၁၊ ၂။ ဘာကြောင့် ဆာလံ ၄၅ ကိုစိတ်ဝင်စားသင့်သလဲ။

ဘုန်းကြီးတဲ့ ဘုရင်တစ်ပါးဟာ အမှန်တရားနဲ့ ဖြောင့်မတ်ခြင်းကို ကာကွယ်ဖို့ စီးနင်းတိုက်ခိုက်တယ်။ သူက ရန်သူတွေအပေါ် အပြီးသတ်အောင်ပွဲခံပြီးတဲ့အခါမှာ လှပတဲ့သတို့သမီးနဲ့ လက်ထပ်ထိမ်းမြားတယ်။ အဲဒီဘုရင်ဟာ ထာဝစဉ် အောက်မေ့ခံရ၊ ချီးမွမ်းခံရတယ်။ ဒါက ဆာလံ ၄၅ မှာပါတဲ့ စိတ်လှုပ်ရှားစရာ အဖြစ်အပျက်တချို့ပဲ။

^၂ ဒါပေမဲ့ ဆာလံ ၄၅ ဟာ ပျော်စရာဇာတ်သိမ်းခန်းပါတဲ့ ဇာတ်လမ်းတစ်ပုဒ်လောက်ပဲ မဟုတ်ဘူး။ အဲဒီမှာပါတဲ့ အဖြစ်အပျက်တွေက ကျွန်ုပ်တို့ရဲ့ လက်ရှိအချိန်နဲ့ အနာဂတ်အပေါ် အကျိုးသက်ရောက်တဲ့အတွက် အရေးကြီးတယ်။ ဒါကြောင့် ဒီဆာလံကျမ်းကို သေချာလေ့လာကြည့်ကြစို့။

၃၊ ၄။ (က) ဆာလံဆရာဟာ ဘယ် ‘ကြည်နူးစရာတစ်ခု’ အကြောင်း ရေးခဲ့သလဲ။ အဲဒါက ကျွန်ုပ်တို့ရဲ့နှလုံးသားအပေါ် ဘယ်လို အကျိုးသက်ရောက်နိုင်သလဲ။ (ခ) ဘယ် “ရှင်ဘုရင်တစ်ပါးအကြောင်း” ကို ကျွန်ုပ်တို့ ဟောပြောနေသလဲ။ ဘယ်အခါမှာ ကျွန်ုပ်တို့ရဲ့လျှာက ကလောင်တံနဲ့တူလာသလဲ။

^၃ ဆာလံ ၄၅:၁ ကိုဖတ်ပါ။ ဆာလံဆရာရဲ့နှလုံးသားကို “လှုပ်ခတ်သွား” စေတဲ့ “ကြည်နူးစရာအကြောင်းတစ်ခု” က ဘုရင်တစ်ပါးနဲ့သက်ဆိုင်တဲ့ သတင်းဖြစ်တယ်။ “လှုပ်ခတ်သွား” လို့ပြန်ဆိုတဲ့ ဟေဗြဲစကားလုံးက “ဆူပွက်” ဆိုတဲ့ အဓိပ္ပာယ်ရှိတယ်။ အဲဒီသတင်းကို ကြားတဲ့အခါ ဆာလံဆရာဟာ အလွန်စိတ်လှုပ်ရှားသွားပြီး သူ့ရဲ့နှလုံးသားက ဆူပွက်လာတယ်၊ ဆိုလိုတာက ထက်သန်မှုတွေနဲ့ပြည့်လာတယ်။ သူ့ရဲ့လျှာကလည်း “ကျွမ်းကျင်တဲ့ကျမ်းကူးသူရဲ့ ကလောင်တံ” လို ဖြစ်လာတယ်။

^၄ အဲဒါက ကျွန်ုပ်တို့အတွက် ဘာအဓိပ္ပာယ်ရှိသလဲ။ မေရှိယနိုင်ငံတော်နဲ့ဆိုင်တဲ့ သတင်းကောင်းက ကျွန်ုပ်တို့ရဲ့နှလုံးသားကို လှုပ်ရှားသွားစေတဲ့ ကြည်နူးစရာအကြောင်းတစ်ခုဖြစ်တယ်။ နိုင်ငံတော်သတင်းက အထူးသဖြင့် ၁၉၁၄ ခုနှစ်မှာ “ကြည်နူးစရာ” ဖြစ်ခဲ့တယ်။ အကြောင်းကတော့ အဲဒီသတင်းက အနာဂတ်မှာ တည်ထောင်မယ့်နိုင်ငံတစ်ခုအကြောင်း မဟုတ်တော့ဘဲ ၁၉၁၄ ခုနှစ်ကစပြီး ကောင်းကင်မှာ အုပ်ချုပ်နေပြီဆိုတဲ့သတင်း ဖြစ်လို့ပဲ။ အဲဒါက ‘လူနေရာမြေတစ်ပြင်လုံးမှာ’ ကျွန်ုပ်တို့ဟောပြောနေတဲ့ ‘နိုင်ငံတော်သတင်းကောင်း’ ပဲ။ (မ. ၂၄:၁၄) အဲဒီနိုင်ငံတော်သတင်းကြောင့် ကျွန်ုပ်တို့ရဲ့နှလုံးသား “လှုပ်ခတ်” သွားသလား။ နိုင်ငံတော်သတင်းကောင်းကို ကျွန်ုပ်တို့ စိတ်အားထက်သန်စွာ ဟောပြောသလား။ ဆာလံဆရာလိုပဲ ကျွန်ုပ်တို့ရဲ့ “သီချင်းက ရှင်ဘုရင်တစ်ပါးအကြောင်း” ဖြစ်တယ်။ အခုအချိန်မှာ ယေရှုဟာ ကောင်းကင်မေရှိယနိုင်ငံတော်မှာ ဘုရင်ဖြစ်နေပြီဆိုတဲ့သတင်းကို ကျွန်ုပ်တို့ကြေညာကြတယ်။ ကျွန်ုပ်တို့က ကမ္ဘာ့ခေါင်းဆောင်တွေအပါအဝင် လူသားအားလုံးကို ယေရှုရဲ့နိုင်ငံတော်ကိုလက်ခံဖို့ ဖိတ်ခေါ်နေတယ်။ (ဆာ. ၂:၁၊ ၂၊ ၄-၁၂) ဟောပြောခြင်းလုပ်ငန်းမှာ ကျမ်းစာကိုအသုံးပြုတဲ့အခါ ကျွန်ုပ်တို့ရဲ့လျှာက “ကျွမ်းကျင်တဲ့ကျမ်းကူးသူရဲ့ ကလောင်တံ” နဲ့တူလာတယ်။

၅။ (က) ယေရှုဟာ ဘယ်လိုနည်းတွေနဲ့ “ခံ့ညား” သလဲ။ (ခ) ယေရှုဟာ ဘယ်လိုနည်းနဲ့ ဟောပြောခဲ့သလဲ၊ သူ့ရဲ့စံနမူနာကို ဘယ်လို တုပနိုင်သလဲ။

^၅ ဆာလံ ၄၅:၂ ကိုဖတ်ပါ။ ယေရှုရဲ့ပုံပန်းသဏ္ဌာန်ကို ကျမ်းစာမှာ အများကြီးမဖော်ပြထားဘူး။ သူဟာ ပြည့်ဝစုံလင်တဲ့ လူသားတစ်ယောက်ဖြစ်လို့ “ခံ့ညား” မယ်ဆိုတာ သေချာပါတယ်။ ဒါပေမဲ့ သူ့ကို အမှန်တကယ် ခံ့ညားစေတာက ယေဟောဝါအပေါ် သူ့ရဲ့သမာဓိစောင့်သိမှုနဲ့ သစ္စာရှိမှုပဲ။ အဲဒီအပြင် ယေရှုဟာ နိုင်ငံတော်သတင်းကောင်းကို ဟောပြောတဲ့အခါ “သာယာနာပျော်ဖွယ်စကားတွေ” သုံးခဲ့တယ်။ ကိုယ်တော်ဟာ လူတွေရဲ့စိတ်နှလုံးကို ထိမိစေတဲ့စကားလုံးတွေကို သုံးခဲ့တယ်။ (လု. ၄:၂၂; ယော. ၇:၄၆) ကျွန်ုပ်တို့လည်း ဟောပြောခြင်းလုပ်ငန်းမှာ ယေရှုကိုတုပဖို့ အတတ်နိုင်ဆုံး ကြိုးစားနေပါသလား။—ကော. ၄:၆။

၆။ ဘုရားသခင်က ယေရှုကို ဘယ်လိုနည်းနဲ့ “ထာဝစဉ်” ကောင်းချီးပေးခဲ့သလဲ။

^၆ ယေရှုဟာ ယေဟောဝါကို သစ္စာရှိပြီး အလွန်ချစ်မြတ်နိုးတယ်။ ဒါကြောင့် ယေရှု မြေကြီးပေါ်အမှုဆောင်ချိန်မှာ ယေဟောဝါ သူ့ကို ကောင်းချီးပေးခဲ့တယ်၊ ပူဇော်သကာအဖြစ် အသက်ကို ပေးဆက်ပြီးနောက်မှာလည်း ဆုချခဲ့တယ်။ တမန်တော်ပေါလုက ယေရှုအကြောင်း ဒီလိုရေးခဲ့တယ်– “လူသားတစ်ဦးအသွင်ဖြင့် ရှိစဉ်တွင် ကိုယ့်ကိုယ်ကိုယ် နှိမ့်ချ၍ အသေခံရသည့်တိုင်အောင်၊ ညှဉ်းဆဲရာသစ်တိုင်ပေါ် အသေခံရသည့်တိုင်အောင် နာခံတော်မူ၏။ ထိုအကြောင်းကြောင့်ပင် ဘုရားသခင်သည် ကိုယ်တော်ကို သာလွန်မြင့်မြတ်သော အခွင့်အရာသို့ ချီးမြှောက်၍ ဘွဲ့နာမတကာတို့ထက် ကြီးမြတ်သောဘွဲ့နာမကို ပေးသနားတော်မူ၏။ သို့ဖြင့် ကောင်းကင်ပေါ်၊ မြေကြီးပေါ်၊ မြေကြီးအောက်၌ ရှိသမျှသောသူတို့သည် ယေရှု၏နာမရှေ့တွင် ဒူးထောက်ကြရမည်။ ထို့ပြင် ယေရှုခရစ်သည် ခမည်းတော်ဘုရားသခင်၏ ဘုန်းအသရေကို ထင်ရှားစေသော သခင်ဖြစ်ကြောင်း လူတိုင်း အတိအလင်း ဝန်ခံကြလိမ့်မည်။” (ဖိ. ၂:၈-၁၁) ယေဟောဝါဟာ ယေရှုကို မသေနိုင်တဲ့အသက်နဲ့ အသက်ပြန်ရှင်စေခြင်းအားဖြင့် “ထာဝစဉ်” ကောင်းချီးပေးခဲ့တယ်။—ရော. ၆:၉။

၇။ ဘုရားသခင်က ယေရှုကို ဘယ်နည်းတွေနဲ့ “အပေါင်းအဖော်တွေထက်ပိုပြီး” ဘိသိက်ပေးခဲ့သလဲ။

^၇ ဆာလံ ၄၅:၆၊ ၇ ကိုဖတ်ပါ။ ယေရှုက ဖြောင့်မတ်မှုကိုချစ်ပြီး သူ့ဖခင်ကို ရှုတ်ချမှုဖြစ်စေနိုင်တဲ့ အရာမှန်သမျှ ကို မုန်းတယ်၊ အဲဒါကြောင့် ယေဟောဝါက သူ့ကို မေရှိယနိုင်ငံတော်ရဲ့ ဘုရင်အဖြစ် ဘိသိက်ပေးခဲ့တယ်။ ယေရှုဟာ “အပေါင်းအဖော်တွေထက်ပိုပြီး အားရရွှင်လန်းခြင်းဆီ” နဲ့ ဘိသိက်ပေးခံရတယ်။ “အပေါင်းအဖော်တွေ” ဆိုတာက ဒါဝိဒ်မျိုးရိုးကနေဆင်းသက်လာတဲ့ ယုဒဘုရင်တွေဖြစ်တယ်။ ယေရှုဟာ ဘယ်လိုနည်းတွေနဲ့ ဘိသိက်ပေးခံရသလဲ။ ပထမနည်းကတော့ ယေရှုကို ယေဟောဝါကိုယ်တိုင် ဘိသိက်ပေးတယ်။ ဒုတိယနည်းက ယေဟောဝါဟာ ယေရှုကို ဘုရင်အဖြစ်ရော၊ ယဇ်ပုရောဟိတ်မင်းအဖြစ်ပါ အမှုဆောင်ဖို့ ဘိသိက်ပေးခဲ့တယ်။ (ဆာ. ၂:၂; ဟေဗြဲ ၅:၅၊ ၆) တတိယနည်းက ယေရှုဟာ အစ္စရေးဘုရင်တွေလို ဆီနဲ့ဘိသိက်ပေးခံရတာမဟုတ်ဘဲ သန့်ရှင်းသောစွမ်းအားတော်နဲ့ ဘိသိက်ပေးခံရတယ်။ နောက်ဆုံးနည်းက ယေရှုဟာ မြေကြီးပေါ်ကနေမဟုတ်ဘဲ ကောင်းကင်ကနေ အုပ်ချုပ်တယ်။

၈။ ယေရှုရဲ့အုပ်ချုပ်မှုက ဖြောင့်မှန်တယ်လို့ ကျွန်ုပ်တို့ ဘာကြောင့် ယုံကြည်စိတ်ချနိုင်သလဲ။ ဘုရားသခင်က ယေရှုရဲ့ပလ္လင်ဖြစ်တယ်ဆိုတာ ဘာအဓိပ္ပာယ်လဲ။

^၈ ၁၉၁၄ ခုနှစ်မှာ ယေဟောဝါဟာ သားတော်ကို ကောင်းကင်မေရှိယနိုင်ငံရဲ့ ဘုရင်အဖြစ် ခန့်အပ်ခဲ့တယ်။ ယေရှုရဲ့နိုင်ငံတော် “ရာဇလှံတံ” ဟာ “ဖြောင့်မှန်တဲ့ရာဇလှံတံ” ဖြစ်တယ်၊ ဒါကြောင့် ယေရှုရဲ့အုပ်ချုပ်မှုဟာ အမြဲတရားမျှတပြီး ဖြောင့်မှန်မယ်ဆိုတာ ယုံကြည်စိတ်ချနိုင်တယ်။ ယေရှုရတဲ့ အခွင့်အာဏာဟာ တရားဝင်တယ်၊ ဘာကြောင့်လဲဆိုတော့ ‘ဘုရားသခင်က သူ့ရဲ့ပလ္လင်’ ဖြစ်တယ်၊ ဆိုလိုတာက ယေဟောဝါက သူ့ကို ဘုရင်အဖြစ်ခန့်အပ်တယ်။ ယေရှုရဲ့ပလ္လင်ဟာ “အစဉ်ထာဝရ” တည်ရှိမှာဖြစ်တယ်။ ယေဟောဝါ ခန့်အပ်ထားတဲ့ဘုရင် လက်အောက်မှာ အမှုဆောင်ရတာ ဂုဏ်ယူစရာပါပဲ။

၉၊ ၁၀။ (က) ယေရှု ဘယ်အချိန်မှာ ဓားကို ခါးမှာချိတ်သလဲ၊ ဓားကို သူ ဘယ်လိုသုံးခဲ့သလဲ။ (ခ) ခရစ်တော်ဟာ အနာဂတ်မှာ ဓားကို ဘယ်လိုသုံးမလဲ။

^၉ ဆာလံ ၄၅:၃ ကိုဖတ်ပါ။ ယေဟောဝါက ဘုရင်ကို ခါးမှာ ဓားချိတ်ထားဖို့ပြောတယ်။ အဲဒီလိုပြောခြင်းအားဖြင့် ယေဟောဝါက ယေရှုကို ဘုရားသခင့်အုပ်ချုပ်မှုကိုဆန့်ကျင်တဲ့ ရန်သူတွေကို တိုက်ခိုက်ချေမှုန်းဖို့ ခွင့်ပြုချက်ပေးလိုက်တယ်။ (ဆာ. ၁၁၀:၂) ခရစ်တော်ဟာ ဘယ်သူမှ မအောင်မြင်နိုင်တဲ့ စစ်သူရဲနဲ့ ဘုရင်ပဲ၊ ဒါကြောင့် သူ့ကို “ခွန်အားကြီးတဲ့အရှင်” လို့ခေါ်တယ်။ ယေရှုဟာ စာတန်နဲ့ နတ်ဆိုးတွေကို အနိုင်ရပြီး ကောင်းကင်ကနေ မြေကြီးပေါ်ပစ်ချခဲ့တဲ့ ၁၉၁၄ ခုနှစ်မှာ သူ့ရဲ့ဓားကို ခါးမှာချိတ်ခဲ့တယ်။—ဗျာ. ၁၂:၇-၉။

^၁၀ အဲဒါက ဘုရင်ဟာ စစ်သူရဲအနေနဲ့ စတင်အောင်ပွဲခံတာဖြစ်တယ်။ သူဟာ “အပြီးအောင်မြင်” ရမှာဖြစ်တယ်။ (ဗျာ. ၆:၂) စာတန့်လောကရဲ့အစိတ်အပိုင်းအားလုံးကို ဖျက်ဆီးပစ်ဖို့၊ စာတန်နဲ့ သူ့ရဲ့နတ်ဆိုးတွေရဲ့ ဩဇာလွှမ်းမိုးမှုကို ဖယ်ရှားပစ်ဖို့ ယေဟောဝါ ဆုံးဖြတ်ထားတယ်။ အရင်ဆုံး ကမ္ဘာ့အယူမှားဘာသာဖြစ်တဲ့ မဟာဗာဗုလုန်ကို ဖျက်ဆီးမှာဖြစ်တယ်။ ယေဟောဝါဟာ ကမ္ဘာ့နိုင်ငံရေး အုပ်စိုးရှင်တွေကိုသုံးပြီး အဲဒီဆိုးညစ်တဲ့ “ပြည့်တန်ဆာ” ကို ဖျက်ဆီးပစ်မယ်။ (ဗျာ. ၁၇:၁၆၊ ၁၇) အဲဒီနောက်မှာ ခရစ်တော်ဟာ စာတန့်လောကရဲ့အုပ်ချုပ်မှုအားလုံးကို ဖယ်ရှားပစ်ပါလိမ့်မယ်။ ပြီးတဲ့နောက် တွင်းနက်ကြီးရဲ့ကောင်းကင်တမန်လည်းဖြစ်တဲ့ ယေရှုဟာ စာတန်နဲ့ နတ်ဆိုးတွေကို တွင်းနက်ကြီးထဲပစ်ချပြီး အပြီးသတ်အောင်ပွဲခံမှာဖြစ်တယ်။ (ဗျာ. ၉:၁၊ ၁၁; ၂၀:၁-၃) စိတ်လှုပ်ရှားစရာကောင်းတဲ့ အဲဒီအဖြစ်အပျက်တွေကို ဆာလံ ၄၅ မှာ ဘယ်လိုကြိုပြောထားတယ်ဆိုတာ ကြည့်ကြစို့။

၁၁။ ခရစ်တော်ဟာ “အမှန်တရား” ကိုကာကွယ်ဖို့ ဘယ်လိုစီးနင်းတိုက်ခိုက်သလဲ။

^၁၁ ဆာလံ ၄၅:၄ ကိုဖတ်ပါ။ ဘုရင်ဟာ နယ်မြေတွေကို သိမ်းပိုက်ဖို့၊ လူတွေကို ကျွန်ပြုဖို့ဆိုတဲ့ ရည်ရွယ်ချက်နဲ့ စစ်တိုက်တာမဟုတ်ဘူး။ ဘုရင်ဟာ မှန်ကန်တဲ့ရည်ရွယ်ချက်တွေနဲ့ စစ်တိုက်တယ်၊ “အမှန်တရားနဲ့ ဖြောင့်မတ်ခြင်းအတွက်၊ နှိမ့်ချမှုအတွက်” တိုက်ခိုက်တယ်။ ယေဟောဝါတစ်ပါးတည်းသာလျှင် စကြဝဠာကို အုပ်ချုပ်ပိုင်ခွင့်ရှိတယ်။ အဲဒါက အရေးကြီးဆုံး “အမှန်တရား” ပဲ၊ အဲဒါကို ကာကွယ်ရမှာဖြစ်တယ်။ စာတန်က သူ ပုန်ကန်ချိန်မှာ ယေဟောဝါမှာ အုပ်ချုပ်ပိုင်ခွင့်မရှိဘူးလို့ ပြောခဲ့တယ်။ အဲဒီအချိန်ကစပြီး နတ်ဆိုးတွေရော လူသားတွေပါ အဲဒီအမှန်တရားကို သံသယဝင်ခဲ့ကြတယ်။ ယေဟောဝါ ခန့်အပ်ထားတဲ့ဘုရင်က စီးနင်းတိုက်ခိုက်ပြီး ယေဟောဝါတစ်ပါးတည်းသာလျှင် အုပ်ချုပ်ပိုင်ခွင့်ရှိတယ်ဆိုတာ သက်သေပြရမယ့်အချိန်က အခုအချိန်ပဲ။

၁၂။ ဘုရင်ဟာ “နှိမ့်ချမှု” ကို ကာကွယ်ဖို့အတွက် ဘယ်လိုစီးနင်းတိုက်ခိုက်သလဲ။

 ^၁၂ ဘုရင်ဟာ “နှိမ့်ချမှု” ကို ကာကွယ်ဖို့အတွက်လည်း စီးနင်းတိုက်ခိုက်တယ်။ ယေရှုဟာ နှိမ့်ချမှုပြရာမှာ၊ ဖခင်ကိုနာခံရာမှာ အမြဲပဲ အကောင်းဆုံးစံနမူနာပြခဲ့တယ်။ (ဟေရှာ. ၅၀:၄၊ ၅; ယော. ၅:၁၉) ဘုရင်ရဲ့သစ္စာရှိကျေးကျွန်အားလုံးဟာ ဘုရင်ရဲ့စံနမူနာကိုတုပပြီး ကိစ္စရပ်တိုင်းမှာ ယေဟောဝါကို အုပ်စိုးရှင်အဖြစ် နှိမ့်ချစွာ လက်အောက်ခံရမယ်။ အဲဒီလိုလုပ်ဆောင်သူတွေသာ ဘုရားသခင့်ကမ္ဘာသစ်မှာ နေထိုင်ခွင့်ရမယ်။—ဇာ. ၁၄:၁၆၊ ၁၇။

၁၃။ ခရစ်တော်ဟာ “ဖြောင့်မတ်ခြင်းအတွက်” ဘယ်လိုစီးနင်းတိုက်ခိုက်သလဲ။

^၁၃ ခရစ်တော်ဟာ “ဖြောင့်မတ်ခြင်းအတွက်” လည်း စီးနင်းတိုက်ခိုက်တယ်။ အဲဒီဖြောင့်မတ်ခြင်းက “ဘုရားသခင်၏ဖြောင့်မတ်ခြင်း၊” နောက်တစ်မျိုးပြောရင် အမှားအမှန်နဲ့ပတ်သက်တဲ့ ယေဟောဝါရဲ့စံနှုန်းတွေဖြစ်တယ်။ (ရော. ၃:၂၁; တရား. ၃၂:၄) ဟေရှာယက ယေရှုခရစ်နဲ့ပတ်သက်ပြီး “ဘုရင်တစ်ပါးက ဖြောင့်မတ်မှုအတွက် အုပ်စိုးလိမ့်မယ်” လို့ ကြိုပြောခဲ့တယ်။ (ဟေရှာ. ၃၂:၁၊ ကဘ) ယေရှုဟာ သူ့ရဲ့အုပ်ချုပ်မှုအောက်မှာ “ကောင်းကင်သစ်” နဲ့ “မြေကြီးသစ်” ကိုဖြစ်ပေါ်စေပြီး အဲဒီနေရာမှာ လူတိုင်းက ဖြောင့်မတ်မှန်ကန်တာကိုပဲ လုပ်ကြမှာဖြစ်တယ်။ (၂ ပေ. ၃:၁၃) ဆိုလိုတာက ကမ္ဘာသစ်မှာနေထိုင်မယ့်သူတိုင်းဟာ ယေဟောဝါရဲ့စံနှုန်းတွေနဲ့အညီ အသက်ရှင်ကြပါလိမ့်မယ်။—ဟေရှာ. ၁၁:၁-၅။

၁၄။ ခရစ်တော်ရဲ့ ညာလက်ဟာ ဘယ်လိုနည်းနဲ့ “ထိတ်လန့်အံ့ဩစရာတွေကို” လုပ်ဆောင်မလဲ။ (ဆောင်းပါးအစမှာပါတဲ့ ရုပ်ပုံကိုကြည့်ပါ။)

^၁၄ ဘုရင်ဟာ ဓားကို ခါးမှာချိတ်ပြီး စီးနင်းတယ်လို့ ဆာလံဆရာက ပြောတယ်။ (ဆာ. ၄၅:၃) ဒါပေမဲ့ အချိန်ကျတဲ့အခါ သူဟာ ညာလက်နဲ့ ဓားကိုထုတ်ပြီး စတင်အသုံးပြုတယ်။ ဆာလံဆရာက ယေရှုနဲ့ပတ်သက်ပြီး “မင်းကြီးရဲ့ ညာလက်က ထိတ်လန့်အံ့ဩစရာတွေကို လုပ်ဆောင်လိမ့်မယ်” လို့ ကြိုပြောခဲ့တယ်။ (ဆာ. ၄၅:၄၊ ကဘ) ယေရှုခရစ်က အာမဂေဒုန်မှာ စာတန့်စနစ်ကို ဖျက်ဆီးတဲ့အခါ “ထိတ်လန့်အံ့ဩစရာတွေကို လုပ်ဆောင်လိမ့်မယ်။” ဘုရင်က စာတန့်စနစ်ကို ဘယ်လိုဖျက်ဆီးမယ်ဆိုတာ ကျွန်ုပ်တို့ အတိအကျ မသိရဘူး။ ဒါပေမဲ့ ယေရှုလုပ်ဆောင်သမျှဟာ ဘုရားသခင့်သတိပေးချက်ကို နားမထောင်သူတွေ၊ ဘုရင့်အုပ်ချုပ်မှုကို လက်မခံသူတွေအတွက် ထိတ်လန့်ကြောက်ရွံ့စရာ ဖြစ်ပါလိမ့်မယ်။ (ဆာလံ ၂:၁၁၊ ၁၂ ကိုဖတ်ပါ။) ဆုံးခန်းကာလနဲ့ပတ်သက်ပြီး ယေရှုက “လူတို့သည် မြေကြီးပေါ်၌ ဖြစ်ပျက်မည့်အရာများကိုမျှော်၍ ကြောက်လန့်သဖြင့် မေ့မြောသွားကြလိမ့်မည်။ အကြောင်းမူကား ကောင်းကင်တန်ခိုးများ တုန်လှုပ်ကြလိမ့်မည်။ ထိုအခါ မဟာဘုန်းတန်ခိုးတော်ကိုဆောင်လျက် မိုးတိမ်ကိုစီး၍ လူသားကြွလာတော်မူသည်ကို မြင်ကြရလိမ့်မည်” လို့ ကြိုဟောခဲ့တယ်။—လု. ၂၁:၂၆၊ ၂၇။

၁၅၊ ၁၆။ စစ်ပွဲမှာ ခရစ်တော်နောက်လိုက်မယ့် ကောင်းကင်ဗိုလ်ခြေတွေမှာ ဘယ်သူတွေ ပါဝင်မလဲ။

^၁၅ ဘုရင်ဟာ ဘုရားသခင့်ရန်သူတွေကို တိုက်ခိုက်ချေမှုန်းဖို့အတွက် “မဟာဘုန်းတန်ခိုးတော်ကိုဆောင်လျက်” ကြွလာမယ်ဆိုတာကို ဗျာဒိတ်ကျမ်းမှာ ဒီလို ကြိုဟောထားတယ်– “ထို့နောက် ကောင်းကင်ပွင့်၍ မြင်းဖြူတစ်စီးကို ငါမြင်၏။ မြင်းစီးသူသည် သစ္စာရှိ၍ စစ်မှန်သောအရှင် ဟုခေါ်ဆိုခံရ၏။ ကိုယ်တော်သည် ဖြောင့်မတ်စွာ တရားစီရင်၍ စစ်တိုက်တော်မူ၏။ ထို့ပြင် ကောင်းကင်ဗိုလ်ခြေတို့လည်း မြင်းဖြူများကိုစီးလျက် နောက်တော်သို့ လိုက်ကြ၏။ သူတို့သည် ဖြူစင်သော ချည်ချောထည်ကို ဝတ်ဆင်ထားကြ၏။ လူမျိုးများကို တိုက်ခိုက်ရန် ခံတွင်းတော်မှ ထက်သောဓားရှည် ထိုးထွက်လျက်ရှိပြီး ကိုယ်တော်သည် ထိုသူတို့ကို သံလှံတံဖြင့် ထိန်းကျောင်းတော်မူမည်။ ကိုယ်တော်သည် အနန္တတန်ခိုးရှင် ဘုရားသခင်၏ အမျက်ဒေါသစပျစ်ကျင်းကိုလည်း နင်းနယ်တော်မူ၏။”—ဗျာ. ၁၉:၁၁၊ ၁၄၊ ၁၅။

^၁၆ စစ်ပွဲမှာ ယေရှုနောက်ကလိုက်မယ့် “ကောင်းကင်ဗိုလ်ခြေ” တွေက ဘယ်သူတွေဖြစ်မလဲ။ ယေရှုက သူ့ရဲ့ဓားကို ခါးမှာချိတ်ပြီး စာတန်နဲ့ နတ်ဆိုးတွေကို ကောင်းကင်ကနေပစ်ချတုန်းက ကောင်းကင်တမန်တွေဟာ ယေရှုနဲ့အတူ တိုက်ခိုက်ခဲ့ကြတယ်။ (ဗျာ. ၁၂:၇-၉) ဒါကြောင့် အာမဂေဒုန်စစ်ပွဲမှာ ခရစ်တော်ရဲ့စစ်တပ်မှာ သန့်ရှင်းတဲ့ကောင်းကင်တမန်တွေ ပါဝင်မယ်ဆိုတာ သဘာဝကျပါတယ်။ ခရစ်တော်ရဲ့စစ်တပ်မှာ နောက်ထပ်ပါဝင်မယ့်သူတွေ ရှိဦးမလား။ ယေရှုက သူ့ရဲ့ဘိသိက်ခံညီတော်တွေကို ဒီလို ကတိပေးခဲ့တယ်– “အောင်မြင်၍ ငါကျင့်သည်အတိုင်း အဆုံးတိုင်အောင်ကျင့်သောသူအား လူမျိုးများအပေါ် အခွင့်အာဏာကို ငါပေးမည်။ ငါ့ခမည်းတော်ထံမှ အခွင့်အာဏာကို ငါလက်ခံရရှိသည်နည်းတူ သူသည်လည်း လူတို့ကို သံလှံတံနှင့် အုပ်စိုးသဖြင့် လူတို့သည် မြေအိုးများ အစိတ်စိတ်ကွဲသကဲ့သို့ ကွဲကြလိမ့်မည်။” (ဗျာ. ၂:၂၆၊ ၂၇) အဲဒီအချိန်မှာ ခရစ်တော်ရဲ့ဘိသိက်ခံညီတော်အားလုံးဟာ ကောင်းကင်ကို ရှင်ပြန်ထမြောက်ပြီးပြီ ဖြစ်ပါလိမ့်မယ်။ သူတို့တွေဟာ ခရစ်တော်ရဲ့  ကောင်းကင်စစ်တပ်မှာ ပါဝင်ကြပါလိမ့်မယ်။ ယေရှုက တိုင်းနိုင်ငံတွေကိုဖျက်ဆီးဖို့ “ထိတ်လန့်အံ့ဩစရာတွေကို” လုပ်ဆောင်တဲ့အခါ ဘိသိက်ခံတွေဟာ ယေရှုနဲ့အတူ ရှိနေကြမှာဖြစ်တယ်။

၁၇။ (က) ခရစ်တော်စီးတဲ့မြင်းဖြူက ဘာကိုတင်စားသလဲ။ (ခ) ဓားနဲ့လေးက ဘာကိုတင်စားသလဲ။

^၁၇ ဆာလံ ၄၅:၅ ကိုဖတ်ပါ။ ဘုရင်က မြင်းဖြူကို စီးတယ်။ “ငါကြည့်လိုက်သော် မြင်းဖြူတစ်စီးကို ငါမြင်၏။ မြင်းစီးသူရဲသည် လေးကို ကိုင်ထား၏။ သူ့အား သရဖူကိုပေး၏။ သူသည် အောင်မြင်လျက်လည်းကောင်း၊ အပြီးအောင်မြင်ရန်လည်းကောင်း ထွက်သွားလေ၏” လို့ ဗျာဒိတ် ၆:၂ မှာဖော်ပြထားတယ်။ မြင်းဖြူက ဘုရားသခင်အမြင်မှာ ဖြောင့်မတ်၊ သန့်ရှင်းတဲ့စစ်ပွဲကို တင်စားတယ်။ (ဗျာ. ၁၉:၁၁) ဘုရင်ဟာ ဓားကိုသာမက လေးကိုလည်း ကိုင်ထားတယ်။ ဓားနဲ့လေး နှစ်မျိုးစလုံးက ရန်သူတွေကို ယေရှုဖျက်ဆီးတဲ့အခါ အသုံးပြုမယ့်နည်းလမ်းတွေကို တင်စားတယ်။

၁၈။ ခရစ်တော်က သူ့ရဲ့ “မြားတွေ” ကို သုံးတဲ့အခါ ဘာတွေဖြစ်ပျက်မလဲ။

^၁၈ ဆာလံဆရာဟာ ကဗျာဆန်ဆန် စကားလုံးတွေသုံးပြီး ဘုရင်အကြောင်း ဒီလိုကြိုဟောခဲ့တယ်– “ချွန်ထက်တဲ့မြားတွေက ရန်သူတွေရဲ့အသည်းနှလုံးကို ဖောက်ထွင်းတယ်။ လူတွေကို မင်းကြီးရှေ့မှာ တဖြုတ်ဖြုတ် လဲကျစေတယ်။” ဖျက်ဆီးခြင်းဘေးက ကမ္ဘာတစ်ခုလုံးအပေါ် ကျရောက်မှာဖြစ်တယ်။ “အဲဒီနေ့မှာ ယေဟောဝါသတ်လို့သေတဲ့သူတွေက မြေကြီးတစ်ဖက်စွန်းကနေ နောက်တစ်ဖက်စွန်းအထိ ရှိနေလိမ့်မယ်” လို့ ယေရမိ ကြိုဟောခဲ့တယ်။ (ယေ. ၂၅:၃၃၊ ကဘ) အဲဒီအဖြစ်အပျက်ကိုပဲ နောက်ပရောဖက်ပြုချက်တစ်ခုက ဒီလိုကြိုဟောတယ်– “နေထဲ၌ရပ်နေသော ကောင်းကင်တမန်တစ်ပါးကိုလည်း ငါမြင်၏။ သူသည် ကောင်းကင်အလယ်တွင် ပျံသန်းနေသော ငှက်အပေါင်းတို့အား ‘ဤနေရာသို့လာကြ။ ဘုရားသခင်၏ ညစာစားပွဲကြီးသို့ စုဝေးကြ။ သင်တို့သည် ရှင်ဘုရင်တို့၏အသား၊ တပ်မှူးတို့၏အသား၊ ခွန်အားကြီးသူတို့၏အသား၊ မြင်းနှင့်မြင်းစီးသူရဲတို့၏အသား၊ လွတ်လပ်သူများ၊ ကျွန်များမှစ၍ လူအကြီးအငယ် အားလုံးတို့၏အသားကို စားကြရမည်’ ဟုကျယ်သောအသံဖြင့် ကြွေးကြော်လေ၏။”—ဗျာ. ၁၉:၁၇၊ ၁၈။

၁၉။ ခရစ်တော်ဟာ ဘယ်လိုနည်းနဲ့ အပြီးသတ် “အောင်ပွဲခံ” မလဲ။

^၁၉ ဆိုးသွမ်းတဲ့စာတန့်လောကကို ဖျက်ဆီးပြီးတဲ့အခါ ဘုန်းကြီးတဲ့ဘုရင် ယေရှုခရစ်ဟာ “အောင်ပွဲခံ” ပါလိမ့်မယ်။ (ဆာ. ၄၅:၄၊ ကဘ) စာတန်နဲ့ သူ့ရဲ့နတ်ဆိုးတွေကို တွင်းနက်ကြီးထဲပစ်ချခြင်းအားဖြင့် အပြီးသတ် အောင်ပွဲခံပါလိမ့်မယ်။ ကောင်းကင်ကနေ ယေရှုနဲ့ ၁၄၄,၀၀၀ တို့ အနှစ်တစ်ထောင်အုပ်ချုပ်နေချိန်မှာ သူတို့တွေဟာ တွင်းနက်ကြီးထဲမှာ ရှိနေပါလိမ့်မယ်။ (ဗျာ. ၂၀:၂၊ ၃) မာရ်နတ်နဲ့ သူ့ရဲ့နတ်ဆိုးတွေ တွင်းနက်ကြီးထဲမှာ ပိတ်လှောင်ခံရတဲ့အခါ ဘာအန္တရာယ်မှ မပေးနိုင်တော့လို့ သူတို့တွေဟာ သေနေတာနဲ့ တူပါလိမ့်မယ်။ အဲဒီအချိန်မှာ မြေကြီးပေါ်မှာရှိသူအားလုံးဟာ စာတန်နဲ့ နတ်ဆိုးတွေရဲ့ အနှောင့်အယှက်မရှိဘဲ ဘုရင့်အုပ်ချုပ်မှုအောက် ပျော်ရွှင်စွာ နေရပါလိမ့်မယ်။ ကမ္ဘာတစ်ခုလုံး သာယာလှပတဲ့ပရဒိသုမဖြစ်ခင်မှာ သူတို့တွေဟာ ဘုရင်နဲ့ ၁၄၄,၀၀၀ တို့နဲ့အတူ ဝမ်းမြောက်ရွှင်လန်းရမယ့် နောက်အကြောင်းတစ်ခု ရှိမှာဖြစ်တယ်။ အဲဒီအကြောင်းကို လာမယ့်ဆောင်းပါးမှာ ဆွေးနွေးပါမယ်။