1, 2. (a) Di ki manera miembronan di un famia por ta diferente for di otro? (b) Cua ta algun manera cu hende por haya e berdad?

TA JEHOVA a institui e areglo di famia. (Efe. 3:14, 15) Sinembargo, hasta si nos ta di mesun famia, nos circunstancia y personalidad no ta mescos. Podise abo a crece hunto cu bo mayornan. Den caso di otronan kisas esey tabata diferente pasobra nan mayornan a muri debi na maleza, accidente of un otro tragedia. Tin hende cu no sa mes ken ta nan mayornan.

² Como adoradornan di Jehova, nos tambe ta forma un famia, pero no ta nos tur a haya e berdad na mesun manera. Por ehempel, kisas manera algun hende sa bisa, abo ‘a lanta den e berdad’, y bo mayornan a inculca principionan biblico den bo. (Deu. 6:6, 7) Of kisas bo ta un di e miles di hendenan cu a haya e berdad mediante e trabou di predica.—Rom. 10:13-15; 1 Tim. 2:3, 4.

3. Kico tur hende tin en comun?

³ A pesar di e factornan cu nos a caba di menciona, tin cierto cosnan cu nos tur tin en comun. Debi cu Adam a desobedece Jehova, nos tur a hereda imperfeccion, pica y morto for di dje. (Rom. 5:12) Y toch, como adoradornan berdadero, nos por yama  Jehova “nos Tata.” Pesey, den pasado, e pueblo scogi di Dios a expresa e palabranan na Isaias 64:8, cu ta bisa: “O SEÑOR, abo ta nos Tata.” Es mas, Hesus a cuminsa su oracion modelo cu e palabranan aki: “Nos Tata cu ta den cielo, bo nomber sea santifica.”—Mat. 6:9.

4, 5. Ki factornan nos lo analisa pa nos aumenta nos amor pa nos Tata, Jehova?

⁴ Jehova, nos Tata celestial, ta duna hende cu ta invoca su nomber cu fe e cuido y proteccion cu nan tin mester. Referiendo na un adorador berdadero, Jehova a bisa: “Pasobra el a stima mi, pesey lo mi libr’e; lo mi proteh’e, pasobra e conoce mi nomber.” (Sal. 91:14) Si, Jehova ta libra su pueblo na un manera amoroso for di nan enemigonan y ta proteha nan pa nan no caba cu nan.

⁵ Awor, laga nos analisa tres factor importante pa asina aumenta nos amor pa nos Tata celestial: (1) Nos Tata ta percura pa nos, (2) Jehova ta proteha nos y (3) Jehova ta nos mihor Amigo. Segun cu nos ta analisa e factornan aki, ta bon pa nos medita riba nos relacion cu Jehova y riba maneranan cu nos por honr’e como nos Tata. Ta bon tambe pa nos reflexiona riba e bendicionnan cu Jehova ta priminti hende cu hala cerca dje.—Sant. 4:8.

6. Dicon nos por bisa cu Jehova ta Dunador di “tur don cu ta bon”?

⁶ Discipel Santiago a skirbi: “Tur don cu ta bon y tur regalo perfecto ta bin di ariba; pues, nan ta baha for di e Tata di e luznan celestial.” (Sant. 1:17) Bida riba su mes ta un regalo maraviyoso cu nos a ricibi di Dios. (Sal. 36:9) Anto si nos uza nos bida pa haci su boluntad, nos lo disfruta di hopi bendicion awor y di bida eterno den futuro. (Prov. 10:22; 2 Ped. 3:13) Pero con esey ta posibel siendo cu nos tur a hereda imperfeccion, pica y morto for di Adam?

7. Con Dios a habri caminda pa nos por tin un bon relacion cu ne?

⁷ Definitivamente Jehova ta e Gran Percurador den hopi manera cu nos no por ni imagina. Su bondad inmereci ta motiv’e pa sali na nos defensa. Por ehempel, ta berdad cu nos tur a hereda imperfeccion for di Adam y ta haci pica. (Rom. 3:23) No obstante, debi na Jehova su amor, el a tuma iniciativa pa habri caminda pa nos por tin un bon relacion cu ne. Con el a haci esey? Apostel Juan a skirbi: “Pa medio di esaki Dios a revela e amor cu e tin pa nos: Dios a manda su Yiu unigenito na mundo pa nos por haya bida pa medio di dje. E amor ey ta nifica esaki: no ta nos a stima Dios, sino ta e a stima nos y a manda su Yiu como un sacrificio di reconciliacion pa nos picanan.”—1 Juan 4:9, 10.

8, 9. Con Jehova a demostra den tempo di Abraham cu Isaak cu e ta e Gran Percurador? (Wak e prome plachi.)

⁸ Alrededor di aña 1893 prome cu Cristo, un suceso profetico a revela te con leu Jehova lo a bay pa hende obediente por ricibi bida eterno. Hebreonan 11:17-19 ta splica: “Pa medio di fe Abraham, ora el a ser poni na prueba, na moda di papia, a ofrece Isaak; e homber cu gustosamente a ricibi e promesanan tabata cla pa sacrifica su unico yiu, aunke Dios a bis’e: ‘Esnan cu lo ta yama “bo descendientenan” lo bin pa medio di Isaak.’ Ma el a rasona cu Dios por a lanta su yiu hasta for di morto; y ta for di morto el a ricibie simbolicamente.” Ta facil pa mira e paralelo: Mescos cu Abraham tabata dispuesto pa sacrifica su yiu, Jehova a sacrifica su Yiu boluntariamente pa rescata humanidad.—Lesa Juan 3:16, 36.

⁹ Isaak lo a keda masha contento ora cu e no mester a muri mas como un sacrificio. Sin duda, el a keda masha agradecido cu Jehova a percura un otro sacrificio na su luga: un chubato di carne cu a pega den un  pida mondi-cera. (Gen. 22:10-13) Pesey, no ta nada straño cu Abraham a yama e luga ey “Jehovah-jireh” (NW), cu ta nifica ‘Jehova Lo Provee.’—Gen. 22:14.

10, 11. Ken awe ta encabesa e “encargo di reconciliacion”, y con nan ta haci esey?

¹⁰ Ora nos medita riba tur loke Jehova a percura pa nos, nos ta realisa tambe cu Hesus a hunga un papel hopi importante den esaki. Pablo tambe a realisa esey, y el a skirbi: “Na e conclusion aki nos a yega: un hende a muri pa tur, pasobra tur hende a muri caba; y el a muri pa tur, pa esnan cu ta biba no biba mas pa nan mes, ma pa esun cu a muri pa nan y a ser lanta for di morto.”—2 Cor. 5:14, 15.

¹¹ Como cu e cristiannan den prome siglo tabata stima Dios y tabata aprecia e privilegio di por sirbie, nan a acepta e “encargo di reconciliacion” cu entusiasmo. Nan trabou di predica y di haci discipel a habri caminda pa hende sincero por a reconcilia cu Dios, disfruta di su amistad y cu tempo bira su yiunan. Awe, sirbidornan ungi di Jehova ta cumpli cu e mesun encargo. Loke nan ta logra como embahador di Dios y di Cristo ta haci posibel cu hende cu ta dispuesto pa acepta e berdad por hala cerca Jehova y bira su sirbidor.—Lesa 2 Corintionan 5:18-20; Juan 6:44; Echo. 13:48.

12, 13. Con nos por demostra cu nos ta aprecia tur loke Jehova ta haci pa nos?

¹² Aprecio pa Jehova, e Gran Percurador, ta motiva tur cristian cu tin speransa di biba riba tera pa semper pa participa hunto cu e unginan den e trabou di predica e Reino. Den e trabou aki, nos ta haci uzo di Bijbel, un otro maraviyoso provision di Dios. (2 Tim. 3:16, 17) Ora nos ta haci bon uzo di Bijbel den sirbishi, nos ta duna otro hende e oportunidad di haya bida eterno. Pa yuda nos den e trabou aki, nos tur ta depende riba un otro provision di Jehova: su spirito santo. (Zac. 4:6; Luc. 11:13) Tur edicion di e Anuario di Testigonan di Jehova ta mustra cu e resultadonan di e trabou di predica ta masha impresionante. Ta un honor pa participa den e trabou aki cu ta duna alabanza na nos Tata y Percurador!

¹³ Mirando tur loke Jehova a percura pa nos, ta bon pa nos cada un puntra nos mes: ‘Mi ta haciendo tur loke mi por den sirbishi pa mustra Jehova cuanto mi ta aprecia tur loke el a haci y ta haciendo pa mi? Den ki maneranan mi por mehora y bira un mihor predicador di e bon noticia?’ Un manera cu nos por mustra nos aprecio pa e maraviyoso provisionnan di Jehova ta di sigui pone e Reino na prome luga den nos bida. Si nos haci esey, Jehova lo percura pa nos haya tur loke nos tin mester. (Mat. 6:25-33) Jehova su amor ta motiva nos pa haci tur loke nos por pa agrad’e y haci su curason contento.—Prov. 27:11.

14. Con Jehova a demostra di ta e Libertador di su pueblo?

¹⁴ Salmista David a canta: “Ami ta afligi y den necesidad; sinembargo, Señor [Jehova] ta corda riba mi. Bo ta esun cu ta yuda mi y ta libra mi.” (Sal. 40:17) Bes tras bes, Jehova a demostra di ta e Libertador di su pueblo como grupo, specialmente ora nan enemigonan tabata persigui nan severamente. Nos ta hopi agradecido pa e yudansa cu Jehova ta percura na momentonan asina y tambe pa tur e provisionnan spiritual cu e ta percura constantemente pa nos.

15. Duna un ehempel cu ta mustra con un tata cu ta stima su yiu ta haci esfuerso pa proteh’e.

¹⁵ Un tata cu ta stima su yiunan no solamente ta percura pa nan pero ta haci esfuerso tambe pa proteha nan. Si nan ta den peliger, mesora e ta purba di rescata nan. Un ruman homber, por ehempel, ta corda un incidente specifico cu a tuma luga tempo cu e tabata hopi chikito. El a conta cu un dia despues di sirbishi, bayendo cas, e y su tata mester a crusa un riu chikito. Pero como cu e mainta ey awa a yobe hopi duro, e nivel di awa a subi, y e unico manera pa crusa e riu tabata di bula di un piedra grandi pa otro. E ruman homber tabata dilanti di su tata. Ora e tabata bula di un piedra pa otro, el a perde balansa y cay den e riu y a bay bou di awa dos biaha. El a keda masha contento ora su tata a gar’e na su schouder y asina evita cu lo el a hoga. Di mes manera, nos Tata celestial ta libra nos for di e mundo malbado aki y for di su gobernante, Satanas. Sin duda Jehova ta e mihor Persona cu por proteha nos.—Mat. 6:13; 1 Juan 5:19.

16, 17. Con Jehova a yuda y proteha e Israelitanan ora nan tabata bringa cu e Amalekitanan?

¹⁶ Na aña 1513 prome cu Cristo, Jehova a rescata e Israelitanan for di sclavitud na Egipto y a proteha nan milagrosamente segun cu nan tabata crusa Lama Cora. Durante e sucesonan cu a sigui tambe Jehova a demostra su amor na nan y a proteha nan. Despues di a cana den desierto den direccion di Sero Sinai, e nacion a yega Refidim.

¹⁷ Mirando loke Bijbel ta profetisa na Genesis 3:15, nos por imagina nos mes con loco Satanas tabata pa haya un chens p’e ataca e Israelitanan cu den su bista a parce di ta indefenso. El a haci esaki uzando e Amalekitanan, kendenan tabata enemigo di e pueblo di Dios. (Num. 24:20) Awor, con Jehova a uza cuater homber fiel—Josue, Moises, Aaron y Hur—pa  proteha su pueblo? Segun cu Josue tabata bringa contra e Amalekitanan, Moises, Aaron y Hur tabata riba un serito den cercania. Tanten cu Moises su mannan tabata na laira, Jehova tabata yuda e Israelitanan vence nan enemigonan. Ora Moises su mannan tabata cansa, Aaron cu Hur tabata wanta nan na laira. Pues, ta cu Jehova su yudansa y proteccion, “Josue a derota Amalek y su pueblo.” (Exo. 17:8-13) Despues, Moises a traha un altar eynan y a yam’e “Jehovah-nissi”, cu ta nifica “Jehova Ta Mi Refugio” (NW).—Exo. 17:14, 15; nota.

18, 19. Con Dios ta proteha su sirbidornan den nos tempo?

¹⁸ Jehova ta proteha hende cu ta stim’e y obedec’e. Mescos cu e Israelitanan na Refidim, ora nos enemigonan ta ataca nos, nos ta acudi na Jehova pa proteccion. Hopi bes el a yega di proteha nos como grupo y yuda nos keda leu for di gara di Satanas. Pensa riba e hopi ocasionnan cu Dios a proteha nos rumannan cu a haya nan cu persecucion pasobra nan a mantene nan neutralidad cristian. Esaki a sosode, por ehempel, na Alemania y na otro paisnan ora e Nazinan tabata na poder den decada di 1930 pa principio di añanan 1940. Ora nos lesa y medita riba e historianan di bida y e relatonan den nos Anuario cu ta mustra con Jehova a proteha nos rumannan den tempo di persecucion, nos confianza den Jehova, kende ta nos Refugio, ta bira mas fuerte.—Sal. 91:2.

¹⁹ Ademas, Jehova ta uza su organisacion y publicacionnan cu esaki ta produci pa duna nos recordatorionan amoroso pa proteha nos. Pensa con e recordatorionan aki a proteha nos den e ultimo añanan. Segun cu e mundo aki ta sigui bira mas y mas obsesiona cu sex, alcohol y pornografia, Jehova ta duna nos recordatorionan oportuno y yudansa practico pa nos por keda alerta pa peligernan moral. Recientemente, por ehempel, nos Tata celestial a conseha nos pa evita mal compania via rednan social. *—1 Cor. 15:33.

20. Ki proteccion y guia nos ta haya mediante e congregacion cristian?

²⁰ Con nos por demostra cu nos ta personanan realmente ‘siña’ pa Jehova? Cumpliendo cu su mandamentonan cuidadosamente. (Isa. 54:13) Nos congregacionnan ta luganan safe caminda nos ta haya guia y proteccion, pasobra eynan tin hombernan fiel cu ta duna nos yudansa y conseho biblico. (Gal. 6:1) Si, Jehova ta uza e ‘regalonan den forma di hende’ aki pa cuida nos cu amor. (Efe. 4:7, 8) Con nos mester reacciona na nan guia? Nos mester ta obedecido y sumiso, y Jehova lo bendiciona nos.—Heb. 13:17.

21. (a) Kico nos mester ta determina pa haci? (b) Kico e siguiente articulo ta splica?

²¹ Laga nos ta determina pa semper sigui guia di spirito santo y asina somete nos mes na nos Tata celestial. Ademas, nos tin cu medita riba e bida di su Yiu, Hesucristo, kende su ehempel excepcional nos ta haci esfuerso pa imita. Como cu e tabata obedecido te na morto, Jehova a recompens’e ricamente. (Flp. 2:5-11) Si nos ta confia den Jehova cu henter nos curason, Jehova lo bendiciona nos tambe. (Prov. 3:5, 6) Pesey, laga nos semper depende riba Jehova pasobra no tin otro persona cu por percura pa nos ni proteha nos mihor cu ne. Pues, ta un goso y privilegio pa sirbie! Nos amor pa Jehova lo sigui crece segun cu nos ta medita riba e di tres factor cu ta demostra cu nos Tata ta interesa den nos—su amistad. E siguiente articulo ta splica dicon Jehova ta nos mihor Amigo.