1, 2. X’differenzi għandna fiċ-ċirkustanzi tal-familja u fil-mod kif ħadna l-verità?

ĠEĦOVA ħalaq l-arranġament tal-familja. (Efes. 3:14, 15) Madankollu, anki jekk niġu mill-istess familja, ilkoll għandna personalitajiet u ċirkustanzi differenti. Xi wħud trabbew mal-ġenituri tagħhom. Oħrajn għandu mnejn tilfu fil-mewt lill-ġenituri tagħhom, forsi minħabba xi marda, xi aċċident, jew xi traġedja oħra. Jerġaʼ oħrajn lanqas biss jafu min huma l-ġenituri tagħhom.

² Ilkoll kemm aħna membri tal-familja t’aduraturi taʼ Ġeħova u ħadna l-verità b’modi differenti. Forsi, bħalma jgħidu xi wħud, int ‘trabbejt fil-verità,’ u l-ġenituri tiegħek daħħlu sew f’qalbek prinċipji divini. (Dt. 6:6, 7) Jew forsi int wieħed mill-eluf li tgħallmu l-verità permezz tax-xogħol tal-ippritkar taʼ qaddejja oħra taʼ Ġeħova.—Rum. 10:13-15; 1 Tim. 2:3, 4.

3. X’hemm komuni bejnietna lkoll?

³ Minkejja l-fatturi li għadna kif semmejna, ilkoll kemm aħna għandna xi ħaġa komuni bejnietna. Insofru l-konsegwenzi tad-diżubbidjenza t’Adam u wrietna l-imperfezzjoni, id-dnub, u l-mewt. (Rum. 5:12) Xorta waħda, bħala aduraturi  veri, nistgħu nsejħu lil Ġeħova “Missierna.” Fi żmien il-qedem, il-poplu magħżul taʼ Ġeħova setaʼ jgħid il-kliem imniżżel f’Isaija 64:8: “O Ġeħova, int Missierna.” Iktar minn hekk, Ġesù fetaħ it-talba mudell tiegħu bil-kliem: “Missierna fis-smewwiet, ħa jitqaddes ismek.”—Mt. 6:9.

4, 5. Sabiex inkabbru l-apprezzament lejn Missierna tas-sema, Ġeħova, x’se niddiskutu?

⁴ Missierna tas-sema jara li jieħu ħsiebna u jipproteġina bħala l-familja t’aduraturi veri tiegħu. Is-salmista jikkwotah bħala li qal: “Talli [aduratur veru] wrieni l-affezzjoni tiegħu, jien neħilsu. Nipproteġih għax sar jaf ismi.” (Salm 91:14) Iva, Alla Ġeħova bi mħabba jħarrabna mill-għedewwa tagħna u jipproteġina bħala l-poplu tiegħu, ħalli ma ninqerdux.

⁵ Sabiex inkabbru l-apprezzament tagħna lejn Missierna tas-sema, ħalli nikkunsidraw tliet fatturi importanti: (1) Missierna hu Dak li jipprovdilna. (2) Ġeħova hu Dak li jipproteġina. (3) U Alla hu l-aqwa Ħabib tagħna. Hekk kif nikkunsidraw dawn il-punti, ikun t’għajnuna li nimmeditaw fuq ir-relazzjoni li għandna m’Alla u nitgħallmu kif nistgħu nonorawh bħala Missierna. Ikun taʼ benefiċċju wkoll li nirriflettu fuq il-barkiet li Ġeħova joffri lil dawk li jersqu qrib lejh.—Ġak. 4:8.

6. X’inhu mod wieħed kif Ġeħova juri li hu Dak li jagħti “kull għotja tajba”?

⁶ “Kull għotja tajba u kull rigal perfett ġej minn fuq,” kiteb id-dixxiplu Ġakbu, “għax jinżel mingħand il-Missier tad-dwal tas-sema.” (Ġak. 1:17) Il-ħajja fiha nfisha hi għotja meraviljuża mingħand Ġeħova. (Salm 36:9) Jekk nużaw ħajjitna biex nagħmlu r-rieda t’Alla, se nesperjenzaw abbundanza taʼ barkiet issa u jkollna l-prospett taʼ ħajja taʼ dejjem fid-dinja l-ġdida. (Prov. 10:22; 2 Pt. 3:13) Imma dan kif inhu possibbli ladarba kulħadd wiret l-imperfezzjoni, id-dnub, u l-mewt mingħand Adam?

7. Alla kif fetħilna t-triq ħalli jkollna relazzjoni mill-qrib miegħu?

⁷ Ġeħova hu Dak li jipprovdi bil-kbir b’aktar modi milli nistgħu nimmaġinaw. Perkażu, il-qalb tajba mhix mistħoqqa tiegħu tqanqlu jsalvana. Iva, ilkoll kemm aħna midinbin u wrietna l-imperfezzjoni mingħand Adam. (Rum. 3:23) Minkejja dan, sforz l-imħabba, Ġeħova ħa l-inizjattiva biex jiftħilna t-triq ħalli jkollna relazzjoni mill-qrib miegħu. “B’dan intweriet l-imħabba t’Alla għalina,” kiteb l-appostlu Ġwanni, “għax Alla bagħat lill-Iben uniġenitu tiegħu fid-dinja biex niksbu l-ħajja permezz tiegħu. L-imħabba qiegħda f’dan: li mhux aħna ħabbejna lil Alla, imma hu ħabbna u bagħat lil Ibnu bħala sagrifiċċju propizjatorju għal dnubietna.”—1 Ġw. 4:9, 10.

8, 9. Ġeħova kif wera li hu Dak li jipprovdi bil-kbir fi żmien Abraham u Iżakk? (Ara l-ewwel stampa.)

⁸ Fis-seklu 19 QEK, ġrajja fil-ħajja t’Abraham uriet kif Ġeħova bi mħabba kien se jagħti l-ħajja taʼ dejjem lin-nies ubbidjenti kollha. Ebrej 11:17-19 jispjega: “Bil-fidi Abraham, meta ġie provat, kważi offra lil Iżakk, u r-raġel li bil-ferħ kien irċieva l-wegħdi pprova joffri lill-iben uniġenitu tiegħu, għalkemm kien intqallu: ‘Dak li jissejjaħ “nislek” ikun permezz taʼ Iżakk.’ Imma qies li Alla setaʼ jqajmu saħansitra mill-imwiet; u minn hemm irċivieh ukoll bħala tixbiha.” Mhuwiex diffiċli biex tara x-xebh. Ġeħova offra lil Ibnu, Ġesù Kristu, għall-benefiċċju tal-umanità.—Aqra Ġwanni 3:16, 36.

⁹ Tistaʼ timmaġina kemm Iżakk ħa r-ruħ meta rrealizza li ma kellux għalfejn  imut? Bla dubju kien grat għall-provvediment t’Alla li ħa post is-sagrifiċċju—muntun maqbud fil-friegħi tas-siġar li kienu fil-qrib. (Ġen. 22:10-13) Mhux taʼ b’xejn li dak il-post ġie msejjaħ “Ġeħova-jire,” li jfisser “Ġeħova Jipprovdi.”—Ġen. 22:14; ntt.

10, 11. Min ħa t-tmexxija fil-“ministeru tar-rikonċiljazzjoni,” u kif għamluh dan?

¹⁰ Hekk kif nimmeditaw dwar kif Ġeħova juri li hu Dak li jipprovdi bil-kbir, aħna nirrealizzaw li mingħajr is-sagrifiċċju taʼ Ġesù ma nkunux nistgħu nsiru ħbieb t’Alla. Pawlu kiteb: “Dan iġġudikajna, li bniedem wieħed miet għal kulħadd; mela, allura, kollha mietu; u miet għal kulħadd biex dawk li jgħixu ma jgħixux iktar għalihom infushom, imma għal dak li miet għalihom u ġie mqajjem.”—2 Kor. 5:14, 15.

¹¹ Minħabba l-imħabba tal-Kristjani tal-bidu għal Alla u l-gratitudni għall-privileġġ li ma jitqabbel maʼ xejn taʼ li jaqduh, huma b’ferħ aċċettaw “il-ministeru tar-rikonċiljazzjoni.” Ix-xogħol tagħhom tal-ippritkar u taʼ li jagħmlu dixxipli fetaħ it-triq għal uħud b’qalb onesta biex jiksbu l-paċi m’Alla, jieħdu pjaċir bil-ħbiberija tiegħu, u eventwalment isiru wliedu spiritwali. Illum, il-qaddejja midluka taʼ Ġeħova jwettqu l-istess ministeru. Huma jaqdu bħala ambaxxaturi għal Alla u għal Kristu. Ix-xogħol tal-ippritkar tagħhom jagħmilha possibbli għal uħud onesti u umli biex jinġibdu minn Ġeħova u jsiru l-qaddejja tiegħu.—Aqra t-2 Korintin 5:18-20; Ġw. 6:44; Atti 13:48.

12, 13. Kif nistgħu nuru li napprezzaw il-ħafna provvedimenti taʼ Ġeħova?

¹² Sforz l-apprezzament tagħhom għal Ġeħova bħala Dak li jipprovdi bil-kbir, il-Kristjani kollha li għandhom it-tama għall-art jieħdu sehem mal-midlukin fix-xogħol tax-xandir tas-Saltna. F’din l-attività nużaw il-Bibbja, u din hi għotja oħra mill-isbaħ t’Alla. (2 Tim. 3:16, 17) Meta nużaw tajjeb il-Bibbja fil-ministeru tagħna, aħna nagħtu opportunitajiet lil oħrajn biex jiksbu l-ħajja taʼ dejjem. Biex jgħinna f’dan ix-xogħol, kull wieħed minna jistrieħ fuq l-ispirtu qaddis, xi ħaġ’oħra li tana Ġeħova. (Żak. 4:6; Lq. 11:13) Ir-riżultati huma impressjonanti, bħalma jidher f’kull edizzjoni tal-ktieb Yearbook of Jehovah’s Witnesses. X’unur dan li nieħdu sehem f’dan ix-xogħol biex infaħħru lil Missierna, Dak li jipprovdilna!

¹³ Ladarba Alla pprovdielna ħafna, għandna nistaqsu lilna nfusna: ‘Qed nagħmel l-aħjar li nistaʼ fil-ministeru tiegħi biex nuri kemm jien grat għal kulma tani Ġeħova? B’liema mod nistaʼ nitjieb u nkun iktar effettiv fl-ippritkar tal-aħbar tajba?’ Aħna nistgħu nuru l-gratitudni tagħna għall-provvedimenti meraviljużi t’Alla billi nżommu l-interessi tas-Saltna l-ewwel f’ħajjitna. Meta nagħmlu hekk, Ġeħova jagħmel ċert li dejjem ikollna kulma neħtieġu. (Mt. 6:25-33) Minħabba li Ġeħova jħobbna, aħna żgur li rridu nagħmlu dak kollu li nistgħu biex nogħġbuh u nferrħulu qalbu.—Prov. 27:11.

14. Ġeħova kif kien Dak li jħarrab lill-poplu tiegħu?

¹⁴ Is-salmista David kanta: “Jien qed insofri u fqir. Ġeħova jagħti kasi. Int l-għajnuna tiegħi u Dak li jħarrabni.” (Salm 40:17) Ġeħova kemm-il darba kien Dak li jħarrab lill-poplu tiegħu bħala grupp, speċjalment meta ġew ippersegwitati bl-ikrah u meta l-għedewwa tagħhom ħaduha qatta bla ħabel kontrihom. Kemm aħna grati għall-għajnuna t’Alla għal drabi bħal dawn u għall-ħafna provvedimenti spiritwali li l-ħin kollu jagħtina!

15. Agħti eżempju taʼ kif missier li jħobb ipproteġa lil ibnu.

¹⁵ Missier li jħobb, mhux biss jipprovdi għal uliedu, imma wkoll jara li jipproteġihom. B’mod immedjat, hu jipprova jsalvahom jekk ikunu fil-periklu. Ħu jiftakar kif missieru kien ipproteġieh meta kien għadu daqsxejn taʼ tifel. Hu u missieru kienu sejrin lura d-dar mill-ministeru u kellhom jaqsmu nixxiegħa. Dakinhar filgħodu, xita qalila ġiegħlet lin-nixxiegħa tfur. L-uniku mod biex jaqsmu għan-naħa l-oħra kien billi jaqbżu minn ġebla kbira għal oħra. It-tifel li kien quddiem missieru tilef il-bilanċ, waqaʼ fin-nixxiegħa, u spiċċa taħt l-ilma darbtejn. Il-tifel kien grat ħafna meta minnufih il-missier qabdu minn spalltu u salvah milli jegħreq. B’mod simili, Missierna tas-sema jipproteġina mill-periklu taʼ din id-dinja mill-agħar u mill-ħakkiem tagħha, Satana. Bla dubju, Ġeħova hu l-aqwa Protettur li qatt jistaʼ jkollna.—Mt. 6:13; 1 Ġw. 5:19.

16, 17. Ġeħova kif għen u pproteġa lill-Iżraelin meta ġġieldu kontra l-Għamalekin?

¹⁶ Bi mħabba, Ġeħova pproteġa lill-poplu tiegħu fis-sena 1513 QEK. Kien diġà salva lill-Iżraelin mill-jasar u kien ipproteġiehom huma u jaqsmu l-Baħar l-Aħmar. Wara li mxew mill-art xagħrija lejn il-Muntanja Sinaj, l-Iżraelin waslu Refidim.

¹⁷ Minħabba l-profezija taʼ Ġenesi 3:15, jistaʼ jkun li Satana kien iddisprat biex jattakka lill-Iżraelin, li donnhom kienu bla protezzjoni. Hu għamel dan billi uża lil Għamalekin, li kienu għedewwa tal-poplu t’Alla. (Num. 24:20) Ikkunsidra dak li wettaq Ġeħova permezz taʼ erbaʼ rġiel leali—Ġożwè, Mosè, Aron, u Ħur. Hekk kif Ġożwè ġġieled kontra l-Għamalekin, fuq għolja fil-viċin kien  hemm Mosè, Aron, u Ħur. L-Iżraelin kienu jkunu minn fuq fil-battalja meta Mosè għolla jdejh. Meta Mosè għejja b’idejh ’il fuq, Aron u Ħur għenuh billi żammewlu jdejh ’il fuq. Għalhekk, bl-għajnuna u l-protezzjoni taʼ Ġeħova, “Ġożwè għeleb għalkollox lil Għamalek u lill-poplu tiegħu.” (Eżo. 17:8-13) Mosè bena artal hemm u semmih “Ġeħova-nissi,” li jfisser “Ġeħova Hu s-Sinjal [l-Arblu] Tiegħi.”—Aqra Eżodu 17:14, 15; ntt.

18, 19. Liema protezzjoni pprovda Alla għall-qaddejja tiegħu fi żmienna?

¹⁸ Ġeħova jipproteġi lil dawk li jħobbuh u jobduh. Bħall-Iżraelin f’Refidim, aħna nfittxu ’l Alla għas-sigurtà meta nħabbtu wiċċna mal-għedewwa. Ġeħova spiss ipproteġiena bħala grupp, u jipproteġina mill-attakki tax-Xitan. Ftakar fil-ħafna okkażjonijiet meta Alla pproteġa ’l ħutna li kienu qed iżommu n-newtralità Kristjana. Pereżempju, dan kien minnu matul iż-żmien tan-Nazi fil-Ġermanja u f’pajjiżi oħra fis-snin 30 u fil-bidu tas-snin 40. Fil-bijografiji u fil-Yearbooks insibu rakkonti taʼ kif Alla pproteġina fi żminijiet taʼ persekuzzjoni. Meta naqraw dawn u nirriflettu fuqhom, il-fiduċja tagħna f’Ġeħova bħala r-refuġju tagħna se tissaħħaħ.—Salm 91:2.

¹⁹ Permezz tal-organizzazzjoni taʼ Ġeħova u l-pubblikazzjonijiet tagħha, aħna nirċievu tfakkiriet bi mħabba għall-protezzjoni tagħna. Ikkunsidra kif dan kien taʼ benefiċċju fiż-żminijiet reċenti. Id-dinja qed tkompli ssir iktar u iktar ossessjonata bis-sess, l-alkoħol, u l-pornografija. Imma Ġeħova tana tfakkiriet urġenti u għajnuna speċifika biex jipproteġina milli nagħmlu affarijiet li jistgħu jeffettwaw ħażin ir-relazzjoni li għandna miegħu. Pereżempju, dan l-aħħar irċivejna pariri minn Missierna tas-sema biex nevitaw sħubija ħażina permezz tal-użu ħażin tan-netwerks soċjali. *—1 Kor. 15:33.

20. Liema protezzjoni u gwida huma pprovduti permezz tal-kongregazzjoni Kristjana?

²⁰ Kif nistgħu nuru li aħna verament qed niġu “mgħallmin minn Ġeħova”? Billi b’attenzjoni nagħtu kas il-kmandi tiegħu. (Is. 54:13) Fir-refuġju tal-kongregazzjonijiet tagħna, aħna nsibu gwida u protezzjoni, għax hu hemm li rġiel leali li jaqdu bħala anzjani jipprovdu għajnuna u pariri Skritturali. (Gal. 6:1) Ġeħova qed juża lil dawn l-“irġiel bħala għotjiet” biex jieħdu ħsiebna bi mħabba. (Efes. 4:7, 8) Kif għandna nirreaġixxu? Sottomissjoni u ubbidjenza minn rajna jirriżultaw f’li jkollna l-barka t’Alla.—Ebr. 13:17.

21. (a) Għandna nkunu determinati li nagħmlu xiex? (b) X’se jiġi kkunsidrat fl-artiklu li jmiss?

²¹ Ejja nkunu determinati li nitmexxew mill-ispirtu qaddis, u b’hekk naċċettaw il-gwida taʼ Missierna tas-sema. Aħna għandna bżonn ukoll nimmeditaw fuq il-ħajja taʼ Ibnu, Ġesù Kristu. Imbagħad nagħmlu ħilitna sabiex insegwu l-eżempju li jispikka tiegħu. Hu rċieva premju kbir talli kien “ubbidjenti sal-mewt.” (Flp. 2:5-11) Bħalu, aħna nkunu mberkin talli nafdaw f’Ġeħova b’qalbna kollha. (Prov. 3:5, 6) Allura, jalla dejjem nistrieħu fuq Ġeħova, l-aqwa wieħed li jipprovdilna u jipproteġina. X’ferħ u xi privileġġ kbir hu li naqduh! L-imħabba tagħna għalih tikber hekk kif nirriflettu fuq it-tielet aspett taʼ kif Missierna jieħu ħsiebna—il-ħbiberija tiegħu. L-artiklu li jmiss jiffoka fuq kif Ġeħova hu l-aqwa Ħabib tagħna.