1, 2. ¿Mbaʼépepa sapyʼánte ñanediferénte ojuehegui?

JEHOVÁ rupivénte oĩ opaite família (Efes. 3:14, 15). Péro peteĩ famíliape naentéroi peteĩchapa ha ikatu voi káda uno idiferénte isituasión. Por ehémplo, oĩ osegíva oiko isy ha itúvandi okakuaapa rire jepe. Ótrogui katu ituvakuéra omano peteĩ mbaʼasýgui, aksidéntepe térã ambue desgrásiape. Ha oĩ voi katu ni ndoikuaajepéiva ituvakuérape.

² Péicha avei oiko Jehová siervokuéra apytépe. Ñande ñaiméramo jepe ifamíliape, naentéroi ñañepyrũ jaikuaa Jehovápe peteĩchapa. Oĩ oaprende vaʼekue la Biblia omboʼéva michĩete guive, ituvakuéra omboʼe rupi chupe (Deut. 6:6, 7). Ha heta katu oĩ oikuaáva Jehovápe ojepredika haguére chupe (Rom. 10:13-15; 1 Tim. 2:3, 4).

3. ¿Mbaʼépepa enterovéva jajojogua?

³ Péro ñanediferénteramo jepe ojuehegui, enterove yvypóra jajojogua peteĩ mbaʼépe. Opavave jasufri Adán naiñeʼẽrendúi haguére Jehovápe, upévare ñaneimperfékto, japeka ha ñamano (Rom. 5:12). Péro jaservi rupi Jehovápe ñande pyʼaite guive ikatu jaʼe hese haʼeha ‘ñande Ru’. Por ehémplo, ipuévlo yma guare ohenói vaʼekue chupe kóicha: “Jehová, nde ningo ore Ru hína” (Is. 64:8, NM). Jesús avei heʼi vaʼekue omboʼérõ guare idisipulokuérape  pe padrenuéstro: “Ore Ru reiméva yvágape, toñemomarangatu nde réra” (Mat. 6:9).

4, 5. ¿Mbaʼépa ñahesaʼỹijóta ikatu hag̃uáicha jahayhuve ñande Ru Jehovápe?

⁴ Ñande Ru yvagapegua oñangareko ha oprotehe umi ojeroviávape hese. Haʼe opromete ñandéve: “[Che siérvo] cherayhúgui che anohẽta chupe jejopy vaígui. Añangarekóta hese oikuaágui che réra” (Sal. 91:14, NM). Jehová omosãso ipuévlope iñenemigokuéragui ha oprotehe chupekuéra ani hag̃ua oñehundi.

⁵ Jahechamína mbohapy mbaʼe ñanepytyvõtava jahayhuve hag̃ua Ñandejárape: 1) oñenkarga opa mbaʼe ñaikotevẽvare, 2) ñandeprotehe ha 3) haʼe avei ñane Amigoite. Ñahesaʼỹijóvo peteĩteĩ koʼã mbaʼe, ñapensami avei mbaʼéichapa ñaime ñande Ru yvagapegua renondépe ha mbaʼépa ikatu jajapo ñambotuicha hag̃ua chupe. Avei jajepyʼamongeta umi mbaʼe porã ohupytývare entéro oñemoag̃uíva hese (Sant. 4:8).

6. ¿Mbaʼéichapa Jehová ohechauka “opa mbaʼe porã” ouha chugui?

⁶ Santiago oskrivi vaʼekue: “Opa mbaʼe porã ha rregálo hekopeguáva ou yvatégui, omeʼẽgui ñandéve Ñandejára haʼéva umi mbaʼerendy yvagapegua Túva” (Sant. 1:17). Ñande rekove ningo haʼe peteĩ rregálo oúva Jehovágui (Sal. 36:9). Ha jaiporúvo jajapo hag̃ua hembipota, koʼág̃ama voi jahupyty heta mbaʼe iporãva ha amo gotyove ikatúta jaiko opa ára g̃uarã Ñandejára múndo pyahúpe (Prov. 10:22; 2 Ped. 3:13). Péro, ¿mbaʼéicha piko jahupytýta koʼã mbaʼe iporãitéva ko Adán káusare ñaneimperféktova, japeka ha ñamano?

7. ¿Mbaʼépa ojapo Jehová ikatu hag̃uáicha ñaĩ ag̃uiete chugui?

⁷ Jehová ohechauka heta hendáicha omeʼẽha ñandéve opa mbaʼe ñaikotevẽva. Jaikuaaháicha, enterovéva japeka ha ñaneimperfékto, péro Jehová ombou Itaʼýra ñanemosãso hag̃ua (Rom. 3:23). Ñanderayhúgui, haʼe voi ojapo tekotevẽva guive ikatu hag̃uáicha ñaĩ ag̃uiete chugui. Apóstol Juan omombeʼu ñandéve: “Péicha ojehechauka Ñandejára mborayhu ñande kásope: Ñandejára ombou Itaʼýra peteĩete ko múndope, ikatu hag̃uáicha haʼe rupive jahupyty pe jeikove. Pe mborayhu ndeʼiséi ñande jahayhu hague Ñandejárape, síno haʼe la ñanderayhu vaʼekue ha ombou Itaʼýrape oñemeʼẽ hag̃ua sakrifísioramo, ikatu hag̃uáicha ojeheja rei ñande pekádo ha jaiko porã jey hendive” (1 Juan 4:9, 10).

8, 9. ¿Mbaʼéichapa Jehová ohechauka oñenkargaha opa mbaʼe oñekotevẽvare Abrahán ha Isaac tiémpope? (Ehecha pe taʼanga oĩva iñepyrũme.)

⁸ Síglo 19-pe rupi Jesús onase mboyve, Abrahán ohasa vaʼekue peteĩ situasión ohechaukáva mbaʼépa Jehová ojapóta ikatu hag̃uáicha opavave yvypóra iñeʼẽrendúva oikove opa ára g̃uarã. Hebreos 11:17-19 omombeʼu: “Ñandejára otanteárõ guare Abrahánpe, haʼe ojerovia rupi haimete oikuaveʼẽ Isaácpe sakrifísioramo. Pe kuimbaʼe vyʼápe orresivi vaʼekue umi promésa, osakrifikamoʼãite itaʼýra peteĩete. Haʼe ojapo upéva, jepe ojeʼe kuri chupe: ‘Ne ñemoñare oúta Isaac rupive’. Abrahán opensa vaʼekue Ñandejára ikatuha omoingove jey itaʼýrape; ha Ñandejára omeʼẽ jey chupe itaʼýra, osalva chupe ani hag̃ua omano. Upéva orrepresenta peteĩ mbaʼe oikótava tenonderãme”. ¿Jahechakuaápa hína mbaʼépepa ojojogua Abrahán ha Jehová? Jehová ningo omeʼẽ Itaʼýra Jesucristo, ikatu hag̃uáicha entéro yvypóra oñevenefisia (elee Juan 3:16, 36).

⁹ ¡Oiméne Isaac oñeñandu porãite raʼe oikuaa rire nomanomoʼãiha! Katuete oagradeséne Ñandejárape omeʼẽ haguére peteĩ ovecha oĩva ag̃ui upégui ojapo hag̃ua pe  sakrifísio (Gén. 22:10-13). Ndareíri upe lugárpe oñembohéra “Jehová-yiré”, heʼiséva idióma evréope Jehová oñenkargataha oñekotevẽvare (Gén. 22:14, nóta, NM).

10, 11. ¿Mávapa oipytyvõ umi héntepe “oiko porã jey hag̃ua” Ñandejárandi, ha mbaʼéichapa ojejapo ko tembiapo?

¹⁰ Ñapensávo mbaʼéichapa Jehová oñenkarga opa mbaʼe ñaikotevẽvare, katuete ou ñane akãme pe sakrifísio Jesús ojapo vaʼekue. Upe sakrifísio rupivénte ikatu ñaime porã jey Jehovándi, ha ñande ñamombaʼeterei upéva. Apóstol Pablo oskrivi vaʼekue: “Ore ningo rohechakuaa enterove umi kuimbaʼe omanóma hague, upévare oñekotevẽ kuri peteĩ kuimbaʼe omano enterove rehehápe. Ha Cristo omano enterove rehehápe ha oñemopuʼã jey, ikatu hag̃uáicha umi oikovéva ndojapovéima haʼekuéra oipotávante, ojapo hag̃ua guei Cristo oipotáva” (2 Cor. 5:14, 15).

¹¹ Umi kristiáno primer síglope guare ohayhu Ñandejárape ha oagradeseterei ikatu haguére oservi chupe. Upévare ovyʼa hikuái oipytyvõ rupi ótrope “oiko porã jey hag̃ua hendive”. Haʼekuéra opredika ha omboʼe kuri umi héntepe pe marandu porã, upéicha rupi heta persóna ipyʼaporãva oñemoag̃ui Jehováre, oiko chuguikuéra iñamígo ha upe rire Ñandejára raʼy. Ñane tiémpope, umi kristiáno unhído ojapo avei ko tembiapo. Haʼekuéra ningo Ñandejára rembijokuái ha omeʼẽ oportunida umi ipyʼaporãvape oñemoag̃ui hag̃ua Jehováre ha oservi hag̃ua chupe (elee 2 Corintios 5:18-20; Juan 6:44; Hech. 13:48).

12, 13. ¿Mbaʼéichapa ikatu jahechauka jaagradeseha umi rregálo porãite Jehová omeʼẽva ñandéve?

¹² Entéro kristiáno orekóva esperánsa oikove hag̃ua ko yvy ape ári oagradeseterei Jehovápe oñenkarga haguére opa mbaʼe ñaikotevẽvare. Upévare omoirũ umi unhídope opredika hag̃ua pe marandu porã. Ha ikatu hag̃uáicha ojejapo ko tembiapo, ojeporu pe rregálo iporãitéva oúva Jehovágui: la Biblia (2 Tim. 3:16, 17). Jaiporu porãramo Ñandejára Ñeʼẽ, ñameʼẽta oportunida ñande rapichakuérape ohupyty hag̃ua pe jeikove opaveʼỹva. Péro Jehová ñanepytyvõ avei ambue hendáicha jajapo hag̃ua ko tembiapo: omeʼẽ ñandéve ijespíritu sánto (Zac. 4:6; Luc. 11:13). Ha jaleéramo pe Anuario de los testigos de Jehová jahecháta umi mbaʼe porã ojehupytýva. ¡Ajépa javyʼaite jajapo haguére ko tembiapo omombaʼeguasúva ñande Ru yvagapeguápe, omeʼẽva ñandéve opa mbaʼe ñaikotevẽva!

¹³ Ñapensamína umi rregálo porãitére Jehová omeʼẽvare ñandéve ha ñañeporandu: “¿Añehaʼãmbaitépa hína apredika ha amboʼe che rapichápe pe marandu porã ikatu hag̃uáicha ahechauka Jehovápe aagradeseha chupe? ¿Mbaʼépa tekotevẽ ajapo ikatu hag̃uáicha chekatupyryve apredika hag̃ua?”. Ñamotenondéramo Ñandejára Rréino, jahechaukáta ñandeagradesidoha. Upéicha Jehová oñenkargáta opa mbaʼe ñaikotevẽvare (Mat. 6:25-33). Ñande ningo ñañandu mbaʼéichapa Jehová ñanderayhu ha oñangareko ñanderehe, upévare katuete ñañehaʼãmbaite jajapo umi mbaʼe ombovyʼáva chupe (Prov. 27:11).

14. ¿Mbaʼépa ojapo Jehová isiervokuéra rehehápe?

¹⁴ David heʼi vaʼekue: “Ajepyʼapy ha ahasa asýramo jepe, aikuaa porã ñande Ruete oñangarekotaha cherehe. Nde voínte che pytyvõhára, Nde, che Ruete, eju pyaʼe chesalva hag̃ua che jejopy vaígui” (Sal. 40:17, ÑÑB). Jehová heta vésema osalva ipuévlope, koʼýte iñenemigokuéra opersegi mbarete jave chupekuéra. ¡Ajépa jaagradesete chupe ñanepytyvõ haguére ñaneñeʼẽrendu hag̃ua pe ijetuʼuve jave, ha omombarete meme rupi ñande jerovia!

15. Emoĩ peteĩ ehémplo ohechaukáva mbaʼéichapa peteĩ túva oprotehe itaʼýrape.

¹⁵ Peteĩ túva ohayhúva itaʼyrakuérape ndahaʼéi oñenkargánteva umi mbaʼe oikotevẽvare hikuái, síno avei oprotehe chupekuéra. Ha ojapeligra sapyʼárõ, ojapóta oimeraẽ mbaʼe hesehapekuéra. Peteĩ ermáno imanduʼa mbaʼéichapa itúva oprotehe chupe imitãʼírõ guare. Haʼe omombeʼu peteĩ díape oúrõ guare predikasióngui itúvandi, ndaikatúi hague ohasa peteĩ pártepe tuichaitereígui pe y. Pe pyharevépe oky heta kuri ha pe arrójo upepegua osẽmbaite. Péro haʼekuéra ohasámante vaʼerã upérupi, upévare opo ohóvo umi ita guasu ári. Haʼe oho itúva renondépe, ha peichahágui ipyho ha hoʼa pe ýpe. Péro dos vése oñapymírõ g̃uarã itúva pyaʼeterei ojagarra chupe ijatiʼýgui ha onohẽ chupe. ¡Oiméne ovyʼaite raʼe osalva haguére chupe itúva! Upéicha avei, ñande Ru yvagapegua ñaneguenohẽ ko múndo aña ha igovernánte poguýgui. Añetehápe ningo ndaipóri ótro ikatúva ñandeprotehe porãve Jehovágui (Mat. 6:13; 1 Juan 5:19).

16, 17. ¿Mbaʼéichapa Jehová oipytyvõ ha oprotehe umi isrraelítape oñorairõrõ guare umi amalekítandi?

¹⁶ Áño 1513-pe a.C. Jehová oprotehe vaʼekue ipuévlope. Haʼe oguenohẽ umi isrraelítape Egipto poguýgui ha oprotehe chupekuéra ohasárõ guare pe mar Rojo. Upéi oho hikuái mónte Sinaí gotyo ha og̃uahẽ peteĩ lugár héravape Refidim.

¹⁷ Satanás oikuaa kuri pe profesía oĩva Génesis 3:15-pe, upévare katuete ojapóne raʼe ikatúva entéro oataka hag̃ua umi isrraelítape, koʼýte haʼetéva hikuái ndaikatumoʼãiva oñedefende. Satanás oiporu umi amalekítape, haʼéva Ñandejára puévlo enemígo (Núm. 24:20). Ñapensamína Jehová  ohupyty vaʼekuére cuatro isiérvo iñeʼẽrendúva rupive: Josué, Moisés, Aarón ha Hur. Josué oñorairõ umi amalekítandi, upe aja Moisés, Aarón ha Hur ojupi peteĩ sérro ruʼãme. Moisés ohupi aja ipo, umi isrraelíta ogana ohóvo iñenemigokuérape. Ha ikaneʼõvo chugui ijyva, Aarón ha Hur ojoko Moisés jyva opyta hag̃uáicha yvate. Jehová oipytyvõ ha oprotehe rupi chupekuéra, “Josué ohundi Amaleq ha ipuévlope” (Éx. 17:8-13, NM). Moisés omopuʼã peteĩ altár upe lugárpe, ha ombohéra “Jehová-nisí”, heʼiséva idióma evréope “Jehová Haʼe Che Póste-Señál” (elee Éxodo 17:14, 15, nóta).

18, 19. ¿Mbaʼéichapa Jehová koʼág̃arupi ñandeprotehe?

¹⁸ Jehová oprotehe opavave ohayhúva ha iñeʼẽrendúvape chupe. Ha ojapo haguéicha umi isrraelíta oĩrõ guare Refidímpe, ñande ñañemoĩ avei ipópe ñane enemigokuéra ñandeataka jave. Jehová heta vésema oprotehe ipuévlope ha osalva chupekuéra Satanásgui. Katuete nemanduʼáne mbaʼéichapa heta vése oñangareko isiervokuérare oĩrõ guare opersegíva chupekuéra. Por ehémplo dékada de 1930 ha 1940-pe umi nási heta ombohasa asy ñane ermanokuérape Alemániape ha ótro tetãme. Anuáriope oñemombeʼu umi mbaʼe ohasa vaʼekue hikuái ha mbaʼéichapa Jehová oprotehe chupekuéra pe ijetuʼuve jave. Jalee ha jajepyʼamongetáramo koʼã mbaʼére, jahechakuaa Jehová oñangarekoha ñanderehe ha jajeroviave hese (Sal. 91:2).

¹⁹ Jehová omeʼẽ ñandéve heta konsého ñandeprotehéva iñorganisasión ha umi puvlikasión rupive. Koʼã mbaʼe ideprovechoiterei ñandéve. Ko múndope henyhẽ umi iñakãrakúva pornografía ha séxore, ha hoʼu rasáva vevída, péro Jehová ñanepytyvõ meme ikonsého rupive ani hag̃ua jaʼa koʼã ñuhãme. Por ehémplo, ojapoháicha peteĩ túva ojepyʼapýva ifamíliare, pyʼỹinte ñanemomanduʼa umi rred sosiál ipeligrosoha ikatúgui ñandegueraha vai (1 Cor. 15:33). *

20. ¿Mbaʼéichapa Jehová ñandegia ha ñandeprotehe?

²⁰ ¿Mbaʼéichapa ikatu jahechauka oikoha ñandehegui “Jehová remimboʼe”? Ñaneñeʼẽrendu vaʼerã chupe opa mbaʼépe (Is. 54:13, NM). Jehová ñandegia ha ñandeprotehe ikongregasión rupive. Upépe umi kuimbaʼe iñeʼẽrendúva oservíva de ansiáno ñanepytyvõ ha omeʼẽ ñandéve konsého la Biblia rupive (Gál. 6:1). Añetehápe Jehová omeʼẽ koʼã “kuimbaʼekuéra rregáloramo”, ha péicha mborayhúpe oñangareko ñanderehe (Efes. 4:7, 8). Upéicharõ, ¿mbaʼépa ñande jajapo vaʼerã? Ñañemoĩ vaʼerã ipoguypekuéra ha ñaneñeʼẽrendu, upéicha Jehová ñanevendesíta (Heb. 13:17).

21. a) ¿Mbaʼépa enterovéva tekotevẽ jajapo? b) ¿Mbaʼépa jahecháta pe artíkulo oúvape?

²¹ Jahejákena pe espíritu sánto ñandegia ha jasegi umi konsého omeʼẽva ñande Ru yvagapegua. Jajepyʼamongeta Itaʼýra Jesucristo ehémplore, ha ñañehaʼã ñahaʼanga chupe. Haʼe ningo iñeʼẽrendu vaʼekue omano meve ha Jehová omeʼẽ chupe heta mbaʼe iporãitereíva (Filip. 2:5-11). Jehová omeʼẽta avei ñandéve heta mbaʼe iporãva jajeroviáramo hese ñande pyʼaite guive (Prov. 3:5, 6). Aníkena arakaʼeve ñanderesarái Jehová oñenkargataha opa mbaʼe ñaikotevẽvare ha ñandeprotehetaha. Ndaipóri ningo haʼeichagua. ¡Ajépa javyʼaite ikatu haguére jaservi chupe! Péro, ¿mbaʼérepa ikatu jaʼe hese haʼeha ñane Amigoite? Pe artíkulo oúva ombohováita ko porandu ha ñanepytyvõta jahayhuve hag̃ua chupe.