1, 2. Momo lie Osamo 45 yi kuetele esilivilo kokuetu?

OSOMA yimue ya velapo yi likolisilako oku teyuila esunga, kuenda oku yula ovanyãli vaye. Noke yoku yula, yi linga uvala lukãi waye a sole calua. Omanu va ivaluka osoma yaco, kuenda va yi sivaya otembo ka yi pui. Eyi, oyo osapi ya velapo yi sangiwa Vosamo 45.

² Vosamo 45, mua kongela ovina vialua okuti, ovolandu a nena esanju a sule. Ovolandu aco a kuete esilivilo lia velapo, momo a tu kuatisa komuenyo wetu cilo, kuenda kovaso yoloneke. Omo liaco, tu konomuisi ulandu wosamo yaco.

3, 4. (a) “Ocina cipi ciwa” Ukualosamo a soneha, kuenda ci vetiya ndati utima wetu? (b) Tua siata oku imba ndati ‘ocisungo catiamẽla’ ku soma? Elimi lietu li kala ndati ‘ndopena yomunu wa loñoloha koku soneha’?

³ Tanga Osamo. 45:1. ‘Olondaka viwa,’ via vetiya utima wukualosamo oku lekisa “esanju.” Kelimi lio Heveru Ondaka “esanju,” yi lomboloka “ocina cimue ci supoka.” Noke, ukualosamo co vetiya oku kuata esanju lialua, kuenje elimi liaye lia linga ‘ndopena yomunu wa loñoloha koku soneha.’

⁴ Nye ci popiwa catiamẽla kokuetu? Olondaka viwa Viusoma wa Mesiya, vi vetiya ovitima vietu. Esapulo Liusoma lia fetika oku kuata ‘esilivilo lia velapo’ oku upisa kunyamo wo 1914. Momo kunyamo waco, akundi va fetika oku sapula catiamẽla Kombiali yi kasi oku viala cilo kilu. Koloneke vilo, tu kasi oku ‘kundila esapulo liaco komanu, oco li linge uvangi kolofeka viosi.’ (Mat. 24:14) Anga hẽ ka tu ‘sanjukilavo’ esapulo liaco Liusoma? Tu kasi hẽ oku lekisa ombili kupange woku kunda olondaka viwa Viusoma? Tua siata oku imba ‘ocisungo catiamẽla’ ku Yesu Kristu Soma yetu, ndeci ukualosamo a linga. Tu kasi oku kunda esapulo liokuti, cilo Yesu o kasi oku viala Vusoma wo kilu. Omo liaco, tu kasi oku laleka omanu vosi oku kongelamo olombiali violuali lulo, oco va tave ku Yesu Osoma. (Osa. 2:1, 2, 4-12) Elimi lietu li kala ‘ndopena yomunu wa loñoloha koku soneha,’ eci tu longisa Embimbiliya komanu kupange woku kunda.

5. (a) Yesu wa kala ndati omunu umue wa posoka? (b) Yesu wa lekisa ndati ohenda poku kundila omanu? Tu kuama ndati ongangu yaye?

⁵ Tanga Osamo. 45:2. Embimbiliya ka li lombolola calua catiamẽla keposo lia Yesu. Omo okuti Yesu wa lipua, ci lekisa okuti,wa kala ulume umue wa ‘posoka calua.’ Epokolo a lekisa ku Yehova Isiaye, olio lieca uvangi weposo liaye. Yesu wa lekisa ohenda komanu poku va kundila esapulo Liusoma. (Luka 4:22; Yoa. 7:46) Aga hẽ tua siatavo oku kuama ongangu ya Yesu okuti, poku longisa tu vetiya ovitima viomanu?—Va Kol. 4:6.

6. Yehova wa sumũlũisa ndati Yesu “otembo ka yi pui”?

⁶ Omo okuti Yesu wa lekisile ombili kupange woku kunda, Yehova wo sumũlũisa vokuenda kupange waye palo posi. Kuenje, Yehova wo wĩha onima noke yoku eca omuenyo waye ndocilumba. Upostolo Paulu wa soneha ndoco: ‘Eci Yesu a citiwa ndomunu, wa liketisa, kuenje, wa pokola toke kolofa, kuenda, wa valeliwa kuti. Omo liaco, Yehova wo kemãlisa, noke, wo luka onduko ya velapo olonduko viosi vikuavo. Wa ci lingila okuti, konduko ya Yesu ku kekamela olongolo viosi viava vo kilu lo posi, levi vio vemehi liongongo. Kuenje, alimi osi a tava okuti Yesu Kristu eye Ñala, oco a muise Yehova ulamba okuti eye Tate.’ (Va Fil. 2:8-11) Yehova wa eca asumũlũho ka a pui ku Yesu, eci o pindula okuti, ka fi vali.—Va Rom. 6:9.

7. Yehova wa waveka ndati Yesu lonjila yimue ya velapo okuti ‘olosoma vio ko Yuda ci sule’?

⁷ Tanga Osamo. 45:6, 7. Omo okuti Yesu wa solele calua ovina via sunguluka, kuenda wa suvuka ovina vi eca etombo ku Isiaye, Yehova wo waveka komangu Yusoma. Yesu wa wavekiwa ‘lulela wonjolela,’ okuti, wa velapo olosoma vina via wavekiwile ko Yuda okuti, via tunda kepata lia Daviti. Momo lie? Momo Yehova eye wa waveka Yesu. Handi vali, Yehova wa waveka Yesu oco a linge Osoma, kuenda Ocitunda Cavelapo. (Osa. 2:2; Va Hev. 5:5, 6) Esunga likuavo lieli liokuti, uviali wa Yesu u kasi kilu, pole, ka u kasi palo posi.

8. Momo lie tu tavela okuti, Usoma wa Yesu wesunga? Olondaka viokuti ‘Yehova wa kapa Yesu komangu yuviali’ vi lomboloka nye?

⁸ Kunyamo wo 1914, Yehova wa vialeka Yesu komangu Yusoma kilu. Omo okuti “epangati liuviali wa Yesu olio epangati liesunga,” ci tu vetiya oku tava okuti, uviali waco u ka amamako otembo ka yi pui. Eye o kuete omoko yoku viala, momo ‘Yehova eye wo kapa komangu yaco.’ Omo liaco, uviali wa Yesu u ka kala ‘otembo ka yi pui.’ Ove hẽ ku sanjukila oku vumba Yehova vemẽhi Liusoma a nõla?

9, 10. (a) Otembo yipi Kristu a tikula osipata yaye, kuenda wa talavaya layo ndati? (b) Kristu o ka talavaya vali ndati losipata yaco?

⁹ Tanga Osamo. 45:3. Yehova wa sapuila Soma oco a kape osipata vocilalo cayo. Poku ci linga, wa eca omoko ku Yesu yoku linga uyaki lovanyãli va Yehova, oco a va kundule. (Osa. 110:2) Omo okuti Kristu Osoma yimue ka yi yuliwa Kovita, o tukuiwa hati: “Ukuonene.” Kunyamo wo 1914, Yesu wa tikula osipata yaye, kuenje wa linga uyaki la Satana kumue lolondele viaye, noke, wa va imba palo posi.—Esit. 12:7-9.

¹⁰ Eyi oyo onjanja yatete Yesu a fetika oku yula. Pole, o sukila ‘oku tẽlisa oku yula kuaye.’ (Esit. 6:2) Yehova wa nõlapo oku nyõla oluali lua Satana, kuenda ovina viosi vi panga onepa kokuaye, kumue lolondele. Catete, o ka nyõla o Bavulono Yinene okuti, oyo ocisoko catavo osi esanda. Noke, Yehova o ka vetiya olombiali violuali lulo, oco vi nyõle “ocipuepue.” (Esit. 17:16, 17) Kuenje, Soma Yovita o ka nyõla oluali lulo lua Satana. Noke, una o tukuiwa hati, ‘ungelo wekungu,’ o ka yula uyaki waye, poku imba Satana vekungu kumue lolondele viaye. (Esit. 9:1, 11; 20:1-3) Omo liaco, tu konomuisi ndomo Osamo 45, yi lombolola ovolandu a komõhisa.

11. Kristu o ka linga ‘ndati uyaki oco a teyuile ocili’?

¹¹ Tanga Osamo. 45:4. Soma Yovita, ka lingi uyaki locimãho coku tambula olofeka, kuenda oku yovola omanu va kasi vupika. Yesu wa handelekiwa oku linga uyaki waco oco a yovole olondingesunga. Eye o keya oco a ‘teyuile ocili, umbombe, kuenda esunga.’ Yesu o ka linga uyaki waco oco a teyuile unene wuviali wa Yehova. Satana wa lingila usuanji unene wa Yehova woku viala, eci a tomba olonumbi Viaye. Tunde kotembo yaco, Satana kumue lolondele viaye, kuenda omanu va pokola kokuaye, va kasi oku amamako lusuanji waco. Yilo oyo otembo Yesu a ka linga uyaki oco a ece uvangi wokuti, Yehova eye lika o kuete omoko yoku viala.

12. Soma o ka linga ndati uyaki oco a ‘teyuile umbombe’?

¹² Soma o ka linga uyaki oco a ‘teyuile umbombe.’ Yesu wa siata oku lekisa ongangu yiwa yumbombe, loku pokola kuviali wa Isiaye. (Isa. 50:4, 5; Yoa. 5:19) Afendeli vosi va Yehova, va sukila oku kuama ongangu ya Soma yavo, loku lekisa umbombe, osimbu va amamako oku pokola ku Yehova okuti, eye ombiali yavo kovina viosi. Vana va ci linga, ovo lika va ka kala voluali luokaliye palo posi, Suku a likuminya.—Sak. 14:16, 17.

13. Kristu o ka linga ndati uyaki oco a ‘teyuile esunga’?

¹³ Kristu o ka linga uyaki oco a ‘teyuile esunga.’ Soma o ka teyuila “esunga” lia Yehova lioku tepisa pokati keci ciwa, leci cĩvi. (Va Rom. 3:21; Esin. 32:4) Uprofeto Isaya wa popia eci catiamẽla ku Yesu Kristu hati: ‘Osoma yi ka viala lesunga.’ (Isa. 32:1) Yesu vokuenda kuviali waye, o ka tẽlisa ohuminyo yaye yatiamẽla ‘kilu liokaliye,’ kuenda ‘koluali luokaliye.’ (2 Pet. 3:13) Omo liaco, omanu vosi va ka kala voluali luokaliye palo posi, va ka sukila oku pokola kolonumbi via Yehova.—Isa. 11:1-5.

14. ‘Eka liondio lia Kristu, li ka linga ndati “ovina vi komõhisa”? (Tala elitalatu kefetikilo liocipama cilo.)

¹⁴ Ukualosamo wa popia hati, Soma o linga uyaki losipata ya somehiwa vocilalo cayo. (Osa. 45:3) Tu lavoka otembo eci Yesu a ka kuata osipata leka liaye liondio, oco a tẽlise ocikele caye. Ukualosamo wa popia hati: “Eka liove liondio, li ku longisa ovina vi komõhisa.” (Osa. 45:4, NW) Eci Yesu Kristu a ka kundula oluali lua Satana vuyaki wo Harmagedo, o ka linga “ovina vi komõhisa” kovanyãli vaye. Ka tua kũlĩhĩle ndomo a ka nyõla oluali lua Satana. Pole, tua kũlĩha okuti, o ka linga ovina vi ka kokela usumba omanu vosi ka va kapeleko alungulo a Yehova, atiamẽla koku pokola Kuviali waye. (Tanga Osamo 2:11, 12.) Vocitumasuku Yesu a tukula catiamẽla kotembo yesulilo, wa popia hati: ‘Omanu va ka ambuka lusumba wovina vi laika oku iya kilu lieve, momo ovonene o kilu a ka lisenga. Noke, va ka mola Mõlomunu iyilila valende lunene kuenda ulamba wa lua.’—Luka 21:26, 27.

15, 16. Helie o ka kongeliwa ‘volohoka’ viokilu vi ka kuama Yesu eci a ka linga uyaki?

¹⁵ Oku iya Kusoma lunene walua, kuenda ulamba’ oco u nyõle ovanyãli va Suku, kua lomboluiwa velivulu Liesituluilo li popia hati: ‘Nda mola ilu lia yuluka, kuenje, kua molẽha okavalu ka yela! U endelako o tukuiwa hati Kolelua, kuenda Ukuacili, kuenje o tetulula lesunga, ndaño ovita o katukilavo lesunga. Olohoka viokilu vio kuama, haivio via wala olonanga viovalatanya vi yela tue, kuenda vi endela kotuvalu tu yela. Vomela waye mua tunda osipata ya tua yoku kundula olofeka. O vi pokuisa lepangati liutale, kuenda o kosa ocitumãlo covinyu yonyeño ya Suku Tõlo.’—Esit. 19:11, 14, 15.

¹⁶ Helie o ka kongeliwa ‘volohoka’ viokilu vi ka kuama Yesu eci a ka linga uyaki? Yesu wa kala ‘lovangelo vaye’ eci a tikula osipata yaye onjanja yatete, oco a tundise Satana kilu kumue lolondele viaye. (Esit. 12:7-9) Ca sunguluka oku limbuka okuti, vuyaki wo Harmagedo Yesu a ka linga, mu ka kongelavo ovangelo vokilu. Anga hẽ vuyaki waco mu ka kongelavo omanu vakuavo? Yesu wa sapuila Kakristão olombuavekua poku popia hati: “U o yula kuenje o lava ovopange ange toke kesulilo, ndu wĩha unene woku viala olofeka. O vi viala lepangati liutale. Kuenje, o nyõla omanu ndeci ci pita lalonga otuma eci a sasuĩwa. Ndu u wĩha unene waco ndeci ame muẽle nda u tambula ku Tate.” (Esit. 2:26, 27, NW) Omo liaco, vamanji ya Kristu va pinduiwa okuti va kasi ale kilu, va ka pangavo onepa kuyaki waco. Ovo, va ka kala konele ya Yesu, eci a ka linga “ovina vi komohĩsa” poku kundula olofeka.

17. (a) Okavalu ka yela Kristu a kasi oku endela ka lomboloka nye? (b) Osipata lohonji vi lomboloka nye?

¹⁷ Tanga Osamo 45:5. Elivulu Liesituluilo 6:2 li lekisa okuti, okavalu ka yela Soma a kasi oku endela, ka lomboloka uyaki wesunga u taviwa la Yehova. (Esit. 19:11) Ndaño okuti Soma wa ambata osipata, pole, o kuetevo ohonji peka. Embimbiliya li popia ndoco: “Nda vanja kuenje nda mola okavalu kamue ka yela, lu wa endelako wambata ohonji. Vo wĩha ekolowa liusoma, yu wa tundila oku yula loku amamako oku yula.” Osipata lohonji vi lomboloka ovimalẽho Kristu a ka nyõla lavio ovanyãli vaye.

18. ‘Ovisongo’ Kristu a ka nyõla lavio omanu vuyaki wo Harmagedo vi ka limbukiwa ndati okuti ‘via tua’?

¹⁸ Vupopi umue wocindekaise, Ukualosamo wa tukula ocitumasuku ci lekisa okuti, ‘ovisongo via tua, vi toma ovitima viovanyãli vaye,’ kuenje, ‘omanu va fila ponele yaye.’ Omanu va ka pondiwa, va ka li sanduila kolonepa viosi violuali. Ocitumasuku ca Yeremiya ci popia hati: ‘Keteke liaco omanu Yehova a ka ponda, va ka kala tunde kesulilo liokilu lieve, toke kesulilo likuavo liokilu lieve.’ (Yer. 25:33) Ocitumasuku ca tukuiwa ndeti, ci sokisiwa locitumasuku cikuavo ci popia hati: ‘Nda mola ungelo umue wa talama vekumbi, yu wa vilikiya lolukandi olonjila viosi vi palãla vilu hati: Enjui. Liongoluili kondalelo yinene ya Suku, oco u li ositu yolosoma, lositu ya vakesongo, lositu yovindululu, lositu yotuvalu lava va endelako, lositu yomanu vosi, leyi yomãla, yapika, leyi yava vanene.’—Esit. 19:17, 18.

19. Kristu o ka tẽlisa ndati ‘oku yula kuaye’?

¹⁹ Noke lioku nyõliwa kuoluali lulo lua Satana, Yesu Kristu o ka tẽlisa ‘oku yula kuaye.’ (Osa. 45:4) Eye o ka tẽlisa oku yula kuaco, poku imba vekungu Satana kumue lolondele viaye. Kuenje, Yesu kumue lolombuavekua, va ka viala vokuenda Kuohulukãi Yanyamo. (Esit. 20:2, 3) Eci Satana kumue lolondele viaye va ka imbiwa vekungu, ka va ka kuata vali unene woku yapuisa omanu. Kuenje, omanu vosi palo posi, va ka kuata elianjo lioku pokola ku Soma yavo, wa yula. Eci va ka mola okuti oluali lua linga luokaliye, esanju liavo li ka li vokiya calua kumue la Soma yavo, kuenda olombuavekua. Vocipama ci kuãimo, tu ka konomuisa ovolandu akuavo a nena esanju.