1, 2. Morwasinke Episarome 45 lya karera nomulyo kwetu?

HOMPA gefumano ta rondo rukara royita, a ka popere usili nouhungami ntani a ka funde nonkore dendi. Konyima zapa nga ka fundilira, age nga likwara nomufuko. Nomuhoko nadinye ngadi diworoka hompa nokumuhamberera. Esi yiso siparatjangwa sEpisarome 45.

² Episarome 45 kwa kara mo yoyinzi kupitakana tupu mbudi zoruhafo. Kwa tumbura mo yihorokwa eyi ya kara nomulyo kwetu. Ayo kukundama eparu lyetu ngesi ntani meho zetu. Nelituromo, tu konakoneni episarome eli.

3, 4. (a) ‘Nonkango musinke donongwa’ ga tjenge muepisarome, ntani ngapi nadi kundama mutjima gwetu? (b) Monkedi musinke atu divisa ‘rusumo rwaHompa,’ ntani ngapi eraka lyetu lya kara ngwendi pena?

³ Resa Episarome 45:1. “Nonkango donongwa” kwa gumine mutjima gomuepisarome ntani kwa ‘zulire’ ndi kwa kere neharo. Nkango zoRuhebeli va toroka “kuna zura” kwa tamba ‘kokuvira.’ Eyi kwa ninkisire mutjima gomuepisarome gu zure eharo nokuninkisa eraka lyendi ngwendi “pena zomutjangi gonkurungu.”

 ⁴ Ngapi kuhamena ose naina? Mbudi zongwa zoUhompa woUmesiyasa kuna kara sininke sosiwa esi nasi guma nomutjima detu. Mbudi zoUhompa kwa ya kere “nonkango donongwa,” unene po 1914. Kutunda opo, mbudi kapi za demenene hena koUhompa wokomeho nye kepangero eli lina kupangera ngesi kutundilira meguru. Ezi kuna kara ‘mbudi zongwa zoUhompa waKarunga’ ezi tuna kudivisa “mwa za uzuni mudima, zi kare umbangi wonomuhoko nadinye.” (Mat. 24:14) Mbudi zoUhompa “kuna zura” momutjima goge ndi? Ose kuna kudivisa mbudi zongwa zoUhompa nomupampi ndi? Ngwendi muepisarome, ose kuna kudivisa ‘rusumo rwaHompa’ gwetu Jesus Kristusa. Ose kumudivisa asi va mu pa sipundipangero meguru ngaHompa goUhompa woUmesiyasa. Ntani hena, ose kuzigida navenye va limburukwe kepangero lyendi, va kare asi vapangeli ndi ava ava pangere. (Epis. 2:1, 2, 4-12) Ano apa atu ruganesa nawa Matjangwa mokuzuvhisa, eraka lyetu kukara ngwendi “pena zomutjangi gonkurungu.”

5. (a) Mononkedi musinke Jesus ga ‘wepe’? (b) Ngapi omu ‘nonkango donongwa da tundire kwaHompa,’ ntani ngapi natu kondja mokukwama sihonena sendi?

⁵ Resa Episarome 45:2. Matjangwa kapi ga uyunga unene kuhamena emoneko lyaJesus lyoparutu. Ngomugara gokusikilira mo, age kwa ‘wepe’ mosipa. Nampili ngoso, ewapo lyendi kwa kwaterere mo ulimburukwi wendi kwaJehova. Ntani hena, Jesus kwa ruganesere “nonkango donongwa” apa nga zuvhisa mbudi zoUhompa. (Ruk. 4:22; Joh. 7:46) Ose kukondja mokukwama sihonena sendi mosirugana setu sokuzuvhisa nokuruganesa nonkango edi nadi guma nomutjima dovantu ndi?—Koros. 4:6.

6. Ngapi omu Karunga ga tungika Jesus?

⁶ Morwa Jesus kwa ligeve nomutjima nagunye, Jehova kwa tungikire sirugana sendi sokuzuvhisa nokumufuta konyima zokugava eparu lyendi ngonzambo. Mupositoli Paurusa kwa tjenge asi: “Age kwa linunupikire, ta limburukwa dogoro konomfa, nda dogoro nokonomfa [dokositji] deedi. Mokonda zeeyi, Karunga yiyo ga mu zerura unene, age yiyo ga mu ruka edina lya pitakana madina nagenye, asi navenye va twire edina lyaJesus nongoro, nava vemeguru nava vepevhu nawa wokonhi zevhu. Nkenye muntu a tongonone asi Jesus Kristusa Hompa, mokuyererepeka Karunga Guhwe.” (Fil. 2:8-11) Jehova kwa tungikire Jesus pokumupindwira “keparu lyanarunye.”—Rom. 6:9.

7. Mononkedi musinke Karunga ga horowere Jesus a pitakane “nkenye hompa”?

⁷ Resa Episarome 45:6, 7. Morwa eharo lyaJesus lyenene lyokuhara uhungami nokunyenga nkenye eyi ayi swaukisa Guhwe, Jehova kwa horowora Jesus ngaHompa goUhompa woUmesiyasa. Jesus kwa mu “poomwena erago lya pitakana lyankenye hompa,” eyi kutanta asi vahompa kwa tundilire moruvharo rwaNdafita. Mononkedi musinke? Zokuhova, Jehova mwene  ga horowere Jesus. Zauvali, Jesus kwa mu gwavekere a kare Hompa noMupristeli goMunene. (Epis. 2:2; Heb. 5:5, 6) Zautatu, Jesus kwa mu gwavekere nompepo zokupongoka kapisi nomagadi, ntani uhompa wendi kapisi wepevhu nye wemeguru.

8. Morwasinke natu uyungira asi ‘Karunga yige ga pa Jesus sipundi souhompa,’ ntani morwasinke natu tantera asi uhompa wendi wa hungama?

⁸ Jehova kwa tumbire Munwendi a kare Hompa goUmesiyasa meguru 1914. ‘Mburo zendi zosiuhompa kuna kara mburo zouhungami,’ yipo nye uhungami nepangero lyendi ngayi karerera. Epangero lyendi ewa, morwa ‘Karunga yige ga mu pa sipundi souhompa.’ Eyi kutanta asi Jehova yige ntundiliro zouhompa waJesus. Ntani hena, sipundi saJesus souhompa ngasi karerera “narunye-narunye.” Ee, ruhafo musi rokukarera Jehova konhi zepangero lyaHompa ogu ga horowora!

9, 10. (a) Siruwoke Kristusa ga dwere rufuro rwendi, ntani ngapi ga ru ruganesere? (b) Ngapi Kristusa nga ruganesa simpe rufuro rwendi?

⁹ Resa Episarome 45:3. Jehova Karunga kwa tanterere Hompa gwendi a ‘dware rufuro,’ nokumupangera a rwe yita nononkore depangero lyendi pokuvazonagura po. (Epis. 110:2) Morwa Kristusa yige Hompa gependa, age kumutumbura asi “munankondo.” Age kwa dwere rufuro rwendi mo- 1914 apa ga fundire Satana novaengeli vendi nokuvazugumina pevhu.—Ehor. 12:7-9.

¹⁰ Olyo kwa kere tupu etameko lyefundo lyaHompa. Age simpe nga pwaga ngwendi ‘mufundi a ka fundilire.’ (Ehor. 6:2) Mpanguro zaJehova simpe ngazi wizira uzuni naunye waSatana, ntani Satana novaengeli vendi ngava va manga. Pomuhowo, ngava zonagura po Babironi Zonene, maukarelikarunga goyimpempa gomouzuni. Jehova nga ruganesa vapangeli woupolitika va zonagure po “hondedi” ezi zondona. (Ehor. 17:16, 17) Ntani nye Hompa gependa nga zonagura po vanapolitika womouzuni ou waSatana. Kristusa, ogu hena ava tumbura asi “muengeli gosirongo sokonhiinhi,” nga ka fundilira pokukazugumina Satana novaengeli vendi mosirongo sokonhi. (Ehor. 9:1, 11; 20:1-3) Tu konakoneni omu Episarome 45 lya pumba yihorokwa eyi yokuhafesa.

11. Ngapi Kristusa ana rondo rukara royita, mokukapopera “usili”?

¹¹ Resa Episarome 45:4. Hompa gependa kapi a ru yita mokugusa yirongo novantu yi kare mepangero lyendi. Age kurwa yita nositambo souhunga. Age kuna rondo ‘rukara royita, mokukapopera usili nelinunupiko ntani nouhungami!’ Usili wounene ou ga hepa kupopera kuna kara upangeli waJehova wanayinye. Satana kwa homwene uhunga woupangeli waJehova apa ga mu rwanesere. Kutunda pena, vaengeli wovadona novantu kwa lipakerera naSatana mokumurwanesa. Ngesi siruwo sina siki mo saHompa ogu ga horowora Jehova a ronde rukara royita a popere usili woupangeli waJehova.

12. Monkedi musinke Hompa ana rondo ‘rukara, mokukapopera’ elinunupiko?

¹² Hompa kuna rondo hena ‘rukara, mokukapopera’ elinunupiko. NgaMunwaKarunga gelike thi, age kwa ya tu sigira sihonena selinunupiko ntani nokulimburukwa kepangero lyoGuhwe. (Jes. 50:4, 5; Joh. 5:19) Navenye ava va kara mepangero lyaHompa va hepa kukwama sihonena sendi selinunupiko sokulimburukwa koupangeli waJehova wanayinye. Vaava  tupu ava yi rugana eyi yiwo ngava ka tunga mouzuni woupe waKarunga.—Sak. 14:16, 17.

13. Ngapi omu Kristusa ana rondo rukara ‘mokukapopera uhungami’?

¹³ Kristusa kuna rondo hena rukara ‘mokukapopera uhungami.’ Uhungami ou a popere Hompa kuna kara ‘uhungami waKarunga,’ ndi nompango daJehova dokuhamena kweyi yoyiwa neyi yoyidona. (Rom. 3:21; Deut. 32:4) Jesaya kwa porofetere kuhamena Jesus Kristusa asi: “Hompa nga pangera pauhungami.” (Jes. 32:1) Epangero lyaJesus ngali sikisa mo etumbwidiro ‘lyeguru lyepe nevhu lyepe,’ omu “ngamu kara uhungami.” (2 Pet. 3:13) Navenye ava ngava ka paruka mouzuni wina woupe ngava ka hepa kukasikisa mo nompango daJehova.—Jes. 11:1-5.

14. Ngapi omu Kristusa nga ka funda “momunene”? (Tara efano pepenuno 3.)

¹⁴ Ngomu ana rondo rukara, age kuna dwara rufuro. (Epis. 45:3) Nye ngesi siruwo sina siki sokuruganesa rufuro oru runa kara mokuwoko kwendi korulyo. Uporofete wemepisarome asi: “Nonkondo doge nadi ka ku fundisisa momunene.” (Epis. 45:4) Apa Jesus Kristusa nga ronda rukara royita mokuyasikisa mo mpanguro zaJehova poHarumangedoni, nga ya funda nonkore dendi “momunene.” Kapi tuna diva eyi nga ka ruganesa mokukazonagura po uzuni waSatana. Nye apa ngayi horoka eyi, ngayi tukukisa nomutjima dovantu ava ava dili kutambura erondoro lyaKarunga lyokulimburukwa kepangero lyaHompa. (Resa Episarome 2:11, 12.) Mouporofete wendi kuhamena uhura, Jesus kwa tente asi vantu ngava kara “nowoma pokundindira eyi yina kuwiza mouzuni. Yeeyi nonkondo deguru ngava di nyunganga.” Ta gweda ko asi: “Ntani nye ngava mona MunwaMuntu ta wiza age meremo, nononkondo dononzi nouyerere.”—Ruk. 21:26, 27.

15, 16. Wolye ava va hamena mombunga ‘zovakwayita’ ava ngava kwama Kristusa mokukarwa yita?

¹⁵ Pokudivisa ewizo lyaHompa “nononkondo dononzi nouyerere” mokuyapangura nonkore daKarunga, buke zEhororo kutanta asi: “Ame makura tani mono eguru lina zeguruka. Na tara ko, nkambe zonzera zina kara mo, ano ogu ga rondere po edina lyendi yige Mulimburukwi, age hena Munasili. Age kupangura oku ta ru yita mouhungami. Nombunga dovakwayita vemeguru wokudwara yikoverero yoyizera ya kuhuka, tava mu kwama awo kuna rondo kononkambe dononzera. Mokana komurondi makura tamu tundu rufuro rorutwe, a toonese ko yirongo. Age nga va pangera nomburo zosivera, nga lyata vhinyu mosikameno sehandu lyenene lyaKarunga, Munankondo nadinye.”—Ehor. 19:11, 14, 15.

¹⁶ Wolye ava va hamena mombunga ‘zovakwayita’ vemeguru ava ngava kwama Kristusa mokukarwa yita? Apa ga dwere rufuro rwendi a zugume mo Satana novaengeli vendi meguru, Jesus kwa mu kweme ‘vaengeli vendi.’ (Ehor. 12:7-9) Eyi kulikida asi poyita yaHarumagedoni, movakwayita vaKristusa ngamu hamena vaengeli wokupongoka. Movakwayita vendi ngamu hamena hena vapeke ndi? Jesus kwa tumbwidilire vamumbya vendi wovagwavekwa asi: “Ogu ana kufunda, nye a kare moyirugana eyi na panga dogoro nokouhura, ngani mu pa nonkondo dokupangera nomuhoko. Moomu na kara ame nononkondo edi ga pa nge Tate, nage yimo nga va lisa nomburo zosivera, oku ta va taura moomu ava taura yipako yerova.” (Ehor.  2:26, 27) Yipo nye, vakwayita vaKristusa vemeguru ngamu hamena vamumbya vendi wovagwavekwa, ava va gwana mfeto zokukaparukira meguru. Vagwavekwa ngava ka pangera kumwe nendi apa nga ka funda “momunene,” oku tava lisa nomuhoko nomburo zosivera.

17. (a) Yisinke azi fanekesa nkambe zonzera ezi ga rondere Kristusa? (b) Yisinke rwa fanekesa rufuro nouta wonkanza?

¹⁷ Resa Episarome 45:5. Hompa ogu ga rondere konkambe zonzera, kwa fanekesa yita yokukuhuka ntani yokuhungama kosipara saJehova. (Ehor. 6:2; 19:11) Ntani ga kara nouta wonkanza. Tatu resa asi: “Na tara ko, tani mono nkambe zonzera. Ano ogu ga rondere ko, kwa kere nouta wonkanza. Makura tava mu pe nkata zefundo, ta pwaga ngwendi mufundi ta ka funda.” Rufuro nouta wonkanza kwa fanekesa nonkedi edi nga ka ruganesa Kristusa mokupangura nonkore dendi.

18. Ngapi omu “yikutji” yaKristusa ngayi “twepa”?

¹⁸ Pokuruganesa nkangoseweko, muepisarome kwa porofetere asi ‘yikutji yaHompa yokutwepa, ngayi wurura nomutjima dononkore dendi.’ Ezonauko ngali kara uzuni mudima. Muporofete Jeremiya kwa tente asi: “Mezuva olyo yimpu eyi nga dipaga HOMPA, ngayi lihana kutunda kouhura ou wouzuni dogoro koukwawo.” (Jer. 25:33) Mokulifana, Ehororo kwa tanta asi: “Ame makura tani mono muengeli gumwe ana sikama mezuva. Age makura ta zigire unene yidira yina kutuka mompepo asi: ‘Wizeni mu ya ponge kosipito sosinene saKarunga, mu ya lye nyama zohompa, nezi zovapitisili wovakwayita nezi zovanankondo. Wizeni mu ya lye hena nyama zononkambe, nezi zava vana rondo po, nezi zanavenye, va kare vamanguruki ndi vapika, vanunu ndi vanene.’”—Ehor. 19:17, 18.

19. Ngapi omu Kristusa nga ka ‘fumana’ nokukafundilira?

¹⁹ Konyima zapa nga zonagura po uzuni naunye waSatana, ‘efumano’ lyaKristusa ‘ngali nenepa.’ (Epis. 45:4) Age nga fundilira pokuzugumina Satana novaengeli vendi mosirongo sokonhii mEpangero lyoNomumvho Eyovi. (Ehor. 20:2, 3) Apa ngava manga Muzonaguli novaengeli vendi, vantu vepevhu ngava manguruka ko kepukiso lyaSatana makura ngava limburukwa kwaHompa gefundo gefumano. Komeho evhu nalinye li ka kare paradisa, awo ngava ka hafa naHompa gwawo nava ngava ka pangera nendi. Sihorokwa oso sokuhafesa ngatu ka si zogera mosirongwa sokukwama ko.