1, 2. Doo u se time sha Pasalmi 45 sha ci u nyi?

TOR u iengem ugen ngu zenden sha kwagh u mimi man u perapera, shi a due sha u una hemba mbaihyomov nav ityav. Hembe mbaihyomov nav mban ityav gburu gburu yô, a za vôso kwase u doon un ishima tsung. Ior umbur kwagh u tor ne shi wuese un sha ikyov ikyov. Ka kwagh u vesen u i er ken takerada u Pasalmi 45 je la.

² Nahan kpa, kwagh u i er ken Pasalmi 45 la ka di kwagh u sagher iyol, u i ôr i za kur sha gbenda u doon tsung tseegh tsô ga. Akaa a i er ker la nga se a inja kpishi je. A bende a uma wase hegen man ken hemen kpaa. Yô, se ver nen ishima hegen, se time nen sha pasalmi ne vighe vighe.

3, 4. (a) Ka “kwaghôron u dedoo” u nyi orpasalmi a nger kwagh na, man kwagh ne una fatyô u benden a ishima yase nena? (b) Ka sha nyi gbenda nahan ‘kwaghôron u dedoo u se lu ôron la i lu u sha kwagh u tor ugene,’ man nombor wase ka u hingir er ka pensel nahan nena?

³ Ôr Pasalmi 45:1. “Kwaghôron u dedoo” u a iv orngeren pasalmi ne ken ishima je a lu “haan” la ka ibaver i sha kwagh u tor ugen. Ishember i ken zwa Heberu i i gem ér “haan”  la ngi ôron kwagh u kwagh u a “usa” a lu haan shin a ve “ambormboso” yô. Ibaver ne doo orpasalmi kpishi u ungwan je lu un er ishima na usa, ngi haan inya sha ci u iember nahan. Shi ibaver ne na nombor na hingir er ka “pensel u orfan kwaghngeren dedoo” nahan.

⁴ Se di ye? Loho u dedoo u sha kwagh u Tartor u Mesiya la ka kwaghôron u dedoo u ka a bende a asema a ase yô. Lu ken inyom i 1914 la, loho u Tartor ne hemba lun u “dedoo” cii ye. Hii shighe la je, loho la kera lu u sha kwagh u Tartor u ken hemen ga, kpa lu u sha kwagh u gomoti u kpôô kpôô, u a lu hemen sha hegen yô. Loho ne ka “Loho u Dedoo u tartor” u se pasen u shin “tar, sha u u̱ lu mpase hen akuraior cii” la. (Mat. 24:14) Kwagh u loho u dedoo u Tartor ne iv se ken ishima je ngu “haan” inya kpa? Se mba pasen loho u dedoo u Tartor la sha gbashima kpa? Er orpasalmi nahan, se kpa ‘kwaghôron u dedoo u se lu ôron la ka u sha kwagh u tor ugen.’ Mba yer tor ne ér Yesu Kristu. Ka se yôô kwagh na se kaa ser i ver un Tor sha, ken Tartor na u Mesiya la. Heela tseegh ga, ka se lôhô ior cii, utor mba tar ne man mba ve tem tor sha a ve la kpaa ser, ve lumun hemen na. (Ps. 2:1, 2, 4-12) Shi nombor wase ka u hingir er ka “pensel u orfan kwaghngeren dedoo” nahan, sha ci u ka se er tom a Bibilo kpoghuloo ken tom wase u pasen kwagh la.

5. (a) Yesu yange ‘doo ashe’ sha nyi igbenda? (b) ‘Akaaôron a doon yange due ken zwa u Tor’ nena, man se kange ishima u dondon ikyav na la nena?

⁵ Ôr Pasalmi 45:2. Ruamabera ôr kwagh u mluashe u Yesu cuku tseegh tsô. Er a lu or u vough yô, yange una lu or u “doon ashe” je ka u henen a hen ga. Nahan cii kpa, lu mtil u a tile sha mimi shi a hemba Yehova ato ga la je yange na ve hemba doon ashe cii ye. Heela tseegh ga, Yesu yange pasen loho u Tartor sha “akaaôron a dedoo.” (Luka 4:22; Yoh. 7:46) Se kange ishima u dondon ikyav na la sha u ôron mkaanem ma maa kôr ior ken ishima shighe u se lu pasen kwagh la kpa?—Kol. 4:6.

6. Yehova yange na Yesu injar i tsôron nena?

⁶ Er Yesu civir Yehova a ishima i môm yô, Yehova ver un doo doo shighe u lu eren tom u pasen kwagh shin tar la, shi a na un injar shighe u na nagh ku ipaan kera la kpaa. Apostoli Paulu yange nger ér: “Er i va zua a Na [Yesu] a mluyol er or nahan yô, A hide a iyol Na ijime, hingir u ungwan kwagh zan zan ar ken ku, man lu ku u terankon je. Ka sha ci u nahan man Aôndo A kende Un sha kpishi je ye, A ii Un iti i i hembe hanma iti igen cii, sha er hanma inyu cii i mba ve lu Sha man mba ve lu shin tar man mba ve lu shin atô u taregh kpaa, ia gure inya ken iti i Yesu yô, man hanma nombor kpaa ua pase er Yesu Kristu ka Ter je sha ci u iengem i Aôndo Ter.” (Fil. 2:8-11) Nahan Yehova nder Yesu shin ku, na un uma u “mayange” ku ua kera ya tor sha a na ga yô.—Rom. 6:9.

7. Ka sha igbenda i nyi nahan Aôndo yange shighe Yesu mkurem hemba “mba kwav” na?

⁷ Ôr Pasalmi 45:6, 7. Er kwagh u perapera doo Yesu ishima kpishi shi a kôr  hanma kwagh u una fatyô u vihin Ter na Yehova iti cii ihyom yô, Yehova tsegha un ér a lu Tor u Tartor u Mesiya la. Yange i shighe Yesu “mkurem ma iember” hemba “mba kwav” na, ka utor mba Yuda mba ve due ken tsombor u Davidi la je la. Sha nena yô? Kwagh u hiihii yô, lu Yehova iyol na tsegha Yesu ye. Kwagh ugen yô, Yehova tsegha Yesu, lu Tor man Zegepristi. (Ps. 2:2; Heb. 5:5, 6) Heela tseegh ga, yange i tsegha Yesu sha icighan jijingi, lu sha u shighen un mkurem ga; shi ka sha a tem tor ye, ka shin tar ne ga.

8. ‘Aôndo ka ikyônough ki torough ki Yesu’ sha nyi gbenda, man er nan ve se ne jighjigh ser tartor na ka u perapera?

⁸ Yehova yange ver Wan na lu Tor Mesiya sha, ken inyom i 1914 la. ‘Tôgh ku tartor na ka ku perapera,’ nahan se na jighjigh ser hanma shighe cii hemen na ua lu u dedoo. Ngu a ian i lun Tor, sha ci u ‘Aôndo ka ikyônough nagh ki torough.’ Inja na yô, ka Yehova a ver Tartor la ye. Heela tseegh ga, ikyônough ki torough ki Yesu kia lu “gbem sha won.” Ka u kwagh u tan ihyagh er u lu civir Yehova sha hemen u Tor u ageegh u Aôndo a ver ne kpa?

9, 10. (a) Lu shighe u han Kristu har sanker na, man fese je er tom a mi nena? (b) Kristu shi una va er tom a sanker na ne nena?

⁹ Ôr Pasalmi 45:3. Yehova kaa a Tor na ne ér a ‘har sanker na a gba hen ikyooso,’ inja na yô, ngu nan Yesu tahav mbu nôngon ityav a mba ve lu hendan a hemen u Aôndo la cii, shi timin ve kera kpaa. (Ps. 110:2) Er Kristu a lu Torutya, u or a fatyô u hemban un ityav ga yô, i yila un ér, “We u ageegh.” Yange har sanker na ken inyom i 1914, shighe u a hemba Satan man azôv a na ityav sha, a daar ve a haa shin tar la.—Mpa. 12:7-9.

¹⁰ Tor ne yange hii a hii u hemban ityav tsô. A gba u “una hemba” gburu gburu. (Mpa. 6:2) Yehova ngu a tim hanma vegher u tar u Satan ne ga, shi gba u una bee a hemen u Satan man azôv a na sha. Vegher u hiihii u tar u Satan u a vande been a mi yô, ka Zegebabilon, u a lu tartor u kwaghaôndo u aiegh u sha tar cii la. Awashima u Yehova ka u utor mba tar ne ve tim “idyakwase” u bo la. (Mpa. 17:16, 17) A been yô, Torutya ne una tim mbahemenev mba tar ne kera cii. Maa Kristu, u i yer un kpaa ér “ortyom u ihyungwa” la, una hemba gburu gburu sha u kenden Satan man azôv a na shin ihyungwa i i ze kweng la. (Mpa. 9:1, 11; 20:1-3) De se nenge er Pasalmi 45 yange tsengapasen er akaa ne aa va er la.

11. Kristu zenden “sha ci u kwagh u mimi” nena?

¹¹ Ôr Pasalmi 45:4. Torutya ne nenge ityav ér una ngohol uharegh shi una kôr ior ikpan ga. Ngu a nôngo ityav mbi perapera sha ci u ngu a mbaawashima mba dedoo. Zenden “sha ci u kwagh u mimi man u ishima i leghlegh man u perapera.” Kwagh u mimi u vesen u i gbe u a pase wang yô ér, ka Yehova a kom u hemen sha won cii ye. Shighe u Satan hemba ato la, lu tesen ér Yehova kuma u hemen ga. Hii shighe la je, azôv man uumace za hemen u kaan ér Yehova kuma u hemen ga. Hegen shighe kuma u Un u Yehova a ver un Tor la una zende sha ci u kwagh u mimi la, sha u tesen ér ka Yehova tseegh a kom u hemen sha won cii ye.

12. Ka sha nyi gbenda nahan Tor la a zenden ‘sha ci u ishima i leghleghe’?

¹² Tor ne shi zenden ‘sha ci u ishima i leghlegh.’ Er a lu Wan u Aôndo u môm môm yô, un iyol na a ver ikyav i hemban  cii, i hiden a iyol ijime shi lumun hemen u Ter na la. (Yes. 50:4, 5; Yoh. 5:19) Mba ve lumun hemen u Tor la cii gba u vea dondo ikyav na la, shi vea hide a iyol a ve ijime, vea tese sha hanma gbenda cii ér ve lumun hemen u Yehova la. Ka mba vea er kwagh ne la tseegh a na ve ian i lun uma ken tar u he u Aôndo a tende zwa a mi la ye.—Sek. 14:16, 17.

13. Kristu zenden ‘sha ci u kwagh u perapera’ nena?

¹³ Kristu shi ngu zenden ‘sha ci u kwagh u perapera’ kpaa. Perapera u Tor la a pasen kwagh na la ka “perapera u Aôndo,” inja na yô, ka atindi a Yehova a we sha kwagh u a lu u dedoo man u bo la je la. (Rom. 3:21; Dut. 32:4) Yesaia yange tsengapasen kwagh u Tor Yesu Kristu kaa ér: “Tor ugen una tema tor sha perapera.” (Yes. 32:1) Hemen u Yesu la ua va a “Usha mba hev” man “tar u he,” u “perapera una tema ker yô,” er i tende nahan. (2 Pet. 3:13) Hanma or u nana lu ken tar u he la cii a gba u nana dondon atindi a Yehova a we la.—Yes. 11:1-5.

14. Uwegh ku yanegh ku Kristu kua er “akaa a cieryol” nena? (Nenge foto u a lu sha mhii u ngeren ne la.)

¹⁴ Tor la ngu zenden a sanker na u a har a gbe hen ikyooso la. (Ps. 45:3) Kpa hegen shighe kuma u una tsua sanker la una kôr ken uwegh nagh ku yanegh ve. Orpasalmi yange tsengapasen ér: “Uwegh Ough ku yanegh [kua] tese U akaa a cieryol!” (Ps. 45:4) Shighe u Yesu una zende sha u timin mbaihyomov nav sha Armagedon la, una er ve “akaa a cieryol.” Kpa gbenda u una tim tar u Satan ne yô, se fa jighilii ga. Kpa ityav mbin mbia na mciem ma a gba mba ve tem shin tar, ve vende u ungwan icintan i Aôndo shi lumun hemen u Yesu la iyol. (Ôr Pasalmi 2:11, 12.) Shighe u Yesu lu ôron kwaghôron u profeti u sha kwagh u mkurtar la, a kaa ér “asema aa yina ior sha mcie man sha mkegh u akaa a a lu van sha won la kpaa; gadia agee a a lu Sha la aa tenger.” Shi a kaa ér: “Zum la vea nenge Wan u or Una va sha abeen, a agee a vesen kua iengem kpaa.”—Luka 21:26, 27.

15, 16. A lu unô vea lu “ikyumutya” i ia dondo Kristu ijime ken ityav mbi nôngon laa?

¹⁵ Takerada u Mpase yôô kwagh u mve u Tor la una va “a agee a vesen kua iengem” sha u timin mbaihyomov mba Aôndo la kaa ér: “Tsô m nenge Sha lu ivegher, nenge, nyinya u pupuu lu. Un u A tema sha mi la i yilan Un er Jighjigh man Mimi. Un er ijir sha perapera, shi nenge ityav kpaa. Akumautya a Sha dondo sha a Na, ve lu sha anyinya a pupuu, ve haa akondo a pupuu a dedoo a kungun a wang iyol. Sanker u esen tsor tsor due ken zwa Na sha u Una gber akuraior yô. Ka Un Una tema tor sha a sha tôgh ku iyôôgh ye. Shi ka Un kpaa Una shoghor ihyungwa i wain i iyugh i sha ishima i vihin i Aôndo Uhembanagee la” ye.—Mpa. 19:11, 14, 15.

¹⁶ Ka unô vea lu mbautyaav mba ve kohol cii ve lu “akumautya” a sha, a a dondo Yesu ijime sha shighe u uitya laa? Shighe u Yesu tsua sanker na, ta num sha Satan man azôv na sha, daar ve haa shin tar la, lu a “mbatyomov nav” imôngo. (Mpa. 12:7-9) Nahan doo u se kure ikyaa ser sha ityav mbi Armagedon la, akumautya a Kristu la aa kua uicighanmbatyomov. Ka unô kpa vea lu ken akumautya nee? Yesu yange tôndo zwa a anmgbianev nav mba i shigh ve mkurem la ér: “Or u nan hembe shi nana ver ishima sha aeren a Am zan zan mkur yô, Me na nan tahav sha akuraior, nana tema tor sha a sha tôgh ku iyôôgh er ka i hembe ityev avur avur nahan, er Mo kpaa M ngohol tahav hen Terem nahan.” (Mpa. 2:26, 27)  Nahan akumautya a Kristu a sha la aa kua anmgbianev nav mba i shigh ve mkurem, mba hen shighe ne nahan vea zua a injar ve i yemen sha la. Zum u Yesu una tema tor sha akuraior sha tôgh ku iyôôgh la, mba i shigh ve mkurem, ve lu hemen vea na imôngo la, vea lu a na ikyooso ikyooso, shighe u una lu eren “akaa a cieryol” la.

17. (a) Nyinya u pupuu u Kristu a hende la tile sha ityough ki nyi? (b) Sanker la man ada la tile sha ityough ki nyi?

¹⁷ Ôr Pasalmi 45:5. Tor la henda nyinya u pupuu, u a til sha ityough ki ityav mbi perapera, mbi mbi lu wang sha ishigh ki Yehova yô. (Mpa. 6:2; 19:11) Dugh sanker u a lu mi la kera yô, shi ngu a ada kpaa. Bibilo kaa ér: “M veren ashe yô, nenge, nyinya u pupuu lu. Un u a tema sha mi la, lu a ada; shi i na un tsar u sha ityou kpaa. A due, lu hemban, man lu sha u una hemba kpaa.” Sanker la man ada la cii tile sha ityough ki kwagh u Kristu una er tom mi u timin mbaihyomov nav yô.

18. “Avaan” a Kristu aa va “hor” nena?

¹⁸ Orpasalmi yange wa icam, tsengapasen ér ‘avaan a Tor la hor je, a kuma ken ishima i mbaihyomov nav,’ ve ‘gbidye inya sha ishigh nagh.’ Mtim la una tser tar cii. Yeremia yange tsengapasen ér: “Sha iyange la mba TER A woo ve la, vea lu hen inya, á hii sha ikighirtar ngin zan zan á za ar ikighirtar ngira.” (Yer. 25:33) Kwaghôron u profeti ugen kpa kaa ér: “Shi m nenge ortyom u Sha tile sha iyange, lu yilan inyon i purugh sha kwavaôndo cii sha zegeimo er: Va kohol nen hen zegeiniongo u Aôndo ne, va ya nen inyam i utor man inyam i anyinya kua mba ve hende a yô, man inyam i ior cii, ônov man ikpan, mbakiriki kua mbavesen cii.”—Mpa. 19:17, 18.

19. Kristu una ‘zende a icivir na doo doo’ shi una hemba gburu gburu nena?

¹⁹ Kristu una timin tar u bo u Satan ne cii yô, una ‘zende a icivir na doo doo.’ (Ps. 45:4) Una hemba gburu gburu sha u daan Satan man azôv a na, haan shin ihyungwa i i ze kweng la, vea lu shimi zan zan Hemen Na u Anyom Dubu la ua kar been. (Mpa. 20:2, 3) Diabolo man mbatyomov nav vea kera lu a tahav mbu eren kwagh môm hen shighe la ga, er mbakpenev nahan. Nahan mba vea lu uma shin tar la cii vea kera lu sha ikyev i hemen u Satan u bo la ga; a lu Yesu, Tor u iengem la una lu hemen ve hen shighe la ye. Kpa cii man ve nenge er a gema tar kure kure ua hingir paradiso cica cii yô, vea lu a ityôkyaa igen kpaa i ember vea Tor ve kua mba vea hemen a na sha la. Se time sha kwagh u saan iyol u una va er la ken ngeren u a dondo ne.