1, 2. Edena dala ai eda famili edia noho dalana be idauidau? Edena dala idauidau ai hereva momokani ita abia?

 RUMA BESE be Iehova ese ia havaraia. (Efe. 3:14, 15) To, famili ta ta edia noho daladia be idauidau. Reana oi be maragi negana amo emu tama sina ida oi noho ela bona oi bada. Ma haida be edia tama sina be gorere, aksiden, o hekwakwanai ta dainai idia mase. Bona ma haida be edia tama sina idia diba lasi.

² Unai hegeregerena, ena be ita ibounai be ruma bese tamona bamona Iehova ita tomadiho henia, to hereva momokani ita abia daladia be idauidau. Reana oi be hereva momokani lalonai oi tubu daekau, bona emu tama sina ese Baibel ena hakaua herevadia be oi dekenai idia hadibaia. (Deu. 6:6, 7) Eiava taunimanima tausen haida hegeregerena, oi danu be Iehova ena hesiai taudia ma haida edia haroro gaukara amo hereva momokani oi dibaia.—Roma 10:13-15; 1 Tim. 2:3, 4.

3. Edena dala haida ai ita ibounai be hegeregere?

³ Ena be eda mauri daladia be idauidau, to dala haida ai ita ibounai be hegeregere. Adamu ena gwau-edeede dainai ita ibounai  be goevadae lasi, mai eda kara dika bona ita mase. (Roma 5:12) To ita, Iehova ita tomadiho henia taudia ese Ia ita gwauraia diba, iseda “Tamana.” Isaia 64:8 ai Israela taudia idia gwau: “Lohiabada e, oi be aiemai Tamana.” Danu, Iesu ese ena hahediba taudia ia hadibaia guriguri be inai bamona ia hamatamaia: “Aiemai Tamana e, guba dekenai oi noho, namona be ibounai ese oiemu ladana do idia hahelagaia.”—Mat. 6:9.

4, 5. Iseda guba Tamana, Iehova dekenai eda lalokau ita habadaia totona, dahaka do ita stadilaia?

⁴ Iseda guba Tamana ese ita ia naria bona gimaia, badina ita be mai abidadama ida ena ladana dekenai ita boiboi. Salamo torea tauna be Iehova ena hereva ia gwauraia, ia gwau: “Ia ese lau ia lalokau henia dainai, lau ese do lau hamauria; lau ese ia do lau gimaia, badina lauegu ladana ia diba.” (Sal. 91:14, BHḡ) Oibe, Iehova Dirava ese mai lalokau ida iseda inai taudia amo ita ia hamauria bona gimaia, unai amo ita do idia hadikaia ore lasi.

⁵ Iseda guba Tamana dekenai eda lalokau ita habadaia totona, inai mai anina bada point toi do ita stadilaia: (1) Ia be iseda Hariharibada Tauna, (2) Gimaia Tauna, bona (3) Turana namona. Unai point toi ita herevalaia neganai, namona be iseda hetura karana Dirava ida ita laloa dobu bona iseda Tamana bamona do ita matauraia daladia ita laloa. Danu, Iehova ese ia kahirakahira idia lao taudia dekenai ia henia hahenamo ita lalodia be namo.—Iam. 4:8.

6. Edena dala ta ai Iehova ia hahedinaraia, ia be “harihari gaudia namodia ibounai” ia Henia Tauna?

⁶ Hahediba tauna Iamesi, ia gwau: “Harihari gaudia namodia ibounai bona harihari gaudia hereadaedia ibounai be atai amo, badina idia be guba diaridia edia Tamana amo idia diho mai.” (Iam. 1:17) Mauri be Iehova ena harihari gauna hereadaena ta. (Sal. 36:9) Bema eda mauri lalonai Iehova ena ura ita karaia, hari hahenamo momo do ita davaria bona tanobada matamatana ai mauri hanaihanai do ita abia. (Aon. 10:22; 2 Pet. 3:13) To, edena dala ai unai do ia vara, badina ita ibounai be Adamu dainai ita goevadae lasi, mai eda kara dika bona ita mase?

7. Edena dala ai Iehova ese dala ia kehoa ia ita tura henia totona?

⁷ Iehova ese dala idauidau ai ia hahedinaraia ia be iseda Hariharibada Tauna Badana. Hegeregere, ena hebogahisi hereadaena dainai ita ia hamauria. Oibe, ita ibounai be Adamu amo ita mai dainai, ita be goevadae lasi bona mai eda kara dika. (Roma 3:23) To, Iehova ese ita ia lalokau henia dainai, dala ia kehoa ita ese ia ita tura henia totona. Aposetolo Ioane ia gwau: “Dirava ena lalokau ita dekenai be inai dala ai ia hahedinaraia, Dirava ese ena Natuna korikorina be tanobada dekenai ia siaia mai, ia amo mauri do ita abia totona. Lalokau ena anina be inai, ita ese Dirava ita lalokau henia dainai lasi, to ia ese ita ia lalokau henia bona ena Natuna ia siaia iseda kara dika ia koua boubouna ia henia totona, unai amo ita bona Dirava huanai maino ia karaia.”—1 Ioa. 4:9, 10.

8, 9. Aberahamo bona Isako edia negai, edena dala ai Iehova ese ia hahedinaraia ia be Hariharibada Tauna Badana? (Laulau ginigunana itaia.)

⁸ Lagani 1,900 gunanai, Iesu ia do vara lasi neganai, Aberahamo ena mauri lalonai ia vara gauna ta ese ia hamomokania, Iehova be mai lalokau ida Ia idia badinaia taudia ibounai dekenai mauri hanaihanai do ia henia. Heberu 11:17-19 ia gwau: “Aberahamo ia abidadama dainai, hahetoho ia davaria neganai, Isako be boubou gauna bamona ia halaoa, oibe, mai moale ida unai gwauhamata ia abia tauna be ia hegaegae, ena natuna tamona sibona ia bouboulaia totona, ena be ia dekenai inai hereva idia gwauraia: ‘Inai tauna do idia gwauraia oiemu garana ia be Isako amo do ia vara.’ To Aberahamo ia laloa Dirava ese mase amo danu Isako ia hatorea isi lou diba, bona iena natuna be  mase amo ia abia lou, bona unai be gau ta ia laulaulaia.” Aberahamo ia ura ena natuna Isako ia bouboulaia hegeregerena, Iehova danu be mai ena ura ida ena Natuna, Iesu Keriso ia henia taunimanima ia hamauria totona.—Ioane 3:16, 36 duahia.

⁹ Isako ia laloparara ia be do ia mase lasi neganai, ia moale! Danu, ia moale badina Dirava ese mamoe ta ia henia, idia bouboulaia totona. (Gen. 22:10-13) Unai dainai, Aberahamo ese unai gabu ena ladana ia gwauraia, “Iehova-ire.” Heberu ai ena anina be, “Lohiabada ese Ia Henia.”—Gen. 22:14, BHḡ.

10, 11. “Maino ena hesiai gaukara” be daidia ese idia gunalaia, bona edena dala ai idia karaia?

¹⁰ Iehova ena hariharibada karana ita laloa dobu neganai, do ita laloparara Iesu ena boubou gauna ese dala ia kehoa Dirava ita tura henia totona. Paulo ia gwau: “Hari ai diba momokani, tau tamona be taunimanima ibounai dainai ia mase, badina taunimanima ibounai be idia mase vadaeni. Oibe, ia be taunimanima ibounai dainai ia mase, unai amo idia mauri taudia be sibona totona do idia mauri lasi, to idia dainai ia mase bona ia toreisi lou tauna totona do idia mauri.”—2 Kor. 5:14, 15.

¹¹ Aposetolo edia negai, Keristani taudia be Dirava idia lalokau henia bona idia hesiai henia ena hahenamo idia laloa bada dainai, mai moale ida “maino ena hesiai gaukara” idia abia dae. Edia haroro gaukara bona hahediba taudia halaoa gaukarana ese dala ia kehoa, kudou-maoro taudia be Dirava ida maino do idia karaia, ena turana ai idia lao, bena gabeai iena guba natudia ai do idia lao. Hari iseda negai, horoa taudia danu be unai gaukara tamona idia karaia. Idia be Dirava bona Keriso edia hereva gwauraia taudia. Edia haroro gaukara amo Iehova ese kara maoromaoro bona manau taudia ia veria mai, ena hesiai taudia ai idia lao totona.—2 Korinto 5:18-20 duahia; Ioa. 6:44; Kara 13:48.

12, 13. Edena dala ai ita hahedinaraia diba Iehova ese ia henia harihari gaudia ita laloa bada?

¹² Tanobada helarona idia abia taudia be Iehova, Hariharibada Tauna Badana, dekenai edia lalokau idia hahedinaraia totona, horoa taudia ida haroro gaukara idia karaia. Unai gaukara lalonai ita ese Baibel ita gaukaralaia, ia be Dirava ena harihari gauna hereadaena ma ta. (2 Tim. 3:16, 17) Baibel ita gaukaralaia namonamo neganai, ma haida ita durua mauri hanaihanai idia abia totona. Unai gaukara ita karaia namonamo totona, Iehova ese harihari gauna ma ta ia henia—iena lauma helaga. (Sek. 4:6; Luka 11:13) Yearbook ai idia torea sivaraidia ese idia hahedinaraia, haroro gaukara ese anina namona ia havaraia noho. Ita moale bada badina, unai gaukara amo iseda Tamana bona Hariharibada Tauna ita hanamoa!

¹³ Dirava ese ita totona ia karaia gaudia ita laloa neganai, namona be sibona ita nanadaia: ‘Iehova ese ia henia harihari gaudia lau laloa bada dainai, haroro gaukara lau goadalaia, a? Edena dala ai egu haroro dalana lau hanamoa diba?’ Bema Dirava ese ita dekenai ia henia gaudia ita laloa bada, eda mauri lalonai Basileia gaudia do ita atoa guna. Bema unai bamona ita karaia, Iehova ese iseda dabu gaudia do ia henia. (Mat. 6:25-33) Dirava be mai lalokau ida ita ia naria dainai, ita ura ena kudouna ia hamoalea karadia do ita karaia.—Aon. 27:11.

14. Edena dala ai Iehova be ena taunimanima edia Hamauria Tauna ai ia lao?

¹⁴ Salamo torea tauna, Davida ia gwau: “Lohiabada e, lau be lau ogogami bona manoka, to oi ese lau oi laloaboio lasi. Oi be lauegu hamauria Tauna bona lauegu Dirava.” (Sal. 40:17) Nega momo Iehova ena taunimanima be edia inai taudia ese idia dagedage henia. To, Iehova be edia Hamauria Tauna ai ia lao. Iehova ita tanikiu henia, badina nega aukadia ai ita gini goada totona, hanaihanai ia ese heduru gaudia ia henia!

15. Tama ta ese ena natuna ia gimaia ena sivarai mani oi gwauraia.

¹⁵ Tama lalokauna ta be ena natudia edia dabu gaudia ia henia sibona lasi, to ia gimadia danu. Bema kahirakahira dika idia davaria, karaharaga idia do ia gimaia. Tadikaka ta be ia maragi neganai, ena tamana ese ia gimaia dalana ia laloatao. Ia bona ena tamana be haroro gaukara murinai ruma dekenai idia giroa lou lalonai, sinavai ta dekenai idia ginidae. Dabai medu bada ia diho dainai, sinavai be ia abata. Sinavai idia hanaia dala tamona be, nadi badana ta amo do idia roho hanai nadi ma ta dekenai. Tadikaka be vairana ai ia raka, to ia dedi bena sinavai lalonai ia moru bona nega rua ranu lalonai ia diho. Ia moale bada badina ena tamana ese karaharaga ia veria dae, unai amo ia maloa lasi. Unai hegeregerena, iseda guba Tamana ese inai tanobada dikana bona ena lohia tauna Satani amo ita ia gimaia. Oibe, Iehova be iseda Gimaia Tauna hereadaena.—Mat. 6:13; 1 Ioa. 5:19.

16, 17. Israela taudia be Amaleka taudia idia tuari henia neganai, edena dala ai Iehova ese idia ia durua bona gimaia?

¹⁶ Lagani 1513 B.C.E. ai, Iehova ese mai lalokau ida ena taunimanima ia gimaia. Aigupito ena igui hesiai amo idia ia hamauria bona Davara Kakakakana amo idia hanaia neganai, idia ia gimaia. Sinai Ororo dekenai idia lao totona tano gagaena idia raka hanaia bona Repidima dekenai idia ginidae.

¹⁷ Genese 3:15 ena peroveta herevana hegeregerena, Satani ia ura dikadika Israela taudia do ia hadikaia, badina toana be idia be goada lasi. Unai ia karaia totona, ia ese Amaleka taudia ia gaukaralaia. Idia be Dirava ena taunimanima idia inai henia taudia. (Num. 24:20) Iehova ese abidadama taudia, Iosua, Mose, Arona, bona Huru ia gaukaralaia ena taunimanima ia gimaia totona. Iosua ese Amaleka taudia ia  tuari henia neganai, Mose, Arona bona Huru be kahirakahira ia noho ororona ta ataiai idia noho. Mose ese iena imana ruaosi ia abia isi neganai, Israela taudia idia kwalimu. To, ena imana ia atoa diho neganai, Arona bona Huru ese ena imana idia abia isi. Oibe, Iehova ena heduru bona gimaia karana dainai, “Iosua ese Amaleka taudia ia halusia momokani.” (Eso. 17:8-13) Unuseniai, Mose ese boubou patana ta ia haginia bona ena ladana ia gwauraia, “Iehova-nisi.” Heberu gado ai ena anina be, “Lohiabada be lauegu pepe.”—Esodo 17:14, 15 duahia.

18, 19. Iseda nega ai, Iehova ese edena dala ai ena hesiai taudia ia gimaia?

¹⁸ Iehova be ia idia lalokau henia bona badinaia taudia ia gimaia. Repidima ai idia noho Israela taudia bamona, Iehova ese eda inai taudia amo ita ia gimaia totona, namona be ia dekenai ita tabekau. Nega momo Iehova ese ena orea taudia ia gimaia, bona Satani ena tarapu amo ia gimaia. Hegeregere, iseda tadikaka be edia gini siri karana dainai dagedage idia davaria neganai, nega momo Dirava ese idia ia gimaia. Lagani 1930 bona 1940 lalodiai, Nazi gavamani be Germany bona tano ma haida ia biagua neganai, Iehova ese ena taunimanima ia gimaia. Mauri sivaraidia bona Yearbook lalodiai, Dirava ese ena taunimanima be dagedage amo ia gimadia ena ekspiriens ita duahia bona laloa dobu neganai, iseda abidadama Iehova, eda Gimaia Tauna, dekenai ia goada.—Sal. 91:2.

¹⁹ Iehova ese ita ia gimaia totona, ena orea bona ia halasia pablikeisen idauidau amo hakaua herevadia ia henia. Mani ita itaia vanegai laganidia lalonai, edena dala ai unai bamona heduru ita abia. Tanobada taudia be matabodaga, inuinu kekero bona ponografi itaia karana idia ura henia bada. Unai dainai, Iehova ese ita dekenai hakaua herevadia ia henia, unai amo gau ta ese eda hetura karana ia ida do ia hadikaia lasi. Hegeregere, eda guba Tamana amo sisiba namona ita abia, social networking web sait idauidau ai hebamo dikadia ita dadaraia totona. a—1 Kor. 15:33.

20. Kongrigeisen lalonai edena gimaia bona hakaua daladia idia noho?

²⁰ Edena dala ai ita hahedinaraia ita be Iehova ese ia “hadibaia” bona ena sisiba ita abia dae? Namona be ena oda herevadia do ita badinaia. (Isa. 54:13) Kongrigeisen be ita ia gimaia bona hakaua gabuna namona. Badina unuseniai elda ese Baibel amo ita idia durua bona sisiba henia. (Gal. 6:1) Iehova ese iena “harihari gaudia” o elda taudia ia gaukaralaia, mai lalokau ida ita idia naria totona. (Efe. 4:7, 8) Edia sisiba be edena bamona do ita laloa? Namona be mai ura ida ita badinaia, unai amo Dirava ese ita do ia hanamoa.—Heb. 13:17.

21. (a) Namona be eda lalona ita hadaia dahaka ita karaia totona? (b) Stadi gabena ai dahaka do ita herevalaia?

²¹ Namona be eda lalona do ita hadaia, lauma helaga ese ita do ia hakaua bona eda guba Tamana ena sisiba do ita abia dae. Danu, namona be iena Natuna, Iesu Keriso ena mauri dalana do ita laloa dobu, bona ita hekwarahi iena haheitalai do ita tohotohoa. Ia ese “kamonai karana ia hahedinaraia ela bona mase,” unai dainai Dirava ese ia dekenai dagi hereadaena ia henia. (Fili. 2:5-11) Bema mai eda kudouna ibounai ida Iehova ita abidadama henia, Ia ese ita do ia hanamoa danu. (Aon. 3:5, 6) Unai dainai, namona be hanaihanai Iehova, iseda Hariharibada bona Gimaia Tauna dekenai ita tabekau. Ia ita hesiai henia be hahenamo badana! To, edena dala ai Iehova be iseda Turana namona? Stadi gabena ai unai henanadai do ita haerelaia, bona unai ese eda lalokau Iehova dekenai do ia habadaia.