sɩm wiye nazɩm [sinzika] yɔɔ. Mbʋ pʋyɔɔ Ɛsɔ kpazɩ-ɩ nɛ ɛha-ɩ hɩɖɛ nɖɩ ɖɩkɩlɩ hɩla kpeekpe yɔ; se paya Yesu hɩɖɛ lɛ, paa nʋmbɔɖɛ nɖɩ lɛ, ɖiluŋ ɛsɔdaa, tataa nɛ hadɛ, nɛ paa nzʋlʋmɩyɛ nɖɩ lɛ, ɖisusi se: Yesu Krɩstʋ kɛ Kɩbaɣlʋ nɛ Caa Ɛsɔ hɩɖɛ sɛɛ.” (Fil. 2:7b-11) Yehowa wazɩ Yesu nɛ “wazaɣ maatɛŋ” mbʋ pʋyɔɔ yɔ efezi-i sɩɖaa taa nɛ ɛha-ɩ wezuu ŋgʋ sɩm tɩtasɩ wɛnʋʋ ɖoŋ kɩ-yɔɔ yɔ.—Rom. 6:9.

7. Ɛzɩma tɩyɛ Ɛsɔ ta Yesu num nɛ pɩkɩlɩ Daviid liɖe taa awiya lɛɛna?

⁷ Kalɩ Keɣa 44:7, 8. Yesu kaasɔɔlɩ siɣsiɣ wɛtʋ kpem nɛ ɛpaɖɩɣ mbʋ pɩpɩzaɣ se pipisi ɛ-Caa hɩɖɛ yɔ, nɛ pʋyɔɔ lɛ Yehowa taa-ɩ num nɛ ɛpɩsɩ-ɩ Mesiya Kewiyaɣ Wiyaʋ. Ɛta Yesu “sɔzɩŋ num, ahɛɛnɛɛ num cɔɔɔ; ɛtaataa mbʋ nɔɔyʋ.” Tɔm ndʋ, tɩwɩlɩɣ se ɛzɩma paata Yesu num yɔ, pɩkɩlɩ ɛzɩma pataɣaɣ num Yuda awiya mba palɩnɩ Daviid liɖe taa yɔ. Ɛzɩma tɩyɛ? Kajalaɣ lɛ, Yehowa maɣmaɣ tanɩ  Yesu num. Nabʋlɛ lɛ, Yehowa ta-ɩ num se ɛpɩsɩ Wiyaʋ nɛ ɛtɛ ɛkɛ Cɔjɔ Sɔsɔ. (Keɣa 2:2; Ebr. 5:5, 6) Nabudozo lɛ, pɩtɩkɛ num maɣmaɣ paata Yesu, ɛlɛ fezuu kiɖeɖeu; nɛ ɛsɔdaa ɛkaɣ e-kewiyitu tɔɔʋ, pɩtɩkɛ tataa.

8. (a) Ɛbɛ yɔɔ papɩzɩɣ nɛ pɔtɔ se ‘Ɛsɔ caɣzɩnɩ Yesu kewiyaɣ kpelaɣ yɔɔ’? (b) Nɛ ɛbɛ yɔɔ ɖɩɩpɩtɩɣ se Yesu kewiyitu tɔɔʋ kaɣ wɛʋ siɣsiɣ?

⁸ Yehowa kpa ɛ-Pɩyalʋ Wiyaʋ ɛsɔdaa pɩnaɣ 1914 taa. ‘E-kewiyaɣ ɖaʋ kɛ tʋtʋyɛ’ ɖaʋ, ye mbʋ ɖɩɩpɩtɩɣ se siɣsiɣ wɛtʋ kaɣ wɛʋ e-kewiyitu tɔɔʋ taa nɛ ɛɛkaɣ ɖʋʋ tʋkaɣ ɛyaa hɛkʋ taa. Ɛnʋ pɩmʋnaa se ɛtɔɔ kewiyitu, mbʋ pʋyɔɔ yɔ ‘Ɛsɔ caɣzɩnɩ-ɩ Kewiyaɣ kpelaɣ yɔɔ.’ Pʋ-tɔbʋʋ lɛ se Yehowa cɔlɔ e-kewiyaɣ lɩnaa. Pɩtasɩ lɛ, Yesu kewiyaɣ kaɣ wɛʋ pɩnzɩ nɛ pɩnzɩ. Ña-taa ɛɛlakɩ leleŋ se ŋwɛɛ Wiyaʋ ɖoŋ tʋ Mesiya kewiyaɣ ŋga kɛ-tɛɛ, nɛ ŋsɛɛ Yehowa na?

9, 10. (a) Ɛzɩmtaa Yesu tam ɛ-laɣɖɛ ɛ-tɩnaɣ taa? (b) Nɛ ɛzɩma tɩyɛ ɛpaɣzɩ-ɖɩ labɩnʋʋ tʋmɩyɛ kpaagbaa? (c) Ɛzɩma Krɩstʋ kaɣ tasʋʋ labɩnʋʋ ɛ-laɣɖɛ tʋmɩyɛ?

⁹ Kalɩ Keɣa 44:4. Yehowa heyi e-Wiyaʋ se ‘ɛta ɛ-laɣɖɛ ɛ-tɩnaɣ taa.’ Pɩwɩlɩɣ se ɛha Yesu nʋmɔʋ se ɛla you nɛ mba pakaɖɩɣnɩ Ɛsɔ Kewiyaɣ yɔ pa-tɩŋa nɛ eɖezi-wɛ. (Keɣa 109:2) Krɩstʋ kɛ Wiyaʋ weyi nɔɔyʋ ɛɛpɩzɩɣ nɛ ɛwa yɔ, pʋyɔɔ pasamɩ-ɩ se ɛwɛ “abalɩtʋ.” Pɩnaɣ 1914 taa ɛtam ɛ-laɣɖɛ ɛ-tɩnaɣ taa nɛ ɛwa Sataŋ nɛ ɛ-aleewaa. Ɛɖɔɔnɩ-wɛ ɛsɔdaa nɛ ɛlɔ-wɛ tataa.—Natʋ 12:7-9.

¹⁰ Pɩkɛ kajalaɣ ɖeɖe lɛ Wiyaʋ Yesu lɩʋ se ɛwa e-koyindinaa yɔ. Ɛlɛ pɩwɛɛ se ewolo pɩ-yɔɔ nɛ ɛtɛzɩ e-koyindinaa wabʋ. (Natʋ 6:2) Pɩwɛɛ se Yehowa nɩŋgbaaŋ hɔm ɛkɔɔ Sataŋ ɛjaɖɛ kpeekpe yɔɔ, nɛ paɖɩɣ Sataŋ nɛ ɛ-aleewaa salaka. Pakaɣ paɣzɩnʋʋ Babilooni Sɔsɔʋ ŋgʋ kɩkɛ ɛjaɖɛ kpeekpe yɔɔ cɛtɩm Ɛsɔ sɛtʋ agbaa yɔ. Yehowa ɖʋwa se ɛkaɣ tɩŋnʋʋ politiki agbaa yɔɔ nɛ eɖezi “halʋ acɛyɛ tʋ” ɛnʋ. (Natʋ 17:16, 17) Pʋwayɩ lɛ, Yesu kaɣ pam ɛza nɛ ɛjaɖɛ yɔɔ kominawaa nɛ ɛtɔyɩtɩ-wɛ. Nɛ pʋwayɩ ɖɔɖɔ lɛ, Krɩstʋ weyi patasɩ-ɩ yaʋ se “pɔʋ sɔsɔʋ tiyiyu, NW” yɔ, ɛkaɣ kpaʋ Sataŋ nɛ ɛ-aleewaa nɛ ɛɖʋ-wɛ pɔʋ sɔsɔʋ taa; pʋbʋ lɛ ɛtɛzɩ wabʋ lɛ. (Natʋ 9:1, 11; 20:1-3) Iyele nɛ ɖɩna ɛzɩma paayɔɔdɩ natʋ tɔm ndʋ Keɣa 44 taa yɔ.

11. Ɛzɩma tɩyɛ Krɩstʋ ‘lʋkɩ toovenim tɔm yɔɔ’?

¹¹ Kalɩ Keɣa 44:5. Yesu ɛɛlakɩ you se ɛmʋ tɛtʋ nɛ ɛkpa ɛyaa nɛ ɛpɩsɩ-wɛ yomaa. You ŋgʋ ɛlakɩ yɔ kɩwɛ siɣsiɣ, nɛ lɩmaɣza kɩbana yɔɔ ɛlakɩ-kʋ. Ɛlʋkɩ “[tɩ luzuu], toovenim nɛ siɣsiɣ tɔm pɔ-yɔɔ.” Toovenim tɔm sɔsɔtʋ ndʋ tɩ-yɔɔ pɩwɛɛ se ɛlʋ yɔ, ndʋ lɛ Yehowa kewiyitu kɩkɩlɩtʋ tɔɔʋ. Sataŋ kaɖɩnɩ Yehowa alɩwaatʋ ndʋ ɛtɔm se Yehowa ɛɛtɔkɩ kewiyitu camɩyɛ yɔ. Kpaɣnɩ mbʋ lɛ, aleewaa nɛ ɛyaa sakɩyɛ wɛɛ nɛ pamaɣzɩɣ se Yehowa ɛɛtɔkɩ e-kewiyitu camɩyɛ. Lɛɛlɛɛyɔ lɛ, alɩwaatʋ talaa se Wiyaʋ weyi Yehowa ta-ɩ num yɔ, ɛlʋ nɛ ɛwɩlɩ se Yehowa ɖeke pɩzɩɣna nɛ ɛtɔɔ kewiyitu ɛyaa yɔɔ.

12. Ɛzɩma tɩyɛ Yesu lʋkɩ tɩ luzuu yɔɔ?

¹² Yesu lʋkɩ ɖɔɖɔ tɩ luzuu yɔɔ. Yesu weyi ɛkɛ Ɛsɔ Pɩyalʋ ɛgbamɩyɛ yɔ, ɛha kɩɖaʋ kɩbaŋʋ tɩ luzuu nʋmɔʋ taa; eluzi ɛ-tɩ ɛ-Caa kewiyitu tɔɔʋ tɛɛ. (Iz. 50:4, 5; Yoh. 5:19) Mba pɛkɛ ɛ-lɩmɖʋyaa siɣsiɣ tɩnaa yɔ, pɩwɛɛ se pa-tɩŋa pamaɣzɩnɩ-ɩ nɛ poluzi pa-tɩ Yehowa kewiyitu kɩkɩlɩtʋ tɔɔʋ tɛɛ pɩtɩŋa pɩ-taa. Mba palakɩ mbʋ yɔ, pe-ɖeke pakaɣnɩ hiɣu  waɖɛ se pacaɣ ɛjaɖɛ kɩfaɖɛ taa.—Zek. 14:16, 17.

13. Ɛzɩma tɩyɛ Krɩstʋ ‘lʋkɩ siɣsiɣ tɔm yɔɔ?’

¹³ Krɩstʋ lʋkɩ ɖɔɖɔ ‘siɣsiɣ tɔm yɔɔ.’ Siɣsiɣ tɔm ndʋ tɩ-yɔɔ Wiyaʋ lʋkɩ yɔ, ndʋ lɛ “Ɛsɔ siɣsiɣ wɛtʋ.” Pɩkɛ paɣtʋ ndʋ Yehowa ɖʋwa nɛ tɩwɩlɩɣ mbʋ pɩkɛ kɩbandʋ nɛ kɩdɛkɛdɩm yɔ. (Rom. 3:21; Wp. 32:4) Izaayii kaayɔɔdɩ Yesu Krɩstʋ yɔɔ se: “Wiyaʋ tɔkɩ kewiyaɣ siɣsiɣ wɛtʋ yɔɔ.” (Iz. 32:1) Yesu kewiyitu tɔɔʋ kaɣ kɔnʋʋ “ɛsɔdaa kɩfalʋʋ nɛ tɛtʋ kɩfatʋ” ɛzɩ Ɛsɔ kaayɔɔdʋʋ yɔ, nɛ “peeɖe siɣsiɣ tɔm kaɣ wɛʋ.” (2 Pɩy. 3:13) Mba pakaɣ wɛʋ ɛjaɖɛ kɩfaɖɛ nɖɩ ɖɩ-taa yɔ, pakaɣ pɔzʋʋ pa-taa paa weyi se ɛɖɔ Yehowa paɣtʋ yɔɔ.—Iz. 11:1-5.

14. Ɛzɩma tɩyɛ Krɩstʋ nɩwaŋ nesi kaɣ labʋ “lakasɩ sɔsɔsɩ”? (Cɔnɩ kiɖe tɛɛ kɩlɛmʋʋ.)

¹⁴ Wiyaʋ caɣ ɛ-kpaŋnʋ yɔɔ nɛ ɛɖɛɣ, ɛtam ɛ-laɣɖɛ ɛ-tɩnaɣ taa. (Keɣa 44:4, 5) Ɛlɛ lɛɛlɛɛyɔ lɛ, alɩwaatʋ talaa se ɛkpɛɛ ɛ-laɣɖɛ nɛ ɛɖɔkɩ-ɖɩ ɛ-nɩwaŋ nesi tɛɛ. Keɣa maɖʋ kaayɔɔdaa se: “Ña-nɩwaŋ hoɖe ŋkaɣnɩ lakasɩ sɔsɔsɩ labʋ.” (Keɣa 44:6) Alɩwaatʋ ndʋ Yesu kaɣ kpaʋ ɛ-kpaŋnʋ yɔɔ se ɛla you Yehowa hɩɖɛ taa Armaagedɔɔ wiye yɔ, ɛkaɣ e-koyindinaa wɩlʋʋ “lakasɩ sɔsɔsɩ”. Ðɩɩsɩŋ mbʋ ɛkaɣ kpaɣʋ se eɖezini Sataŋ ɛjaɖɛ yɔ. Ɛlɛ, mbʋ ɛkaɣ labʋ puwiye yɔ, pɩkaɣ yebu nɛ sɔɔndʋ sɔsɔtʋ natʋyʋ kpa ɛyaa mba patiwelisi Ɛsɔtɔm ndʋ posusuu yɔ, nɛ mba patiluzi pa-tɩ Yesu kewiyitu tɛɛ yɔ. (Kalɩ Keɣa 2:11, 12.) Yesu yɔɔdaɣ ɛjaɖɛ tɛm tɔm lɛ, ɛtɔm se “sɔɔndʋ kaɣ ɛyaa kpaʋ pɩŋŋ nɛ kʋñɔmɩŋ weyi ɩkaɣ lɩʋ ɛjaɖɛ yɔɔ yɔ, mbʋ pʋyɔɔ yɔ ɛsɔdaa ɖoŋ kpeekpe kaɣ ñamsʋʋ.” Nɛ ɛtasɩ yɔɔdʋʋ se: “Ðɩnɛ ɛlɛ pakaɣ naʋ ɛyʋ Pɩyalʋ kɔŋ ɛsɔdaa mɩndʋ yɔɔ, ɛ nɛ e-ɖoŋ sɔsɔŋ nɛ e-yuŋ.”—Luka 21:26, 27.

15, 16. Mba nɛ mba kaɣ kɛʋ “yoyaa” mba patɩŋɩɣ Krɩstʋ wayɩ you taa yɔ?

¹⁵ Pɔyɔɔdɩ Natʋ takayaɣ taa ɖɔɖɔ ɛzɩma Wiyaʋ Yesu kaɣ kɔm “ɛ nɛ e-ɖoŋ sɔsɔŋ nɛ e-yuŋ” se eɖezi ɛyaa kɩdɛkɛdaa yɔ, pɩ-tɔm. Pɔtɔm se: “Mana ɛsɔdaa tʋlaa nɛ kpaŋnʋ kʋhʋlʋm nɔɔyʋ lɩɩ; weyi ɛcaɣ ɛ-yɔɔ yɔ, payaɣ-ɩ se Tɔm mʋyʋ nɛ Tʋtʋyɛ, ɛhʋʋ tɔm nɛ ɛlakɩ you siɣ siɣ. Nɛ ɛsɔdaa yoyaa tɩŋɩɣ ɛ-wayɩ kpaŋnaŋ kʋhʋlʋmɩŋ yɔɔ, posu tokonaa kʋhʋlʋmaa layɩ layɩ. Seɣye naɖɩyɛ lɩɣnɩ ɛ-nɔɔ taa, ɖɩwɛ lɔŋ mana mana, nɖɩ ɛmakɩnɩ sɩɩnaa layaa yɔ; ɛnʋ kaɣnɩ-wɛ ɖɔkʋʋ nɛ ñɩɣyʋʋ ɛgbazɩyɛ, ɛnʋ puuni Ɛsɔ pana sɔsɔna sʋlʋm, kedeŋa kpeekpe tʋ.”—Natʋ 19:11, 14, 15.

¹⁶ Mba kaɣ sɩnʋʋ Krɩstʋ you labʋ nɛ pɛkɛ ɛsɔdaa “yoyaa” mba patɩŋɩɣ ɛ-wayɩ yɔ? Yesu kaacalɩ kpaɣʋ ɛ-laɣɖɛ se ɛɖɔɔnɩ Sataŋ nɛ ɛ-aleewaa ɛsɔdaa lɛ, ɛ nɛ “e-tiyiyaa” palabɩnɩ you ŋgʋ. (Natʋ 12:7-9) Ye mbʋ, ɖɩpɩzɩɣ nɛ ɖɩyɔɔdɩ se Ɛsɔ tiyiyaa kiɖeɖema kaɣ wɛʋ Krɩstʋ yoyaa mba pakaɣ-ɩ sɩnʋʋ Armaagedɔɔ you labʋ yɔ, pa-taa. Ɛlɛ, nabɛyɛ ɖɔɖɔ kaɣ wɛʋ e-yoyaa mba pa-taa? Yesu kaaheyi e-koobiya pata-m numwaa lidaʋ tɔm tʋnɛ: “Waɖʋ weyi ɛɖɔkʋʋ ɛ-tɩ kpam man-tʋmɩyɛ taa nɛ pɩkɔɔ pɩtɛ yɔ, mankaɣ-ɩ ɖoŋ haʋ ajɛɛ yɔɔ. Ɛkaɣ-yɛ talʋʋ nɛ ñɩɣyʋʋ ɛgbazɩyɛ ɛzɩ pɔyɔkʋʋ cʋʋ wondu yɔ. Mbʋ ɖɔɖɔ ma, mamʋ ɖoŋ ɛnɩ man-Caa cɔlɔ.” (Natʋ 2:26-28) Ye mbʋ, Krɩstʋ koobiya pata-m numwaa mba pɛtɛm mʋʋ pa-kɩhɛyʋʋ ɛsɔdaa yɔ, pakaɣ wɛʋ ɖɔɖɔ yoyaa mba pa-taa. Krɩstʋ awumbiya pata-m numwaa kpeekpe kaɣ wɛʋ ɛ-cɔlɔ alɩwaatʋ ndʋ ɛkaɣ  labʋ “lakasɩ sɔsɔsɩ” nɛ ɛtalɩɣ ajɛɛ nɛ ñɩɣyʋʋ ɖaʋ yɔ.

17. (a) Ɛbɛ kpaŋnʋ kʋhʋlʋm weyi ɛ-yɔɔ Krɩstʋ caɣaa yɔ, ɛsɩŋnaa? (b) Laɣɖɛ nɛ tɔʋ pasɩŋnɩ we?

¹⁷ Kalɩ Keɣa 44:6. Wiyaʋ caɣ kpaŋnʋ kʋhʋlʋm yɔɔ. Nɛ kpaŋnʋ kʋhʋlʋm ɛnʋ ɛsɩŋnɩ you siɣsiɣ nɛ kele kele ñɩŋgʋ Yehowa ɛzɩdaa. (Natʋ 6:2; 19:11) Pɩtasɩnɩ laɣɖɛ lɛ, wiyaʋ ɖɔkɩ ɖɔɖɔ tɔʋ. Ðɩkalɩɣ Natʋ 6:2 taa se: “Ðɩnɛ ɛlɛ kpaŋnʋ kʋhʋlʋm nɔɔyʋ lɩɩ mɛ-ɛzɩdaa; weyi ɛcaɣ ɛ-yɔɔ yɔ ɛɖɔkɩ tɔʋ nakʋyʋ. Pɛcɛlɩ-ɩ hulaɣ nakɛyɛ, pʋwayɩ lɛ ɛcaŋ ɛɖɛɛ, ɛkɛ waɖʋ, se ɛtasɩ ɖɔɖɔ wabʋ.” Laɣɖɛ nɛ tɔʋ pasɩŋnɩ nʋmɔŋ weyi ɩ-yɔɔ Krɩstʋ kaɣ tɩŋnʋʋ se eɖezi e-koyindinaa yɔ.

18. Ɛzɩma tɩyɛ Krɩstʋ tɔʋ “ñɩma” kaɣ wɛʋ “patʋ”?

¹⁸ Keɣa maɖʋ yɔɔdɩ Wiyaʋ tɔm nɛ ɛtɔŋ se ‘ɛ-tɔʋ ñɩma wɛ patʋ’ nɛ atʋlʋʋ e-koyindinaa laŋa pɔŋ nɛ ‘ɛyaa samasɩ tɔlʋʋ ɛ-ɛzɩdaa.’ You ŋgʋ kɩ-taa, Yesu nɛ e-yoyaa pakaɣ ɛyaa kʋʋ siŋŋ ɛjaɖɛ kpeekpe yɔɔ. Yeremii kaama ɛ-natʋ tɔm taa se: “Puwiye lɛ, [Yehowa] sɩɖaa mba pakʋwa yɔ, pɔtɔyʋʋ tɛtʋ kamaɣ lɛɛka nɛ lɛɛka pɔ-yɔɔ.” (Yer. 25:33) Natʋ tɔm lɛɛtʋ yɔɔdɩ ɖɔɖɔ you ŋgʋ kɩ-yɔɔ se: “Pʋwayɩ lɛ mana tiyiyu nɔɔyʋ, ɛsɩŋ wɩsɩ yɔɔ, ɛmakɩ kubuka ɖoŋ sumasɩ kpeekpe, nzɩ sɩkʋyʋʋ ɛsɔdaa yɔ, se: ‘Ɩkɔɔ ikpeɣli Ɛsɔ kazandʋ sɔsɔtʋ ɖeɖe! Ɩkaɣ libu peeɖe awiya nandʋ, nɛ kapɩtaŋwaa sɔsaa nandʋ, nɛ sɔdɩŋ nandʋ, nɛ kpaŋnaŋ nɛ ɩ-yɔɔ caɣyaa pa-nandʋ, nɛ ɛyaa ndɩ ndɩ nandʋ, mba pɛwɛ pa-tɩ yɔɔ yɔ, nɛ mba pɛkɛ yomaa yɔ, cikpema nɛ sɔsaa!’”—Natʋ 19:17, 18.

19. Ɛzɩma Krɩstʋ kaɣ tɛzʋʋ e-koyindinaa wabʋ?

¹⁹ Krɩstʋ ɖeziɣ Sataŋ ɛjaɖɛ kɩdɛkɛdɩyɛ nɛ pɩtɛ lɛ, ‘ɛkpaɣ ɛ-kpaŋnʋ yɔɔ nɛ ajana’ se ‘ewolo nɛ ɛtɛzɩ wabʋ.’ (Keɣa 44:5) Ɛkaɣ tɛzʋʋ wabʋ alɩwaatʋ ndʋ ɛɖʋʋ Sataŋ nɛ aleewaa pɔʋ sɔsɔʋ taa pɩnzɩ kudoku kiya yɔ. Pɩnzɩ kudoku ŋgʋ kɩ-taa lɛ, Yesu nɛ ɛ-awumbiya 144000 pakaɣ tɔɔʋ kewiyitu nɛ ɛsɔdaa. (Natʋ 20:2, 3) Alɩwaatʋ ndʋ Yiliyu nɛ ɛ-aleewaa pɛwɛɣ pɔʋ ŋgʋ kɩ-taa yɔ, pɛwɛɣ ɛzɩ sɩɖaa yɔ mbʋ pʋyɔɔ yɔ paatasɩɣ wɛnʋʋ ɖoŋ ɛyaa yɔɔ. Ðɩnɛ ɛlɛ ɛyaa kaɣ pa-tɩ luzuu Wiyaʋ weyi ɛkɛ waɖʋ nɛ ɛmʋnɩ samtʋ yɔ, ɛ-tɛɛ. Ɛlɛ, pʋcɔ nɛ tɛtʋ kpeekpe pɩsɩ paradisuu pazɩ pazɩ lɛ, nabʋyʋ kaɣ tasʋʋ labʋ nɛ ɛyaa mɛyɩ amɛya Wiyaʋ nɛ ɛ-awumbiya pɔ-yɔɔ. Pakaɣ taa leleŋ tɔm ndʋ tɩ-taa tazʋʋ ñʋʋ ŋgʋ kɩkɔŋ yɔ, kɩ-taa.