Jehovah Wẹ Awuwledainanutọ po Hihọ́-Basinamẹtọ Mítọn Po
“Na e ko ze owanyi etọn do ogo e, enẹwutu wẹ yẹn na whlẹn ẹn: yẹn na ze e do aga, na ewọ yọ́n oyín ṣie wutu.”—PS. 91:14.
1, 2. Nawẹ mí gbọnvona míde na nuhe dù ninọmẹ whẹndo tọn mítọn po aliho he mẹ mí plọn nugbo lọ te po gbọn?
JEHOVAH wẹ yin dowatọ whẹndo tọn. (Efe. 3:14, 15) Ṣigba, eyin mí tlẹ wá sọn whẹndo dopolọ mẹ, jẹhẹnu po ninọmẹ mítọn lẹ po nọ gbọnvo. Hiẹ sọgan ko nọ mẹjitọ towe lẹ dè sọn jiji towe whenu kakajẹ whenue a yin mẹho. Mẹdevo lẹ sọgan ko hẹn mẹjitọ yetọn lẹ bu to okú mẹ, vlavo gbọn azọ̀n, asidan kavi nugbajẹmẹji devo lẹ dali. Etomọṣo, mẹdelẹ ma tlẹ yọ́n mẹjitọ yetọn lẹ paali.
2 Aliho voovo mẹ wẹ hagbẹ whẹndo sinsẹ̀n-basitọ Jehovah tọn lẹ tọn plọn nugbo lọ te. Hiẹ sọgan ko yin ‘pinplọn whẹ́n to nugbo lọ mẹ,’ dile mẹdelẹ nọ dọ do, podọ mẹjitọ towe lẹ ko yí sọwhiwhe do plọn we nunọwhinnusẹ́n Jiwheyẹwhe tọn lẹ. (Deut. 6:6, 7) Kavi hiẹ sọgan ko yin dopo to omẹ fọtọ́n he plọn nugbo lọ gbọn azọ́n yẹwhehodidọ devizọnwatọ Jehovah tọn lẹ tọn gblamẹ.—Lom. 10:13-15; 1 Tim. 2:3, 4.
3. Etẹlẹ wẹ mímẹpo tindo to kọndopọ mẹ?
3 Mahopọnna nuhe go mí donù enẹlẹ, mímẹpo wẹ tindo onú delẹ to kọndopọ mẹ. Mí nọ jiya kọdetọn tolivivẹ Adam tọn bo dugu mape, ylando po okú po tọn. (Lom. 5:12) Etomọṣo, taidi sinsẹ̀n-basitọ nugbo lẹ, mí sọgan ylọ Jehovah dọ “Otọ́ mítọn.” To whenue Isaia 64:8 to alọdlẹndo omẹ dide Jiwheyẹwhe tọn lẹ to hohowhenu, e dọmọ: “OKLUNỌ E, hiẹ wẹ otọ́ mítọn.” Humọ, Jesu bẹ odẹ̀ apajlẹ tọn etọn jẹeji po hogbe ehelẹ po dọmọ: “Otọ́ mítọn he tin to olọn mẹ, na oyín towe ni yin kinklandowiwe.”—Matiu 6:9.
4, 5. Nado yidogọna pinpẹn-nutọn-yinyọnẹn mítọn na Otọ́ mítọn, Jehovah, etẹwẹ mí na gbadopọnna?
4 Otọ́ mítọn olọn mẹ tọn nọ penukundo mí go bo nọ basi hihọ́na mí sọgbe hẹ nuhudo mítọn dile mí to oyín etọn ylọ po yise po. Psalm-kantọ lọ yihodọ sọn e dè dọmọ: “Na [sinsẹ̀n-basitọ nugbo de] ko ze owanyi etọn do ogo e, enẹwutu wẹ yẹn na whlẹn ẹn: yẹn na ze e do aga, na ewọ yọ́n oyín ṣie wutu.” (Ps. 91:14) Na nugbo tọn, Jehovah Jiwheyẹwhe nọ gbọn owanyi dali whlẹn mí sọn alọ kẹntọ mítọn lẹ tọn mẹ bo nọ basi hihọ́na mí, na mí nikaa yin gbidigbidi sẹ̀.
5 Nado yidogọna pinpẹn-nutọn-yinyọnẹn mítọn na Otọ́ olọn mẹ tọn mítọn, mì gbọ mí ni gbadopọnna onú titengbe atọ̀n delẹ: (1) Otọ́ mítọn wẹ Awuwledainanutọ mítọn. (2) Jehovah wẹ Hihọ́-basinamẹtọ mítọn. (3) Podọ Jiwheyẹwhe wẹ Họntọn dagbe hugan mítọn. Dile mí na to dogbapọnna nuagokun ehelẹ, mì gbọ mí ni lẹnnupọndo haṣinṣan he mí tindo hẹ Jiwheyẹwhe ji bo pọ́n lehe mí sọgan gbògbéna ẹn taidi Otọ́ mítọn do. Podọ e nasọ yin alenu nado lẹnnupọndo dona he Jehovah tindo na mẹhe dọnsẹpọ ẹ pẹkipẹki lẹ ji.—Jak. 4:8.
JEHOVAH WẸ AWUWLEDAINANUTỌ DAHO HUGAN LỌ
6. Etẹwẹ yin dopo to aliho he mẹ Jehovah nọ do ede hia taidi Mẹhe nọ namẹ “nunina dagbe lẹpo” te lẹ mẹ?
6 Devi Jakọbu wlan dọmọ: “Aga wẹ nunina dagbe lẹpo gọna nunina pipé lẹpo nọ wá sọn, na e nọ jẹte wá sọn Otọ́ hinhọ́n olọn tọn lẹ lọ dè.” (Jak. 1:17) Ogbẹ̀ na ede ko yin nunina jiawu de sọn Jehovah dè. (Ps. 36:9) Eyin mí yí gbẹzan mítọn do wà ojlo Jiwheyẹwhe tọn, mí nọ duvivi dona susu lẹ tọn todin bosọ tindo todido nado nọgbẹ̀ kakadoi to aihọn yọyọ lọ mẹ. (Howh. 10:22; 2 Pita 3:13) Ṣigba, nawẹ enẹ yọnbasi gbọn to whenue e yindọ mí to pipehẹ kọdetọn vẹadi tolivivẹ Adam tọn lẹ tọn?
7. Nawẹ Jiwheyẹwhe wleawu aliho de tọn, na mí nido sọgan tindo haṣinṣan pẹkipẹki hẹ ẹ gbọn?
7 Na nugbo tọn, Jehovah yin Awuwledainanutọ Daho lọ to aliho susu mẹ. Di apajlẹ, nukundagbe majẹhẹ etọn nọ whàn ẹn nado gọalọna mí. Nugbo wẹ dọ mímẹpo wẹ yin ylandonọ bo dugu mape tọn sọn otọ́ mítọn aigba ji tọn tintan lọ dè. (Lom. 3:23) Etomọṣo, na Jehovah yiwanna mí wutu, e ze afọdide tintan lọ bo wleawu aliho de tọn, na mí nido sọgan tindo haṣinṣan pẹkipẹki de hẹ ewọ. Apọsteli Johanu wlan dọmọ: “Gbọn ehe dali wẹ owanyi Jiwheyẹwhe tọn ko yin didohia to whẹho mítọn mẹ, na Jiwheyẹwhe do Visunnu detọ́n dopo akàn etọn hlan aihọn mẹ na mí nido sọgan mọ ogbẹ̀ gbọn ewọ gblamẹ. Ehe mẹ wẹ owanyi lọ te, e ma yindọ míwlẹ wẹ ko yiwanna Jiwheyẹwhe gba, ṣigba dọ ewọ wẹ yiwanna mí bo do Visunnu etọn hlan taidi avọ́sinsan oyẹsu tọn de na ylando mítọn lẹ.”—1 Joh. 4:9, 10.
8, 9. Nawẹ Jehovah do ede hia nado yin Awuwledainanutọ Daho Hugan lọ to ojlẹ Ablaham po Isaki po tọn mẹ gbọn? (Pọ́n yẹdide he tin to bẹjẹeji hosọ ehe tọn.)
8 To owhe kanweko 19tọ J.W.M. tọn mẹ, nujijọ dọdai tọn de wá aimẹ, ehe do lehe Jehovah na gbọn owanyi dali na ogbẹ̀ madopodo gbẹtọvi tonusetọ lẹpo do hia. Heblu lẹ 11:17-19 dọmọ: “Gbọn yise dali, to whenue Ablaham yin tintẹnpọn, e ko dibla yí Isaki do sanvọ́, bọ dawe lọ he ko mọ opagbe lọ lẹ yí po ayajẹ po tẹnpọn nado yí visunnu dopo akàn etọn do sanvọ́, dile etlẹ yindọ e ko yin didọna ẹn dọmọ: ‘Nuhe na yin yiylọdọ “okún towe” na wá gbọn Isaki gblamẹ.’ Ṣigba, e mọdọ Jiwheyẹwhe tlẹ penugo nado fọ́n ẹn sọn oṣiọ lẹ mẹ; podọ e sọ gọ̀ ẹ mọyi sọn finẹ to yẹhiadonu-liho.” E ma vẹawu nado mọ kanṣiṣa lọ. Jehovah desọn ojlo mẹ nado ze Visunnu etọn, Jesu Klisti jo do ota gbẹtọvi lẹ tọn mẹ.—Hia Johanu 3:16, 36.
9 Lehe homẹ Isaki tọn na ko hùn nado mọdọ emi yin whinwhlẹngán sọn avọ́sinsan he na hẹn okú wá na ẹn enẹ mẹ do sọ! Ayihaawe ma tin dọ ewọ na ko dopẹ́ to whenue Jehovah wleawu nudevo tọn na avọ́sinsan lọ, yèdọ agbò de he azò etọn lẹ plá do nukan he to yakẹ de go. (Gẹn. 22:10-13) Abajọ filọ do nọ yin yiylọdọ “Jehovah-jile,” ehe zẹẹmẹdo ‘Jehovah na wleawu etọn.’—Gẹn. 22:14; nudọnamẹ odò tọn.
AWUWLEDAINANU DE NADO GBỌWHẸ
10, 11. Mẹnu lẹ wẹ yin nukọntọ to “lizọnyizọn whẹgbigbọ tọn” lọ mẹ, podọ nawẹ yé nọ wàmọ gbọn?
10 Dile mí lẹnayihamẹpọn do lehe Jehovah do ede hia nado yin Awuwledainanutọ Daho Hugan lọ do ji, mí sọ yọ́n pinpẹn adà titengbe he Jesu Klisti yiwà tọn, dile Paulu wlan do dọmọ: “Nujikudo míwlẹ tọn wẹ, dọ omẹ dopo kú na mẹlẹpo; enẹwutu, mẹlẹpo ko kú; podọ ewọ kú na mẹlẹpo na mẹhe to ogbẹ̀ lẹ ma nado nọgbẹ̀ na yede ba, ṣigba na omẹ lọ he kú na yé bo yin finfọn.”—2 Kọl. 5:14, 15.
11 Na Klistiani dowhenu tọn lẹ yiwanna Jiwheyẹwhe bo yọ́n pinpẹn lẹblanulọkẹyi mayọnjlẹ he yé tindo nado sẹ̀n ewọ tọn wutu, yé yí homẹhunhun do kẹalọyi “lizọnyizọn whẹgbigbọ tọn” lọ. Azọ́n yẹwhehodidọ po mẹhẹnzun devi tọn yetọn po hùn aliho dote na gbẹtọ ahunjijlọnọ lẹ nado wá tin to jijọho mẹ hẹ Jiwheyẹwhe, bo lẹzun họntọn etọn, bosọ wá lẹzun ovi gbigbọmẹ tọn etọn lẹ to godo mẹ. To egbehe, devizọnwatọ yiamisisadode Jehovah tọn lẹ to lizọnyizọn dopolọ hẹndi. Nuhe yé nọ wadotana taidi afọzedaitọ Jiwheyẹwhe po Klisti po tọn lẹ zọ́n bọ Jehovah nọ dọ̀n gbẹtọ lẹ bọ yé nọ lẹzun yisenọ.—Hia 2 Kọlintinu lẹ 5:18-20; Joh. 6:44; Owalọ 13:48.
12, 13. Nawẹ mí sọgan dohia dọ mí yọ́n pinpẹn awuwledainanu Jehovah tọn lẹ tọn gbọn?
12 Nado do pinpẹn-nutọn-yinyọnẹn hia Jehovah taidi Awuwledainanutọ Daho Hugan lọ, Klistiani he tindo todido aigba ji tọn lẹ nọ tindo mahẹ to azọ́n yẹwheho Ahọluduta lọ tọn didọ mẹ hẹ mẹyiamisisadode lẹ. To azọ́n ehe mẹ, mí nọ yí Biblu zan, yèdọ awuwledainanu jiawu Jiwheyẹwhe tọn devo. (2 Tim. 3:16, 17) Gbọn Ohó gbọdo Jiwheyẹwhe tọn yiyizan po azọ́nyinyọnẹn po to lizọnyizọn lọ mẹ dali, mí nọ hùn dotẹnmẹ dote na mẹdevo lẹ nado sọgan mọ ogbẹ̀ madopodo. Nado mọ alọgọ yí to azọ́n ehe mẹ, dopodopo mítọn nọ ganjẹ awuwledainanu Jehovah tọn devo go, enẹ wẹ gbigbọ wiwe etọn. (Zek. 4:6; Luku 11:13) Kọdetọn lọ lẹ nọ jiawu taun dile Annuaire des Témoins de Jéhovah nọ dohia do to owhe dopodopo mẹ. Gbégbò nankọtọn die nado tindo mahẹ to azọ́n ehe mẹ bo na pipà Otọ́ mítọn podọ Awuwledainanutọ mítọn!
13 To whenuena e yindọ Jiwheyẹwhe ko wleawu onú ehe lẹpo tọn na mí, e na yọ́n nado kanse míde dọ: ‘Be n’to nuhe go n’pé lẹpo wà to lizọnyizọn ṣie mẹ nado dohia Jehovah lehe n’yọ́n pinpẹn awuwledainanu etọn lẹ tọn do ya? Aliho tẹlẹ mẹ wẹ n’sọgan pọnte dogọ te bo lẹzun yẹwhehodọtọ kọdetọn dagbenọ to wẹndagbe lọ lilá mẹ?’ Mí sọgan do pinpẹn-nutọn-yinyọnẹn mítọn hia na awuwledainanu jiawu Jiwheyẹwhe tọn lẹ gbọn Ahọluduta lọ zizedo otẹn tintan mẹ to gbẹzan mítọn mẹ dali. Eyin mí wàmọ, Jehovah na hẹn ẹn diun dọ nuhe sin nuhudo mí tindo lẹ na yin nina mí. (Mat. 6:25-33) Na Jehovah yiwanna mí wutu, mílọsu nọ jlo nado wà nuhe go mí pé lẹpo nado hẹn homẹ etọn hùn.—Howh. 27:11.
14. Nawẹ Jehovah yin Mẹwhlẹngántọ de na omẹ etọn lẹ gbọn?
14 Psalm-kantọ Davidi jihàn dọmọ: “Oyànọ, agbátọnọ wẹ yẹn; ganṣo OKLUNỌ lẹnnu jẹ ogo e: hiẹ wẹ alọgọtọ ṣie podọ whlẹngántọ ṣie.” (Ps. 40:17) Jehovah ko whlẹn omẹ etọn lẹ pludopludo taidi pipli de, titengbe to whenue kẹntọ lẹ to homẹkẹndo yé sinsinyẹn bosọ to gbé yetọn yàn badabada. Lehe mí dopẹna Jiwheyẹwhe na alọ he e nọ gọ́ na mí to ojlẹ mọnkọtọn lẹ mẹ gọna awuwledainanu gbigbọmẹ tọn he mí nọ mọyi to whelẹponu do sọ!
JEHOVAH NỌ BASI HIHỌ́NAMẸ
15. Basi zẹẹmẹ lehe otọ́ owanyinọ de nọ dovivẹnu nado basi hihọ́na ovi etọn do tọn.
15 Otọ́ owanyinọ de ma nọ wleawudaina ovi etọn lẹ poun gba, ṣigba e sọ nọ basi hihọ́na yé. Ewọ nọ saba dovivẹnu nado whlẹn yé eyin yé tin to owù mẹ. Mẹmẹsunnu de flin nujijọ de he wá aimẹ to whenue e gbẹ́ yin yọpọvu de. Ewọ po otọ́ etọn po lẹkọ sọn sinsẹ̀nzọn lọ mẹ jei whégbè, ṣigba yé dona dasá tọ̀sisa kleun de po afọ po whẹpo do jẹ whégbè. Jikun sinsinyẹn de ko ja to afọnnu lọ he zọ́n bọ tọ̀sisa lọ gọfla. Aliho dopo gee nado dasá tọ̀sisa lọ wẹ nado nọ lọ́n sọn zannu daho de ji jẹ devo ji. Dile visunnu lọ to yìyì to nukọnna otọ́ etọn, afọ etọn dídí sọn zannu lọ lẹ dopo ji bọ e jai jẹ osin gigọ́ lọ mẹ bo yì otọ̀ glọ whla awe. Lehe e dopẹ́ do sọ to whenue otọ́ etọn yawu wle awà etọn bo whlẹn ẹn ma nado kútọ! Otọ́ olọn mẹ tọn mítọn nọ whlẹn mí sọn nuhe mí sọgan ylọ dọ tọ̀sisa he to adán ji aihọn ylankan ehe tọn mẹ podọ sọn ogán etọn Satani si. E họnwun dọ Jehovah wẹ yin Hihọ́-basinamẹtọ dagbe hugan he mẹdepope sọgan jlo nado tindo.—Mat. 6:13; 1 Joh. 5:19.
16, 17. Nawẹ Jehovah gọalọna Islaelivi lẹ bosọ basi hihọ́na yé to whenue yé to avùnho hẹ Amalẹkinu lẹ gbọn?
16 Hihọ́-basinamẹ owanyinọ Jehovah tọn yin didohia to nuhe jọ to whenue ewọ whlẹn Islaelivi lẹ sọn kanlinmọgbenu Egipti tọn bo basi hihọ́na yé to azọ́njiawu-liho dile yé dasá Ohù Vẹẹ lọ to 1513 J.W.M. godo. To whenue yé ko zinzọnlin gbọn zungbo mẹ pànta Osó Sinai godo, akọta lọ wá whèsla do Lẹfidimi.
17 Na dọdai Jiwheyẹwhe tọn he tin to Gẹnẹsisi 3:15 wutu, Satani na ko yí egblemaku do to dotẹnmẹ dín nado yangbé Islaelivi he taidi mẹhe ma tin to hihọ́ glọ enẹlẹ tọn. E wà ehe gbọn Amalẹkinu lẹ he yin kẹntọ omẹ Jiwheyẹwhe tọn lẹ tọn yiyizan dali. (Sọh. 24:20) Lẹnnupọndo nuhe Jehovah wadotana gbọn sunnu nugbonọ ẹnẹ ehelẹ, Jọṣua, Mose, Aalọn, po Huli po dali ji. Dile Jọṣua to avùnho hẹ Amalẹkinu lẹ, Mose, Aalọn po Huli po tin to pópló he to yakẹ de ji. Islaelivi lẹ nọ duto avùn lọ ji to whenue Mose dlẹn alọ etọn lẹ do aga. Eyin alọ kú i, Aalọn po Huli po nọ hẹn alọ etọn lẹ go. Gbọn alọgọ Jehovah tọn po hihọ́-basinamẹ etọn po dali, ‘Jọṣua gbawhàn Amalẹki po omẹ etọn lẹ po tọn.’ (Eks. 17:8-13) Mose do agbà de do finẹ, bo ylọ oyín etọn dọ “Jehovah-nisi,” ehe zẹẹmẹdo “OKLUNỌ lọ wẹ awhànsia ṣie.”—Hia Eksọdusi 17:14, 15; nudọnamẹ odò tọn.
YÉ YIN HIHỌ́-BASINA SỌTA NUYIWADOMẸJI SATANI TỌN LẸ
18, 19. Hihọ́-basinamẹ tẹwẹ Jiwheyẹwhe ko wleawu etọn na devizọnwatọ etọn lẹ to ojlẹ mítọn mẹ?
18 Jehovah nọ basi hihọ́na mẹhe yiwanna ẹn bo nọ setonuna ẹn lẹ. Taidi Islaelivi lẹ to Lẹfidimi, mí nọ lẹhlan Jiwheyẹwhe dè na hihọ́-basinamẹ to whenue kẹntọ lẹ diọnukunsọ mí. Jehovah ko basi hihọ́na mí taidi pipli de, podọ e ko basi hihọ́na mí sọta nuyiwadomẹji Lẹgba tọn lẹ. Lẹnnupọndo nujijọ susu lẹ he mẹ Jiwheyẹwhe basi hihọ́na mẹmẹsunnu mítọn lẹ he hẹn kadaninọ Klistiani tọn yetọn go ji. Di apajlẹ, nuhe jọ niyẹn to gandudu Nazi tọn whenu to Allemagne, podọ to otò devo lẹ mẹ to owhe 1930 lẹ mẹ podọ to bẹjẹeji owhe 1940 lẹ tọn. Eyin mí nọ hia otàn gbẹzan tọn lẹ gọna kandai he nọ sọawuhia to Annuaire des Témoins de Jéhovah mẹ gando hihọ́-basinamẹ Jiwheyẹwhe tọn to ojlẹ homẹkẹn tọn lẹ mẹ go bo nọ lẹnayihamẹpọn do yé ji, ehe na hẹn jide mítọn to Jehovah mẹ taidi Fibẹtado mítọn lodo.—Ps. 91:2.
Jehovah sọgan yí yisenọ hatọ mítọn lẹ zan nado gọalọna mí, na mí nido yin nugbonọ to ojlẹ awusinyẹn tọn lẹ mẹ (Pọ́n hukan 18-20)
19 Gbọn titobasinanu Jehovah tọn po zinjẹgbonu etọn lẹ po gblamẹ, mí nọ mọ nuflinmẹ owanyinọ lẹ yí, ehe nọ basi hihọ́na mí. Lẹnnupọndo lehe enẹ ko hẹn ale wá na mí to agọe do ji. Dile aihọn ehe to yinylan dogọ to zanhẹmẹ, ahànnunu po yẹdide fẹnnuwiwa tọn lẹ po mẹ, Jehovah ko wleawu nuflinmẹ he wá do gànmẹ lẹ tọn na mí, na mí nido sọgan nọ nukle sọta nuhe na hẹn walọ dagbe mítọn gble lẹ. Di dohia, mí nọ mọ ayinamẹ yí sọn Otọ́ mítọn olọn mẹ tọn dè nado dapana gbẹdido ylankan lẹ to Intẹnẹt ji. a—1 Kọl. 15:33.
20. Hihọ́-basinamẹ po anademẹ tẹlẹ po wẹ mí nọ mọyi to agun Klistiani tọn mẹ?
20 Nawẹ mí sọgan dohia gbọn dọ mí nọ yin “pinplọn sọn OKLUNỌ dè” nugbonugbo? Gbọn tonusisena gbedide etọn lẹ po sọwhiwhe po dali. (Isa. 54:13) Agun mítọn lẹ yin nọtẹn hihọ́ tọn de, fie mí nọ mọ anademẹ po hihọ́ he mí tindo nuhudo etọn lẹ po te, na finẹ wẹ sunnu nugbonọ he to sinsẹ̀n taidi mẹho lẹ nọ na mí ayinamẹ sinai do Owe-wiwe ji lẹ te. (Gal. 6:1) Jehovah nọ saba yí ‘sunnu he yin ninamẹ di nunina lẹ’ zan nado penukundo mí go po owanyi po. (Efe. 4:7, 8) Enẹwutu, nawẹ mí dona yinuwa gbọn? Mí dona litai sọn ojlo mẹ wá bo setonu; eyin mí wàmọ, Jiwheyẹwhe na dona mí.—Heb. 13:17.
21. (a) Etẹwẹ mí dona magbe nado wà? (b) Etẹ ji wẹ mí na dọhodo to hosọ he bọdego mẹ?
21 Mì gbọ mí ni nọ na dotẹnmẹ gbigbọ wiwe nado deanana mí bo gbọnmọ dali kẹalọyi anademẹ Otọ́ olọn mẹ tọn mítọn. Mí sọ dona lẹnayihamẹpọn do gbẹzan Visunnu etọn, Jesu Klisti tọn ji, bo dovivẹnu nado hodo apajlẹ vonọtaun etọn. Na Jesu setonu kakajẹ kúdonu wutu, e mọ ahọsumẹ daho de yí. (Flp. 2:5-11) Taidi ewọ, mí na mọ dona lẹ yí na mí dejido Jehovah go sọn ahun mẹ wá wutu. (Howh. 3:5, 6) Enẹwutu, mì gbọ mí ni magbe nado nọ lẹhlan Jehovah dè to whepoponu taidi Awuwledainanutọ podọ Hihọ́-basinamẹtọ mítọn he nkọ ma pé awe lọ. Lẹblanulọkẹyi daho wẹ e yin nado sẹ̀n ewọ po ayajẹ po! Owanyi he mí tindo na ẹn na jideji eyin mí gbadopọnna adà atọ̀ntọ he mẹ Otọ́ mítọn nọ hò mítọn pọ́n te, enẹ wẹ lehe e nọ jihọntọn hẹ mí do. Hosọ he bọdego na dọhodo lehe Jehovah yin Họntọn dagbe hugan mítọn do ji.
a Apajlẹ nuflinmẹ enẹlẹ tọn sọgan yin mimọ to hosọ he bọdego ehelẹ mẹ, “Intẹnẹt—Nọ Yí I Zan po Nuyọnẹn Po” to Atọ̀họ̀-Nuhihọ́ lọ Tọn 15 août 2011, weda 3-5 gọna “Họ́ Dewe Sọta Omọ̀ Lẹgba Tọn Lẹ!” po “Nọte Gligli bo Dapana Omọ̀ Satani Tọn Lẹ!” po to Atọ̀họ̀-Nuhihọ́ lọ Tọn 15 août 2012 weda 20-29.
