1, 2. Yiwuphi umehluko okhona endleleni esakhula ngayo kanye lendlela esathola ngayo iqiniso?

 UJEHOVA nguye owaqalisa imuli. (Efe. 3:14, 15, NW) Ubuntu bethu lendlela esakhula ngayo kuyatshiyana lanxa sivela emulini yinye. Kungenzeka ukuthi wakhula uhlala labazali bakho kusukela uzalwa waze waba ngumuntu omdala. Engxenye abanye bafelwa ngabazali babo ngenxa yokugula, izingozi loba ezinye nje izehlakalo. Kanti njalo abanye abakaze babathi tshazi abazali babo.

2 Abanengi emulini yezikhonzi zikaJehova bathola iqiniso ngezindlela ezitshiyeneyo. Mhlawumbe wakhulela emulini yaboFakazi njalo abazali bakho bagcizelela izimiso zikaNkulunkulu kuwe. (Dute. 6:6, 7) Kumbe ungomunye wezinkulungwane ezafundiswa iqiniso yizinceku zikaJehova ezazitshumayela.​—Rom. 10:13-15; 1 Tim. 2:3, 4.

3. Kuyini esifanana ngakho sonke?

3 Kungelani lokuthi sitshiyene ezintweni eziqanjwe phezulu, zikhona ezinye izinto esifanana ngazo. Sonke siyabuzwa ubuhlungu bempumela yokungalaleli kuka-Adamu, sizalwa silesono lokungapheleli njalo siyafa. (Rom. 5:​12) Kodwa silemvumo yokubiza uJehova ngokuthi “unguBaba wethu” ngenxa yokuthi siyizikhonzi zeqiniso. U-Isaya 64:8 uthi: “O Jehova,  wena unguBaba wethu.” Le yindlela abantu bakaNkulunkulu ababekhethiwe ngezikhathi zasendulo ababembiza ngayo. Kanti njalo uJesu wethula umthandazo wakhe oyisibonelo ngamazwi athi: “Baba wethu osezulwini, malihlonitshwe ibizo lakho.”​—Mat. 6:9.

4, 5. Kuyini esizakukhangela okuzasinceda njengoba sihlola ukuthi simthanda kangakanani uBaba wethu uJehova?

4 UBaba wethu osezulwini uyasivikela njalo asinakekele ngoba singabantu ababiza igama lakhe ngokholo. Umhubi ucaphuna amazwi kaJehova esithi: ‘Ngokuba uyangithanda, ngizamkhulula [isikhonzi seqiniso]; ngizamvikela, ngokuba uyalinaka ibizo lami.’ (Hubo. 91:​14) UJehova uNkulunkulu ngenxa yothando uyasikhulula sibili ezitheni zethu njalo asivikele ukuze singathanyelwa siphele sonke ngoba singabantu bakhe.

5 Asihloleni izinto ezintathu ezizakwenza simthande kakhulu uBaba wethu osezulwini: (1) Ukuthi uBaba wethu unguMkhululi wethu. (2) UJehova unguMvikeli wethu. (3) Lokuthi unguMngane wethu omkhulu. Ngesikhathi sixoxa ngemicijo le, kungasinceda kakhulu ukunakana ngobuhlobo bethu loNkulunkulu njalo sidingisise lokuthi singamdumisa njani uBaba wethu. Kanti njalo kungasinceda ukuthi sicabangisise ngezibusiso uJehova azigcinele bonke abasondela kuye.​—Jak. 4:⁠8.

6. Kuyini okutshengisa ukuthi uJehova unguMuphi wazo “zonke izipho ezinhle”?

6 Umfundi uJakhobe wabhala wathi: “Zonke izipho ezinhle lezipheleleyo zivela phezulu, zehlele phansi zivela kuyise wezibane zasezulwini.” (Jak. 1:​17) Ukuphila yisipho esimangalisayo esivela kuJehova. (Hubo. 36:9) Nxa siphilela ukwenza intando kaNkulunkulu sithola izibusiso ezinengi khathesi njalo siba lethemba lokuthola ukuphila okungapheliyo emhlabeni omutsha. (Zaga. 10:​22; 2 Phet. 3:​13) Kodwa lokhu kungenzakala njani njengoba silezinhlupho ezabangelwa yikungalaleli kuka-Adamu?

7. UNkulunkulu wenzani ukuze sibe lobuhlobo obuqinileyo laye?

7 Zinengi kakhulu izinto ezitshengisa ukuthi uJehova unguMkhululi oMkhulu sibili. Ngokwesibonelo uyasikhulula ngomusa wakhe ongasifanelanga. Kuliqiniso ukuthi sonke sizalwa silesono lokungapheleli esakuthola kukhokho wethu. (Rom. 3:​23) Lanxa kunjalo, uJehova wathatha inyathelo elithile ukuze senelise ukuba lobuhlobo obuqinileyo laye ngenxa yokuthi uyasithanda. Umphostoli uJohane wabhala wathi: “UNkulunkulu walubonisa kanje uthando lwakhe kithi: Wathumela emhlabeni iNdodana yakhe eyiyo yodwa ukuba siphile ngayo. Lolu luthando: kungayisikuthi sasimthanda uNkulunkulu, kodwa ukuthi yena wasithanda wathumela iNdodana njengomhlatshelo wenhlawulo yezono zethu.”​—1 Joh. 4:​9, 10.

8, 9. UJehova watshengisa njani ukuthi unguMkhululi oMkhulu ngesikhathi sika-Abhrahama lo-Isaka? (Khangela umfanekiso osekuqaliseni.)

8 Ngekhulu lesi-19 B.C.E., kwaba lesehlakalo esiyisiphrofetho esatshengisa lokho uJehova akwenzayo ngenxa yothando ukuze anike abantu abalalelayo ukuphila okungapheliyo. UHebheru 11:​17-19 uchaza ukuthi: “Ngokukholwa, kwathi u-Abhrahama elingwe nguNkulunkulu, wanikela u-Isaka njengomhlatshelo. Yena owayamukele izithembiso wayeseseduze ukuba anikele indodana yakhe eyodwa njalo eyiyo kuphela, lanxa uNkulunkulu wayethe kuye, ‘Ngo-Isaka kuzavela inzalo yakho owayithenjiswayo.’ U-Abhrahama wanakana ukuthi uNkulunkulu wayengabavusa abafileyo, njalo nxa kuzekeliswa, wamamukela u-Isaka evela ekufeni.” Lokhu kuhambelana lalokho uJehova akwenzayo, wanikela ngeNdodana yakhe uJesu Khristu ukuze ahlawulele bonke abantu emhlabeni.​—Bala uJohane 3:​16, 36.

9 Akuthandabuzwa ukuthi kwamthokozisa kakhulu u-Isaka ukuthi kasabulawanga  njengomhlatshelo! Futhi kumele ukuthi wambonga kakhulu uNkulunkulu ngokubalungisela inqama eyayisesixukwini ukuthi ibe ngumnikelo. (Gen. 22:​10-​13) Yikho kungamangalisi ukuthi indawo le yabizwa ngokuthi “Jehovah-jireh, NW” okutsho ukuthi “uJehova Uzanakekela.”​—Gen. 22:14.

10, 11. Ngobani abakhokhelayo ekwenzeni ‘inkonzo yokubuyisana’ njalo bakwenza njani lokhu?

10 Njengoba sicabangisisa ngokuthi uJehova utshengisa njani ukuthi unguMkhululi oMkhulu, asiwukhohlwa umsebenzi oqakathekileyo owafezwa nguJesu Khristu, njengoPhawuli owabhala ukuthi: “Siyakholwa ukuba oyedwa wafela bonke, ngakho bonke bafa. Wafela abantu bonke ukuze abaphilayo bangaziphileli bona ngokwabo, kodwa lowo owabafelayo wavuswa njalo.”​—2 Khor. 5:​14, 15.

11 AmaKhristu okuqala ayemthanda kakhulu uNkulunkulu njalo ebonga ngesibusiso esikhulu sokumkhonza, yikho ayamukela ngentokozo ‘imfundiso kumbe inkonzo yokubuyisana.’ Umsebenzi wabo wokutshumayela lowokwenza abafundi wanika inengi labantu ababelezinhliziyo eziqotho ithuba lokuthi babuyisane loNkulunkulu, bathokoze ngokuba ngabangane bakhe njalo ekucineni babe ngabantwana bakhe. Yiyo inkonzo eyenziwa yizinceku zikaJehova ezigcotshiweyo namuhla. Lokho abakwenzayo njengabameli bakaNkulunkulu loKhristu kwenza ukuthi uJehova adonse bonke abalesifiso sokusondela kuye babeyizikhonzi.​—Bala u-2 Khorinte 5:​18-​20; Joh. 6:​44; ImiSeb. 13:48.

12, 13. Kuyini esingakwenza ukuze kukhanye ukuthi siyambonga uJehova ngezinto ezinengi asenzela zona?

12 Wonke amaKhristu alethemba lokuphila emhlabeni atshengisa ukubonga uJehova uMkhululi oMkhulu ngokuncedisa abagcotshiweyo emsebenzini wokutshumayela ngoMbuso. Emsebenzini lo sisebenzisa iBhayibhili, esinye isipho esivela kuNkulunkulu esihle kakhulu. (2 Tim. 3:​16, 17) Nxa silisebenzisa ngobunono iLizwi likaNkulunkulu eliphefumulelweyo enkonzweni yethu, siyabe sinika abanye ithuba lokuthi bathole ukuphila okungapheliyo. Umoya ongcwele ngesinye isipho esivela kuJehova esenza siphumelele emsebenzini lo. (Zek. 4:6; Luk. 11:​13) Imibiko ekhitshwa emabhukwini ethu omnyaka, okuthiwa ngama-Yearbook of Jehovah’s Witnesses, mihle kakhulu. Kuyisibusiso esikhulu kakhulu ukwenza umsebenzi lo odumisa uBaba wethu onguMkhululi.

13 Nxa sikhangela konke esikuphiwa nguNkulunkulu, nanku umbuzo okumele sizibuze wona: ‘Ngenza konke okusemandleni ami yini emsebenzini wokutshumayela ukuze ngitshengise ukuthi ngiyambonga kakhulu uJehova ngalokho angenzela khona? Kungaphi lapho engingathuthukisa khona ukuze ngiphumelele emsebenzini wokutshumayela izindaba ezinhle?’ Ukuqakathekisa imisebenzi yoMbuso ukwedlula zonke izinto ezimpilweni zethu kutshengisa ukuthi siyambonga uNkulunkulu ngezinto ezinhle asenzela zona. Singenza njalo, uJehova uzaba leqiniso lokuthi konke esikudingayo siyakuthola. (Mat. 6:​25-​33) Njengoba uNkulunkulu esithanda kangaka, kasizameni ukwenza konke esingakwenza ukuze senze inhliziyo yakhe ithokoze.​—Zaga. 27:11.

14. UJehova ubakhulula njani abantu bakhe?

14 Umhubi uDavida wathi: “Ngiyahlupheka, ngiyaswela; sengathi uJehova angangikhumbula. Ulusizo lwami lomkhululi wami.” (Hubo. 40:​17) UJehova uhlezi ebakhulula abantu bakhe, ikakhulu nxa izitha zabo zibahlasela njalo zibahlukuluza kokuphela. Siyambonga kakhulu uNkulunkulu ngokusenyula ebunzimeni lobu kanye lezinto ezinengi aqhubeka esisekela ngazo ekukhonzeni kwethu.

15. Landisa ukuthi ubaba olothando uvikela njani umntanakhe.

15 Ubaba olothando uyabanakekela abantwabakhe  aphinde abavikele. Kathunywa ukuthi ayekhulula abantwabakhe nxa besengozini. Omunye umfowethu ukhumbula okuthile okwenzakala kuye esesemncane. Sebebuyela ngekhaya loyise bevela ekutshumayeleni bahamba ngendlela equma kwesinye isifula. Mhlalokho kwakune izulu elikhulu ekuseni njalo isifula sasesigcwele. Kodwa ukuze bachaphe kwakumele banyathele phezu kwamatshe amakhulu ayephakathi kwesifula. Wathi ezama ukunyathela ematsheni umfana watshelela wawela emanzini njalo watshona kabili emanzini. Masinya nje uyise wamdumela ngehlombe njalo wamkhipha ukuze angathathwa ngamanzi. Akuthandabuzwa ukuthi umfana lo wambonga kakhulu uyise. Yikho kanye okwenziwa nguBaba wethu osezulwini nxa esikhulula kulokho esingakufanisa lezikhukhula ezigelezayo zalo umumo wezinto omubi kanye lombusi wawo uSathane. Ngeqiniso uJehova unguMvikeli omkhulu ukwedlula loba ngubani esingamcabanga.​—Mat. 6:​13; 1 Joh. 5:19.

16, 17. UJehova wabavikela njani abako-Israyeli ngesikhathi besilwa lama-Amaleki?

16 Indlela uJehova avikela ngayo abantu bakhe icaciswa kuhle yisenzakalo esabakhona ngemva kokukhululwa kwabako-Israyeli ebugqilini baseGibhithe, lokuvikelwa kwabo ngendlela eyisimangaliso ngesikhathi bechapha uLwandle Olubomvu ngo-1513 B.C.E. Ngemva kokudabula enhlane besiya eNtabeni iSinayi, abako-Israyeli bafika eRefidimu.

17 Isiphrofetho sikaNkulunkulu esikuGenesisi 3:​15 sitshengisa ukuthi uSathane wayezama zonke izindlela ukuthi ahlasele abako-Israyeli ababekhanya bengela obavikelayo. Wazama ukwenza lokhu esebenzisa ama-Amaleki ayeyizitha zabantu bakaNkulunkulu. (AmaN. 24:​20) Khangela ukuthi uJehova wenzani esebenzisa amadoda amane athembekileyo uJoshuwa, uMosi, u-Aroni kanye loHuri. Ngesikhathi uJoshuwa esilwa  lama-Amaleki khonapho eduze phezu koqaqa kwakuloMosi, u-Aroni kanye loHuri. Lapho uMosi ephakamisa izandla zakhe abako-Israyeli babewanqoba ama-Amaleki. Izandla zakhe sezidiniwe, u-Aroni loHuri babemncedisa ukuthi aqhubeke eziphakamisile. Ukuvikelwa lokuncediswa nguJehova yikho okwenza “uJoshuwa wehlula ibutho lama-Amaleki.” (Eks. 17:​8-​13) UMosi wakha i-alithare endaweni le wayibiza ngokuthi “Jehovah-nissi, NW” okutsho ukuthi “uJehova uLuphawu Lwami.”​—Bala u-Eksodusi 17:​14, 15.

18, 19. UNkulunkulu usivikela njani kulezinsuku?

18 UJehova uvikela abamthandayo labamlalelayo. Sithembela kuNkulunkulu ukuthi asivikele nxa sihlaselwa yizitha njengabako-Israyeli beseRefidimu. UJehova uhlala esivikela siliqembu njalo uyasinceda ukuze singabanjwa yimijibila kaDeveli. Cabanga ngokuthi uNkulunkulu wabavikela kangaki abafowethu abangavumanga ukungenela kwezombangazwe. Ngokwesibonelo lokhu kwenzakala ngesikhathi samaNazi eGermany kanye lakwamanye amazwe. Ukubala kanye lokucabangisisa ngezindaba ezikuma-Yearbook lakumamagazini eziphathelane lokuthi uNkulunkulu ubavikela njani abantu bakhe nxa behlukuluzwa, kuzasiqinisekisa ukuthi uJehova uyisiphephelo sethu.​—Hubo. 91:2.

19 Sithola izikhumbuzo ezisivikelayo enhlanganisweni kaJehova kanye lasemabhukwini ayo. Cabanga ngokuthi zisincedisa njani kulezinsuku. Njengoba umhlaba uqhubeka ucwila ekuziphatheni okubi, ukudakwa kanye lephonogirafi, uJehova usinika izikhumbuzo kanye losizo olwenza siqaphele singaweli ezingozini lezi. Ngokwesibonelo uBaba wethu uyasixwayisa ngokuthi singazihlanganisi labangane ababi ngokusebenzisa kubi izindlela zokukhulumisana ku-Internet okuthiwa ngama-social networks. *​—1 Khor. 15:33.

20. Yikuphi ukuvikelwa lokuqondiswa esikuthola ebandleni lobuKhristu?

20 Singakutshengisa njani ukuthi ‘sifundiswa nguJehova’ sibili? Ngokulalela imilayo yakhe zikhathi zonke. (Isaya. 54:​13) Emabandleni ethu yikho lapho esivikelwa khona njalo sithole isiqondiso esisidingayo ngoba kulapho esinikwa khona izeluleko eziseMibhalweni ngamadoda athembekileyo angabadala. (Gal. 6:1, NW) Kanengi uJehova usinakekela ngothando esebenzisa ‘izipho’ lezi ezingabantu. (Efe. 4:​7, 8) Kumele sikwamukele njani lokhu? Kumele silalele ngenhliziyo yonke njalo sizithobe ukuze uNkulunkulu asibusise.​—Heb. 13:17.

21. (a) Uzimisele ukwenzani? (b) Sizaxoxa ngani esihlokweni esilandelayo?

21 Sonke asizimiseleni ukuqondiswa ngumoya ongcwele njalo silalele iziqondiso ezivela kuBaba wethu osezulwini. Kanti njalo kumele sicabangisise ngempilo yeNdodana yakhe, uJesu Khristu, esizama ngamandla ukuyilingisela. UJesu wathola umvuzo omkhulu ngenxa yokuthembeka kwakhe kwaze kwaba sekufeni. (Flp. 2:​5-​11) Lathi sizabusiswa nxa singathemba uJehova ngenhliziyo yethu yonke. (Zaga. 3:​5, 6) Ngakho-ke sonke asithembeleni kuJehova onguMkhululi loMvikeli omkhulu kulabo bonke. Kuyisibusiso esikhulu njalo kuyasithokozisa kakhulu ukumkhonza. Sizamthanda kakhulu uJehova njengoba sizahlola enye indlela uBaba wethu asinakekela ngayo. Isihloko esilandelayo sizacacisa ukuthi uJehova unguMngane wethu omkhulu ngayiphi indlela.