1, 2. Eaa ra tatou ka inangaro ei i te akara meitaki ia Salamo 45?

TE AKAORO nei tetai ariki kaka ei paruru i te tuatua mou e te tuatua tika. Ka autu aia ki rungao i tona au enemi, e oti ka akaipoipo aia i tetai vaine purotu manea. Ka akamaaraia e ka akapaapaaia teia ariki e tuatau ua atu. Ko teia tetai au tupuanga mataora tei akatakaia mai i roto ia Salamo 45.

² Tera ra, e maata atu te o maira i roto ia Salamo 45. E puapinga tikai teia au tupuanga no tatou no te mea ka riro te reira ei akakeuanga ririnui i roto i to tatou oraanga i teianei e a te tuatau ki mua. Ka akara ana tatou i teia taramo.

3, 4. (a) Eaa te “tuatua meitaki” ta te tata taramo i tata, e akapeea te reira me akakeu i to tatou ngakau? (e) Eaa te karere no runga i “te ariki” ta tatou e akakitekite nei, e akapeea to tatou arero i riro mei “te peni o te tangata tata viviki i te tuatua”?

³ E tatau ia Salamo 45:1. Tetai “tuatua meitaki” tei “pupu” i roto i te ngakau o te tata taramo koia oki, te nuti no runga i tetai ariki. Te akarongo anga te tata taramo i teia nuti kua rekareka maata aia, mei te mea rai e kua pupu me kore kua oraora tona ngakau. Kua riro katoa tona arero mei “te peni o te tangata tata viviki i te tuatua.”

 ⁴ Akapeea ra tatou? Kua riro te tuatua meitaki no runga i te Patireia ei akakeuanga ririnui i roto i to tatou ngakau. I te mataiti 1914, kua riro te karere o te Patireia ei mea “meitaki” tikai. Te tumu? Mei tera mataiti mai, kare teia karere i akatumuia ki runga i tetai Patireia te ka aere mai a te tuatau ki mua. Tera ra, kua akatumuia ki runga i tetai kavamani tika tikai e tutara nei i runga i te rangi. Ko teia te “evangelia o te basileia” ta tatou e tutu aere nei “e kako rava ake te ao katoa.” (Mata. 24:14) Kua “pupu” me kore kua rekareka ainei to tatou ngakau i teia karere o te Patireia? Te akakitekite ra ainei tatou i te tuatua meitaki o te Patireia ma te tu oraora? Mei te tata taramo rai, te tuatua nei tatou ‘no runga i tetai ariki.’ Te akakitekite nei tatou i te karere e ko Iesu te Tutara o te Patireia i te rangi. Te pati nei tatou i te katoatoa, kapiti mai te aronga mana tutara o teianei ao, kia ariki i te Patireia o te Atua. (Sala. 2:1, 2, 4-12) Me taangaanga tatou i te Pipiria i roto i te angaanga tutuanga, ka riro to tatou arero mei “te peni o te tangata tata viviki i te tuatua.”

5. (a) Na roto i teea au tu i riro ei a Iesu ei tangata manea? (e) Akapeea a Iesu te akakitekite maru anga i te karere o te Patireia, e ka akapeea tatou me aru i tona akaraanga?

⁵ E tatau ia Salamo 45:2. Kare e maata ana ta te Pipiria i akakite mai no runga i te tu akara anga o Iesu. Ei tangata apa kore, kare e ekoko e e tangata manea aia. Tera ra, no tona tu tiratiratu e te akarongo mou kia Iehova i riro ei aia ei tangata manea tikai. Pera katoa, kua akakitekite maru a Iesu i te karere o te Patireia e kua akakeu aia i te ngakau o te tangata na roto i tana tuatua. (Luka 4:22; Ioa. 7:46) Te tauta pakari ra ainei tatou i te aru i to Iesu akaraanga i roto i te angaanga tutuanga?​—Kolo. 4:6.

6. Akapeea te Atua te akameitaki anga ia Iesu?

⁶ No to Iesu tu akarongo mou e tona inangaro maata no tona Metua, kua akameitaki a Iehova i tana angaanga orometua i te enua nei e kua oronga Aia i te tutaki kiaia no te akaatinga anga i tona oraanga. Kua tata te apotetoro ko Paulo no runga ia Iesu e: “Koia i kitea mei te tangata nei te tu, kua taakaaka iaia uaorai i te akonoanga e tae ua atu ki te mate, ki te mate satauro ra. I akateitei rava atu ei te Atua iaia, e kua oronga mai i te ingoa i maata ua atu i te teitei i te au ingoa ravarai nei nona: Kia tuku te au turi katoa ki raro, to te rangi, to runga i te enua, e to raro ake i te enua, i te ingoa o Iesu; E kia aaki te au vaa ravarai e, ko Iesu Mesia te Atu, kia kakā te Atua Metua.” (Phili. 2:8-11) Kua akameitaki a Iehova ia Iesu na te akatuakaouanga iaia ki te oraanga mate kore.​—Roma 6:9.

7. Na roto i teea au mataara i akatainu ei te Atua ia Iesu e ‘maata rava atura i tona au oa’?

⁷ E tatau ia Salamo 45:6, 7. No to Iesu inangaro maata no te mea tika e tona rikarika no te au mea tei akamareka kore i tona Metua, kua akatainu a Iehova iaia ei Ariki no te Patireia. Kua akatainuia a Iesu ‘ki te manongi o te rekareka e maata rava atura i tona au oa’ koia oki te au Ariki o Iuda no roto mai i te uanga o Davida. Na roto i teea au mataara? Mea mua, na Iehova i akatainu ia Iesu. Te rua, kua akatainu a Iehova ia Iesu kia tutara ei Ariki e ei Taunga Maata. (Sala.  2:2; Ebe. 5:5, 6) Te toru, kua akatainuia a Iesu ki te vaerua tapu, kare ki te manongi. E te a, te tutara ra aia mei runga mai i te rangi, kare mei te enua nei.

8. Eaa tatou i papu ei e e tutaraanga tika to Iesu, e eaa te aiteanga e ko te Atua tona terono?

⁸ I te mataiti 1914, kua akataoonga a Iehova i tana Tamaiti ei Ariki no te Patireia i runga i te rangi. “E sepeta tuatua-tika te sepeta o [to Iesu] basileia,” no reira tatou i papu ei e ka riro ua rai tana tutaraanga ei mea tau e te tika. Tei iaia te tikaanga ei Ariki no te mea ko te Atua tona terono koia oki, na Iehova i akataoonga iaia ei Ariki. Ka vai rai to Iesu terono “e tuatau ua atu.” Kare e ekoko e te rekareka nei tatou i te tavini ia Iehova i raro ake i te Ariki tana i akataoonga!

9, 10. (a) Inaea a Karaiti te tatua anga i tana koke, e eaa tana i rave? (e) Ka akapeea a Karaiti me taangaanga i tana koke a te tuatau ki mua?

⁹ E tatau ia Salamo 45:3. Akakite a Iehova ki te Ariki kia tatua i tana koke ki runga i tona ua. Na te rave anga i teia, te oronga ra Aia i te tikaanga kia Iesu kia tamaki atu e kia takore i te aronga tei patoi i te tutaraanga a te Atua. (Sala. 110:2) No te mea e Ariki Tumutoa a Karaiti e kare e rauka i tetai ua atu i te autu ki rungao iaia, kua kapikiia aia e ko “tei ririnui.” I te mataiti 1914, kua tatua aia i tana koke te autu anga aia ki rungao ia Satani e te au temoni e kua uri ia ratou mei runga mai i te rangi ki te enua nei.​—Apo. 12:7-9.

¹⁰ Ko te akamataanga te reira o te upokotu anga o te Ariki, e ka “upokotu atu rai” aia. (Apo. 6:2) Kua iki a Iehova i te takore i te au tuanga ravarai o to Satani ao, e ka akakoreia te au akakeuanga kino a Satani e tana au temoni. Ka akapeea Aia me rave i te reira? Te mea mua, ka takoreia a Babulonia Maata, te au akonoanga pikikaa o teianei ao. Na roto i te au mana tutara o teianei ao, ka takore a Iehova i teia “vaine akaturi.” (Apo. 17:16, 17) Aru mai, ka takore takiri a Karaiti i te au kavamani pouroa o to Satani ao. E oti, ka upokotu atu rai a Iesu, ‘te angela o te vaarua takere kore,’ na te uri anga ia Satani e te au temoni ki roto i te vaarua takere kore. (Apo. 9:1, 11; 20:1-3) I teianei, ka akara ana tatou akapeea a Salamo 45 te totouanga i teia au tupuanga umere.

11. Akapeea a Karaiti te akaoro anga ei paruru i te “tuatua-mou”?

¹¹ E tatau ia Salamo 45:4. Kare te Ariki e tamaki atu kia rauka mai te au enua me kore kia akatuikaa i te tangata. E akakoroanga ngateitei tona i tamaki ei aia. Te akaoro ra aia ei paruru i te “tuatua-mou, e te maru, e te tuatua-tika.” Tei ia Iehova anake te tikaanga kia tutara i te ao katoa e pini ua ake. Ko teia te “tuatua-mou” puapinga rava atu ka anoanoia i te paruru. Te meameaau anga a Satani, kua patoi aia i to Iehova tikaanga kia tutara. Mei tera taime mai, kua patoi atu te au temoni e te au tangata i teia tuatua mou puapinga rava atu. Teia oki te taime no te Ariki ta Iehova i akatainu kia tamaki atu, e kia akapapu e tei ia Iehova anake te tikaanga kia tutara.

12. Akapeea te Ariki te akaoro anga ei paruru i te tu “maru”?

¹² Te akaoro katoa ra te Ariki ei paruru i te tu “maru.” Kua akanoo ua ana a Iesu i te akaraanga meitaki rava atu no te tu maru e te akarongo ki tona Metua. (Isa. 50:4, 5; Ioa. 5:19) Ka anoanoia te au tavini tiratiratu o te Ariki kia aru i tona akaraanga e kia akaari i te tu maru ia ratou e akarongo ra kia Iehova ei Tutara no ratou i roto i te au mea ravarai. Ko te aronga ua tei rave i teia te ka akatikaia kia noo i roto i te ao ou o te Atua.​—Zeka. 14:16, 17.

13. Akapeea a Karaiti te akaoro anga ei paruru i te “tuatua-tika”?

 ¹³ Te akaoro katoa ra a Karaiti ei paruru i te “tuatua-tika.” Ko teia te “tuatua-tika a te Atua” koia oki, to Iehova au turanga no te mea tika e te mea tarevake. (Roma 3:21; Deu. 32:4) Teia ta Isaia i totou no runga ia Iesu: “E tutara mai tetai ariki ma te tuatua-tika.” (Isa. 32:1) I te tuatau o tana tutaraanga, ka apai mai a Iesu i “te rangi ou e te enua ou,” e ka rave te tangata katoatoa i te mea tika. (2 Pete. 3:13) Te aiteanga, i roto i te ao ou, ka akono te katoatoa i to Iehova au turanga no te mea tika e te mea tarevake.​—Isa. 11:1-5.

14. Ka akapeea te rima katau o Karaiti me akatupu i te “au mea rikarika”? (Akara i te tutu mua o teia atikara.)

¹⁴ Akakite mai te tata taramo e te akaoro ra te Ariki ma tana koke tei tatuaia ki runga i tona ua. (Sala. 45:3) E oti ka rave mai aia i te koke ki roto i tona rima katau. Kua totou te tata taramo e na te rima katau o Iesu e akatupu “i te au mea rikarika” koia oki, te au mea umere e te mataku. (Sala. 45:4) I te tuatau ia Aramakito, me akaoro a Iesu Karaiti i te takore atu i to Satani ao, e maata tana au mea umere ka rave ei tamataku i tona au enemi. Kare tatou i kite e ka akapeea te Ariki me takore atu i to Satani ao. Inara kua kite tatou e noatu eaa ta Iesu ka rave, ka mataku te aronga tei patoi i te au akamatakiteanga a te Atua e te tutaraanga a te Ariki. (E tatau ia Salamo 2:11, 12.) I roto i tana totou no runga i te tuatau openga, kua karanga a Iesu e ka taravai “te ngakau tangata i te mataku, e te manako ua anga i taua au mea ra i te vaitata anga mai i te ao nei, ka riro oki te au mea mana o te rangi ra i te ruruia.” Karanga katoa aia e: “Ei reira ratou e kite ei i te Tamaiti a te tangata, i te aere anga mai na roto i te tiao, ma te mana e te kakā maata.”​—Luka 21:26, 27.

15, 16. Koai ma ka o atu ki roto i te nuku vaeau te ka aru ia Karaiti ki te tamaki?

¹⁵ I roto i te puka o Apokalupo, kua akakiteia e te aere maira te Ariki “ma te mana e te kakā maata” i te tamaki atu i te au enemi o te Atua. Te akakite ra e: “Kite atura oki au i te rangi i te vevete angaia, e i na, e oroenua teatea; e ko tei noo ki rungao ra, kua karangaia aia, i te Pikikaa kore, e te Tuatua-mou, e akava aia, e e tamaki i te tamaki, ma te tuatua-tika. E kua aru maira te au nuku o te rangi ra iaia, ki rungao i te oroenua teatea, ma te kakau meitaki, e te teatea, e te vivii kore, i te kakau anga. E koke kokoi tei peke mai no roto i tona vaa, ei tainga anga nana i te pa enua: e e mana aia ki rungao ia ratou ma te sepeta auri ra: e nana e takatakai i te taomianga vine ra, ko te wina o te riri otooto o te Atua mana katoatoa.”​—Apo. 19:11, 14, 15.

¹⁶ Koai ma ka o atu ki roto i te “au nuku” i te rangi te ka aru ia Iesu ki te tamaki? Te tatua anga a Iesu i tana koke ki runga i tona ua no te taime mua, kua tauturu tana au angera iaia i te uri atu ia Satani e te au temoni mei runga mai i te rangi. (Apo. 12:7-9) No reira, i te tamaki o Aramakito, ka kapitiia mai te au angera tapu ki roto i te nuku vaeau o Karaiti. E aronga ke atu ainei te ka kapitiia mai ki roto i te nuku vaeau o Karaiti? Kua taputou a Iesu ki tana au taeake akatainuia e: “E te riro iaia te re ra, e te tāpu i taku tuatua e tae ua atu ki te openga ra, e oronga atu au i te mana nona ki rungao i te pa enua: E e tutara aia i rungao ia ratou ma te sepeta auri ra; e e ungaungā rava ratou mei te kapu a te potera ra: mei tei tukuia mai e taku Metua iaku nei.” (Apo. 2:26, 27) I tera taime, kua aere takere te au taeake akatainuia pouroa o Karaiti ki te rangi. Ka o katoa atu ratou ki roto i to Karaiti nuku vaeau i te rangi. Ka tamaki ratou ki te pae  ia Iesu me rave aia i te au mea umere e te mataku i te takore i te au pa enua.

17. (a) Eaa ta te oroenua teatea ta Karaiti e akaoro ra e akatutu maira? (e) Eaa ta te koke e te ana e akatutu maira?

¹⁷ E tatau ia Salamo 45:5. Te akaoro ra te Ariki i tetai oroenua teatea. Te karanga ra a Apokalupo 6:2 e: “Kua akara atura au, e i na, e oroenua teatea: e e ana ta tei noo ki rungao; e e korona tei orongaia mai nona: aere atura aia ma te upokotu atu e kia upokotu atu rai.” Te akatutu ra te oroenua teatea i te tamaki tuatua tika e te tau i mua i te Atua. (Apo. 19:11) Kapiti mai ki te koke, te mou ra te Ariki i tetai ana. Te akatutu ra te koke e te ana i te au ravenga ta Karaiti ka taangaanga ei takore atu i tona au enemi.

18. Eaa te ka tupu me taangaanga a Karaiti i tana au “kakao”?

¹⁸ Na roto i te tuatua pee, kua totou te tata taramo no runga i te Ariki e: “Ka topa te au tangata i raro ia koe! ka kokoi te au kakao noou ra, i te ngakau o te au enemi o te ariki.” Ka tupu te kino maata i te ao katoa. Te akakite maira te totou a Ieremia e: “E ko tei mate ia Iehova ra, kia tae ki te reira rā, e riro ïa mei tetai openga mai o te enua, e tae ua atu ki tetai openga o te enua.” (Iere. 25:33) Akakite katoa tetai totou no runga i taua tupuanga e: “Kua akara atura au i tetai angela i te tu anga ki roto i te rā; kua kapiki maira ma te reo maata ki te au manu ravarai e rere i roto i te mareva nei, na ko maira, Ka aere mai e akaputuputu kotou i te kaingakai aiai a te Atua maata ra; Kia kai kotou i te kopapa o te au ariki ra, e te kopapa o te au rangatira ra, e te kopapa o te aronga mana ra, e te kopapa o te au oroenua, e to tei noo ki rungao ra, e te kopapa o te au tangata ravarai, to te rangatira e to te tuikaa, to te tangata rikiriki e to te aronga mamaata.”​—Apo. 19:17, 18.

19. Ka akapeea a Karaiti me upokotu atu rai?

¹⁹ I muri ake te takoreia anga te ao kino o Satani, “ka akaoro ei [te Ariki kaka ko Iesu Karaiti] ma te manuia.” (Sala. 45:4) Ka upokotu atu rai aia na te uri anga ia Satani e te au temoni ki roto i te vaarua takere kore. Ka noo ratou ki reira no te okotai tauatini mataiti, te tuatau ka tutara a Iesu e te 144,000 mei te rangi mai. (Apo. 20:2, 3) Me piritia a Satani e te au temoni ki roto i te vaarua takere kore, mei te mea rai e kua mate ratou no te mea kare e rauka ia ratou i te akatupu akaou i te kino. I reira, ka mataora te katoatoa i te enua nei i te tutaraanga a te Ariki, no te mea ka kore te akakeuanga kino a Satani e tana au temoni. I na, i mua ake ka riro te enua ei parataito, e tumuanga ke atu tetai ka mataora tatou kapiti atu te Ariki e te 144,000. Ka uriuriia teia tupuanga mataora i roto i te atikara ka aru mai.