1, 2. a) ¿Imashinata familia ucupillata shuj shuj canchi? b) ¿Imashinata Jehová Diosmanda yachajupashcanchi?

FAMILIATACA Jehová Diosmi callarichirca (Efes. 3:​14, 15). Shinapash familia ucupillatami cada uno shuj shuj canchi. Huaquingunaca jatunyangacamanmi taitamamahuan viñashcanchi. Cutin shujcunaca, taitamamacuna imapash ungüi japijpi o imapash llaquipi huañujpimi taitamama illaj viñashcanchi. Huaquingunacarin taitamamataca rijsitallapash na rijsishcanchichu.

² Jehová Diosta sirvijcunapash shuj familia cuendami canchi. Shinapash cada unomi shuj shuj canchi. Huaquingunamanga Jehovata sirvij taitamamacunami Jehová Diosmanda yachachishca (Deut. 6:​6, 7). Cutin ashtacacunamanga shuj huauquipanicunami Jehová Diosmanda yachachishca (Rom. 10:​13-15; 1 Tim. 2:​3, 4).

3. ¿Imashinata tucuicuna canchi?

³ Cada uno shuj shuj cashpapash tucuicunallatami Adanba huahuacuna caimandaca juchayu nacirishpa huañunchi (Rom. 5:12). Shinapash, Jehová Diosta ali sirvimandaca tucuicunallatami Jehová Diostaca ñucanchi Taita ni ushanchi. Israelitacunaca  Isaías 64:8​pica nircami: “Mandaj Dioslla, canmi ñucanchi taita cangui” nishpa. Mañanata yachachijushpaca Jesusca nircami: “Jahua pachapi tiajuj ñucanchi Taitalla, cambaj jucha illaj shutiguca, alicachi tucushca cachun” nishpa (Mat. 6:9).

4, 5. Ñucanchi Taita Jehová Diosta ashtahuan juyangapaca ¿ima quimsa tapuicunatata ricugripanchi?

⁴ Ñucanchi jahua pachapi Taitaca paita ali sirvijcunata cuidashpa ricuriajunmi. Taita Diosca ninmi: ‘Ñucata juyashcamandami ñucapash paitaca cacharichisha. Paitaca ñuca shutita rijsishcamandami alicachi tucunapi churasha [“cuidariasha”, NM] nishpa (Sal. 91:14). Jehová Diosca paita sirvijcunata contracunamanda salvashpami ama tucuchichun cuidariajun.

⁵ Ñucanchi Taita Jehová Diosta ashtahuan juyangapaca cai quimsa tapuicunata ricupashun: 1) ¿Imashinata Jehová Diosca Ashtacata Caraj Dios cashcata ricuchijushca?, 2) ¿Imashinata cuidariajushca?, 3) ¿Imashinata ñucanchi ashtahuan ali Amigo cashcata ricuchijun? Cai tapuicunamanda yachajunajushpaca pensaripashunchi: “¿imashinata Diospa ñaupajpi ali ricurishpa catita ushani? ¿Imashinata Taita Diosta ashtahuan alabai ushani?” nishpa. Shinallata Jehová Diosman quimirimanda ima bendiciongunata charishcata yaripashunchi (Sant. 4:8).

6. Jehová Diosca ¿imashinata ‘imatapash juyailla aliguta caraj’ Dios cashcata ricuchishca?

⁶ Discípulo Santiagoca nircami: “Taita Diosca jahua pachamandami imatapash juyailla aliguta caramujun. Paillatami jahuapi punchayachishpa tiajcunatapash churashca” nishpa (Sant. 1:​17, Mushuj Testamento Quichua Imbabura). Tucuicunallatami Taita Dios causaita carajpi causanajunchi (Sal. 36:9). Taita Dios munashcashna causashpami cunanbica ashtaca bendiciongunata charinchi. Shamuj punllacunapicarin paraíso Alpapi unai unaicaman causana esperanzatami charinchi (Prov. 10:22; 2 Ped. 3:13). Shinapash juchasapa nacirishca gentecunaca ¿imashinata chai esperanzata charishun?

7. Paipa ali Amigo tucuchunga ¿imatata Jehová Diosca rurarca?

⁷ Jehová Diosca Ashtacata Caraj Diosmi can. Shuj ejemplota ricupashun. Tucuicunami Adanba culpamanda juchayucuna canchi (Rom. 3:23). Shinapash, gentecuna paipa ñaupajpi ali ricurichun munashpami Jehová Diosca ‘paipa shujlla Churita cai pachaman cachamushpa, ñucanchita juyajushcata ricuchirca. Ñucanchica Taita Diosta na juyashpami causarcanchi. Ashtahuangarin pairami ñucanchita juyarca. Paillatami paipa Churita ñucanchi juchacunata anchuchingapaj huañuchun cachamurca’ (1 Juan 4:​9, 10).

8, 9. Abrahanba Isaacpa tiempopica ¿imashinata Jehová Diosca Ashtacata Caraj Dios cashcata ricuchirca? (Callari dibujota ricupangui.)

⁸ Jesús naciringapaj casi 1.900 huatacuna faltajpi, Abrahán imata rurashcata ricupashunchi. Hebreos 11:​17-19​pica ninmi: ‘Ali crij cajta Diosman ricuchingapaj munashpami’ Abrahanga ‘Isaacta Diosman carashpa huañuchingapaj aparca. Isaacmandami miraita charingui nijpipash Taita Dios causachingami yashpami, Abrahanga’ Isaacta huañuchishpa Taita Diosman carangapaj munajurca. Imashinami Abrahanga paipa shujlla churita Taita Diosman carangapaj munarca, shinallatami Jehová Diospash tucui gentecunata ayudangapaj paipa shujlla Churita caramurca (Juan 3:​16, 36, liingui).

⁹ Isaacta huañuchina horas chayajpica Jehová Diosca shuj carnero llamatami ricuchirca. Chai carnero llamaca shuj sacha jihuapimi liarishpa quedashcarca. Chai  carnerotami Abrahanga Isaacpa cuenda huañuchishpa Jehovaman cararca (Gén. 22:​10-13). Paita na huañuchishcamandaca Isaacca ninandami cushijushcanga. Jehová Dios carnerota ricuchishpa carajpimi chai pushtutaca ‘Mandaj Diosmi caran’ nishpa shutichirca (Gén. 22:14).

10, 11. a) ¿Picunata ‘Taita Dioshuan ali tucuichi’ nishpa villachinajun? b) ¿Imashinata villachinajun?

¹⁰ Jehová Dios paipa Churita cachamushpa ayudashcamandami Jehová Dioshuan ali tucuita ushanchi. Apóstol Pabloca nircami: ‘Shujllami tucuicunamanda huañurca. Chaimandami tucuicuna huañushcashna tucurcanchi. Ama paicunapa munaihuanlla causachunmi Cristoca tucuicunamanda huañurca. Ashtahuangarin Cristopalla causachunmi, paicunamanda huañushpa causarirca’ nishpa (2 Cor. 5:​14, 15).

¹¹ Jesusta punda catijcunaca Taita Diostaca tucui shunguhuanmi juyarca. Paita sirvi ushashcamandapash ninandami agradicirca. Chaimandami ‘Dioshuan ali tucuichi’ nishpa villachigrichi nijpica cushijushpa villachinajurca. Paicuna villachijpi, yachachijpimi ali shungu gentecunaca Taita Dioshuan ali tucushpa, paipa amigocuna caita usharca. Ashtahuangarin, ali shungu gentecunaca Taita Diospa churicuna cuendami tucurca. Cunan punllacunapica Jesusta catij ungidocunami villachinajun, yachachinajun. Ungidocunaca Cristopa shutipipash Taita Diospa shutipipash rimashpami, gentecunataca Jehovaman quimirishpa paita sirvichun ayudanajun (2 Corintios 5:​18-20, liingui; Juan 6:44; Hech. 13:48).

12, 13. Jehová Dios ashtacata carashcamandaca ¿imashinata agradicita ushanchi?

¹² Ashtacata Caraj Diosta agradicishpami cai Alpapi causana esperanzata charijcunaca Diospa Reinomanda villachishpa ungidocunata ayudan. Ñucanchicunaca Taita Dios carashca Bibliahuanmi gentecunamanga villachinchi, yachachinchi (2 Tim. 3:​16, 17). Bibliapi textocunahuan aliguta yachachishpaca gentecuna unai unaicaman causana oportunidadta charichunmi ayudanajunchi. Villachichun, yachachichunga paipa espíritu santotapashmi Taita Diosca carashca (Zac. 4:6; Luc. 11:13). Taita Dios imashina ayudajushcata yachangapaca testigo de Jehovacunapa Anuario librocunatami liina canchi. Ñucanchicunaca villachishpa, yachachishpami Ashtacata Caraj Taita Diosta alabanajunchi.

¹³ Jehová Dios ñucanchicunaman ashtacata carashcamandami tapurina canchi: “¿ Jehová Diosta agradicimandaca villachingapaj, yachachingapaj ashtahuan esforzarijunichu? Ashtahuan aliguta villachingapaca ¿imatata rurana cani?” nishpa. Jehová Diosta agradicishcata ricuchingapaca Taita Diospa Reinotami pundapi churana canchi. Reinota pundapi churajpica tucuilla ñucanchi minishtishcacunatami Taita Diosca caranga (Mat. 6:​25-33). Jehová Dios ñucanchita juyashpa cuidajujta yachashpami paita ashtahuan cushichingapaj munanchi (Prov. 27:11).

14. Llaquilla punllacunapica ¿imashinata Jehová Diosca ayudan?

¹⁴ Davidca cashna nishpami candarca: ‘Llaquilla cajpipash, Mandaj Diosmi ñucataca yarihuanga. Canmi ñucata ayudaj, ñuca llaquimanda cacharichij capangui’ nishpa (Sal. 40:17). Paipa sirvijcunata contracuna ninanda llaquichijujpica cutin cutinmi Jehová Diosca ayudajushca. Chai llaqui punllacunapi ali ñanmanda ama caruyachun ayudajpi, espiritualmente ashtacata Jehová Dios carashcamandaca ninandami Jehová Diostaca agradicina canchi.

15. Huahuacunata cuidaimandaca ¿imatata taitacunaca ruran?

¹⁵ Jehová Diosca shuj taita cuenda caimandami ñucanchicunataca imapash llaqui ama japichun ricuriajun. Shuj ejemplota ricupashun. Shuj huauquica ninmi, ñuca uchila cashpaca ñuca taitandi villachingapaj llujsishca jipami huasiman tigranajurcanchi. Shinapash chai punllaca alihorata ushashcata tamiashpaca ñucanchi yalina huaicupica ushashcatami yacu jundashcarca. Chaimandami rumicunata brincashpa yalinajurcanchi. Ñucaca ñaupashpa yalijushpami rumimanda lluchashpa yacuman urmashpa ishcai viajeta casi ahogarircani. Chaita ricushcandimi ñuca taitaca ucha hombrosmanda japishpa llujchihuarca. Ñuca taita salvashcamandaca ninandami ñuca taitataca agradicini nin. Jehová Diospash ñucanchi Taita cuenda caimandami Diablopash cai nali mundopash ñucanchita ama llaquichichun cuidariajun. Jehová Diosllami ñucanchicunataca aliguta cuidai ushan (Mat. 6:13; 1 Juan 5:19).

16, 17. Amalequitacunahuan macanajuj horasca ¿imashinata Jehová Diosca israelitacunata cuidariajurca?

¹⁶ Jehová Diosca israelitacunata juyashpami cuidan carian. Jesús shamungapaj 1.513 huatacuna faltajpica, egipciocunamanda salvarishpami israelitacunaca mar Rojota yalishpa Sinaí nishca urcuman ringapaj munanajurca. Paicunaca Refidim nishca pushtupimi carca.

¹⁷ Shinapash Diabloca Génesis 3:15​pi shimicuna pactarichunga na munarcachu. Chaimandami amalequita gentecunahuan Diabloca israelitacunata tucuchingapaj munarca (Núm. 24:20). Shinapash Jehová Diosca ¿imatata rurarca? Jehová Diosca Josueta, Moisesta, Hurta, Aarondami agllarca. Josueca  amalequitacunahuan macanajungapami rirca. Cutin Moisés, Hur, Aaronga shuj loma jahuapimi shayarirca. Moisés maquita alzariajujpica israelitacunaca contracunata mishanajurcami. Cutin shaijushpa maquita urai churai callarijpica Hur, Aaronmi Moisespa maquita alzashpa charinajurca. Jehová Dios ayudajpi, cuidariajujpimi Josueca, Amaleqtapash paipa ‘soldadocunatapash espadahuan huañuchishpa tucuchijurca’ (Éx. 17:​8-13). Moisesca Jehová Dios ayudajpi, cuidajpimi chai pushtupica shuj altarta rurarca. Chai altartaca “Mandaj Diosmi, ñuca bandera”, [Jehovami ñuca Pacajuna Pushtu, Éx. 17:15, NM, nota] nishpami shutichirca (Éxodo 17:​14, 15, liingui).

18, 19. Cunan punllacunapica ¿imashinata Jehová Diosca cuidariajun?

¹⁸ Jehová Diosca paita juyajcunata, cazujcunataca cuidariajunmi. Imashinami israelitacuna Refidim nishca pushtupi cashpaca Jehovapa ayudata mascarca, shinallatami contracuna llaquichinajujpica Jehovapi pacajunchi. Jehová Diosca paipa sirvijcunata Diablo ama pandachichunga cuidariajushcami. Shuj ejemplota ricupashun. Alemania llactapi huauquipanicuna politicapi na chapuringapaj munashpa llaquichi tucunajujpica Jehová Diosca cuidariajurcami. Chai huauquipanicunata imashina Jehová Dios cuidariajushcata Anuario librocunapi liishpami Jehová Dios ñucanchi pacajuna pushtu cashcataca tucui shunguhuan crinchi (Sal. 91:2).

¹⁹ Cunan punllacunapi gentecunaca ashtahuan ashtahuanmi huaglinajun, paicuna munashcatalla rurashpa, lluchullacuna pinganai cosascunata ruranajujta ricushpami causanajun. Shinapash Jehová Diosca paipa organizacionhuan, publicaciongunahuanmi Bibliapi consejocunata intindichishpa chai trampacunapi ama urmachun ayudajun. Internetpi nali cumbacunamandapash cuidarinami canguichi nishpami taita cuenda consejajun (1 Cor. 15:33). *

20. Jehová Diosca ¿imashinata ñucanchicunata cuidariajun?

²⁰ Jehovapa mandashcacunata cazushpami Jehovapa ‘yachachishcacunata’ chasquishcata ricuchinchi (Is. 54:13). Ashtahuangarin congregacionbimi Jehovata ali sirvij ancianocunaca Bibliapi consejocunata intindichishpa ñucanchicunataca cuidariajun (Gál. 6:1). Ñaupajman pushachun jaricunata churashpami Jehová Diosca cuidariajushca (Efes. 4:​7, 8; NM). Jehová Dios chashna cuidariajushcamandaca ancianocunata uyana, cazunami canchi. Cazujpimi Jehová Diosca ñucanchicunata bendicianga (Heb. 13:17).

21. a) ¿Imatata rurangapaj munanchi? b) Shamuj temapica ¿imatata yachajupashun?

²¹ Shinaca Jehová Dios paipa espíritu santohuan ñaupajman pushachun saquipashunchi. Shinallata ñucanchi jahua cielopi Taitapa consejocunatapash cazupashunchi. Ashtahuangarin Jesuspa ali ejemplopi pensarishpa paipa ali ejemplota catipashunchi. Paica huañungacamanmi Jehovata cazurca. Chaimandami Jehová Diospash ashtacata Jesustaca bendiciarca (Filip. 2:​5-11). Ñucanchicunapash Jehovapi tucui shunguhuan confiashpaca ashtaca bendiciongunatami charishun (Prov. 3:​5, 6). Ama cungaripanguichichu, Jehová Diosmi Ashtacata Caraj Dios can. Paica cuidajunmi. Paita sirvinaca shuj jatun bendicionmi can. Shinapash ¿imamandata ninchi Jehová Diosca ñucanchi ali Amigomi can nishpa? Chaitaca shamuj temapi yachajushpami Jehová Diostaca ashtahuan juyashun.