1, 2. Kɛzi asolo yɛ mbusua nu gyinlabelɛ nee ndenle mɔɔ yɛluale zo yɛnwunle nɔhalɛ ne la ɛ?

GYIHOVA a vale abusua ngyehyɛleɛ ne ziele ɛkɛ a. (Ɛfɛ. 3:14, 15) Noko akee, saa yɛvi abusua ko anu bɔbɔ a, yɛ subane nee yɛ tɛnlabelɛ le ngakyile. Bie a ɛdɛnlanle wɔ awovolɛ nwo ɔvi wɔ ngakula nu toonwo a wɔyɛ kpanyinli a. Bie mɔ noko awovolɛ ɛwu ɔlua anwodolɛ, esiane, anzɛɛ anwubɛnyunlu gyɛne bie ati. Bie mɔ bɔbɔ ɛnze bɛ awovolɛ.

² Kɛ menli mɔɔ boka Gyihova abusua ne mɔɔ ɛlɛsonle ye anwo la, yɛdayɛ noko yɛluale ndenle ngakyile zo a yɛnwunle nɔhalɛ ne a. Kɛmɔ bie mɔ ka ye la, bie a ‘bɛtetele wɔ wɔ nɔhalɛ ne anu,’ wɔ awovolɛ vale Nyamenle ngyinlazo hilehilele wɔ. (Mɛla 6:6, 7) Anzɛɛ ɛboka menli dɔɔnwo ne mɔɔ zukoale nɔhalɛ ne ɔlua Gyihova azonvolɛ bie mɔ edwɛkɛhanlɛ gyima ne azo la anwo.—Wulo. 10:13-15; 1 Tem. 2:3, 4.

3. Duzu a yɛ kɔsɔɔti yɛnyia yɛfi awolɛ nu a?

³ Ɔnva nwo ninyɛne mɔɔ yɛha nwolɛ edwɛkɛ la, ninyɛne bie mɔ wɔ ɛkɛ mɔɔ yɛ kɔsɔɔti yɛnyia yɛfi awolɛ nu a. Adam anzosesebɛ ne ɛva sinlidɔlɛ, ɛtane, nee ewule ɛra yɛ nwo zo. (Wulo. 5:12) Yemɔ bɔbɔ anzi, kɛ nɔhalɛ azonvolɛ la, yɛkola yɛfɛlɛ Gyihova kɛ “yɛ Ze.” Ayezaya 64:8 hanle vanenle Nyamenle menli mɔɔ dɛnlanle aze wɔ tete ne la anwo kɛ: “O [Gyihova], wɔmɔ a ɛle yɛ ze a.” Yeanga ye zɔ, Gyisɛse bɔle ye asɔneyɛlɛ neazo ne  abo kɛ: “Yɛ Ze mɔɔ wɔ anwuma: Wɔ duma nwo ɛde.”—Mat. 6:9.

4, 5. Amaa yɛ anyezɔlɛ mɔɔ yɛlɛ yɛmaa yɛ Ze, Gyihova ayɛ kpole la, duzu a ɔle kpalɛ kɛ yɛsuzu nwo a?

⁴ Kɛmɔ yɛfa diedi yɛbɔ ye duma la ati, yɛ anwuma Selɛ ne maa yɛ sa ka mɔɔ yɛhyia nwo la na ɔbɔ yɛ nwo bane. Edwɛndolɛnli ne dole edwɛkɛ ɛhye mɔɔ Nyamenle hanle la azo: “Kɛmɔ [nɔhalɛ sonvolɛ beta] me ɛhulolɛ nu la ati, mebalie ye; mebawowa ye, ɔboalekɛ ɔze me duma.” (Edw. 91:14) Ɛhɛe, Gyihova Nyamenle fi ɛlɔlɛ nu die yɛ fi yɛ kpɔvolɛma asa anu, na ɔbɔ yɛ nwo bane kɛ ye menli, amaa bɛangu yɛ kɔsɔɔti.

⁵ Amaa anyezɔlɛ mɔɔ yɛlɛ yɛmaa yɛ anwuma Selɛ ne ayɛ kpole la, bɛmaa yɛzuzu ninyɛne nsa mɔɔ anwo hyia la anwo: (1) Yɛ Ze ne le yɛ Maavolɛ. (2) Gyihova le yɛ Wowavolɛ. (3) Yɛɛ Nyamenle le yɛ Gɔnwo kpalɛ kpalɛ. Mekɛ mɔɔ yɛlɛsuzu ninyɛne ɛhye mɔ anwo la, ɔbayɛ kpalɛ kɛ yɛbadwenledwenle agɔnwolɛvalɛ mɔɔ yɛ nee Nyamenle lɛ la anwo amaa yɛahola yɛali ye eni kɛ yɛ Ze. Eza ɔwɔ kɛ yɛdwenledwenle nyilalɛ mɔɔ ɔfa ɔmaa bɛdabɛ mɔɔ bɛbikye ye la anwo.—Gye. 4:8.

6. Adenle ko mɔɔ Gyihova dua zo kile kɛ ɔle “ɛlolɛdeɛ kpalɛ biala” Maavolɛ la a le boni?

⁶ Ɛdoavolɛ Gyemise hɛlɛle kɛ “ɛlolɛdeɛ kpalɛ biala nee ahyɛlɛdeɛ biala mɔɔ di munli la vi anwuma; ɔvi Nyamenle Selɛ ne mɔɔ bɔle anwuma ahɛnlaneɛ ne mɔ la ɛkɛ a ɔba a.” (Gye. 1:17) Ngoane mumua ne le ahyɛlɛdeɛ kɛnlɛma mɔɔ ɔvi Gyihova ɛkɛ. (Edw. 36:9) Saa yɛyɛ Nyamenle ɛhulolɛdeɛ a, yɛnyia nyilalɛ dɔɔnwo ɛnɛ na yɛnyia anyelazo kɛ yɛbanyia dahuu ngoane wɔ ewiade fofolɛ ne anu. (Mrɛ. 10:22; 2 Pita 3:13) Noko ɔlua mɔɔ ɛvi Adam anzosesebɛ ne anu ɛra la ati, kɛ ɔkɛyɛ na ɛhye ayɛ boɛ ɛ?

7. Kɛzi Nyamenle ɛbuke nwolɛ adenle amaa yɛ nee ye anyia agɔnwolɛvalɛ kpalɛ ɛ?

⁷ Nɔhalɛ nu, Gyihova le Maavolɛ Kpole wɔ ndenle dɔɔnwo anu. Kɛ neazo la, ye ɛlolɛ ne die yɛ ngoane. Yɛ kɔsɔɔti yɛyɛ ɛtane na yɛnyia sinlidɔlɛ yɛvi yɛ ze mɔɔ ɔlumuale ɔdɛnlanle azɛlɛ ye azo la ɛkɛ. (Wulo. 3:23) Noko akee, ɔlua Gyihova ɛhulolɛ ne ati, yebuke nwolɛ adenle amaa yɛ nee ye anyia agɔnwolɛvalɛ kpalɛ. Ɛzoanvolɛ Dwɔn hɛlɛle kɛ: “Kɛ Nyamenle zile hilele kɛ ɔkulo yɛ la ɛne: ɔzoanle ɔ Ra kokye ne wɔ ewiade ye anu, amaa ɔlua ɔ nwo zo yɛanyia ngoane. Ɛhulolɛ kɛ de la ɛne: tɛ yɛmɛ a yɛhulole Nyamenle a, yemɔ a ɔhulole yɛ na ɔzoanle ɔ Ra ne kɛ ɔrayɛ yɛ ɛtane ne mɔ anwo mgbɔdalɛdeɛ, amaa ɔlua ɔ nwo zo bɛava yɛ ɛtane ne mɔ bɛahyɛ yɛ.”—1 Dwɔn 4:9, 10.

8, 9. Kɛzi Gyihova hilele kɛ ɔle Maavolɛ Kpole wɔ Ebileham nee Ayezeke mekɛ zo ɛ? (Nea mɔlebɛbo nvoninli ne.)

⁸ Kɛyɛ 1893 K.Y.M., ngapezo bie manle yɛnwunle kɛzi Gyihova ɛlɔlɛ nziezielɛ mɔɔ bamaa alesama mɔɔ bɛyɛ tieyɛ anyia ngoane mɔɔ ɛnlɛ awieleɛ kpole si de la. Hibuluma 11:17-19 kilehile nu kɛ: “Diedi a manle Ebileham, mɔɔ ɛnee Nyamenle ɛbɔ ye ɛwɔkɛ la, vale ɔ ra nrenya kokye Ayezeke kɛ ɔfa yeabɔ [afɔle] yeamaa Nyamenle wɔ mekɛ mɔɔ Nyamenle zɔle ye nleanle la. Ɛnee Nyamenle ɛha ɛhile Ebileham kɛ, ‘Ɔlua Ayezeke anwo zo a ɛbanyia wɔ nlɔnra dɔɔnwo ne, kɛmɔ menvale membɔle wɔ ɛwɔkɛ la a.’ Ebileham nyianle adwenle kɛ Nyamenle kola dwazo mɔwuamra fi ewule nu, na amgba noko, Ebileham asa hanle Ayezeke vile ewule nu.” Ɔnyɛ se kɛ yɛbanwu mɔɔ ndotonwo ɛhye abo kile la. Gyihova vale ɔ Ra, Gyisɛse Kelaese bɔle afɔle manle alesama.—Bɛgenga Dwɔn 3:16, 36.

⁹ Nea kɛzi Ayezeke anye liele kɛ bɛliele ye bɛvile afɔlebɔlɛ ewule ɛhye anu a! Ɔ nye liele nziezielɛ mɔɔ Nyamenle yɛle  vale boane nyinli mɔɔ bɛbava bɛabɔ afɔle ne ɔziele aziakɛ ne abo la anwo. (Mɔl. 22:10-13) Ɔnyɛ azibɛnwo kɛ bɛvɛlɛle ɛkɛ ne Gyihova-gyirɛ mɔɔ ɔ bo a le ‘Gyihova Bahile’ wɔ Hibulu nu la.—Mɔl. 22:14.

10, 11. Nwane mɔ a lumuale wɔ gyima mɔɔ bɛva bɛmaa yɛ kɛ “yɛhwe menli yɛrayɛ bɛ ɔ gɔnwo mɔ” la anu a, na kɛzi bɛyɛle ye ɛ?

¹⁰ Mekɛ mɔɔ yɛlɛdwenledwenle kɛzi Gyihova kile kɛ ɔle Maavolɛ Kpole anwo la, ɔwɔ kɛ yɛnwu gyima titile mɔɔ Gyisɛse Kelaese lile kɛmɔ Pɔɔlo bɔbɔ hɛlɛle la: “Yɛdie yɛto nu kɛ sonla ko wule manle menli kɔsɔɔti, na ye zɔhane ati menli kɔsɔɔti wule. Ɔwule ɔmanle menli muala, amaa bɛdabɛ mɔɔ bɛde ngoane nu la andɛnla ammaa bɛ ngome bɛ nwo, na bɛadɛnla bɛamaa sonla ne mɔɔ bɛ ti a ɔwule na bɛdwazole ye bɛrale ngoane nu la.”—2 Kɔl. 5:14, 15.

¹¹ Ɔlua ɛhulolɛ nee anyezɔlɛ mɔɔ ɛnee bɛlɛ ye wɔ nwolɛ adenle kpole ne mɔɔ bɛnyianle bɛzonlenle Nyamenle anwo la ati, alumua Keleseɛnema vale anyelielɛ liele dole nu kɛ ‘bɛmaa bɛ gyima kɛ bɛhwe menli bɛrayɛ bɛ ɔ gɔnwo mɔ.’ Bɛ edwɛkɛhanlɛ nee ɛdoavolɛyɛlɛ gyima ne manle ahonlekpalɛma nee Nyamenle nyianle anzondwolɛ, agɔnwolɛvalɛ, na awieleɛ bɔkɔɔ ne bɛyɛle ye sunsum mralɛ. Ɛnɛ, Gyihova azonvolɛ mɔɔ bɛkpokpa bɛ la yɛ gyima ko ne ala bie. Gyima mɔɔ bɛyɛ kɛ Nyamenle nee Kelaese agyakɛ anu gyinlavolɛ la, maa ahonlekpalɛma bikye Gyihova na bɛbayɛ diedima.—Bɛgenga 2 Kɔlentema 5:18-20; Dwɔn 6:44; Gyi. 13:48.

12, 13. Kɛzi yɛbahile kɛ yɛ nye sɔ Gyihova nziezielɛ dɔɔnwo ne ɛ?

¹² Anyezɔlɛ mɔɔ Keleseɛnema mɔɔ bɛlɛ azɛlɛ ye azo anyelazo kɔsɔɔti lɛ maa Gyihova kɛ Maavolɛ kpole la, maa bɛ nee bɛdabɛ mɔɔ bɛkpokpa bɛ la bɔ nu bɔ Belemgbunlililɛ ne nolo. Yɛfa Baebolo ne mɔɔ ɔle Nyamenle nziezielɛ bieko la, yɛdi gyima wɔ daselɛlilɛ nu. (2 Tem. 3:16, 17) Yɛmaa awie mɔ nyia ngoane mɔɔ ɛnlɛ awieleɛ mɔɔ bɛbanyia la anwo anyelazo ɔlua Nyamenle Edwɛkɛ ne mɔɔ yɛfa yɛdi gyima kpalɛ wɔ daselɛlilɛ nu la azo. Amaa yɛanyia moalɛ wɔ yɛ gyima ne anu la, yɛ nuhua ko biala fa ɔ nwo to nziezielɛ bieko mɔɔ Gyihova ɛyɛ—ye sunsum nwuanzanwuanza ne anwo zo. (Zɛk. 4:6; Luku 11:13) Mɔɔ ɛvi nu ɛra la yɛ anyelielɛ, kɛmɔ yɛnwu ye wɔ Yearbook of Jehovah’s Witnesses ne mɔ anu la. Nea enililɛ mɔɔ ɔwɔ nu kɛ yɛbayɛ gyima ɛhye bie yɛaye yɛ Ze ne nee Maavolɛ ne ayɛlɛ a!

¹³ Saa yɛdwenle mɔɔ Nyamenle ɛyɛ ɛmaa yɛ kɔsɔɔti la anwo a, ɔwɔ kɛ yɛbiza yɛ nwo kɛ: ‘Asoo melɛyɛ mɔɔ mebahola la amuala wɔ me ɛzonlenlɛ gyima ne anu meahile kɛ me nye sɔ Gyihova nziezielɛ ne kpalɛ ɔ? Ndenle boni mɔ azo a mebahola meayɛ edwɛkpa ne nolobɔvo kpalɛ a?’ Yɛbahola yɛayɛ Nyamenle mo wɔ ye nziezielɛ ngɛnlɛma ne anwo, ɔlua Belemgbunlililɛ gyima ne mɔɔ yɛbava yɛalumua la azo. Saa yɛyɛ ɛhye a, Gyihova banlea kɛ yɛ sa bɛaha mɔɔ yɛhyia nwo la. (Mat. 6:25-33) Ɔlua Nyamenle ɛlɔlɛ ne ati, yɛkulo kɛ yɛbɔ mɔdenle yɛyɛ mɔɔ sɔ ɔ nye la amaa ɔ nye alie.—Mrɛ. 27:11.

14. Kɛzi Gyihova ɛyɛ Dievolɛ ɛmaa ye menli ɛ?

¹⁴ Edwɛndolɛnli Devidi dole edwɛne kɛ: “Mame, mele ehyianli, menlɛ bie; na Awulae dwenle me nwo. O me Nyamenle, ɛle me boavolɛ, ɛle me ngoanedievolɛ.” (Edw. 40:17) Gyihova ɛhɔ zo ɛyɛ Dievolɛ ɛmaa ye menli kɛ ekpunli, titile wɔ mekɛ mɔɔ bɛkpɔle bɛ na kpɔvolɛma yɛle bɛ atisesebɛ la. Yɛyɛ Nyamenle mo kɛ ɔboa yɛ wɔ mekɛ zɛhae mɔ anu na ɔkɔ zo ɔyɛ sunsum nu nziezielɛ ɔmaa yɛ la!

15. Maa ndonwo fa kile kɛzi selɛ mɔɔ lɛ ɛlɔlɛ bɔ mɔdenle kɛ ɔbɔ ɔ ra nwo bane la anu.

¹⁵ Selɛ mɔɔ kulo ɔ mra la fa ninyɛne mɔɔ bɛhyia nwo la maa bɛ na eza ɔbɔ bɛ nwo bane. Saa bɛkɔ ngyegyelɛ nu a, ɔbɔ mɔdenle ɔdie bɛ. Adiema ko kakye edwɛkɛ bie mɔɔ zile wɔ ye ngakula nu la. Mekɛ mɔɔ ɔ nee ye papa ɛkpɔne daselɛlilɛ na bɛlɛkɔ sua nu la, bɛhɔvale ɛleka mɔɔ azudenle bie la la. Ezule kpole bie dɔle ɔmanle azudenle ne yile. Saa bɛbahola bɛapɛ azule ne a, kyesɛ bɛwulu bɛfi bolɛ kpole ko azo bɛkɔ fofolɛ zo. Ɛnee kakula nrenya ne li ɔ ze anyunlu, ɔtelele yemɔti ɔdɔle azule ne anu na ɔnlomanle fane nwiɔ. Nea kɛzi kakula nrenya ne anye liele wɔ mekɛ mɔɔ ɔ ze zɔle ye awane bo ndɛndɛ yele ye vile nzule ne anu a! Yɛ anwuma Selɛ ne die yɛ fi debie mɔɔ ɔle kɛ azuyilɛ kpole wɔ ewiade ɛtane ɛhye mɔɔ ye nyamenle a le Seetan la anu. Gyihova a amgba le Wowavolɛ mɔɔ tɛla biala mɔɔ yɛbahola yɛanyia a.—Mat. 6:13; 1 Dwɔn 5:19.

16, 17. Kɛzi Gyihova boale Yizilayɛma wɔ bɛ nee Amalɛkema konle ne anu ɛ?

¹⁶ Wɔ ɛvolɛ 1513 K.Y.M., yɛnwunle kɛzi Gyihova fi ɛlɔlɛ nu bɔ ye menli nwo bane wɔ Yizilayɛma mɔɔ ɔliele bɛ ɔvile Yigyibiti akɛlɛzonlenlɛ nu nee kɛzi ɔluale nwanwane adenle zo ɔliele bɛ ɔvile Nyevile Kɔkɔlɛ ne anu la anu. Mɔɔ maanle ne kpɔsale fienemgbole ne mɔɔ ɔbikye Boka Saenae azo la, akee bɛradwule Relɛfedem.

¹⁷ Ɔlua ngapezo ne mɔɔ wɔ Mɔlebɛbo 3:15 la ati, ɔbayɛ kɛ ɛnee Seetan anye ɛbolo kpalɛ ɔlɛkpondɛ adenle yeateta Yizilayɛma mɔɔ anwo yɛ anwunvɔne la. Ɔluale Amalɛkema mɔɔ ɛnee le Nyamenle menli agbɔvolɛ la anwo zo ɔyɛle zɔ. (Ɛdi. 24:20) Suzu mɔɔ Gyihova luale mrenya nna ɛhye mɔ—Dwɔhyua, Mosisi, Aalɔn, nee Hɛɛle  anwo zo yɛle la anwo nea. Mekɛ mɔɔ Dwɔhyua nee Amalɛkema ko la, menli mɔɔ ɛnee wɔ boka bie mɔɔ bikye ɛkɛ azo la a le Mosisi, Aalɔn, nee Hɛɛle. Saa Mosisi maa ɔ sa zo a ɛnee Yizilayɛma ɛlɛdi konim. Saa ɔ sa ɛlɛbu a, Aalɔn nee Hɛɛle sosɔ ɔ sa. Yemɔti, ɔlua Gyihova moalɛ nee ye anwobanebɔlɛ ti, “Dwɔhyua vale ye konle dadeɛ ne biale Amalɛkema takaa.” (Ade. 17:8-13) Mosisi zile afɔlemokyea wɔ ɛkɛ, ɔvɛlɛle ye Gyihova-nisi, ɔ bo kile ‘Gyihova Le Me Fɛlɛnra.’—Bɛgenga Adendulɛ 17:14, 15.

18, 19. Anwobanebɔlɛ boni a Nyamenle fa maa ye azonvolɛ wɔ yɛ mekɛ ye anu a?

¹⁸ Gyihova bɔ bɛdabɛ mɔɔ bɛkulo ye na bɛyɛ tieyɛ bɛmaa ye la anwo bane. Saa kpɔvolɛma dwazo tia yɛ a, yɛ nye la kɛ Nyamenle babɔ yɛ nwo bane kɛmɔ ɔyɛle ɔmanle Yizilayɛma wɔ Relɛfedem la. Fane dɔɔnwo ne ala Gyihova bɔ yɛ nwo bane kɛ ekpunli, na ɔdie yɛ ɔfi Abɔnsam asa nu. Dwenle mekɛ dɔɔnwo ne ala mɔɔ Nyamenle ɛbɔ yɛ mediema mɔɔ bɛngyi afoa biala kɛ Keleseɛnema anwo bane la anwo nea. Kɛ neazo la, ɛhye bie zile wɔ Nazima tumililɛ ne abo wɔ Germany nee maanle gyɛne nu wɔ 1930 ne mɔ anu nee 1940 ne mɔ mɔlebɛbo. Saa yɛkenga na yɛdwenledwenle ɛbɛlabɔlɛ nu nee Yearbook ne anu edwɛkɛ mɔɔ fane kɛzi Nyamenle bɔ menli nwo bane wɔ ɛkpɔlɛ mekɛ nu la anwo a, ɔbamaa anwodozo mɔɔ yɛlɛ ye wɔ Gyihova anu kɛ yɛ Ɛvealeka la anu amia.—Edw. 91:2.

¹⁹ Gyihova dua ye ahyehyɛdeɛ ne nee mbuluku zo fa ngakyelɛ mɔɔ ɔbɔ yɛ nwo bane la maa yɛ. Suzu kɛzi ɛhye ɛboa yɛ kenlensa ye la anwo. Ɔluakɛ ewiade ne ati ɛlɛmi adwɔmanebɔlɛ nee nlanwonvoninli ɛnleanlɛ nu kpalɛ la ati, Gyihova fa ngakyelɛ nee moalɛ mɔɔ fane ɛbɛlatane nwo la ɔmaa yɛ ndɛndɛ. Kɛ neazo la, ɔtu yɛ folɛ kɛ selɛ ɔmaa yɛkoati agɔnwolɛ ɛtane mɔɔ bɛdua Intanɛte zo adwelielilɛ zo bɛtu la anwo. *—1 Kɔl. 15:33.

20. Anwobanebɔlɛ nee adehilelɛ boni a Keleseɛne asafo ne fa maa a?

²⁰ Kɛzi yɛmaa ɔda ali kɛ amgba ‘Gyihova kilehile’ yɛ ɛ? Ɔlua ye mɛla ne mɔ mɔɔ yɛdi zo kpalɛ la azo. (Aye. 54:13) Asafo ne anu le ɛleka mɔɔ yɛnyia adehilelɛ nee banebɔlɛ a, ɔluakɛ ɛkɛ ne a mrenya mɔɔ di nɔhalɛ na bɛsonle kɛ mgbanyima la fa Ngɛlɛlera ne anu folɛdulɛ boa yɛ a. (Gal. 6:1) Gyihova dua ‘menli nu ahyɛlɛdeɛ’ ɛhye mɔ anwo zo ɔnea yɛ kpalɛ. (Ɛfɛ. 4:7, 8) Duzu a ɔwɔ kɛ yɛyɛ a? Saa yɛfi yɛ ɛhulolɛ nu yɛbɛlɛ yɛ nwo aze na yɛyɛ tieyɛ a Nyamenle bayila yɛ.—Hib. 13:17.

21. (a) Duzu a ɔwɔ kɛ yɛsi pi kɛ yɛbayɛ a? (b) Duzu a yɛbazuzu nwo wɔ edwɛkɛ mɔɔ doa zo la anu a?

²¹ Bɛmaa yɛzi pi yɛmaa sunsum nwuanzanwuanza ne ɛhile yɛ adenle yɛva yɛdie yɛ anwuma Selɛ ne. Eza ɔwɔ kɛ yɛdwenledwenle kɛzi ɔ Ra, Gyisɛse Kelaese bɔle ye ɛbɛla la anwo na yɛbɔ mɔdenle kɛ yɛbali ye neazo ne mɔɔ tɛla biala la anzi. Kɛmɔ Gyisɛse yɛle tieyɛ hɔle ewule nu bɔbɔ la ati, ɔnyianle nwolɛ ahatualɛ. (Fel. 2:5-11) Saa yɛyeye yɛ ahonle nu yɛfa yɛ rɛle yɛwula Gyihova nu a, yɛdayɛ noko yɛbanyia nyilalɛ. (Mrɛ. 3:5, 6) Yemɔti, bɛmaa yɛbu Gyihova dahuu kɛ ɔle Maavolɛ nee Wowavolɛ mɔɔ tɛla biala. Nea anyelielɛ nee nwolɛ adenle kpole mɔɔ yɛnyia yɛlɛsonle ye a! Ɛhulolɛ mɔɔ yɛlɛ yɛmaa ye la bayɛ kpole wɔ mekɛ mɔɔ yɛlɛsuzu yɛ anwuma Selɛ ne ɛlɔlɛ subane ne mɔɔ tɔ zo nsa—ye agɔnwolɛvalɛ ne anwo la. Edwɛkɛ mɔɔ doa zo la bahilehile kɛzi Gyihova le yɛ Gɔnwo kpalɛ kpalɛ la anu.