1, 2. Mukonda diahi tua tokala kuijiia i tanga o Salamu ia 45?

O SOBHA ia fuama uia ni dikabakaba mu ku bhângela o kidi, ni kuiuka, ni ku tolola o jinguma jê. Kioso kia tambula o kikoué, muéne u kazala ni díbhanga diambote. O sobha a mu lembalala, ni ku mu ximana ku miji, hádia ni hádia. Íii izulukutu ia katunda ia tange mu divulu dia Jisálamu mu 45.

² Maji o Salamu íii ia 45 ki i tange ngó musoso uambote, uala ni disukilu di sangulukisa. O izulukutu io zuele-mu iala ni dilomboluelu phala etu. Iene ia tu tokala lelu, ni ku hadia. Tu di longe kiambote o sálamu íii.

3, 4. (a) O “maka mambote” ahi a soneka o mukua jisalamu, ni kiebhi ki tu divua ku mixima, ia lungu ni maka enhá? (b) Njimbu iahi i tu boka “ia lungu ni sobha?” Kiebhi ki kala o dimi dietu kála kipena?

³ Tanga Jisálamu 45:1. O “maka mambote” a bhangesa o muxima ua mukua jisalamu ku “fulujuka,” o njimbu ia lungu ni sobha. O kizuelu ku “fulujuka” mu Hebalaiku, kilombolola kala “menha a mu fulujuka.” O mukua jisalamu ua sangulukile kiavulu mu kuívua o njimbu íii, o muxima ué ua kexile kala menha a mu fulujuka ni kisangusangu kiavulu. Kiki kia  bhangesa ué kuila o dimi diê di kala kála ‘kipena kia kuata o hete ia ku soneka.’

⁴ Kiki kilombolola ihi phala etu? O njimbu iambote ia Utuminu ua Mexiia kima kiambote, ki bhangesa o muxima uetu ku fulujuka. O njimbu iambote ia Utuminu ia mateka ku kala maka “mambote,” benge-benge ku muvu ua 1914. Mukonda diahi? Mukonda tundé mu kithangana kieniókio, ka kexile dingi mu boka o njimbu ia Utuminu ieji kuíza ku hádia, maji akexile mu boka, o utuminu ua kidi ua mu tumina ku diulu mu izuua íii. Íii iene ‘o Njimbu Iambote ia Utuminu ua Nzambi,’ i tua mu boka “mu ngongo ioso, mu kubhana umbangi ku akua jixi joso.” (Mat. 24:14) O kuila o muxima uetu ua mu “fulujuka” mukonda dia njimbu iambote ia Utuminu? O kuila tua mu boka o njimbu ia Utuminu ni ku suina kuoso? Kála o mukua jisalamu, o ‘muimbu uetu ua lungu ni sobha.’ Tu boka kuila, Jezú muéne o Sobha Mexiia ua mu Tumina ku diulu. Etu tuexana o jisobha ja mundu iú, phala ku xikina o Utuminu ua Jezú. (Jisá. 2:1, 2, 4-12) Mu kiki, o dimi dietu di kala kála ‘kipena kia kuata o hete ia ku soneka,’ kioso ki tu longa ni Bibidia mu sidivisu ia ku boka.

5. (a) Mu ukexilu uahi Jezú ua ‘iukile kiavulu?’ (b) Kiebhi muéne kia boko ni ‘ku sanguluka kuoso,’ ni kiebhi ki tu tena ku kaiela o phangu iê?

⁵ Tanga Jisálamu 45:2. O Bibidia ki i zuela kiavulu se Jezú ua iukile mba ua ibhile. Maji mukonda muéne kexile mukua kituxi, se phata muéne ua ‘iukile kiavulu.’ Maji o kima kia mu bhangesa ku kala muthu ua iuka, o ufiiele ué kua Jihova. Jezú ua boko ué ni ‘ku sanguluka kuoso’ o njimbu ia Utuminu, o izuelu iê ia fulujuka ku mixima ia athu. (Luka 4:22; Nzuá 7:46) O kuila tua mu bhanga ioso phala ku kaiela o phangu ia Jezú kioso ki tuia mu boka?—Kol. 4:6.

6. Kiebhi Nzambi kia bhana kua Jezú o dibesá dia ‘kalelaku?’

⁶ Mukonda dia ufiiele ni henda ia Jezú kua Tat’ê, Jihova ua mu besoala mu ukunji ué mu ixi, iu ua mu bhana ujitu kioso kia bhana o muenhu ué mu sata ia ku kula. O poxolo Phaulu ua soneka: ‘O kia zubha kutukuluka mu kidifua kia muthu, muène ua di tununa, anga u tumaka katé mu kufua—kufua-phe kiá kua sebuluka ku taka. Mukonda dia kiki, Nzambi ua mu zangeleka kiavulu, iú ua mu bhana dijina dia tundu o majina moso. Uila kiki, mu kujingisa o dijina dia Jezú, ene oso a di fukamena, kixi ió ala mu diulu, kixi ala mu ngongo, kixi ala koxi a mavu mu’alunga. Ki bhu xala dimi di kamba kufisala kuma Jezú Kristu muene Ngana, mu ku bhana o fuma kua Nzambi, Tata.’ (Fil. 2:8-11) Jihova ua mu bhana dibesá dia ‘kalelaku’ mu ku mu fukununa phala ku tambula muenhu ua kalelaku.—Loma 6:9.

7. Mu ukexilu uahi Jezú ua tundu ‘akuâ’ mu ku mu unda kua Nzambi?

⁷ Tanga Jisálamu 45:6, 7. Mukonda dia henda iavulu ni kuiuka, ni ku zemba o ima i xingisa Tat’ê, Jihova ua mu undu kala Sobha ia Utuminu ua Mexiia. Jezú a mu undu ni “maji a kusanguluka” iú ua tundu ‘akuâ,’ o ji sobha ja Judá exile o  mbutu ia Davidi. Mu ukexilu uahi? Kia dianga, mukonda Jezú a mu undile kua Jihova. Kaiadi, Jezú a mu undu ku kala Sobha, ua kituka Mukunji ua Dikota. (Jisá. 2:2; Jihe. 5:5, 6) Katatu, Jezú ka mu undu ngó ni maji a mazumba, maji a mu undu ué ni nzumbi ikôla. Mu kusuka-ku, muéne u mateka ku tumina ku diulu, ka mateka ku tuma mu ixi.

8. Mukonda diahi tu tena ku dielela kuila o utuminu ua Jezú ua iuka? Ihi ilombolola Nzambi ku kala o kiandu kia Jezú?

⁸ Jihova ua tumbika Mon’ê ku Usobha ua Mexiia ku diulu ku muvu ua 1914. ‘O mbasá ia utuminu uê, o mbasa ia ku iuka,’ mu kiki tu tena ku dielela kuila mu utuminu ué ki mua-nda kamba o kuiuka. O ungana ué ua kidi, o ‘kiandu kiê Nzambi.’ Mukonda Jihova muéne ua mu solo kala Sobha. O kiandu kia Jezú kia-nda “xalela sè thembu.” Ku sanguluka mu ku sidivila Jihova, mu ku belesela o Utuminu ua Sobha ia undu?

9, 10. (a) Thembu kuxi ia soma Kristu o xibhata iê ni ihi ia bhange na-iu? (b) Ihi ia-nda bhanga Kristu ni xibhata iê ku hádia?

⁹ Tanga Jisálamu 45:3. Jihova u longa o Sobha iê ‘ku soma o xibhata iê mu ditabela diê,’ mu kienhiki, muéne ua bhana o ungana kua Jezú phala ku bhânga ni jinguma joso a bhukumukina o ungana ua Nzambi, ni ku a buika. (Jisá. 110:2) Mukonda Kristu Disoladi, Sobha, ka tena ku mu tolola, amba kuila uala ni “unénene ua ungana ué.” Muéne ua soma o xibhata iê ku muvu ua 1914, kioso kia tolola Satanaji ni madimonho mê, iu ua lundumuina mu ixi.—Dij. 12:7-9.

¹⁰ Kiki kiexile ngó o dimatekenu dia ita ia tolola o Sobha. Maji muéne ka ‘zubha luua ku tolola o jinguma.’ (Dij. 6:2) Jihova ua-nda buika o athu oso a bhanga mbandu ku mundu ua Satanaji, ni ima ia iibha iene mu bhanga Satanaji ni madimonho. Kia dianga, ua-nda buika o Babilonha ia Dikota, o kisangela kia jingeleja ja makutu. Jihova ua-nda ta ku mixima ia jinguvulu ku buika ‘o muhatu ua undumbu.’ (Dij. 17:16, 17) Mu ku kaiela-ku, Kristu, ua-nda buika o jinguvulu ja mundu ua Satanaji. Kristu a mu ixana ué “anjo ia dikungu ki di moneka hole,” ua-nda tenesa o kikoué kiê, mu ku takula Satanaji ni madimonho mê mu dikungu ki di moneka hole. (Dij. 9:1, 11; 20:1-3) Tu di longe kiebhi o Salámu 45 ia kanene o izulukutu íii.

11. Kiebhi Kristu kia mu kuíza ni dikabakaba “mu kubhângela o kidi?”

¹¹ Tanga Jisálamu 45:4. O Sobha ka luua ita phala ku tambula jixi mba ku bhikisa athu. Saí ima i mu bhangesa ku luua ita. Muéne u luua ita ‘mu ku bhângela o kidi, ni kuiuka ni kulenduka.’ O kidi kia beta-o-kota kia tokala ku bhângela, kia lungu ni ungana ua Jihova. Kioso Satanaji kia bhukumuka, muéne ua londekesa kuila Jihova, ka tokalele ku kala nguvulu ia athu. Tundé o kithangana kieniókio, saí madimonho, ni athu mu ixi, a mateka ué ku bhukumukina Jihova. O kithangana kia Sobha a mu undu kua Jihova ku luua o ita, kia bhixila, phala kulondekesa kuila Jihova muéne ngó uala ni kutena kua ku tumina o ngongo ioso.

12. Kiebhi o Sobha kiza ni dikabakaba mu ku bhângela o ‘kulenduka?’

¹² O Sobha uíza ué ni dikabakaba mu ku bhângela o ‘kulenduka.’ Tundé ukulu Jezú ua bhana phangu ia kulenduka ni ku belesela Tat’ê. (Iza. 50:4, 5; Nzuá 5:19) O jiselevende joso ja fiiele ja Sobha, a tokala ku kaiela o phangu iê, ni ku belesela o Ungana ua Jihova mu ima ioso. Oso  a mu belesela, ene ngó a-nda kala ku mundu uobhe ua kanena Nzambi.—Zak. 14:16, 17.

13. Kiebhi Kristu kiza ni dikabakaba mu ku bhângela ‘o kuiuka?’

¹³ Kristu uíza ué ni dikabakaba mu ku bhângela o ‘kuiuka.’ O kuiuka ku bhângela o Sobha, o ‘kuiuka kua Nzambi’—o itumu ia Jihova ia lungu ni ia iibha ni ia mbote. (Loma 3:21; Mate. 32:4) O polofeta Izaia ua kanena ia lungu ni Jezú Kristu: “Kua-nda kukala sobha ua kà hinga unganga ua kuiuka.” (Iza. 32:1) Kioso kia-nda tumina, Jezú ua-nda bheka “maùlu m’obhe,” ni “oxi i’obhe,” mua “tunga ubatuilu ua kuiuka.” (2 Phe. 3:13) O athu oso a-nda tunga mu ixi iobhe a-nda belesela o itumu ia iuka ia Jihova, ia lungu ni ia iibha mba ia mbote.—Iza. 11:1-5.

14. Kiebhi o lukuaku lua Kristu lua-nda bhanga “ima ia undanda?” (Tala o foto ia dianga.)

¹⁴ O mukua Jisalamu u zuela kuila, o Sobha uíza ni dikabakaba, ni xibhata ia soma mu ditabela diê. (Jisá. 45:3) Muéne u katula ué o xibhata iê ni lukuaku luê lua kadilu u mateka ku bhânga. O mukua jisalamu ua kanena: ‘Lukuaku lué lua dilu ua ka bhanga ima ia undanda.’ (Jisá. 45:4) Kioso kia-nda kuíza Jezú Kristu ni dikabakaba phala ku buika o mundu ua Satanaji ku Alumajedone, muéne ua-nda bhanga “ima ia undanda” ku jinguma jê. Ki tuejiia kiambote kiebhi o Sobha kia-nda buika o mundu ua Satanaji. Maji tuejiia kuila o ima ia-nda bhanga Jezú, ia-nda bhangesa o athu ka belesela o itendelesu ia Nzambi ni ku xikina o utuminu ua Sobha ku kala ni uôma uavulu. (Tanga Jisálamu 2:11, 12.) Mu kikanenu kiê kia lungu ni dizubhilu, Jezú ua zuela kuma o athu eji “kuambuka ni uôma, mu kubanza o ima ia-ndu bhita. Mukonda katé ni jinguzu ja maúlu ja-ndu tunguta!” Muéne uambe dingi: “Kumbi diná a-ndu mona Mon’a Muthu iú uijila mu dituta, ni kusuina ni ungana uònene!”—Luka 21:26, 27.

15, 16. Nanhi u bhanga mbandu ku “ifuxi ia makuenze” a-nda kaiela Kristu mu ita?

¹⁵ O kuíza kua Sobha “ni kusuina ni ungana uònene” phala ku buika o jinguma ja Nzambi, a ki tange mu divulu dia Dijingunuinu. Diene dizuela: “Anga ngi mona diulu dia jikuka. Ngedi ngi tala, kua moneka kabalu kazela, o ua xikama-ku a mu ixana Fiiele, a mu ixana Kidi. Muène u fundisa mu kidi, u lua ita mu uiukilu uê. O ifuxi ia makuenze iene mu diulu, anga i mu kaiela, a mondala jikabalu jizela, a zuata linhu ia fina, iazele, iauabha kiambote. Mu kanu diê anga mu fuômoka xibhata iatu, iene ia tolola na-iu akua jixi. Muène u a tumina ni mbasá ia felu. Muène u titidila mu ditangi dia kukamena o vinhu ia njinda iatemanana ia Nzambi Kutènde.”—Dij. 19:11, 14, 15.

¹⁶ Nanhi ua-nda bhanga mbandu ku “ifuxi ia makueze” iene mu diulu, a-ndaia mu luua kumoxi ni Kristu? O veji ia dianga Jezú ku soma o xibhata iê, iu ua lundumuna Satanaji ni madimonho mê, muéne ua kexile kumoxi ni “ji-anju jê.” (Dij. 12:7-9) Mu kiki, tu tena ku mona kuila mu ita ia Alumajedone o ji-anju ja Nzambi, a-nda bhânga ué kumoxi ni Kristu. O kuila o kifuxi kiê kia makuenze kua-nda bhinga athu amukuá? Jezú ua kanena ku jiphange jê o Jikidistá a a undu: “Uoso u tolola, u aluka imbamba iami katé bhu dizubilu, muenhó kala eme kia ngi bhana ukota ua kutumina kuala Tata iami, eme ue ngi mu bhana ukota ua kutumina akua jixi. U ji tumina ni mbasa ia felu, uila jimbia ja mavu u ji bula imenga-imenga.” (Dij. 2:26, 27)  Tu tena ku mona kuila o jiphange ja Kristu a a fukununa phala kuia ku diulu, a-nda bhanga mbandu ku ita íii. O Jikidistá a-nda kala kiá ku diulu, kioso Jezú kia-nda bhanga o “ima ia undanda” phala ku buika o mundu.

17. (a) Ihi ilombolola o kabalu kazele kua sambela Kristu? (b) Ihi ilombolola o xibhata ni sosa?

¹⁷ Tanga Jisálamu 45:5. O Sobha ua sambela ku kabalu kazele, kulombolola o ita ia iuka bhu pholo ia Jihova. (Dij. 6:2; 19:11) Muéne kambate ngó o xibhata, uambata ué sosa. Tu tanga: “Ngedi ngi tala, kua moneka kabalu kazela, o ua xikama-ku a mu ixana Fiiele, a mu ixana Kidi. Muène u fundisa mu kidi, u lua ita mu uiukilu uê.” O xibhata ni sosa, ilondekesa o ima ia-nda bhânga na-iu Kristu phala ku buika o jinguma jê.

18. Kiebhi o “sosa” ia Kristu, ia-nda ‘kutua?’

¹⁸ Mu ku ta kifika, o mukua jisalamu ua soneka: “Misongo ié i uasa, iatu muene o jisungu, ia kuata mu mixima ia jinguma ja muenexi; ifuxi ia dibhale, eie hé u bhita ni ku a diota.” Kua-nda kala kibuika ku mundu uoso. Jelemiia ua kanena kuila: “Oso a kà a bhakula ku kalunga kuala Jihova kizuu’okio, a kà dizala muene tundé ku’andekela ixi katé ku ia suku.” (Jel. 25:33) O kikanenu kia mukua kia difu kiambe: “Anga ngi mona anju iemana ku dikumbi. Muène u di kola ni dízui dia suina, anga uambela o jinjila joso jala kubhita bhulu, uixi: Zenu, mu bhongoloke ku kizokola kia dikota kia Nzambi! Zenu mu die xitu ia jisobha, ni xitu ia makesongo a ita, ni xitu ia masoladi, ni xitu ia jikabalu ni ene a ji mondala, ni xitu ia athu oso, jifôlo ni abhika, jindenge ni makota!”—Dij. 19:17, 18.

19. Kiebhi Kristu kia-nda ‘suluka phala ku tenesa o kikoué?’

¹⁹ Kioso kia-nda buika o mundu ua Satanaji, o Sobha Jezú Kristu ua-nda ‘suluka phala ku tenesa o kikoué.’ (Jisá. 45:4) Muéne ua-nda tenesa o kikoué kiê, kioso kia-nda takula Satanaji ni madimonho mê, mu dikungu ki di moneka hole, ku Utuminu ua Midi ia Mivu. (Dij. 20:2, 3) Kioso Diabhu ni madimonho mê kia-nda ku a takula mu dikungu ki di moneka hole, o athu a-nda kala mu ixi, ka-nda ku a funhisa dingi kua Diabhu, mu kiki, ki kia-nda ku a bhonza dingi ku belesela o Sobha ua fuama o kijingu. Ande dia ku mona o ixi ioso ku kituka palaízu, saí dingi kima kia-nda ku a bhangesa ku sanguluka ni Sobha iâ, ni ió a-nda tumina nê ku diulu. O kizulukutu kiki, tua-nda di longa kiu mu milongi ia-nda kaiela.