1, 2. Kifer nou bizin interese pou examinn Psaume 45?

 ENN Gran lerwa pe mont lor enn seval pou al lager pou defann laverite ek lazistis ek pou vink so bann lennmi. Apre ki li gagn enn viktwar final lor zot, li marye avek enn zoli tifi. Tou dimounn rapel sa lerwa-la ek donn li loner pou touletan. Se enn tipe lor la ki Psaume 45 koze.

² Me Psaume 45 li pa zis enn zoli zistwar ki fini bien. Bann levennman ki mansione ladan ena enn sinifikasion pou nou. Zot konsern nou lavi asterla, ek osi nou lavenir. Alor, anou examinn sa psaume-la avek boukou latansion.

3, 4. (a) Ki sa “bon kitsoz” ki konsern nou la, ek kouma sa kapav tous nou leker? (b) Dan ki fason eski nou ‘sant lor enn lerwa,’ ek kouma nou lalang vinn parey kouma enn stylet?

³ Lir Psaume 45:1. Sa “bon kitsoz” ki tous leker sa ekrivin psaume la ek ki fer li “vibre,” se enn nouvel konsernan enn lerwa. Sa nouvel-la ti fer leker sa ekrivin psaume la koumadir “vibre,” setadir ranpli ar enn gran lazwa ek sa ti fer so lalang vinn parey kouma “stylet enn kopis kalifie.”

⁴ Ki nou kapav dir lor nou? Bon nouvel lor Rwayom  Mesianik se enn bon kitsoz ki tous nou leker. Mesaz lor sa Rwayom-la ti vinn sirtou enn “bon” nouvel an 1914. Depi sa lane-la, sa mesaz-la nepli ena enn rapor avek enn Rwayom ki ti pou etabli, me sa ena enn rapor avek enn gouvernman reel ki pe regne dan lesiel. Se sa “bon nouvel lor Rwayom la” ki nou prese “partou kot dimounn reste lor later kouma enn temwaniaz pou tou bann nasion.” (Mat. 24:14) Eski nou leker pa “vibre” par mesaz lor sa Rwayom-la? Parey kouma ekrivin sa psaume-la, nou ‘sant lor enn lerwa’​—nou Lerwa Jésus Christ. Nou anonse ki li’nn vinn Lerwa dan lesiel, dan Rwayom Mesianik. Anplis, nou invit tou dimounn​—bann dirizan ek lepep​—pou soumet ar so rwayote. (Ps. 2:1, 2, 4-12) Ek nou lalang vinn parey kouma “stylet enn kopis kalifie” kan nou bien servi Labib dan nou predikasion.

5. (a) Dan ki fason Jésus ti “zoli”? (b) Kouma ‘bann parol ki ti fer plezir pou tande ti sorti lor lalev Lerwa,’ ek kouma nou kapav fer zefor pou swiv so lexanp?

⁵ Lir Psaume 45:2. Labib pa donn boukou detay lor laparans Jésus. Li ti enn zom parfe, alor sirman li ti bien “zoli.” Selman, seki ti fer li ena enn gran bote, se so fidelite ek so lintegrite anver Jéhovah. Anplis, Jésus ti pres Rwayom Bondie avek “bann parol ki fer plezir pou tande.” (Luc 4:22; Jean 7:47) Eski personelman, nou fer tou seki nou kapav pou swiv so lexanp dan predikasion ek nou esey servi bann parol ki pou tous leker bann dimounn?​—Col. 4:6.

6. Kouma Bondie ti beni Jésus “pou touletan”?

⁶ Jésus ti servi Jéhovah avek tou so leker, akoz sa, Jéhovah ti beni li pandan so minister lor later ek ti rekonpans li apre ki li ti donn so lavi an sakrifis. Lapot Paul ti ekrir: “Kan li [Jésus] ti vinn kouma enn zom, li ti abes limem, ek li ti obeir ziska lamor, wi, lamor lor enn poto soufrans. Se pou sa rezon-la ki Bondie ti donn li enn pli gran pozision ek ti kontan pou donn li enn nom ki pli gran ki tou lezot nom, pou ki o-nom Jésus tou zenou pliye dan lesiel ek lor later ek anba later, ek dimounn ki koz tou langaz rekonet an piblik ki Jésus Christ, limem Segner pou laglwar Bondie, nou Papa.” (Phil. 2:8-11) Jéhovah ti beni Jésus “pou touletan” kan Li ti resisit li pou gagn lavi imortel.​—Rom. 6:9.

7. Dan ki fason Bondie ti swazir Jésus plis ki so “bann konpagnon”?

⁷ Lir Psaume 45:6, 7. Jésus ti ena enn gran lamour pou lazistis ek li ti ena laenn pou tou seki ti kapav zet dezoner lor so Papa. Akoz sa, Jéhovah ti swazir li pou vinn Lerwa dan Rwayom Mesianik. Dan enn fason sinbolik, Bondie ti vers “delwil lazwa” lor Jésus plis ki lor so “bann konpagnon,” setadir bann lerwa Juda dan desandans David. Dan ki fason? Premierman, se Jéhovah Limem ki ti swazir Jésus pou vinn Lerwa. Deziemman, Jéhovah ti  swazir li pou vinn Lerwa ek Gran Pret toulede. (Ps. 2:2; Héb. 5:5, 6) Trwaziemman, kan Jéhovah ti swazir Jésus, Li pa ti vers delwil lor li, me Li ti avoy lespri sin. Finalman, Rwayom Jésus trouv dan lesiel, pa lor later.

8. Dan ki sans eski se ‘Bondie ki tronn Jésus,’ ek kifer nou kapav ena garanti ki pou ena lazistis kan li pou regne?

⁸ Jéhovah ti etabli so Garson kouma Lerwa Mesianik dan lesiel an 1914. ‘Baton rwayal so rwayom li enn baton rwayal ki drwat,’ alor nou ena garanti ki kan li pou regne, pou ena lazistis ek li pou fer seki drwat. Li ena drwa pou regne parski ‘se Bondie ki so tronn.’ Sa vedir ki se Jéhovah ki finn etabli li kouma Lerwa. Anplis, rwayote Jésus pou existe “pou touletan.” Eski ou pa fier ki ou pe servi Jéhovah anba lotorite sa gran Lerwa ki Bondie inn etabli la?

9, 10. (a) Kan eski Christ ti met so lepe dan so sintir, ek kouma li ti servi li deswit? (b) Kouma Christ pou servi so lepe dan lavenir?

⁹ Lir Psaume 45:3. Jéhovah demann Lerwa ki Li’nn etabli pou ‘met so lepe sirlekote.’ Kan Li fer sa, Li donn Jésus lotorite pou fer lager kont bann ki opoze ar souverennte Bondie ek pou detrir zot. (Ps. 110:2) Personn pa kapav gagn laviktwar lor Christ, Lerwa-Gerye, se akoz sa ki apel li “zom for.” Li ti met so lepe dan so sintir an 1914 kan li ti gagn laviktwar lor Satan ek so bann demon. Li ti tir zot dan lesiel ek ti zet zot lor later.​—Rév. 12:7-9.

¹⁰ Sa ti zis koumansman viktwar sa Lerwa-Gerye-la. Li ankor bizin “konplet so viktwar.” (Rév. 6:2) Jéhovah finn deside ki bizin detrir tou parti sistem Satan lor later, ek bizin tir tou linflians Satan ek so bann demon. Premierman, Gran Babylone, lanpir mondial fos relizion pou detrir. Jéhovah pou servi bann dirizan politik pou detrir sa move ‘prostitie-la.’ (Rév. 17:16, 17) Apre, Christ pou detrir tou bann gouvernman ki ena dan lemond Satan. Lerla, Christ, ki Labib apel osi “anz labim,” pou konplet so viktwar kan li pou zet Satan ek so bann demon dan labim. (Rév. 9:1, 11; 20:1-3) Anou gete kouma Psaume 45 ti anons sa bann levennman bien interesan-la.

11. Kouma Christ al lager “pou laverite”?

¹¹ Lir Psaume 45:4. Sa Lerwa-la pa al lager pou gagn bann pei ouswa pou fer bann dimounn vinn esklav. Li azir avek lazistis; alor li ena bann bon rezon pou fer sa lager-la. Li al lager “pou laverite, limilite ek lazistis.” Jéhovah tousel ena drwa pou diriz liniver. Sa se verite pli inportan ki bizin defann. Satan ti met an dout drwa ki Jéhovah ena pou regne kan li ti rebel kont Li. Depi sa, bann demon ek bann dimounn finn met an dout sa verite inportan la. Asterla finn ariv ler pou Lerwa ki Jéhovah inn etabli, pou al lager ek prouve ki zis Jéhovah tousel ena drwa pou regne.

12. Dan ki fason Lerwa Jésus Christ al lager ‘pou limilite’?

¹² Lerwa Jésus Christ al lager osi ‘pou limilite.’ Garson Bondie finn touletan donn nou enn bon lexanp konsernan limilite ek lobeisans anver so Papa. (Is. 50:4, 5; Jean 5:19) Tou bann serviter fidel sa Lerwa-la bizin swiv so lexanp ek soumet zot avek limilite ar souverennte Jéhovah dan tou kitsoz. Zis bann ki fer sa ki pou gagn drwa  viv dan lemond nouvo ki Bondie inn promet.​—Zek. 14:16, 17.

13. Kouma Christ al lager ‘pou lazistis’?

¹³ Christ al lager osi ‘pou lazistis.’ Lazistis ki sa Lerwa-la defann se “lazistis Bondie,” setadir bann prinsip Jéhovah lor seki bon ek seki move. (Rom. 3:21; Deut. 32:4) Isaïe ti profetize konsernan Jésus Christ: “Enn lerwa pou regne pou lazistis.” (Is. 32:1) Pandan so regn, Jésus pou etabli enn “nouvo lesiel ek enn nouvo later, kot pou ena lazistis.” (2 Pierre 3:13) Tou bann abitan dan lemond nouvo pou bizin viv dapre bann prinsip Jéhovah.​—Is. 11:1-5.

14. Kouma lame drwat Jésus Christ pou fer “bann kitsoz inpresionan”? (Get zimaz dan koumansman lartik.)

¹⁴ Kan Lerwa mont lor so seval blan, li ena enn lepe sirlekote. (Ps. 45:3) Apre sa, li pran so lepe dan so lame drwat ek koumans servi li. Sa ekrivin psaume-la ti anonse konsernan Jésus: “To lame drwat pou fer bann kitsoz inpresionan.” (Ps. 45:4) Kan Jésus pou vinn detrir lemond Satan pandan Har-Maguédôn, li pou fer “bann kitsoz inpresionan” kont so bann lennmi. Nou pa kone exakteman ki mwayin li pou servi pou detrir lemond Satan. Me bann dimounn lor later ki pa’nn ekout bann avertisman Bondie ek ki pa’nn soumet zot ar regn sa Lerwa-la, pou panike kan sa pou arive. (Lir Psaume 2:11, 12.) Dan so profesi konsernan lepok lafin, Jésus ti dir ki bann dimounn pou “gagn febles telman zot per ek akoz bann kitsoz ki zot pe atann pou arive lor later, parski pwisans ki dan lesiel pou tranble.” Li ti azoute: “Ek lerla, zot pou trouv Garson Limanite vini dan enn niaz avek pwisans ek enn gran laglwar.”​—Luc 21:26, 27.

15, 16. Kisannla pou form parti dan “bann larme” ki pou swiv Christ dan lager?

¹⁵ Liv Révélation ti anonse ki Lerwa pou vini “avek pwisans ek enn gran laglwar” pou detrir bann lennmi Bondie. Révélation dir: “Mo ti trouv lesiel ouver, ek gete! enn seval blan. Sa kikenn ki pe asiz lor sa seval-la apel Fidel ek Vre. Li ziz ek li fer lager avek lazistis. Ek deryer li, bann larme ki ti dan lesiel ti pe swiv li lor bann seval blan. Zot labiyman ti an lin, enn lin fin, blan ek pir. Enn long lepe fite sorti dan so labous pou li kapav detrir bann nasion avek sa. Li pou diriz zot avek enn baton an feray. Anplis, li pou pietinn preswar divin koler Bondie Tou-Pwisan.”​—Rév. 19:11, 14, 15.

¹⁶ Kisannla pou form parti dan bann “larme” ki dan lesiel ek ki pou swiv Jésus dan sa lager-la? “Bann anz” ti ansam avek Jésus kan premie fwa li ti servi so lepe pou tir Satan ek so bann demon dan lesiel. (Rév. 12:7-9) Alor li lozik pou krwar ki kan pou ena lager Har-Maguédôn, pou ena bann anz ki pou form parti dan bann larme Christ. Eski pou ena zis zot tousel dan sa bann larme-la? Jésus ti fer sa promes-la ar bann ki li ti swazir pou regn avek li dan lesiel: “Mo pou donn enn kikenn ki vinker ek ki swiv mo bann aksion ziska lafin, pouvwar lor bann nasion, ek li pou diriz bann dimounn avek enn baton an feray pou ki li kraz zot kouma bann resipian larzil, parey kouma mo finn gagn pouvwar ar mo Papa.” (Rév. 2:26, 27) Alor, dan bann larme Christ pou ena osi so bann frer  ki lerla pou’nn fini gagn zot rekonpans dan lesiel. Sa bann Kretien-la pou avek Jésus kan li pou fer “bann kitsoz inpresionan” pou detrir bann nasion avek enn baton an feray.

17. (a) Ki sa seval blan ki Christ monte la reprezante? (b) Ki sa lepe ek sa lark-la reprezante?

¹⁷ Lir Psaume 45:5. Sa Lerwa-la pe mont lor enn seval blan; sa reprezant enn lager ki pou fer avek lazistis ek ki Bondie aprouve. (Rév. 6:2; 19:11) Li pena zis enn lepe, li ena osi enn lark. Nou kapav lir: “Mo ti trouve, ek gete! enn seval blan, ek sa kikenn ki ti pe asiz lor sa seval-la ti ena enn lark; ek ti donn li enn kouronn, ek li ti sorti kouma enn vinker ek pou konplet so viktwar.” Sa lepe-la ek sa lark-la toulede reprezant mwayin ki Christ pou servi pou detrir so bann lennmi.

18. Ki pou arive kan Christ pou servi so “bann fles”?

¹⁸ Dan enn fason poetik, sa ekrivin psaume la ti profetize ki ‘fles sa Lerwa-la bien fite, li pers leker so bann lennmi, li fer bann nasion tonbe devan li.’ Sa destriksion-la pou partou lor later. Jérémie ti profetize: “Bann dimounn ki Jéhovah pou touye sa zour-la pou depi enn bout later ziska lot bout.” (Jér. 25:33) Enn lot profesi ki koz lor mem levennman dir: “Ek mo ti trouv osi enn anz ki ti pe debout dan soley, ek li ti kriye bien for ek li ti dir tou bann zwazo ki pe anvole dan lesiel: ‘Vinn isi, rasanble zot pou gran repa Bondie, pou ki zot manz laser bann lerwa ek laser bann komandan militer ek laser bann zom for ek laser bann seval ek bann ki asiz lor zot, ek laser zot tou, bann zom lib ek bann esklav, bann tipti ek bann gran.’”​—Rév. 19:17, 18.

19. Kouma Christ pou konplet so viktwar?

¹⁹ Apre ki Christ pou detrir move lemond Satan, li pou “al ver laviktwar.” (Ps. 45:4) Li pou konplet so viktwar kan li pou zet Satan ek so bann demon dan labim. Zot pou res ladan pandan Regn Mil An. (Rév. 20:2, 3) Satan ek so bann demon pa pou kapav fer nanye, koumadir zot inn mor; alor, zot pa pou kapav inflians bann dimounn lor later. Zot tou lor later pou kapav soumet zot ar zot gran Lerwa ki’nn gagn laviktwar. Me avan ki zot trouv later antie vinn enn paradi, pou ena enn lot rezon ki pou fer zot gagn lazwa ansam avek zot Lerwa ek bann 144,000. Nou pou examinn sa levennman bien zwaye-la dan prosin lartik.