1, 2. Oonkalo dhuukwanegumbo wetu odha yoolokathana ngiini nosho wo eputuko lyetu lyopambepo?

JEHOVA oye a tota po elongekidho lyuukwanegumbo. (Ef. 3:14, 15) Nokuli nonando otu li muukwanegumbo wumwe, otu na uukwatya wa yoolokathana notu li moonkalo dha yoolokathana. Otashi vulika wa putudhwa kaavali yoye okuza kuunona sigo oto koko. Yalwe otashi vulika ya silwa aavali yawo, tashi vulika omolwuuwehame nenge molwiiponga. Natango opu na yalwe mboka kaaye shi nokuli aavali yawo.

² Mokati kiilyo yuukwanegumbo waJehova, eputuko lyopambepo olya yoolokathana wo. Otashi vulika wa putukila moshili ngaashi yamwe haya ti, naavali yoye oye ku longa omakotampango gopakalunga. (Deut. 6:6, 7) Nenge tashi vulika wu li gumwe gwomaantu omayuvi mboka yi ilonga oshili okupitila miilonga yokuuvitha yaapiya yalwe yaJehova. — Rom. 10:13-15; 1 Tim. 2:3, 4.

3. Atuheni otu na iinima yini ya faathana?

³ Kakele kiinima mbyoka ya tumbulwa metetekelo, atuheni otu na iinima yontumba ya faathana. Ohatu mono iihuna omolwiilanduliko yokwaavulika kwaAdam notwa thigulula okwaagwanenena, uulunde nosho wo eso. (Rom. 5:12) Nokuli nonando osho shi li ngawo, tu li aalongelikalunga yashili, oshi li mondjila okwiithana Jehova “Tate.” Jesaja  64:8 okwa popi kombinga yoshigwana shaKalunga oshihogololwa shonale, a ti: “OMUWA, ongoye tate.” Kakele kaashono, Jesus okwa li a tameke egalikano lye noohapu ndhika tadhi ti: “Tate yetu, ngu uli megulu: Edhina lyoye nali yapulwe.” — Mat. 6:9.

4, 5. Sho tatu konakona kutya olupandu lwetu lwokupandula Tate yetu, Jehova, olu thike peni, otashi ka kala nawa tu tedhatedhe kushike?

⁴ Tate yetu gwomegulu ohe tu sile oshimpwiyu nohe tu gamene tu li oshigwana shoka hashi ithana edhina lye moshili. Omupisalomi okwe mu popi a ti: “Otandi hupitha mboka [aalongelikalunga yashili] ye hole ndje notandi gamene mboka ye shi kutya ongame OMUWA.” (Eps. 91:14) Eeno, Jehova Kalunga ohe tu gamene pahole kaatondi yetu nohe tu gamene tu li oshigwana she, opo kaatu pwe po.

⁵ Opo tu kale tu na olupandu lwomuule lwokupandula Tate yetu gwomegulu, natu ka kundathaneni iinima itatu ya simana: (1) Tate yetu gwomegulu Omusilishimpwiyu. (2) Jehova Omugameni gwetu. (3) Kalunga oku li wo Kuume ketu kopothingo. Sho tatu kundathana iinima mbika, otashi ke tu kwathela tu tedhatedhe kekwatathano lyetu naKalunga tse tu mone kutya ongiini tatu vulu oku mu simaneka e li Tate yetu. Otashi ke tu etela wo uuwanawa uuna tatu tedhatedha komalaleko nuuyamba ngoka Jehova e nine mboka taya hedha popepi naye. — Jak. 4:8.

6. Omomukalo gumwe guni Jehova u ulika kutya oku li Omugandji ‘gwoshipewa kehe oshiwanawa’?

⁶ Omulongwa Jakob okwa nyola a ti: “Oshipewa kehe oshiwanawa nomagano kehe ga gwana ga pwa ohaga zi kuKalunga, Omushiti gwomaminikilo gokegulu.” (Jak. 1:17) Onkalamwenyo yo yene oyi li omagano omakumithi ngoka twa pewa kuJehova. (Eps. 36:9) Uuna tatu longitha oonkalamwenyo dhetu tu longe ehalo lyaKalunga, ohatu mono omalaleko nuuyamba ogendji ngashingeyi notu na etegameno lyoku ka mona omwenyo gwaaluhe muuyuni uupe. (Omayel. 10:22; 2 Pet. 3:13) Ihe mbela ongiini shika tashi wapa ngele tashi ya piilanduliko yinikitha oluhodhi yokwaavulika kwaAdam?

7. Ongiini Kalunga e tu palela ondjila tu vule okukala tu na ekwatathano lyopothingo naye?

⁷ Eeno shili, Jehova oku li Omusilishimpwiyu Omunene kaaku na we. Pashiholelwa, ohe tu hupitha omolwohenda ye. Eeno, atuheni otu li aalunde notwa thigulula okwaagwanenena kutate gwetu gwotango gwokombanda yevi. (Rom. 3:23) Kakele kaashono, Jehova okwa li a katuka onkatu tango omolwohole ye, e shi ningi tashi wapa opo tu kale tu na ekwatathano lyopothingo naye. Omuyapostoli Johannes okwa nyola a ti: “Kalunga okwe tu hololele ohole ye, sho a tumu Omuvalwa gwe awike muuyuni, opo tu kale tu na omwenyo omolwe. Ohole hayo ndjoka kutya ando twa li tu hole Kalunga, aawe, ihe Kalunga oye kwa li e tu hole tango nokwa tumu Omwana, a ninge eyambo lyokudhima po oondjo dhetu.” — 1 Joh. 4:9, 10.

8, 9. Ongiini Jehova a li u ulike kutya oku li Omusilishimpwiyu Omunene pethimbo lyaAbraham naIsak? (Tala kethano ndyoka li li petameko.)

⁸ Konima yoomvula 1 800 lwaampono manga Jesus inaa valwa, oshiningwanima shopahunganeko shoka sha li sha ningwa osha li shu ulike kutya Jehova okwa longa shi thike peni sho a gandja esiloshimpwiyu lyopahole opo aantu aavuliki ya kale nomwenyo sigo aluhe. Aahebeli 11:17-19 otaya ti: “Eitaalo olyo lya longitha Abraham, a gandje omwana Isak, a ninge eyambo, sho Kalunga a li e mu yeleke. Abraham oye tuu ngoka Kalunga e mu uvanekela euvaneko, ihe nando ongaaka, okwa li i ilongekidha okuyamba po omuvalwa gwe awike. Kalunga okwa li a lombwele Abraham a ti: ‘Oluvalo lwoye otalu ka za muIsak.’ Abraham okwa li u uvite kutya Kalunga ota vulu okuyumudha Isak nokuusi. Onkee otatu vulu okutya, Abraham okwa peululwa Isak a zi mokusa.” Oshipu okumona ekwatathano ndyoka li li po. Jehova okwa li a yamba po Omwana, Jesus Kristus, omolwuuyuni awuhe. — Lesha Johannes 3:16, 36.         

⁹ Isak ka li tuu a nyanyukwa sho a hupu kaa yambwe po! Osha yela kutya okwa li a nyanyukilwa esiloshimpwiyu ndyoka Kalunga a li a gandja li  mu pingene po kaa yambwe po, ano onzi ondumentu ndjoka ya li ya adhika mengande li li popepi. (Gen. 22:10-13) Nomolwaashoka ehala ndyoka li ithanwa “Jehovah-jireh,” shoka mOshihebeli tashi ti “Jehova ota ka sa oshimpwiyu.” — Gen. 22:14 NW.

10, 11. Oolye ya kala nokukwatela komeho “oshilonga shokuhangitha,” nongiini ya kala noku shi ninga?

¹⁰ Sho tatu tedhatedha kunkene Jehova u ulika kutya oku li Omusilishimpwiyu Omunene, ohatu dhimbulula onkandangala ya simanenena ndjoka Jesus Kristus a dhana, nokuli ngaashi naanaa Paulus a ningi sho a nyola, a ti: “Ohole yaKristus otayi tu pangele, sho twa dhimbulula kutya omuntu gumwe okwa sile aantu ayehe. Shika otashi ti, aantu ayehe oya sa. Kristus okwa sile aantu ayehe, opo mboka ye na omwenyo kaaya ikalele we yo yene, ihe ya kalele nguka a si molwawo nokwa yumudhwa molwawo.” — 2 Kor. 5:14, 15.

¹¹ Omolwohole yawo yokuhola Kalunga nosho wo olupandu lwawo lwomuule lwuuthembahenda itaawu vulu okuyelekwa nasha woku mu longela, Aakriste yopetameko oya li ya taamba ko nenyanyu “oshilonga shokuhangitha.” Iilonga yawo yokuuvitha noyokuninga aantu aalongwa oya li ya pala ondjila opo aantu mboka ye na omitima omiwanawa ya kale ye na ombili naKalunga, ya nyanyukilwe uukuume naye, nokonima otaya ka ninga oyana yopambepo. Kunena, aapiya yaJehova aagwayekwa ohaya longo oshilonga sha faathana. Shoka haya gwanitha po ye li aakalelipo yaKalunga naKristus ohashi shi ningi tashi wapa opo mboka ya hogololwa kuJehova e ya nane yo ya ninge ooitaali. — Lesha 2 Aakorinto 5:18-20; Joh. 6:44; Iil. 13:48.

12, 13. Ongiini tatu vulu okuulika kutya otu na olupandu lwomasiloshimpwiyu ogendji ngoka Jehova he tu pe?

¹² Aakriste ayehe mboka ye na etegameno lyoku ka kala kombanda yevi ohaya kutha ombinga pamwe naagwayekwa miilonga yUukwaniilwa yokuuvitha, taye shi ningi nolupandu lwokupandula Jehova e li Omusilishimpwiyu Omunene. Miilonga mbika, ohatu longitha Ombiimbeli ndjoka yi li esiloshimpwiyu lilwe lyaKalunga lya dhenga mbanda. (2 Tim. 3:16, 17) Mokulongitha nuukeka Oohapu dhaKalunga dha nwethwa mo muukalele, ohatu pe yalwe ompito ya ka mone omwenyo gwaaluhe. Opo tu mone eyambidhidho miilonga mbika, kehe gumwe gwomutse ohi ikolelele kesiloshimpwiyu lilwe ndyoka Jehova ha gandja, ano ombepo ye ondjapuki. (Sak. 4:6; Luk. 11:13) Iizemo ohayi nyanyudha noonkondo, ngaashi shu ulikwa mo-Yearbook of Jehovah’s Witnesses yomumvo kehe. Kashi li tuu etumba okukala tu na ombinga miilonga mbika tayi tanga Tate yetu nOmusilishimpwiyu gwetu!

¹³ Mokutala kwaashihe shoka Kalunga e tu pa, oshi li nawa ngele tatu ipula tatu ti: ‘Mbela otandi ningi ngaa ngaashi tandi vulu muukalele wandje ndi ulukile Jehova kutya olupandu lwandje olu thike peni omolwomasiloshimpwiyu agehe ngoka e tu pa? Omomikalo dhini tandi vulu okuhwepopala ndi ninge omuuvithi gwonkundana ombwanawa ha pondola?’ Otatu vulu okuulika olupandu lwetu omolwomasiloshimpwiyu gaKalunga omawanawa mokupititha komeho iinima yUukwaniilwa moonkalamwenyo dhetu. Ngele otwa ningi ngaaka, Jehova ota ka shilipaleka kutya oompumbwe dhetu odha gwanithwa po. (Mat. 6:25-33) Omolwohole yokuhola Kalunga, osha yela kutya otu na okukala twa hala okuninga oshindji ngaashi tatu vulu opo tu nyanyudhe omwenyo gwe. — Omayel. 27:11.

14. Ongiini Jehova a kala Omusilishimpwiyu gwoshigwana she?

¹⁴ Omupisalomi David okwi imbi a ti: “OMUWA, ngame oshimbembe nohepele, ino dhimbwa ndje. Ongoye omusilishimpwiyu gwandje.” (Eps. 40:17) Jehova okwa kala lwiikando Omusilishimpwiyu gwoshigwana she shi li ongundu, unene tuu sho sha li tashi hepekwa nonyanya nosha li tashi tidhaganwa kaatondi yasho. Katu na tuu olupandu omolwekwatho lyaKalunga pomathimbo ngoka nomolwomasiloshimpwiyu ogendji gopambepo ngoka he tu pe aluhe!

15. Gandja oshiholelwa sha nkene omusamane omunahole ha gamene okamwana.

¹⁵ Omusamane omunahole iha sile owala oshimpwiyu oyana, ihe ohe ya gamene wo. Ota ka kambadhala oku ya hupitha ngele ye li moshiponga. Omumwatate gumwe ota dhimbulukwa oshiningwanima shimwe sha ningilwe sho a li okamatyona. Sho ye nahe ya li yu uka kegumbo taya zi miilonga yomomapya oya li ya kwata ondjila ndjoka ye ya fala handiyaka yomulonga. Omvula yepoola ndjoka ya li ya loko ongulonene oya li ya ningitha okamulonga ka kunguluke. Opo ya taaguluke omeya ngoka oya li owala ye na okweenda taya nuka komamanya gamwe omanene ngoka ga li po. Manga ke li komeho yahe, okamatyona oka li ke ende emanya limwe pomunkulo e ta ka gwile momeya, e ta ka yi kohi lwaali. Okamatyona kaka li tuu ka nyanyukwa sho he e ka kwata nziya mepepe a dhiginina e te ka hupitha kaa ka se omeya! Tate yetu gwomegulu ohe tu hupitha moonkalo moka tashi vulika twe dhi tala ko dhi li ekunguluko enene lyomeya guuyuni mbuka wa kolokosha nosho wo komupangeli gwawo Satana. Jehova oku li shili Omugameni a dhenga mbanda ngoka itoo mu pewa lwaali komuntu. — Mat. 6:13; 1 Joh. 5:19.

16, 17. Ongiini Jehova a li a kwathele nokugamena Aaisraeli sho ya li ya kondjitha Aayamaleki?

¹⁶ Egameno lyopahole ndyoka Jehova a li a gandja olyu ulikwa nawa kwaashoka sha li sha ningwa sho a hupitha Aaisraeli muukwatwa muEgipiti nokwe ya gamene pashikumithalonga sho ya taaguluka Efuta Etiligane mo 1513 K.E.N. Konima yokweenda mombuga yu uka kOndundu yaSinai, oshigwana osha li sha thiki puRefidim.

¹⁷ Mokutala kehunganeko lyaGenesis 3:15, Satana oku na okukala a li ta nyata owala evi sho a kala ta kongo ompito a ponokele Aaisraeli mboka ya li taya monika ya fa kaaye na omugameni. Okwa li e shi ningi okupitila mAayamaleki, mboka ya li aatondi yoshigwana shaKalunga. (Num. 24:20) Tala kwaashoka Jehova a li a ningi okupitila maalumentu yane aadhiginini, Josua, Moses, Aaron, naHur. Sho Josua a li ta kondjitha  Aayamaleki, koshikulundundu shimwe shoka sha li popepi okwa li Moses, Aaron, naHur. Aaisraeli oya li yu ulike kutya aanankondo molugodhi sho Moses a yelutha iikaha ye pombanda. Sho iikaha ye ya ningi iidhigu, Aaron naHur oya li ye mu ambidhidha. Onkee ano, omolwekwatho lyaJehova negameno lye, “Josua okwa dhenge Aayamaleki e te ya sindi thilu.” (Eks. 17:8-13) Moses okwa li a tungu oshiyambelo mpoka, e te shi ithana “Jehovah-nissi,” shoka tashi ti “OMUWA oye epandela lyandje.” — Lesha Eksodus 17:14, 15.

18, 19. Jehova oha gamene ngiini aapiya ye pethimbo lyetu?

¹⁸ Jehova oha gamene mboka ye mu hole nohaya vulika kuye. Ngaashi Aaisraeli ya li pu Refidim, natse ohatu kongo egameno kuKalunga uuna twa palamenwa kaatondi yetu. Olundji Jehova okwa kala noku tu gamena tu li ongundu, nohe tu gamene kaatu ponokelwe kOndiapoli. Dhiladhila koonkalo odhindji sho Kalunga a li a gamene aamwatate mboka ya li ya kakatele omuthika gwawo gwopaKriste. Pashiholelwa, shika osho sha li ngaaka pethimbo lyaNazi mOndowishi niilongo yilwe moomvula dho 1930 nasha nosho wo dho 1940 nasha. Okulesha nokutedhatedha koondjokonona nokomahokololo ngoka haga kala mo-Yearbook kombinga yankene Kalunga a li a gamene oshigwana she sho sha li tashi hepekwa, otaku ka koleka einekelo lyetu muJehova e li Omupopili gwetu. — Eps. 91:2.

¹⁹ Okupitila mehangano lyaJehova nosho wo miileshomwa yalyo, ohatu mono omadhimbulukitho gopahole omolwegameno lyetu. Natu tale kunkene shika she tu etela uuwanawa momathimbo opo ga zi ko. Sho uuyuni mbuka tawu ende tawu ningine mentopo lyuuholume nomiikolitha nosho wo lyomathano giipala, Jehova okwe tu pa omandhindhiliko ge endelela nosho wo ekwatho lyolela lyoku tu kwathela tu kale tu shi nkene iinima mbyoka tayi vulu oku tu nyateka pamikalo. Pashiholelwa, ohatu pewa omayele gopahole kutate yetu gankene tatu vulu okuhenuka eendathano ewinayi okupitila mokulongitha nayi o-social network. * — 1 Kor. 15:33.

20. Egameno lini newiliko lini hali monika okupitila megongalo lyopaKriste?

²⁰ Ongiini tatu vulu okuulika kutya otatu ‘longwa’ shili kuJehova? Omokuvulika thiluthilu kiipango ye. (Jes. 54:13) Mehala lyegameno momagongalo getu, ohatu mono mo eyambidhidho ndyoka twa pumbwa negameno, molwaashono omu na aalumentu aadhiginini mboka ye li aakuluntugongalo haya gandja ekwatho nomayele gopamanyolo. (Gal. 6:1) Esiloshimpwiyu lyaJehova lyopahole olindji ohatu li mono okupitila ‘maantu mbaka ye li omagano.’ (Ef. 4:7, 8) Otu na okwiinyenga ngiini? Okuvulika taku zi komutima ohaku eta omalaleko nuuyamba. — Heb. 13:17.

21. (a) Otu na okukala twa tokola toko okuninga shike? (b) Otatu ka kundathana shike moshitopolwa tashi landula?

²¹ Natu kale twa tokola toko tu kale tatu wilikwa kombepo ondjapuki e tatu taamba ko ewiliko lyaTate yetu gwomegulu. Otwa pumbwa wo okutedhatedha konkalamwenyo yOmwana, Jesus Kristus, nokukambadhala okulandula oshiholelwa she sha dhenga mbanda. Omolwokuvulika kwe nokuli sigo omeso, Jesus okwa li a mono ondjambi yo ondoka. (Fil. 2:5-11) Ngaashi ye, otatu ka lalekwa nuuyamba mokwiinekela muJehova nomutima gwetu aguhe. (Omayel. 3:5, 6) Onkee ano natu kale aluhe twi inekela thiluthilu muJehova e li Omusilishimpwiyu nOmugameni gwetu kaaku na we. Kashi shi tuu enyanyu enene nuuthembahenda uunene sho tatu mu longele! Ohole yetu yoku mu hola otayi ka koka sho tatu tedhatedha kuukwatya uutitatu waTate yetu, mboka wu li uukuume wetu naye. Oshitopolwa tashi landula otashi ka ukitha eitulomo kunkene Jehova e li Kuume ketu kopothingo.