1, 2. Ngerang a klekakerous er a blekerdelel a klengar er a telungalek er kid me sel rolel e kede silubii a klemerang?

 A JEHOVAH a uchul e ngar er ngii a telungalek. (Efe. 3:​14, 15) Me alta kede chedal a osisiu el telungalek, engdi kede rokui el kakerous a blekerdeled me a rolel a klengar er kid. A rebebil a locha mlukeroul el obengterir a redemerir me a rederrir. E a rekuk bebil a locha mlad a redemerir me a rederrir e le ngsecher, accident, me a lechub e ngkuk ta er a kdekudel el tekoi a uchul. Nglocha dirrek el ngar er ngii a rebebil el diak lodengelterir a redemerir me a rederrir.

² Kid el rokui a chedal a telungalek er a Jehovah el mengull er ngii e mla suubii a klemerang el ngar er a kakerous el rolel. Ke locha mlukeroul el obengkel a demam me a delam el tir a ulsisecheklau el mo kiei el oltirakl a omellach er a Biblia. (Dut. 6:6, 7) Me a lechub e ke ta er tirke el betok el telael el chad el silubii a klemerang e le te mla er ngii a rebebil er a remesiungel a Jehovah el ulemerk er a klumech el eko er kau.​—Rom 10:13-15; 1 Ti. 2:3, 4.

3. Ngera el osisiu el tekoi a doba el rokui?

³ Me alta ngkakerous a blekerdelel a klengar er kid, engdi kede rokui el ngar ngii a tekoi el di osisiu er kid. A Adam a mlo diak lolengesenges er a Dios a uchul, me kede rokui el mludiukes er a diak el  cherrungel el klengar, klengit me a kodall. (Rom 5:12) Me nguaisei, engdi ngsebeched el omekedong er a Jehovah el “Demmam” e le kede mera el mesiungel. A irechar, e tirke el ngellitel el chedal a Dios a mle sebechir el melekoi aike el tekoi el ngar er a Isaia 64:8 el kmo: “Kau a Demmam e RUBAK.” A Jesus a dirrek el ulemuchel er a nglunguchel el kmo: “Demmam el ngar a eanged: ‘Bo le modanges a chedaol ngklem.’”​—Mt. 6:9.

4, 5. Ngera el tekoi a bo dosaod a lsekum e ngsoad el menglou er a bltkil a rengud el mo er a Demad el ngar er a eanged el Jehovah?

⁴ A Demad el ngar er a eanged a omekerreu er a telungalek er ngii el tir a mengull er ngii. A doltirakl er a tekingel a milluches er a Psalm, e a Jehovah a dilu el kmo: “Ak mo olsobel er tirkel betik a rengrir er ngak [mera el mengull er ngak], e mengkar er tirkel medengelkak.” (Psa. 91:14) A Jehovah a olsobel er a rechedal er a recherrouir e omekerreu er tir me ngdiak lemetemall.

⁵ Me a bo donglou er a bltkil a rengud el mo er a Demad el ngar er a eanged el Jehovah, e bo dosaod el kmo ngoeak a ngera el rolel e ngii a (1) ngike el Omeskid Aike el Dousbech, (2) ngike el Omekerreu er Kid, e (3) ngike el kot el kmeed el Sechelid. Me a bo dosaod aika el edei el tekoi, e bo dekerekikl el melatk el kirel a deleuill er kid me a Dios e dosuub el kmo ngmekerang a dongebkall er ngii el ua el Demad. Ngdirrek el kired el melatk aike el klengeltengat el Jehovah a mla tuib el mo omesterir tirke el olekeed er tir er ngii.​—Jak. 4:8.

6. Ngera uchul me ngsebeched el melekoi el kmo a Jehovah a ngike el Omeskid a “bek el ungil” el sengk?

⁶ A disaiplo el Jakobus a milluches el kmo: “A bek el ungil e cherrungel sengk a ngar a eanged el mei; ng mei el ngar a Dios, el ulemeob a llomes el ngar a eanged.” (Jak. 1:17) A klengar a kmal ungil el sengk el mla er a Jehovah. (Psa. 36:9) Me sel dousbech er a klengar er kid el meruul a soal a Jehovah, e ngmo uchul a betok el klengeltengat er chelechang me kid a mo nguu a diak a ulebengelel el klengar er a beches el beluulechad. (Osi. 10:22; 2 Pe. 3:13) Engdi ngmekerang e sebechel el uaisei a lsekum e kede rokui el mludiukes er a diak el cherrungel el klengar, klengit, me a kodall el mla er a Adam?

7. Ngera el tekoi a bla leketmeklii a Dios el uchul e ngsebechel el mo er ngii a kmes el deleuill er kid el obengkel?

⁷ A Jehovah a ngike el Omeskid Aike el Dousbech el ngar er a betok el rolel. Ngii el bekokeuii a uchul me ngrullii el mo soal el olengeseu er kid. Kid el rokui a mo er a klengit e mla mudiukes er a diak el cherrungel el klengar el mla er a Adam. (Rom 3:23) Me nguaisei, engdi a bltkil a rengul a Jehovah a uchul, me ngmla meskid a rolel e ngmo er ngii a kmes el deleuill er kid el obengkel. A apostol el Johanes a milluches el kmo: “E a Dios a ulechotii a bltkil a rengul er a loderchii a di tal Ngelekel el mer a beluulchad, me bo dokiu ngii el mo nguu a klengar. Tiakid a bltikerreng el kmo, ng diak le kid a mle betik a rengud er a Dios; ng bai Dios a mle betik a rengul er kid me ng ulderchii a Ngelekel, el doeak ngii e ng musubes a kngtid.”​—1 Jn. 4:9, 10.

8, 9. A Jehovah ngmilekerang e ulechotii er a taem er a Abraham me a Isak el kmo ngii ngike el Omeskid Aike el Dousbech? (Momes er a siasing er a uchelel a suobel.)

⁸ A bekord el 1,900 el rak er a uchei er a lemechell a Jesus, e a tekoi el dilubech er a klengar er a Abraham a ulechotii a rolel e a Jehovah a mo omesterir a rokui el bekongesenges el chad a diak a ulebengelel el klengar. A Hebru 11:17-19 a mesaod el kmo: “A Abraham a uluumerang a uchul me ng uldersii a ngelekel el Isak el mo tenget er ser a longarm er ngii a Dios. A Abraham ingikel lurruul er a telbiil a Dios el obengkel, e ngdi ngii a mle kldmokl el mo odersii a ngelekel el mo tenget. A Dios a dilu er ngii el kmo, ‘a rengelekem a mo oeak a Isak el mei.’ A Abraham a mle medengei er a rengul el kmo a Dios a sebechel el olekiis er a re chad er a kodall. Seikid ia uchul ma Isak a ua ia le mlad e lluut el mo chad.” Me ngdi uai a Abraham el kilengei el mo melenget er a ngelekel el Isak, a Jehovah a kilengei el mo tongetengii a Ngelekel el Jesus Kristus me bo lesobel a klechad.​—Monguiu er a Johanes 3:16, 36.

⁹ Ka di molatk er sel deuil a rengul a Isak er a  bo lodengei el kmo ngdikea bo lemad. Ngulterekokl el kmal uleba omereng el saul e le a Jehovah a kiltmeklii a sechal el sib el mo tenget. (Gen. 22:10-13) A Abraham a milengeklii tia el basio el “Jehovah-jireh,” el ngar er a tekoi er a Hebru e ngbelkul a kmo a “RUBAK a Meskid.”​—Gen. 22:14.

10, 11. Te rua techang a omekrael er tia el ureor el “mesumech a delongelir a re chad” me a Dios, e mekerang a loruul er tiang?

¹⁰ Sel dorriter el kirel aike el rokui el bla lebeskid a Jehovah, e kede mo melatk el kmo a lak a tengetengel a Jesus e ngdiak el sebeched el mo sechelil a Dios. A Paulus a milluches el kmo: “E le ki ungil el medengei el kmo a tal chad a mlad el kirir a rokui el chad, el belkul a kmo a rokui el chad a mlad el obengkel. Me ng mlad el kirir a rokui el chad, me ng uchul e tirkel oltirakl er ngii a mo diak di le ngar el kirel a ungil er tir, e bai kirel a Kristus el mlad el kirir e mokiis el lmuut el me ngar.”​—2 Ko. 5:14, 15.

¹¹ A Rekristiano er a irechar a mle betik a rengrir er a Dios e uleba omereng el saul er a techall el mo mesiou er ngii, me te kilengei el mo “oureor el mesumech a delongelir a re chad me ngii.” Tia el ureor a mle ureor er a berkel a klumech el uchul me a rechad a mo budech a delongelir el obengkel a Dios, e mo sechelil, e mo ngelekel a Dios el ngar er a eanged. Chelecha el taem, e a rengellitel el mesiungel a Jehovah a meruul er a osisiu el ureor. Te mesiou el melekingel a Dios me a Kristus. A urerir er a berkel a klumech a uchul me a rechad a mo meruul a melemalt el tekoi e mo ngariou a rengrir me bo el sebechir el mo kmeed er a Jehovah e mo mesiungel.​—Monguiu er a 2 Korinth 5:18-20; Jn. 6:44; Rel. 13:48.

12, 13. Kede mekerang e ochotii el kmo kede oba omereng el saul el kirel aike el rokui el bla lebeskid a Jehovah?

¹² A rengodech el sib a oba omereng el saul el kirel a Jehovah el ngike el Omeskid Aike el Dousbech, me te oureor el obengterir a rengellitel el omerk er a ungil chais. Kede meruul er tia el ureor er a berkel a klumech el ousbech er a Biblia el ngii a ta er a mekreos el sengk el mla er a Dios. (2 Ti. 3:16, 17) Sel bo dungil el ousbech er a Biblia el ngar er a omesiunged, e kede mesterir a rechad a techall el mo nguu a diak a ulebengelel el klengar. A Jehovah a dirrek el meskid a chedaol klisichel. Me a derta er kid a ultuil er tia el chedaol klisiich el mo olengeseu er kid er a omesiunged. (Sek. 4:6; Lk. 11:13) A bek el Yearbook of Jehovah’s Witnesses el tuobed a ochotii el kmo ngmera el betok a ungil el tekoi el mla meketmokl el okiu tia el ureor er a berkel a klumech. Tiang a kmal ileakl el techall el mo sebeched el teloi er tia el ureor el mo uchul a odanges el mo er a Demad el ngii a Omeskid Aike el Dousbech.

¹³ A Dios a mla meskid aike el tekoi el dousbech, me a leuaisei e ngungil a di el kid el oker el kmo: ‘Ngak ak meruul aike el sebechek er a omesiungek el ochotii el mo er a Jehovah el kmo ak oba omereng el saul el kirel a rokui el bla lebeskak? Ak mekerang e mo ungil el omerk er a ungil chais?’ Me a lsekum e kede oba omereng el saul el kirel aike el rokui el lomeskid a Dios, e kede mo nguu a Rengedel el mo kot er a klengar er kid. A bo doruul el uaisei, e a Jehovah a ulterekokl el mo omeskid aike el rokui el tekoi el dousbech. (Mt. 6:25-33) A bltkil a rengul a Jehovah el mei er kid a uchul, me ngsoad el meruul aike el sebeched el mo oldeu er a rengul.​—Osi. 27:11.

14. Ngmekerang a Jehovah e mla olsobel er a rechedal?

¹⁴ A David, el milluches er a Psalm a milengitakl el kmo: “Ngak a mechitechut e ousbech a ngesou, ngdi RUBAK a melebedebek er ngak. Kau a ngelseuik e Osebelek.” (Psa. 40:17) A Jehovah a mla mo betok el taem el Lolsobel er a rechedal el ua ta el cheldebechel, el ileakl sel sekum e te mo meringel el modechelakl er a recherrouir. Kede mera el oba omereng el saul e le Jehovah a blechoel el omeskid aike el dousbech el mo melemolem el blak a rengud el mo er ngii el ngar er a chelsel chouaika el meringel el taem.

15. Mouchais er a ta er a kerebai el kirel a rolel a betik a rengul el chedam a lomekerreu er a ngelekel.

¹⁵ A betik a rengul el chedam a diak di lomesterir  aike el lousbech a rengelekel e lemerekong e ngdirrek el omekerreu er tir. E le omko te mlo chelebangel er a kdekudel el tekoi e ngdi mereched el mo olsobel er tir. A ta el odam a melatk el kirel a rolel a demal a lomekerreu er ngii er a lekekerei el buik. Ngii me a demal a mirrael el mo remei er a bo lemerek el oldingel e mle kirir el mo imuul er a omoachel. Ngmla er ngii a klou el chull er sel tutau me ngmleieleb tia el omoachel. E a di ta el rolel e te mo imuul a oeak sel leridekekl er a ta el klou el bad el mo er a kuk tang. Nguleak uchei er a demal e mlo metacherbesul me ngrirebet er tia el omoachel e mle eru el taem el lebo lemoduleb er a chelsel. Ngmera el mlo ungil a rengul ngika el buik e le demal a di mle mereched el orekedii a ongelngelel e ulsebelii me ngdimlak leros. Me ngar er a osisiu el rolel, a Demad el ngar er a eanged a omekerreu er kid er a kdekudel el tekoi er tia el mekngit el beluulechad me ngike el mengedereder er ngii el Satan. A Jehovah a ngike el kot el ungil el Omekerreu er kid el diak a mo uai ngii.​—Mt. 6:13; 1 Jn. 5:19.

16, 17. Ngmilekerang a Jehovah e olengeseu e omekerreu er a rechad er a Israel er a loumekemad er a rechad er a Amalek?

¹⁶ A Jehovah a ulemekerreu er a rechedal er a rak er a 1513 er a uchei er a Kristus. A uchei e ngulsebelterir a rechad er a Israel er a klsibai e ulemekerreu er tir er a bo leiuul er a Bekerekard el Daob. A uriul er a lorael er a ked el mo bedul a Rois el Sinai, e te mlo er a Refidim.

¹⁷ A ulaoch er a Genesis 3:15 a dirkak letaut me a Satan a locha kmal mle soal el mo oldechelakl er a rechad er a Israel e le ngua lemlak a ulekerreu el mo er tir. A ta er a rolel e ngmirruul er tiang a oeak sera lousbech er a rechad er a Amalek, el tir a mle cherrouir a rechedal a Dios. (Ule. 24:20) Ngmilekerang a Jehovah e omekerreu er a rechedal er tirka el cherrouir el okiu a Josua, Moses, Aron, me a Hur? A Josua me a rechedal er a loumekemad er a rechad er a Amalek, e a Moses, Aron, me a Hur a mla er a bita el ked. A lsekum a Moses a mechei a chimal me ngdi ngarbab, e a Jehovah a mo olengeseu er a rechad er a Israel el  mo mesisiich er a recherrouir. A Moses er a bo lak el sebechel el oldars er a chimal, e a Aron me a Hur a mla er isei el olengeseu er ngii. Me ngoeak a ngelsuil a Jehovah me a ulekerreu er ngii, e a “Josua a di mlo mesisiich er a re chad er a Amalek.” (Exo. 17:8-13) A uriul er isei, e a Moses a tileketekii a olengetongel er isei, e milekedongii el kmo “Jehovah-nissi,” el belkul a kmo “A RUBAK a bangderang er ngak.”​—Monguiu er a Exodus 17:14, 15.

18, 19. Ngar er aika el mereko el rak e a Dios ngmla mesterir a remesiungel a ngera el ulekerreu?

¹⁸ A Jehovah a omekerreu er tirke el betik a rengrir er ngii e olengesenges er ngii. Me nguai a rechad er a Israel er a lengar er a Refidim, e ngkired el ultuil er a Dios el kirel a ulekerreu er a recherroued. A Jehovah a blechoel el omekerreu er kid, e melemolem el omekerreu er kid er a ultekengel a Diabelong. Nguai tiang, a Dios a mla mo betok el taem el lomekerreu er a rudam er kid el mlodechelakl e le te diak loba bitang me a ka lebitang. Tiang a dilubech er a beluu er a Germany me a kuk bebil er a beluu er sel taem el chad er a Nazi a mlo mengedereder er aike el rak er a 1930 me a uchelel aike el rak er a 1940. Me sel donguiu e dolebedebek aike el tekoi el dilubech el ngar er a Yearbook el kirel a ulekerreuil a Dios sel lengar er ngii a odechelakl, e ngmengal mo mesisiich a klaumerang er kid er a Jehovah.​—Psa. 91:2.

¹⁹ A Jehovah a dirrek el omekerreu er kid el oeak sel lomeskid a uleklatk el okiu a cheldebechelel me a babier el loltobed. Ka molatk er a rolel e aika el uleklatk a mla omekerreu er kid er aika el mereko el rak. A beluulechad a di merael el mo klou a klemeriarreng er tir er a tekoi er a durs, rrom, me a osengel a siasing er a remeau. Engdi a Jehovah a mla meskid a uleklatk me a ileakl el ngeso el mo omekerreu er kid me lak bo doruul a tekoi el mo uchul a telemellel a deleuill er kid me ngii. El uai tiang, kede dirk ngilai a uleklatk el mla er a Demad el ngar er a eanged el kmo ngkired el mengeroid er kid er a bedeklel a mekngit el klausechelei el okiu a social network. *​—1 Ko. 15:33.

20. Ngera el ulekerreu me a ulekrael a dengai er a ongdibel er kid?

²⁰ Kede mekerang e ochotii el kmo kede olengesenges aika el uleklatk e mosisechakl er a Jehovah? Kede meruul er tiang el oeak sel dolengesenges a llechul. (Isa. 54:13) A ongdibel er kid a ungil el basio el sebeched el mo er ngii e metik a ulekerreu me a ulekrael. Ngar er sei e a remechuodel a omeskid a ngeso me a ulekrael el ngar er a Biblia. (Gal. 6:1) A Jehovah a ousbech er tirka el “sengk” el mo omekerreu er kid el oeak a bltikerreng. (Efe. 4:7, 8) Me ngera kired el meruul a lsekum a remechuodel a meskid a uleklatk? Ngkired el kongei el olengesenges, e a doruul el uaisei, e a Jehovah a mo omekngeltengat er kid.​—Heb. 13:17.

21. (a) Ngera kirel el mo ulterekokl a rengud er ngii? (b) Ngera kede mo mesaod er a ongingil el suobel?

²¹ Me a leuaisei e bo dultuil er a chedaol klisichel a Demad el ngar er a eanged e dekengei a ulekrael el mla er ngii. Ngdirrek el kired el merriter el kirel a klengar er a Jesus e mo er sel tkurrebab el sebeched el mo oltirakl er a kerebil. A Jesus a ngiluu a kot el ungil el sengk e le ‘ngullengesenges el mo lmuut er a kodall.’ (Fil. 2:5-11) Kid me kede dirrek el mukngeltengat a lsekum e kede mui el oumerang er a Jehovah el oba rengud el rokir. (Osi. 3:5, 6) Me a leuaisei, e bo deblechoel el ultuil er a Jehovah, el ngii ngike el mo omeskid aike el dousbech e omekerreu er kid el lmuut el ungil er a ngii di el chad. Ngmera el klou el chetengakl el tekoi sel dosiou er a Jehovah e kmal mo uchul a deuil a rengud. Engdi ngmekerang a Jehovah e kmal mo kmeed el sechelid? A bltkil a rengud a mengal mo mesisiich sel bo donger er tia el ker er a ongingil el suobel.