1, 2. ¿Kausayninchej, imaynatachus Diosta rejsisqanchejpis tukuypatachu kikin? Sutʼinchay.

FAMILIATAQA Jehová rikhuricherqa (Efe. 3:14, 15). Chaywanpis uj familiapeqa mana tukuychu kikin kanku, nitaj kikin imaspichu rikukunku. Qanqa ichá jovenyanaykikama tatasniykiwan kausakorqanki. Wakenqa uj onqoyrayku, accidenterayku chayri waj llakiyrayku mana tatayoj, ni mamayoj rikhurerqanku. Wakintaj, tatasninkutaqa ni rejsillarqankupischu.

² Jehovaj kamachisninpis uj familia jinalla kanchej, chaywanpis kausayninchejqa mana kikinchu, nitaj tukuychu Diosmanta kikinta yachakorqanchej. Ichapis wakenqa cristiano familiapi wiñakorqanchej, wawamantapachataj Bibliamanta yachakorqanchej (Deu. 6:6, 7). Wakintaj, ichapis uj hermano Diosmanta willariwasqanchejrayku Bibliamanta yachakuyta qallarerqanchej (Rom. 10:13-15; 1 Tim. 2:3, 4).

3. ¿Imatataj herenciata jina japʼinchej, chaywanpis imatataj ruwayta atinchej?

³ Kausayninchej mana tukuypatachu kikin kajtinpis, Adán mana Diosta kasukusqanrayku juchata, wañuyta ima herenciata jina japʼinchej (Rom. 5:12). Jinapis, Jehovata mana wasanchaspa  sirvisqanchejrayku, payman Tatanchejman jina qayllaykuyta atinchej. Ñaupa tiempopi Diospa llajtanmanta kajkunaqa Isaías 64:8 versiculopi nin jina, “Tata Dios, qanmin Tatayku kanki” nispa niyta atej kanku. Chantapis Jesusqa Diosmanta mañakuyta yachachishaspa, kayta nerqa: “Janaj pachapi kashaj Tatayku, sutiyki jatunchasqa kachun”, nispa (Mat. 6:9).

4, 5. ¿Imastataj ukhuncharisunchej Tatanchej Jehovata astawan munakunapaj?

⁴ Tatanchej Jehovaqa paypi atienekusqanchejrayku allinta qhawawanchej, jarkʼawanchejtaj. Pay nin: “Cheqa sonqo kamachiy munakuwasqanrayku, noqa payta salvasaj, jarkʼasajtaj noqata rejsiwasqanrayku”, nispa (Sal. 91:14, NM). Jehovaqa llajtanta enemigosninmanta libran, mana chinkachisqa kanankupajtaj jarkʼan.

⁵ Jehovata astawan munakunapajqa pay tukuy imata Qowajninchej, Jarkʼawajninchej, aswan sumaj Amigonchej ima kasqanta qhawarina. Chay kinsa imasta ukhunchashaspataj, tʼukurina Tatanchej Jehovawan masichakusqanchejpi, payta jatunchanapaj imatachus ruwayta atisqanchejpipis. Chantapis Payman qayllaykojkuna ima bendicionestachus japʼisqankupi tʼukurinallataj (Sant. 4:8).

6. ¿Imatá qowanchej Jehová “tukuy ima allin kaj” paymanta jamusqanta rikhuchinanpaj?

⁶ Santiago kayta qhelqarqa: “Tukuy ima allin kaj, kʼacha kaj imaqa patamanta qosqa kashan cielopi kʼanchaykunata ruwaj Tatamanta”, nispa (Sant. 1:17). Kausaytapis Jehová uj regalota jina qowarqanchej (Sal. 36:9). Paypa munayninta ruwaspa kausakusun chaytaj, kay tiempopi ashkha bendicionesta japʼisun, qhepamantaj mosoj pachapi wiñaypaj kausakuyta atisun (Pro. 10:22; 2 Ped. 3:13). Chaywanpis Adán juchata, wañuyta ima herenciata jina saqewasqanchejrayku, ¿imaynatataj wiñaypaj kausayta atisunman?

7. ¿Imatataj Jehová ruwarqa paywan sumajta masichakunanchejpaj?

⁷ Jehovaqa tukuy imata Qowajninchej. Sutʼincharinapaj, khuyakuyninrayku juchamanta kacharichiwanchej. Imajtinchus tukuy runas Adanmanta juchata herenciata jina japʼerqanchej (Rom. 3:23). Jinapis, Jehovaqa munakuwasqanchejrayku paywan sumajta masichakunapaj ñanta kicharerqa. Apóstol Juan chaymanta parlaspa nerqa: “Kay jinamanta Diosqa munakuyninta rikuchiwarqanchej: Payqa uj kʼata Churinta kay pachaman kachamorqa, paynejta kawsayniyoj kananchejpaj. Chay munakoyqa kay jinapi rikukun: Mana noqanchej Diosta munakusqanchejpichu, manachayqa Dios munakuwasqanchejpi, Churinta kachamusqampitaj juchasninchejmanta Diospa phiñakuyninta wañuyninwan thasnunampaj”, nispa (1 Juan 4:9, 10).

8, 9. ¿Imaynatataj Abrahampa chantá Isaacpa tiemponpi Jehová rikucherqa tukuy imata Qoj kasqanta? (16 paginapi dibujota qhawariy.)

⁸ Jesús nacekunanpaj 1.900 watas jina faltashajtin Abrahampa kausayninpi imachus kasqanpi tʼukurina. Chayqa rikucherqa runas wiñaypaj kausayta atinankupaj imatachus Jehová ruwayta munasqanta. Hebreos 11:17-19 versiculospi jinata sutʼinchan: “Creesqanrayku Abrahamqa pruebaman churasqa kaspa, kʼata churin Isaacta Diosman jaywarqa uywa wañuchisqata jina, pichus Diospa nisqanman jina nacekorqa, chayta. Diosqa Abrahamman nisqa: Isaacnejta mirayniykeqa kanqa, nispa. Abrahamrí ajinata ruwarqa, imaraykuchus yuyasharqa Dios atiyniyoj kasqanta wañojkunata kawsarichinampaj. Chayrayku nisunman, wañusqas ukhumanta churinta watejmanta kawsashajta japʼikapusqanta”,  nispa. Jehovapis, runasrayku wawan Jesucristota tukuy sonqo jaywarqa (Juan 3:16, 36 leey).

⁹ Isaacqa maytachá kusikorqa chay kutipi mana wañusqanmanta. Chantapis, maytachá Jehovaman agradecekorqa cuentanmanta uj carnerota sachʼas ukhupi jarapʼasqata qosqanmanta (Gén. 22:10-13). Chayraykuchá Abrahamqa chay cheqata “Jehová-yiré, NM” nispa suticharqa, chaytaj niyta munan “Tata Diosqa qon, imachus mana kanchu, chayta” (Gén. 22:14).

10, 11. ¿Pikunataj Dioswan“allinyakuna” kasqanmanta willaypi ñaupajpi kanku?

¹⁰ Jehová tukuy imata qowasqanchejpi tʼukurina. Jesús kausayninta mana jaywanmanchu karqa chayqa mana Dioswan allinyakuyta atisunmanchu karqa, chay jawa maytapuni chaymanta agradecekunchej. Pablopis chayta yachaspa kayta qhelqarqa: “Kayta allinta yachasqaykurayku: Uj wañorqa tukuyrayku, jinallatataj tukuy wañorqanku. Señorqa tukuypaj wañorqa, kunan kawsajkuna amaña paykunapajchu kawsanankupaj, astawanqa kawsanankupaj, jaqay pichus wañorqa, kawsarimporqataj paykunarayku, chaypaj”, nispa (2 Cor. 5:14, 15).

¹¹ Ñaupa cristianosqa Diosta munakorqanku, sirviyta atisqankumantataj agradecekorqanku. Chayrayku, “paywan allinyakuna” kasqanmanta tukuy sonqo parlarqanku. Willasqankurayku, yachachisqanrayku imataj, ashkha llampʼu sonqo runas Dioswan allinyakuyta, masichakuyta ima aterqanku, Diostaj wawasninpaj rejsikaporqa. Kunanpis ajllasqa cristianosqa kikillantataj ruwashanku. Paykunaqa Diospa sutinpi, Cristoj sutinpiwan willajkuna kasqankurayku, runasta wajyarinku Jehovaman qayllaykunankupaj, kamachisninmantaj tukunankupaj (2 Corintios 5:18-20 leey; Juan 6:44; Hech. 13:48).

12, 13. ¿Imaynatataj Jehová tukuy imata qowasqanchejmanta agradecesqa kasqanchejta rikuchisunman?

¹² Jallpʼapi wiñaypaj kausakuyta suyakojkunaqa, ajllasqa cristianosta Reinomanta willaypi yanapakunku. Ajinamantataj, Jehová tukuy imata Qowajninchej kasqanmanta agradecekusqankuta rikuchinku. Chay willaypeqa Bibliawanpuni yanapachikunchej, mayqenchus Diospa sumaj regalollantaj (2 Tim. 3:16, 17). Diospa Palabranmanta sumajta yachachispaqa runasta wiñay kausayta japʼinankupaj yanapanchej. Jehovaqa chay llankʼayta sumajta juntʼanapaj espíritu santontapis qollawanchejtaj (Zac. 4:6; Luc. 11:13). Anuario de los testigos de Jehová nisqa librosta leespaqa ajinapuni kasqanta rikunchej. Chantapis willayninchejqa Jehovata jatunchan, pichus Tatanchej, tukuy imata Qowajninchejtaj. Chayrayku chaypi yanapakoyqa may sumaj.

¹³ Jehová tukuy imata qowasqanchejrayku sumaj kanman kaykunata tapurikunanchej: “¿Tukuy atisqaytachu willani agradecekusqayta rikuchinaypaj? ¿Imastataj ruwayman aswan sumajta willanaypaj?”, nispa. Diospa Reinonta kausayninchejpi ñaupajman churaspaqa, agradecesqa kasqanchejta rikuchinchej. Jehovataj ni imamanta pisichiwasunchu (Mat. 6:25-33). Dios munakuwasqanchejrayku, sonqonta kusichinapaj tukuy atisqanchejta ruwayta munanchej (Pro. 27:11).

14. ¿Imatataj Jehová ruwarqa kamachisnin qhatiykachasqa kashajtinku?

¹⁴ Davidqa jinata takerqa: “Noqa wajcha, llakisqataj kani; ama qonqawaychu Señor. Qanmin yanapawaj, salvawajtaj kanki”, nispa (Sal. 40:17). Jehovaqa llajtanta kutin kutita salvarqa, astawanpis enemigosnin sinchʼita qhatiykachashajtinku. Noqanchejpis, ¡mayta agradecekunchej Payta mana wasanchanapaj yanapawasqanchejmanta!

15. Imaynatachus uj tata wawanta salvasqanmanta parlariy.

¹⁵ Uj munakuyniyoj tataqa wawasninman ni imata pisichinchu. Chantapis, tukuy imamanta jarkʼayta munan, imapi rikukojtinkutaj usqhayllata yanapan. Uj hermano yuyarikun uj pʼunchay wawa kashajtin tatanwan willaymanta kutipushajtinku imachus kasqanmanta. Chay paqarin mayta paramusqanrayku, mayuntaqa ashkha yaku jamushasqanta rikorqanku. Chay jawa, rumimanta rumi phinkispa chay mayuta chimpasharqanku. Payqa tatanpa ñaupaqenta risharqa, jinallapitaj ujnin rumipi lluskʼaspa yakuman urmaykorqa, iskay kutitataj chinkaykaporqa. Tatantaj lijritanmanta kallpawan japʼiykuspa yakumanta orqhorqa, jinamanta payta salvarqa. Payqa may kusisqa kasharqa mana wañusqanmanta. Ajinallatataj Tatanchej Jehovapis kay sajra pachamanta, Satanasmanta ima librawanchej. Pay jawaqa mana waj Jarkʼaj kanchu (Mat. 6:13; 1 Juan 5:19).

16, 17. ¿Imaynatataj Jehová israelitasta amalecitaswan maqanakushajtinku yanaparqa, jarkʼarqa ima?

¹⁶ Jehovaqa Israel llajtanta Egiptomanta kacharichispa, munakuywan jarkʼasqanta rikucherqa. Israelitasqa Jesús niraj jamushajtin 1513 watapi Puka Qochanejta chimparqanku. Chaymantataj Sinaí Orqoman rishajtinku, Refidim nisqa cheqaman chayarqanku.

¹⁷ Satanasqa sumajta yacharqa imatachus Génesis 3:15 versiculopi nisqanta. Chayrayku israelitasta tukuy imaymanamanta chinkachiyta munarqa. Chay jawa amalecitasnejta paykunata ñakʼaricherqa, pikunachus israelitaspa enemigosnin karqanku (Núm. 24:20). Imatachus chay kutipi Josuenejta, Moisesnejta, Aaronnejta, Hurnejta ima Jehová ruwasqanpi tʼukurina. Josueqa amalecitaswan maqanakamorqa.  Chaykamataj Moiseswan, Aaronwan, Hurwan ima jatun orqo puntaman wicharerqanku. Moisés makinta pataman oqharishajtenqa israelitas amalecitasta atipanayasharqanku. Jinata oqharisqanpi Moisespa makisnin utiykojtintaj Aaronwan, Hurwanqa sapa uj makinmanta japʼerqanku. Josueqa Jehová yanapasqanrayku, jarkʼasqanrayku ima “amalecitasta espadawan atiparqa” (Éxo. 17:8-13). Chayrayku Moisesqa chay cheqapi uj altarta ruwarqa, suticharqataj “Jehová-nisí” nispa, chaytaj hebreo qallupi “Jehová Pakakunayqa” niyta munan (Éxo 17:14, 15, NM).

18, 19. ¿Imaynatataj Jehová kay tiempopi jarkʼawanchej?

¹⁸ Jehovaqa payta munakojkunata, kasukojkunata ima jarkʼan. Israelitasqa Refidimpi kashajtinku Jehovapi atienekorqanku. Noqanchejpis Jehovapi pakakuyta maskʼanchej enemigosninchej contranchejpi sayaykojtinku. Jehovaqa llajtanta mashkha kutispi jarkʼan, Satanaspa makinmantataj salvan. Wakin cristianostaqa mana kay pachaj imasninman chhapukusqankurayku llakiypi rikukushajtinku jarkʼarqa. Alemaniamanta, waj suyusmanta ima ashkha hermanosqa Hitler 1930, 1940 watas chaynejpi kamachishajtin ñakʼarichisqa karqanku, Jehovataj paykunata jarkʼarqa. Anuario nisqa librosta leespaqa, qhatiykachasqa kashajtinku Jehová kamachisninta jarkʼasqanta rikunchej. Chaypi tʼukurispataj, Jehová Pakakojninchej kasqanpi astawan atienekunchej (Sal. 91:2).

¹⁹ Jehovaqa llajtannejta, publicacionesnejta ima sumaj yuyaychaykunata qowanchej. Chay yuyaychaykunataj kay tiempopi mayta yanapawanchej. Kay pacha runasqa khuchichakuyman, machachej ujyanasta ujyayman, mana pʼachayojkunata qhawayman ima astawan qokushanku. Jehovataj mana chaykunapi urmanapaj ashkha yuyaychaykunata qowanchej. Sutʼincharinapaj uj Tata jina, Internetnejta wajkunawan masichakuymanta allinta qhawarikunata niwanchej (1 Cor. 15:33). *

20. ¿Imatataj qotuchakuypi tarinchej?

²⁰ ¿Imaynatataj rikuchisunman Jehovaj yachachisqasnin kasqanchejta? Kamachiykunasninta tukuy imapi kasukuspa (Isa. 54:13). Qotuchakuykunapeqa sumaj yuyaychaykunata, jarkʼayta ima tarinchej. Imajtinchus ancianosqa Biblia nisqanman jina yanapariwanchej, yuyaychariwanchejtaj (Gál. 6:1). Arí, Jehovaqa ancianosta regalosta jina qorqa, paykunanejta munakuywan qhawanawanchejpaj (Efe. 4:7, 8). Chayrayku noqanchejqa paykunata kasukuna, kamachiyninkupitaj kana (Heb. 13:17).

21. 1) ¿Imatataj ruwayta munanchej? 2) ¿Imatá qhepan yachaqanapi ukhuncharisun?

²¹ Tatanchej Jehová yuyaychanawanchejta, espiritunwantaj yanapanawanchejta saqekunallapuni. Chantapis Churin Jesucristoj ruwasqanpi tʼukurina, pay jina ruwanapajtaj kallpachakuna. Payqa wañuchisqa kanankama kasukullarqapuni, Jehovataj chayrayku mayta bendicerqa (Fili. 2:5-11). Noqanchejpis Jehovapi tukuy sonqo atienekusun chayqa, ashkha bendicionesta japʼisun (Pro. 3:5, 6). Chayrayku, Jehová tukuy imata Qowajninchej, Jarkʼawajninchej ima kasqanta ama qonqanachu. Payta sirviyta atisqanchejqa, ¡ni imawan kikinchakunchu! Chaywanpis, ¿imaraykutaj nillasunmantaj Jehová aswan sumaj Amigonchej kasqanta? Qhepan yachaqanapi chayta ukhuncharisun, Payta astawan munakunapajtaj yanapawasun.