1, 2. ¿Imanasqataq imayna tarikusqanchikpi hinaspa Diosta imayna reqsisqanchikpi mana chaynallachu kanchik?

JEHOVA DIOS unanchasqanraykum lliw ayllukuna kan (Efes. 3:14, 15, NM). Sapakama aylluyoq kaspapas manamá imayna kayninchikpiwan imayna tarikusqanchikpiqa chaynallachu kanchik. Ichapas wakinkuqa tayta-mamankuwan yacharqaku yuyayniyoq kanankukama. Wakinkupaqa ichapas tayta-mamanku onqoywan otaq ima desgraciawanpas wañukurqa. Wakinkuñataqmi tayta-mamankutaqa mana reqsirqakupaschu.

² Jehova Diospa serviqninkunapas llapanchikmi Diospa llaqtanpiqa huk ayllu hinalla kanchik, ichaqa manam chaynallachu kanchik imayna tarikusqanchikpiwan Diosta imayna reqsisqanchikpiqa. Ichapas qamtaqa taksacha kasqaykimantapacha tayta-mamayki Jehova Diosmanta yachachisurqanki (Deut. 6:6, 7). Otaq wakin cristianokuna hina Jehova Diosmanta pipas willasusqaykirayku paymanta yacharurqanki (Rom. 10:13-15; 1 Tim. 2:3, 4).

3. ¿Imaynam llapallanchik kanchik?

³ Qawamusqanchikman hinaqa, ayllunchikpi hinaspa Dios reqsisqanchikpi mana chaynalla kaspanchikpas, llapallanchikmi Adan mana kasukusqanrayku pantaq, huchayoq hinaspa wañuq  kanchik (Rom. 5:12). Chayna kaptinpas, tukuy sonqonchikwan Jehova Diosta servisqanchikraykum Taytanchik kasqanta nichwan. Ñawpaq tiempopipas Jehova Diospa akllasqan llaqtanmi kaynata nirqa: “Dioslláy, taytaykum kunanqa kanki”, nispa (Is. 64:8). Chaymantapas, Jesusmi Taytanta mañakuspan kaynata nispan qallarirqa: “Hanaq pachapi Taytayku, sutiki yupaychasqa kachun”, nispa (Mat. 6:9).

4, 5. ¿Imamantam yachasunchik Taytanchik Jehova Diosta astawan kuyanapaq?

⁴ Hanaq pachapi Taytanchikqa cuidawanchik hinaspa waqaychawanchikmi sutinmanta iñiywan qayakuqkunataqa. Paymi niwanchik: “Ñoqata kuyawasqanraykum ñoqapas payta librasaq. Ñoqata reqsiwasqanraykum seguro sitiopi churasaq”, nispa (Sal. 91:14). Jehova Diosqa enemigonkunamantam llaqtanta libran hinaspapas mana chinkachisqa kananpaqmi waqaychan.

⁵ Astawan Jehova Diosta kuyanapaq qatiqninpi qawasun: Tukuy Qowaqninchik kasqanmanta, Waqaychawaqninchik kasqanmanta hinaspa aswan allin Amistadninchik kasqanmanta. Sapakamamanta qawaspanchik yuyaymanasun Taytanchik Jehova Dioswan amistadninchik imayna kasqanmanta hinaspa payta hatunchanapaq ima ruwananchikmanta. Yuyaymanasuntaq payman asuykuqkuna ima bendicionkuna chaskisqankumantapas (Sant. 4:8).

6. ¿Imaynatam Jehova Diosqa qawachiwanchik ‘llapa ima allin kaqkuna’ paymanta hamusqanta?

⁶ Jesuspa qatiqnin Santiagom qellqarqa: “Cielopi kanchaqkuna unanchaq Diosmantam chaskinchik llapa ima allin kaqkunataqa”, nispa (Sant. 1:17). Kawsakuyninchikpas Jehova Diospa qowasqanchik sumaq regalom (Sal. 36:9). Chay kawsakuyninchikta paypa munayninta ruwanapaq servichikuspaqa, Jehova Diospa bendicionninkunatam chaskinchik hinaspapas wiñay kawsay suyakuyniyoqmi kanchik (Prov. 10:22; 2 Ped. 3:13). Ichaqa, ¿imaynatam chayta haypayta atichwan huchatawan wañuyta Adanmanta chaskisqanchikrayku?

7. ¿Imatam Jehova Diosqa ruwarqa paywan allin amistad kananchikpaq?

⁷ Jehova Diosqa Qokuykuq kasqantam qawachiwanchik. Payqa kuyawasqanchiktam qawachiwanchik huchamantawan wañuymanta librawaspanchik. Llapallanchikmi huchayoq kanchik hinaspapas Adanraykum pantaq runakuna kanchik (Rom. 3:23). Chayna kaptinpas, anchata kuyawasqanchikraykum Churinta kachamurqa rantinchikpi wañunanpaq, chaynapi paywan allin amistad kananchikpaq. Apostol Juanmi nirqa: “Diosninchikmi sapallan Churinta kay pachaman kachamurqa payrayku wiñay kawsayniyoq kananchikpaq, chaynatamá Diosninchikqa kuyawasqanchikta qawachiwarqanchik. Kaymá chay kuyakuyqa: Manam ñoqanchikchu Diostaqa kuyarqanchik aswanqa paymi ñoqanchikta kuyawaspanchik Churinta kachamurqa huchanchikrayku piñakuyninta amachaq kananpaq”, nispa (1 Juan 4:9, 10).

8, 9. ¿Imaynatam Jehova Diosqa Abrahampa hinaspa Isaacpa tiemponpi Qokuykuq kasqanta qawachirqa? (Qaway 16 kaq paginapi dibujota.)

⁸ Jesuspa nacesqanmanta yaqa 1.900 wata ñawpaqtaraqmi, Abrahampa ruwasqan qawachirqa kasukuq runakuna wiñay kawsayta haypanankupaq Jehova Diosninchik ima ruwananmanta. Hebreos 11:17-19 nisqanmi kaynata willawanchik: “Pruebasqa kaspanpas Abrahamqa iñiyllawanmi churinta wañuchinanpaq churakuykurqa. Promesakuna chaskiq Abrahanmá sapallan churinta presentarqa: ‘Cheqap castaykiwan sutichasqaqa kanqa Isaacllamantam’ nispa Dios nichkaptinpas. Wañuruptinpas Diosqa atiyninwan kawsarichiq kasqanpim Abraham yuyaymanarqa. Abrahamqa wañusqakunamanta kawsarimuchkaqta hinam churinta chaskiykurqa”, nispa. Imaynam Abraham churin  Isaacta ofrendata hina qoyta munarqa, chaynataqmi Jehova Diospas Churin Jesucristota qorqa llapallan runakunarayku (leey Juan 3:16, 36).

⁹ ¡Maynatachá Isaacpa sonqonqa tiyaykurqa chay kutipi mana wañuptinqa! Jehova Diostam anchata agradecekurqa paypa rantinpi wañunanpaq chaprapi arwikusqa carnerota qoykuptin (Gen. 22:10-13). Chayraykuchá Abrahamqa chay sitiota suticharqa “Tayta Diosmi Churamunqa” nispa (Gen. 22:14).

10, 11. ¿Pikunataq runakuna Dioswan allinyanakunankupaq willakuyta qallarirqaku, hinaspa imaynatam chayta ruwarqaku?

¹⁰ Jehova Diospa tukuy qowasqanchikkunapi yuyaymanaspam, reqsikunchik ñoqanchikrayku Jesus wañukusqallanwan Dioswan allinyanakuy atisqanchikta. Chayna kasqantam Pablopas reqsikurqa, paymi qellqarqa: ‘Llapallanchikpa rantinchikpi Cristopa wañusqanta yachaspaqa yachanchiktaqmi wañusqa hinaña llapallanchik kasqanchiktapas. Cristoqa wañurqa llapallanchikpaqmi chaynapi kawsaqkunapas manaña kikillanchikpaq kawsaspa Cristopaqña kawsananchikpaq, payqa wañukuspanmi kawsariramurqa’, nispa (2 Cor. 5:14, 15).

¹¹ Punta cristianokunaqa Jehova Diostam kuyarqaku, agradecekurqakutaqmi payta servisqankumantapas. Chayraykum runakuna Dioswan allinyanakunankupaq kamachisqa kasqankuta kusikuywan chaskirqaku. Diosmanta willakusqankum allin sonqoyoq achka runakunata yanaparqa Dioswan allinyanakunankupaq, allin amistad kanankupaq hinaspa churinkuna kanankupaqpas. Chay ruwaytam kunan tiempopi hanaq pachapaq cristianokunapas ruwachkanku. Diospa hinaspa Jesucristopa willakuqninkuna kasqankuraykum, allin sonqoyoq runakunata yanapanku Diosta servinankupaq (leey 2 Corintios 5:18-20; Juan 6:44; Hech. 13:48).

12, 13. ¿Imaynatam allin kaqkunata Dios qowasqanchikmanta agradecekusqanchikta qawachichwan?

¹² Qokuykuq Jehova Diosta agradecekuspankum, kay Pachapaq suyakuyniyoq cristianokunaqa hanaq pachaman rinankupaq suyakuyniyoq cristianokunata Diosmanta willakuypi yanapanku. Chay ruwaypim Bibliata servichikunchik, chaypas Jehova Diospa qowasqanchik sumaq regalom (2 Tim. 3:16, 17). Allinta Bibliata servichikuspanchikmi, runamasinchikta yanapanchik wiñay kawsayta haypanankupaq. Ichaqa manamá chayllachu. Jehova Diosqa qowanchiktaqmi chuya espirituntapas paymanta willakunapaqqa (Zac. 4:6; Luc. 11:13). Anuario sutiyoq librokunapim leenchik Diosmanta willakuyninchik imayna yapakusqanmanta. ¡Mayna sumaqmá Taytanchik hinaspa Qowaqninchik Diosta hatunchanapaq chaypi yanapakuyqa!

¹³ Tukuy imakunata Jehova Dios qowasqanchikraykum tapukunanchik: “¿Tukuytachu ruwani Diosmanta willakunaypaq chaynapi tukuy qowasqanmanta anchata agradecekusqayta qawachinaypaq? ¿Imapitaq astawan kallpanchakunay Diosmanta aswan allinta willakunaypaq?”, nispa. Agradecekusqanchiktam qawachisun Diospa munayninta puntapi churaspa. Chaynapim Jehova Diosqa imapas pisipuwaqninchikta qowasunchik (Mat. 6:25-33). Kuyakuywan Jehova Dios waqaychawasqanchikqa sonqonta kusichinapaqmi kallpanchawanchik (Prov. 27:11).

14. ¿Llaqtan imayna tarikuptinmi Jehova Diosqa librarqa?

¹⁴ Rey Davidmi takirqa: “Ñakariqña kallaptiypas [. . .]. Wakcha runa kallaptiypas Tayta Diosnillaymá qonqallawanchu. Qamqariki ñoqallayta yanapawaspamá dejawankichu”, nispa (Sal. 40:17). Jehova Diosqa achka kutipim llaqtanta librarqa, astawanraqmi enemigonkunawan llumpay qatikachasqa kaptinkuqa. ¡Anchatamá Jehova Diosta agradecekunchik iñiyninchikpi takyananchikpaq  chayna sasachakuypi yanapawasqanchikmanta hinaspa allin kaqkunata hinalla qowasqanchikmanta!

15. ¿Imaynatam kuyakuq tayta churinta waqaychaspan salvarqa?

¹⁵ Kuyakuq taytaqa manam imapas necesitasqallantachu churinkunamanqa qon, aswanqa imamantapas waqaychanmi. Sasachakuypi tarikuptinkuqa mana iskayrayaspanmi yanapan. Huk iñiqmasinchikmi willakun warmallaraq kachkaspan taytanwan kuska Diosmanta willakusqankumanta kutimuchkaptinku, mayu hinaña lloqlla harkarusqanmanta. Chay lloqllaqa yarqamantam lloqsiramurqa llumpayta pararamusqanrayku. Chaymi paykunaqa rumikunaman sarupakuspanku chimpananku karqa. Payqa taytanpa ñawpaqnintam rirqa, ichaqa rumiman mana allinta saruruspanmi yakuman wichikuykurqa. Hinaptinmi taytanqa chaylla hombronmanta hapiruspan wañunanmanta salvarurqa. ¡Anchatamá payqa agradecekurqa! Chaynallataqmi Jehova Diosninchikpas kay Pachapi sasachakuykunamanta hinaspa Satanaspa mana allin ruwawasqanchikmanta librawanchik. Arí, Jehova Diosninchikqa pimantapas ancha allin Waqaychawaqninchikmi (Mat. 6:13; 1 Juan 5:19).

16, 17. ¿Imaynatam Jehova Diosqa Israel runakunata waqaycharqa Amalec casta runakunawan peleaptinku?

¹⁶ Jehova Diospa waqaychakuq kasqanmi sutillata qawakurqa 1513 watapi Israel runakuna Egipto nacionmanta librasqa kasqanku qepaman. Paykunaqa Puka lamar qochatam chimparurqaku hinaspam Sinai orqoman risqankupi Refidim lawman chayarurqaku.

¹⁷ Genesis 3:15 nisqanpi willakuymanta yachasqanraykum, Satanasqa Israel runakunata imaynatapas chinkarachiyta munarqa. Chaypaqmi Satanasqa Diospa llaqtanpa contranpi kaq Amalec casta runakunata  servichikurqa (Num. 24:20). ¿Imaynatam Jehova Diosqa llaqtanta waqaycharqa Josueyta, Moisesta, Aaronta hinaspa Hur sutiyoq runata servichikuspan? Josueymi Amalec casta runakunawan peleaq lloqsirqa. Moises, Aaron hinaspa Hurñataqmi orqopa puntanman rirqaku. Makinta Moises altoman hoqariptinmi Israel runakuna venceq. Chaymi Moisespa brazonkuna utiruptin Aaronwan Hurqa takyachirqaku. Jehova Diospa yanapakuyninwanmi “Amalec runakunata Josuey vencerurqa” (Ex. 17:8-13). Hinaptinmi Moises chay lawpi altarta perqaspan suticharqa “Diosmi banderay” nispa (leey Exodo 17:14, 15).

18, 19. ¿Imaynatam Jehova Diosqa kunan tiempopi waqaychawanchik?

¹⁸ Jehova Diosqa payta kuyaqkunatawan kasukuqninkunatam waqaychan. Israel runakuna Refidim lawpi ruwasqankuman hinam ñoqanchikpas contranchikpi hatariptinku Jehova Diosta maskanchik waqaychawananchikpaq. Payqa achka kutipim llaqtanta waqaycharqa hinaspapas Satanasmantam librarqa. Achka kutipim Jehova Diosqa serviqninkunata waqaycharqa mana pimanpas sayapakusqankurayku qatikachasqa kasqankumanta. Chaynam pasakurqa Alemania nacionpi hinaspa huk nacionkunapi achka iñiqmasinchikkunawan, paykunam 1930 hinaspa 1940 watakunapi nazi tropakunawan qatikachasqa karqaku. Anuario librokunapim willakun serviqninkunata Jehova Dios imayna waqaychasqanmanta. Chayta leespa yuyaymanaptinchikqa paypi hapipakunapaqmi allinta yanapawasun (Sal. 91:2).

¹⁹ Waqaychasqa kananchikpaqmi yachachikuykunata chaskinchik Diospa llaqtantakama hinaspa chaskisqanchik qellqantakama. Chay yanapakuykunaqa allintapunim kunan tiempopi yanapawanchik. Kay Pachapi runakunaqa astawanraqmi munasqallankuman hina ruwayman hinaspa millakuypaq qalalla kaqkunata qawayman qokuchkanku. Jehova Diosmi ichaqa consejokunata qowanchik tukuy chay toqllakunaman mana wichiykunapaq. Chaymi Taytanchik hina niwanchik mana allin amistadkunamanta karunchakunapaq, chay mana allin amistadkunamanmi wichiykuchwan Internetnintakama (1 Cor. 15:33). *

20. ¿Imaynatam Jehova Diosqa congregacionpi waqaychawanchik?

²⁰ ¿Imaynatam qawachichwan Jehova Diospa yachachisqan kasqanchikta? Kamachikuyninkunata allinta kasukuspanchikmi (Is. 54:13). Congregacionkunapim tarinchik waqaychasqa kanapaq allin yachachikuykunata, chaypim Diosman sonqo ancianokuna Bibliapa nisqanman hina yanapakuykunata qowanchik (Gal. 6:1). Chay ancianokunatam Jehova Diosqa servichikuchkan kuyakuywan waqaychawananchikpaq (Efes. 4:7, 8, NM). ¿Imatam ñoqanchikqa ruwananchik? Kasukunanchikmi, chaynapim Jehova Diosqa bendeciwasun (Heb. 13:17).

21. a) ¿Imapaqmi kallpanchasqan kachkanchik? b) ¿Imamantam qatiqnin yachachikuypi qawasun?

²¹ Chaynaqa, saqekusunyá Diospa chuya espiritunwan hinaspa yachachikuyninkunawan yanapachikunapaq. Yuyaymanasuntaq Churin Jesucristo qatipakunapaq hina kasqanpi, kallpanchakusuntaq qatipakunapaqpas. Payqa wañukunankamam kasukuq karqa chaymi Jehova Diosqa bendeciykurqa (Filip. 2:5-11). Ñoqanchikpas tukuy sonqonchikwan Jehova Diospi hapipakuspanchikqa bendecisqam kasun (Prov. 3:5, 6). Hinaptinqa, amayá qonqasunchu Jehova Dios Qowaqninchik hinaspa Waqaychawaqninchik kasqanta. ¡Mayna kusikunapaqmi payta serviyqa! Ichaqa, ¿imanasqataq nichwan Jehova Diosqa ancha allin Amistadninchik kasqanmanta? Kaymanta qatiqnin yachachikuypi qawayninchikmi astawan yanapawasun payta astawan kuyanapaq.