1, 2. Sa ano kita nagkakalain kun dapit sa kamugtakan sa pamilya asin sa kun paano ta naaraman an katotoohan?

HALI ki Jehova an areglo nin pamilya. (Efe. 3:14, 15) Pero, dawa hali kita sa sarong pamilya, magkakalain an satong ugali asin kamugtakan. Tibaad kaiba mo an saimong mga magurang puon kan mamundag ka sagkod na magdakula. An iba puwedeng nagadanan nin mga magurang, tibaad huli sa hilang, aksidente, o iba pang trahedya. An iba pa dai ngani aram kun siisay an mga magurang ninda.

² Bilang mga miyembro kan pamilya nin mga parasamba ki Jehova, magkakalain man an paagi kun paano ta naaraman an katotoohan. Tibaad ‘pinadakula ka sa katotoohan,’ arog kan sabi nin iba, asin itinadom sa saimo kan mga magurang mo an diyosnon na mga prinsipyo. (Deut. 6:6, 7) O tibaad saro ka sa rinibong tawo na nakaaram kan katotoohan paagi sa paghuhulit kan ibang mga lingkod ni Jehova.—Roma 10:13-15; 1 Tim. 2:3, 4.

3. Ano an pagkakapareho niyato gabos?

³ Sa ibong kan mga bagay na nasambitan pa sana, gabos kita may pagkakapareho. Nagsasakit kita huli sa epekto kan pagsuway ni Adan asin minana ta an pagkabakong perpekto, kasalan, asin kagadanan. (Roma 5:12) Minsan siring, bilang tunay na mga parasamba, tama sanang  apudon ta si Jehova na ‘satong Ama.’ Uyon sa Isaias 64:8, an piniling banwaan nin Diyos kan suanoy makakapagsabi: ‘Jehova, ika an samuyang Ama.’ Dugang pa, pinunan ni Jesus an saiyang modelong pamibi sa mga tataramon na: ‘Ama niyamo na yaon ka sa langit. Sambahon an ngaran mo.’—Mat. 6:9.

4, 5. Mantang sinisiyasat ta an rarom kan satong pagpapahalaga sa satong Ama, si Jehova, makakatabang kun tutukaron niyato an ano?

⁴ Itinatao sa sato kan satong Ama sa langit an pag-ataman asin proteksiyon na kaipuhan ta bilang saiyang mga lingkod na nag-aapod sa pangaran niya na may pagtubod. Kinotar kan salmista an sinabi niya: “Huli ta padangat niya [sarong tunay na parasamba] ako, ililigtas ko siya. Iingatan ko siya huli ta aram niya an sakuyang pangaran.” (Sal. 91:14, NW) Iyo, mamumuton kitang iliniligtas ni Jehova Diyos sa satong mga kaiwal asin pinoprotektaran kita bilang saiyang banwaan, tanganing dai kita mapara.

⁵ Tanganing mapararom an satong pagpapahalaga sa satong Ama sa langit, tukaron ta an tulong importanteng bagay: (1) An satong Ama iyo an satong Paratao. (2) Si Jehova an satong Paraprotektar. (3) An satong Diyos an pinakadayupot niyatong Katuod. Mantang tinutukar ta an mga puntong ini, makakatabang kun huhurop-hurupon ta an satong relasyon sa Diyos asin aaramon kun paano ta siya matatawan nin onra bilang satong Ama. Magigin kapaki-pakinabang man kun huhurop-hurupon ta an mga bendisyon na itinatao ni Jehova sa mga minarani sa saiya.—Sant. 4:8.

6. Ano an sarong paagi na si Jehova nagigin an Paratao kan “gabos na marahay na balaog”?

⁶ Isinurat kan disipulong si Santiago na ‘an gabos na marahay na balaog asin an gabos na sangkap na balaog hali sa itaas, na naghihilig hali sa Ama nin kaliwanagan.’ (Sant. 1:17) An buhay mismo sarong marahayon na balaog o regalo hali ki Jehova. (Sal. 36:9) Kun ginagamit ta an satong buhay sa paggibo kan kabutan nin Diyos, naeeksperyensiyahan ta an abundang bendisyon ngunyan asin igwa kita nin paglaom na buhay na daing sagkod sa bagong kinaban. (Tal. 10:22, NW; 2 Ped. 3:13) Pero huli sa makamumundong resulta kan pagsuway ni Adan, paano pa ini magigin posible?

7. Paano binukasan nin Diyos an dalan tanganing magkaigwa kita nin dayupot na relasyon sa saiya?

⁷ Tunay nanggad, si Jehova an Nangungurog na Paratao sa dai mabilang na paagi. Halimbawa, naligtas kita huli sa saiyang dai na kutana maninigong kabuutan. Iyo, gabos kita makasalan asin nagmana nin pagkabakong perpekto sa satong inot na ama na si Adan. (Roma 3:23) Minsan siring, huli sa pagkamuot ni Jehova, siya an inot na naggibo nin paagi na bukasan an dalan tanganing magkaigwa kita nin dayupot na relasyon sa saiya. ‘Digdi kaini an pagkamuot nin Diyos nahayag sa sato,’ an isinurat ni apostol Juan, ‘na an Diyos nagsugo sa kinaban kan saiyang Aking bugtong tanganing kita mabuhay huli saiya. Digdi kaini an pagkamuot, bakong huli ta kita namuot sa Diyos, kundi huli ta siya namuot sato, asin nagsugo kan saiyang Aki na magin kabayadan kan satong mga kasalan.’—1 Juan 4:9, 10.

8, 9. Paano si Jehova nagin an Nangungurog na Paratao kan panahon ni Abraham asin Isaac? (Hilingon an ritrato sa kapinunan kan artikulo.)

⁸ Kan ika-19 siglo B.C.E., may sarong makahulang pangyayari na naghahayag kun gurano kadakula an mamumuton na probisyon ni Jehova para sa makinuyog na mga tawo tanganing kamtan ninda an buhay na daing katapusan. An Hebreo 11:17-19 nagsasabi: ‘Huli sa pagtubod si Abraham, huling binalo, idinulot niya si Isaac; iyo siya na nag-ako sa kaugmahan kan mga panuga nagdudulot kan saiyang aking bugtong; siya na kaidto sinabihan, “Sa ki Isaac aapudon an saimong banhi.” Sa paghuna-huna na an Diyos makakapabangon minsan hali sa mga gadan; na hali diyan man garo man sana inako niya siya liwat.’ Bakong dipisil mahiling an pagkakaagid. Itinao ni Jehova an saiyang Aki, si Jesu-Cristo, para sa mga tawo sa kinaban.—Basahon an Juan 3:16, 36.

⁹ Siguradong ikinaugma nanggad ni Isaac an pagkaligtas niya sa kagadanan bilang atang! Daing duda na nagpasalamat siya sa probisyon nin Diyos  para sa kasalidang atang—sarong lalaking karnero na nasabit sa kaharaning kapalungpungan. (Gen. 22:10-13) Bakong makangangalas na an lugar na iyan inapod na “Jehova-jireh,” na nangangahulugan na “Si Jehova an Matao.”—Gen. 22:14, NW.

10, 11. Sairisay an nanginginot sa ‘ministeryo nin pakipag-ulian,’ asin paano ninda iyan ginigibo?

¹⁰ Mantang hinuhurop-hurop ta kun paano si Jehova nagin an Nangungurog na Paratao, mapagpasalamat niyatong minimidbid an mahalagang marhay na papel ni Jesu-Cristo, arog mismo ni Pablo kan siya magsurat: ‘Siring an samong paghukom, na an saro nagadan manungod sa gabos, kaya an gabos nagadan. Asin siya nagadan manungod sa gabos tanganing an mga nabubuhay dai na mabuhay manungod sa sainda man sana, kundi manungod kaidtong nagadan asin nabuhay liwat dahil sainda.’—2 Cor. 5:14, 15.

¹¹ Huli sa saindang pagkamuot sa Diyos asin sa pasasalamat sa pambihirang pribilehiyo na maglingkod sa saiya, maugmang inako kan suanoy na mga Kristiyano an ‘paglingkod [“ministeryo,” NW] nin pakipag-ulian.’ An saindang paghuhulit asin paggibo nin disipulo nagbukas nin dalan para sa mga sadiyosan an puso na makipagkatuninungan sa Diyos, magin katuod niya, asin sa huri magin espirituwal na mga aki niya. Ngunyan, an linahidan na mga lingkod ni Jehova naggigibo nin kaparehong ministeryo. Huli sa nagibo ninda bilang mga embahador nin Diyos asin ni Cristo, nagin posible na an mga tawong may tamang inklinasyon dagkahon ni Jehova asin magkaigwa nin pagtubod sa saiya.—Basahon an 2 Corinto 5:18-20; Juan 6:44; Guibo 13:48.

12, 13. Paano niyato maipapahiling na pinapahalagahan ta an dakul na probisyon ni Jehova?

¹² Huli sa pagpapahalaga ki Jehova bilang an Nangungurog na Paratao, an gabos na Kristiyano na may daganon na paglaom nakikiiba sa mga linahidan sa paghuhulit kan Kahadian. Sa gibuhon na ini, ginagamit niyato an Bibliya, na saro pang marahayon na probisyon nin Diyos. (2 Tim. 3:16, 17) Paagi sa mahusay na paggamit kan ipinasabong na Tataramon nin Diyos sa satong ministeryo, tinatawan ta nin oportunidad an iba na magkamit nin buhay na daing katapusan. Tanganing tabangan kita sa gibuhon na ini, an lambang saro sa sato nagsasarig sa saro pang probisyon ni Jehova—an saiyang banal na espiritu. (Zac. 4:6; Luc. 11:13) Kahanga-hanga an mga resulta, arog kan mahihiling ta sa kada luwas kan Yearbook of Jehovah’s Witnesses. Sarong onra nanggad na makikabtang sa gibuhon na ini sa kaumawan kan satong Ama asin Paratao!

¹³ Huli sa gabos na itinao nin Diyos, marahay na haputon niyato an satong sadiri: ‘Ginigibo ko daw an bilog kong makakaya sa sakong ministeryo tanganing ipahiling ki Jehova an rarom kan pagpapahalaga ko sa mga probisyon niya? Anong mga bagay an puwede kong pauswagon tanganing magin mas epektibong parahulit kan maugmang bareta?’ Ikakapahiling ta an satong pasasalamat sa marahayon na probisyon nin Diyos paagi sa padagos na pag-inot sa intereses kan Kahadian sa satong buhay. Kun gigibuhon ta iyan, sisiguraduhon ni Jehova na mapapaniguan an satong mga pangangaipo. (Mat. 6:25-33) Huli sa pagkamuot nin Diyos, siguradong gusto tang gibuhon an satong pinakamakakaya tanganing mapaugma an puso niya.—Tal. 27:11.

14. Paano si Jehova nagin an Paraligtas kan saiyang banwaan?

¹⁴ An salmistang si David nag-awit: ‘Ako mamundo asin nagkakaipo; [lugod] si Jehova maghuna-huna dapit sa sakuya. An sakuyang tabang asin sakuyang paraligtas iyo ika.’ (Sal. 40:17) Si Jehova pauruutrong nagin Paraligtas kan saiyang banwaan bilang grupo, lalo na kan sinda pinepersegir nin grabe asin garo baga daing untok na hinahanap kan mga kaiwal ninda. Nagpapasalamat nanggad kita sa tabang ni Jehova sa siring na mga panahon asin sa dakul na espirituwal na probisyon na padagos niyang itinatao sa sato!

15. Iilustrar kun paano hinihinguwang protektaran nin sarong mamumuton na ama an saiyang aki.

¹⁵ An mamumuton na ama dai sana nagsusustento  sa mga aki niya kundi naghihinguwa man na protektaran sinda. Natural sanang pagmamaigutan niyang iligtas sinda kun sinda nasa peligro. Nagigirumduman nin sarong brother an sarong pangyayari kan siya aki pa. Sindang mag-ama papuli na hali sa paglilingkod sa langtad kan kinaipuhan nindang bumalyo sa sarong sapa. Huli sa makusog na uran kan agang idto, luminangkaw an tubig sa sapa. Makakabalyo sana sinda kun malukso-lukso sinda sa darakulang gapo. An aki nainot sa ama niya asin paglukso niya sa sarong gapo napasala siya kaya nahulog siya sa masulog na tubig asin duwang beses na uminirarom. Marahay sana ta tulos siyang kinaputan kan saiyang ama sa abaga asin nailigtas siya sa pagkalamos! Iliniligtas kita kan satong Ama sa langit hali sa garo makusog na sulog kan maraot na kinaban na ini asin sa namamahala kaini, si Satanas. Tunay nanggad, si Jehova an pinakamarahay na Paraprotektar na puwedeng lauman nin siisay man.—Mat. 6:13; 1 Juan 5:19.

16, 17. Paano tinabangan asin prinotektaran ni Jehova an mga Israelita kan sinda makipaglaban sa mga Amalekita?

¹⁶ An mamumuton na proteksiyon na itinatao ni Jehova malinaw na mahihiling sa nangyari pagkatapos niyang iligtas an mga Israelita hali sa pagkauripon sa Ehipto asin milagroso sindang prinotektaran mantang nagbabalyo sa Dagat na Pula kan 1513 B.C.E. Pagkatapos kan pagbaklay sa kaawagan pasiring sa Bukid nin Sinai, an nasyon nag-abot sa Refidim.

¹⁷ Kun dapit sa hula nin Diyos sa Genesis 3:15, si Satanas posibleng desperado na mantang naghahanap nin oportunidad na atakehon an daing kalaban-laban na mga Israelita. Ginibo niya ini paagi sa mga Amalekita, na kalaban kan banwaan nin Diyos. (Bil. 24:20) Isip-isipon kun ano an nagibo ni Jehova paagi sa apat na maimbod na lalaki—si Josue, Moises, Aaron, asin Hur. Mantang nakikipaglaban si Josue sa mga Amalekita, yaon sa kaharaning bulod si Moises, Aaron,  asin Hur. Nanggagana an mga Israelita sa ralaban kun iiniitaas ni Moises an saiyang mga kamot. Kan matanglay na an mga kamot niya, tinukudan iyan ni Aaron asin Hur. Kaya huli sa tabang asin proteksiyon ni Jehova, nadaog ni Josue si Amalek asin an banwaan kaini. (Ex. 17:8-13) Naggibo duman si Moises nin altar, na inaapod iyan na “Jehova-nissi,” na nangangahulugan na “Si Jehova an Sakuyang Pailihan.”—Basahon an Exodo 17:14, 15.

18, 19. Anong proteksiyon an itinatao nin Diyos para sa saiyang mga lingkod ngunyan?

¹⁸ Pinoprotektaran ni Jehova an mga namumuot asin nagkukuyog sa saiya. Arog kan mga Israelita sa Refidim, naglalaom kita sa Diyos kun inaatake kita kan mga kaiwal. Parati kitang pinoprotektaran ni Jehova bilang grupo, asin iliniligtas kita sa pag-atake kan Diyablo. Isip-isipon an dakul na pangyayari na prinotektaran nin Diyos an satong mga tugang na nagpadanay kan saindang Kristiyanong neutralidad. Halimbawa, nangyari ini durante kan kapanahunan nin Nazi sa Alemania asin sa iba pang nasyon kan dekada nin 1930 asin kan inot na mga taon kan dekada nin 1940. An pagbasa asin paghurop-hurop sa mga istorya nin buhay asin mga pagkasaysay sa Yearbook manungod sa pagprotektar nin Diyos sa mga panahon nin pagpersegir makakapakusog sa satong pagtitiwala ki Jehova bilang satong Pailihan.—Sal. 91:2.

¹⁹ Paagi sa organisasyon ni Jehova asin sa mga publikasyon kaini, nag-aako kita nin mamumuton na mga pagirumdom na nagpoprotektar sa sato. Pag-isipan kun paano ini nagin kapaki-pakinabang sa nakaagi pa sanang mga taon. Mantang an kinaban na ini garo baga urog na nag-iirarom sa kumunoy nin karigsukan asin pornograpiya, nagtatao si Jehova nin apuradong mga pagirumdom asin praktikal na tabang tanganing patanidan kita sa mga peligro sa moral. Halimbawa, nag-aako kita nin arog sa amang mga konseho na likayan an maraot na pag-iriba na nakukua sa salang paggamit nin social networking. *—1 Cor. 15:33.

20. Anong proteksiyon asin paggiya an makukua paagi sa Kristiyanong kongregasyon?

²⁰ Paano ta maipapahiling na kita talagang mga ‘natukduan ni Jehova’? Paagi sa maingat na paghimati sa saiyang mga pagbuot. (Isa. 54:13) An satong mga kongregasyon sarong ligtas na lugar, na diyan nakakakua kita nin kinakaipuhan na paggiya asin proteksiyon. Asin diyan an maimbod na mga lalaki na naglilingkod bilang mga elder nagtatao nin Makakasuratan na tabang asin konseho. (Gal. 6:1) An kadaklan sa mamumuton na pag-ataman ni Jehova itinatao sa sato paagi sa “balaog” na mga lalaking ini. (Efe. 4:7, 8) Paano kita maninigong maghimati? Kun gikan sa buot kitang mapasakop asin makuyog, bebendisyunan kita nin Diyos.—Heb. 13:17.

21. (a) Maninigo na magin determinado kitang gibuhon an ano? (b) Ano an tutukaron sa sunod na artikulo?

²¹ Lugod na magin determinado kitang magpagiya sa banal na espiritu asin sa siring, akuon an paggiya kan satong Ama sa langit. Kaipuhan man niyatong hurop-hurupon an pamumuhay kan saiyang Aki, si Jesu-Cristo, na an daing kaagid na halimbawa pinagmamaigutan niyatong sunudon. Dakulang balos an nakamtan ni Jesus huli sa saiyang pagkuyog dawa sagkod sa kagadanan. (Fil. 2:5-11) Arog niya, bebendisyunan kita kun bilog na puso kitang magtitiwala ki Jehova. (Tal. 3:5, 6) Kaya lugod na pirmi kitang magsarig ki Jehova bilang an satong daing kaagid na Paratao asin Paraprotektar. Nakakaugma nanggad asin dakulang pribilehiyo na maglingkod sa saiya! Mas makusog an satong pagkamuot sa saiya mantang hinuhurop-hurop ta an ikatulong aspekto kan pag-ataman sa sato kan satong Ama—an saiyang pakikikatuod. Tutukaron kan sunod na artikulo kun paanong si Jehova an satong pinakadayupot na Katuod.