1, 2. Kungani iHubo 45 liqakathekile kithi?

 INKOSI yenkazimulo ilwela iqiniso kanye lokulunga njalo iqedisa ukunqoba izitha zayo. Isizinqobile zonke ekulweni kokucina, itshada lomlobokazi wayo omuhle. Izizukulwane zonke ezizayo zizahlala ziyikhumbula inkosi le njalo ziyidumisa. Lokhu yikho okumunyethweyo kuHubo 45.

² Kodwa iHubo 45 lilokunye okuqakathekileyo ngaphandle kokuba lendaba emnandi nje elesiphetho esihle. Izehlakalo ezisesahlukweni lesi ziqakathekile kithi. Zimayelana lokuphila kwethu khathesi, kanye lekusasa lethu. Yikho-ke, asilihlolisiseni ihubo leli ngelihlo elibukhali.

3, 4. (a) ‘Izindaba ezinhle’ ziphathelane lani njalo zizithinta njani izinhliziyo zethu? (b) ‘Siyihayela njani inkosi’ njalo ulimi lwethu luba njani njengepenseli yomlobi ololwazi?

³ Bala iHubo 45:1. ‘Indaba enkulu [“enhle,” NW]’ ethinte inhliziyo yomhubi yayitshiya ‘isigubhazela’ iphathelane lenkosi. Ibala lesiHebheru eliyisenzo elihunyutshwe ngokuthi ‘ukugubhazela’ lalisitsho “ukuphuphuma,” kumbe “ukubila.” Inhliziyo yomhubi yabila ngokutshiseka ngenxa yendaba le njalo ulimi  lwakhe lwaba ‘njengepenseli yomlobi ololwazi.’

⁴ Lokhu kutshoni kithi? Izindaba ezinhle zoMbuso kaMesiya ziphathelane lokuthile okuhle okuthinta izinhliziyo zethu. Umlayezo woMbuso waba ‘muhle’ kakhulu ngo-1914. Kusukela khonapho, umlayezo lo awusaphathelananga loMbuso ozayo kodwa usuphathelane lohulumende woqobo osubusa ezulwini. Leli ‘livangeli kumbe izindaba ezinhle zoMbuso’ esizitshumayela “kuwo wonke umhlaba njengobufakazi kuzo zonke izizwe.” (Mat. 24:14) Izinhliziyo zethu ‘ziyagubhazela’ yini ngomlayezo woMbuso? Sizitshumayela ngokutshiseka yini izindaba ezinhle zoMbuso? Njengomhubi, ‘sihayela inkosi’ yethu, uJesu Khristu. Simemezela ukuthi useyiNkosi yoMbuso kaMesiya ebekiweyo ezulwini. Kanti njalo asikhethi muntu, ababusi lababuswayo sibamema bonke ukuthi bazithobe ebukhosini bakhe. (Hubo. 2:​1, 2, 4-12) Ulimi lwethu ‘lunjengepenseli yomlobi ololwazi’ ngenxa yokuthi sisebenzisa iLizwi elibhaliweyo zikhathi zonke ekutshumayeleni.

5. (a) Kuyini okwakusenza ukuthi uJesu abe ‘yilikhwa lamakhwa’? (b) UJesu wayesebenzisa amazwi anjani ekutshumayeleni, futhi singamlingisela njani?

⁵ Bala iHubo 45:2. IMibhalo ayikhulumi okunengi ngokuthi uJesu wayebukeka njani. Akuthandabuzwa ukuthi ‘wayeyilikhwa’ ngenxa yokuthi wayephelele. Kodwa wayeyilikhwa lamakhwa ngenxa yokuthembeka kwakhe kuJehova lokuhlala eqotho zonke izikhathi. Kanti njalo uJesu wasebenzisa ‘amazwi amnandi’ lapho etshumayela umlayezo woMbuso. (Luk. 4:22; Joh. 7:46) Siyamlingisela yini nxa sitshumayela? Siyawasebenzisa yini amazwi athinta izinhliziyo zabantu?​—Kol. 4:6.

6. UNkulunkulu wambusisa njani uJesu “lanininini”?

⁶ UJesu wayezinikele ngenhliziyo yakhe yonke, yikho uJehova wambusisa ngesikhathi etshumayela emhlabeni futhi wamnika umvuzo ngemva komhlatshelo wokufa kwakhe. Umphostoli uPhawuli wabhala ukuthi: “[UJesu] wathi ebunjwe wabonakala njengomuntu, wazithoba walalela kwaze kwaba sekufeni.” UPhawuli uqhubeka esithi, “Ngakho-ke uNkulunkulu wamphakamisela endaweni ephezulu kakhulu wamnika ibizo elingaphezu kwamabizo wonke, ukuba amadolo wonke aguqe ebizweni likaJesu, ezulwini lasemhlabeni kanye langaphansi komhlaba, lezindimi zonke zivume ukuthi uJesu Khristu uyiNkosi, kube ludumo lukaNkulunkulu uYise.” (Flp. 2:8-11) UJehova wambusisa uJesu “lanininini” ngokumvusa ukuthi aphile phakade, engasafi.​—Rom. 6:9.

7. UNkulunkulu wamgcoba njani uJesu ngaphezu “kwabakhula” bakhe?

⁷ Bala iHubo 45:​6, 7. UJesu wayekuthanda kakhulu ukulunga njalo wayezonda loba yini eyayingenza ukuthi uYise angahlonitshwa, yikho uJehova wamgcoba waba yiNkosi yoMbuso kaMesiya. UJesu wagcotshwa “ngamafutha entokozo” ukwedlula ‘abakhula bakhe’ okutsho amakhosi akoJuda osendo lukaDavida. Njani?  Esinye isizathu yikuthi uJesu wagcotshwa nguJehova ngokwakhe. Kanti njalo uJehova wamgcoba waba yiNkosi loMphristi oMkhulu. (Hubo. 2:2; Heb. 5:5, 6) Okunye yikuthi uJesu kagcotshwanga ngamafutha kodwa wagcotshwa ngomoya ongcwele njalo ubukhosi bakhe ngobasezulwini hatshi emhlabeni.

8. Kungani kuthiwa uJesu ulelungelo lokubusa, njalo kungani singaba leqiniso lokuthi umbuso wakhe ulokulunga?

⁸ UJehova wabeka iNdodana yakhe ukuthi ibe yiNkosi enguMesiya ezulwini ngo-1914. Sileqiniso lokuthi uJesu uzakwahlulela ngokulunga ngenxa yokuthi ‘intonga yokwahlulela kuhle izakuba yintonga yombuso wakhe.’ Ulelungelo lokubusa ngenxa yokuthi uJehova nguye isisekelo sombuso wakhe. Kanti njalo isihlalo sobukhosi sikaJesu sizakuma kuze kube “nini lanini.” Akuthandabuzwa ukuthi lawe uyaziqhenya ngokukhonza uJehova ngaphansi kweNkosi ayibekileyo elamandla amakhulu.

9, 10. (a) UKhristu wayihloma nini inkemba yakhe, njalo waqalisa nini ukuyisebenzisa? (b) Uzayisebenzisa njani esikhathini esizayo?

⁹ Bala iHubo 45:3. UJehova ulaya iNkosi ayibekileyo, uJesu, ukuthi ‘ihlome inkemba yayo okhalweni.’ Ngokwenza njalo eyinika amandla okuthi iyekulwa labo bonke abaphikisana lobukhosi bukaNkulunkulu njalo eyinika lamandla okubahlulela. (Hubo. 110:2) UKhristu uyiNkosi eliQhawe engeke inqotshwe, yikho ebizwa ngokuthi “wena omkhulu.” Wahloma inkemba yakhe ngo-1914, wanqoba uSathane kanye lamadimoni akhe wasebaxotsha ezulwini wabaphosela emhlabeni.​—Isam. 12:7-9.

¹⁰ Ngalesosikhathi iNkosi yayisaqalisa nje ukunqoba. Kodwa kusamele “iqedise ukunqoba kwayo.” (Isam. 6:2, NW) Zonke izinto ezisemhlabeni obuswa nguSathane zilokhu zisamelele ukwahlulelwa nguJehova njalo uSathane lamadimoni akhe kumele basuswe. Okuzaqala ukutshabalaliswa yiBhabhiloni eNkulu, umbuso womhlaba wonke wenkolo yamanga. Kuyinjongo kaJehova ukusebenzisa abakhokheli bezombusazwe ukuthi batshabalalise “isiphingi” lesi esibi. (Isam. 17:​16, 17) INkosi eliQhawe izalandela ngokubhubhisa imibuso kaSathane, iyichithe yonke. UKhristu obizwa langokuthi “yingilosi yoMgodi ongelamkhawulo” uzaqedisa ukunqoba kwakhe ngokujikela uSathane lamadimoni akhe emgodini ongelamkhawulo. (Isam. 9:1, 11; 20:1-3) Ake sihlole ukuthi iHubo-45 laziphrofetha njani izehlakalo lezi.

11. UKhristu ulilwela njani ‘iqiniso’?

¹¹ Bala iHubo 45:4. INkosi eliQhawe ayiqedisi ukunqoba kwayo ukuze nje ithumbe izindawo ibisicindezela abantu. Ilwa impi yokulunga ngenjongo enhle. Ilwela ‘iqiniso, ukuzithoba lokulunga.’ Iqiniso elikhulu okumele ililwele yibukhosi bukaJehova bendawo yonke. USathane wahlasela ilungelo likaJehova lokubusa lapho emhlamukela. Sekuyisikhathi iqiniso leli eliqakathekileyo lilokhu liphikwa ngamadimoni kanye labantu. Khathesi sesifikile isikhathi sokuthi iNkosi egcotshwe nguJehova iqalise ukulilwela ngokupheleleyo iqiniso eliphathelane lelungelo likaJehova lokubusa.

12. UJesu usifundisa njani ‘ukuthobeka’?

¹² INkosi isifundisa ‘ukuthobeka.’ Yasitshiyela isibonelo esihle sokuthobeka kanye lokuzithoba ngokuthembeka ebukhosini bukaYise, njengoba iyiNdodana kaNkulunkulu ezelwe yodwa. (Isaya. 50:4, 5; Joh. 5:19) Zonke izinceku zeNkosi ezithembekileyo  kumele ziyilingisele njalo zizithobe ebukhosini bukaJehova kukho konke ezikwenzayo. Abazabe besenza njalo yibo kuphela abazaphila emhlabeni kaNkulunkulu omutsha esawuthenjiswayo.​—Zek. 14:16, 17.

13. UKhristu uzakulwela njani ‘ukulunga’?

¹³ UKhristu ulwela ‘ukulunga.’ Ukulunga okulwelwa yiNkosi ‘yikulunga okuvela kuNkulunkulu’ okutsho izimiso zikaJehova mayelana lokulungileyo lokungalunganga. (Rom. 3:21; Dute. 32:4) Ephrofetha ngeNkosi uJesu Khristu, u-Isaya wathi: “Inkosi izabusa ngokulunga.” (Isaya. 32:1) UJesu esebusa uzaletha “izulu elitsha lomhlaba omutsha” esawuthenjiswayo ozabe ‘ulikhaya lokulunga.’ (2 Phet. 3:13) Wonke umuntu ozahlala emhlabeni omutsha kuzamele asebenzise izimiso zikaJehova empilweni yakhe.​—Isaya. 11:1-5.

14. Isandla sikaKhristu sokunene sizazenza njani “izimanga”? (Khangela umfanekiso osekuqaliseni.)

¹⁴ INkosi izagada ibhiza layo elimhlophe, ilenkemba okhalweni lwayo. (Hubo. 45:3) Kodwa kufika isikhathi sokuthi ihwatshe inkemba yayo iyisebenzise ngesandla sayo sokunene. Umhubi waphrofetha wathi: “Akuthi isandla sakho sokunene senze izimanga.” (Hubo. 45:⁠4) Nxa uJesu esethunywe nguJehova ukuzokwahlulela nge-Amagedoni, uzakwenza “izimanga” ehlasela izitha zakhe. Asikwazi ukuthi uzasebenzisani ukuze atshabalalise umhlaba obuswa nguSathane. Kodwa inyathelo lelo lizabenza bathuthumele ngokwesaba labo abasemhlabeni abangazange basilalele isixwayiso esivela kuNkulunkulu sokuthi bazithobe ekubuseni kweNkosi. (Bala iHubo 2:11, 12.) Ephrofetha ngesikhathi sokucina, uJesu wathi abantu “bazaphela amandla ngokwesaba, benqinekiswa yilokho okuzayo emhlabeni, ngokuba izibunjwa zasemkhathini zizazanyazanyiswa.” Waqhubeka wathi: “Kulesosikhathi bazayibona iNdodana yoMuntu isiza ngeyezi ilamandla lenkazimulo enkulu.”​—Luk. 21:26, 27.

15, 16. Ngobani abazabumba “amabutho” azalandela uKhristu empini?

¹⁵ Ibhuku leSambulo limemezela ngokuza kweNkosi izokwahlulela “ilamandla lenkazimulo enkulu” lisithi: “Ngabona izulu livulekile njalo phambi kwami kwakulebhiza elimhlophe, umgadi walo ethiwa nguThembekile loQiniso. Uyahlulela ngokulunga alwe impi. Amabutho asezulwini ayemlandela, egade amabhiza amhlophe njalo egqoke ilineni elihle, elimhlophe njalo lihlanzekile. Emlonyeni wakhe kuphuma inkemba ebukhali agalela ngayo izizwe. Uzazibusa ngentonga yensimbi. Unyathela isikhamelo sewayini sentukuthelo yolaka lukaNkulunkulu uSomandla.”​—Isam. 19:11, 14, 15.

¹⁶ Ngobani ababumba “amabutho” asezulwini alandela uKhristu empini? Uzakhumbula ukuthi ngesikhathi ehloma inkemba yakhe okokuqala ukuze axotshe uSathane lamadimoni akhe ezulwini, uJesu ‘wayelezingilosi zakhe.’ (Isam. 12:7-9) Kukhanya kulengqondo ukuphetha ngokuthi empini ye-Amagedoni, izingilosi ezingcwele zizabe zisebuthweni likaKhristu. Kuzabe kulabanye yini? UJesu wathembisa abafowabo abagcotshiweyo wathi: ‘Lowo onqobayo esenza intando yami kuze kube sekucineni, ngizamnika amandla phezu kwezizwe​—Uzazibusa ngentonga yensimbi, aziphahlaze zibe yizicucu njengokwenziwa ngebumba​—njengoba ngithole amandla avela kuBaba.’ (Isam. 2:26, 27) Yikho-ke amabutho kaKhristu asezulwini azagoqela abafowabo abagcotshiweyo abazabe sebethole umvuzo  wasezulwini. Abagcotshiweyo bazabe bebusa laye lapho esenza “izimanga” ngesikhathi eseselusa izizwe ngentonga yensimbi.

17. (a) Ibhiza elimhlophe eligadwe nguKhristu limelani? (b) Inkemba ledandili kumelani?

¹⁷ Bala iHubo 45:5. INkosi igade ibhiza elimhlophe elimela impi emsulwa lelungileyo phambi kukaJehova. (Isam. 6:2; 19:11) Kayithwalanga nkemba kuphela, ithwele ledandili. Sibala ukuthi: “Ngakhangela, khonapho phambi kwami kwakulebhiza elimhlophe! Umgadi walo wayephethe idandili, njalo waphiwa umqhele, wasuka wahamba njengomnqobi ehlose ukunqoba [“eqedisa ukunqoba kwakhe” NW] Inkemba ledandili kumela lokho okuzasetshenziswa nguKhristu ngesikhathi esesahlulela izitha zakhe.

18. “Imitshoko” kaKhristu izakhanya njani ukuthi ‘icijile’?

¹⁸ Umhubi uphrofetha esebenzisa ulimi olusankondlo esithi, ‘imitshoko yeNkosi ecijileyo iciba izinhliziyo zezitha zayo’ yenze ukuthi ‘izizwe ziwe ngaphansi kwezinyawo zayo.’ Lokhu kuzakwenzakala emhlabeni wonke. Isiphrofetho sikaJeremiya sithi: “Labo ababulewe nguJehova bazakuba sezindaweni zonke​—kusukela komunye kusiya komunye umkhawulo womhlaba.” (Jer. 25:33) Isiphrofetho esihambelana laleso sithi: “Ngasengibona ingilosi imi elangeni, eyamemezela ngelizwi elikhulu ezinyonini zonke ezazindiza emoyeni isithi, ‘Wozani libuthanele idili elikhulu likaNkulunkulu, ukuze lidle inyama yemizimba yamakhosi, leyezinduna zempi, leyamadoda alamandla, eyamabhiza leyabagadi bawo, kanye leyabantu bonke, abakhululekileyo lezigqili, abancane labakhulu.’”​—Isam. 19:17, 18.

19. UKhristu uzakuqedisa njani ukunqoba kwakhe?

¹⁹ UKhristu esetshabalalise umumo wezinto kaSathane lapha emhlabeni ‘esebukhosini bakhe uzakhwela enqoleni esiyanqoba.’ (Hubo. 45:4) Uzaqedisa ukunqoba kwakhe ngokujikela uSathane lamadimoni akhe abavalele emgodini ongelamkhawulo ize iphele iminyaka eyinkulungwane. (Isam. 20:2, 3) UDeveli lezingilosi zakhe sebenjengezidumbu ngalesosikhathi, bayabe bengasahluphi muntu emhlabeni njalo abantu bonke bazabe sebezithoba ngokupheleleyo eNkosini yabo yenkazimulo enqobayo. Kodwa bengakaboni umhlaba untshintshwa kancane kancane usiba lipharadayisi balesinye isizatho sokuthi bathokoze leNkosi yabo kanye labazabusa layo ezulwini. Isenzakalo leso esithokozisayo sizahlolwa esihlokweni esilandelayo.