1, 2. Situasaun saida deʼit mak la hanesan entre família ida-idak no mós dalan neʼebé sira hetan lia-loos?

 JEOVÁ mak hun ba família hotu-hotu. (Éfeso 3:14, 15) No tuir loloos, ema ida-idak iha família laran nia hahalok no situasaun la hanesan. Karik ita hamutuk ho ita-nia inan-aman husi kiʼik toʼo boot. Maibé balu seluk lakon sira-nia inan-aman tanba sira moras ka hetan dezastre ruma. No ema balu mós la hatene sé mak sira-nia inan-aman.

² Maski nuneʼe, ita hotu mak parte husi Jeová nia família boot, no hetan lia-loos iha dalan oioin. Karik ita sai boot iha lia-loos no ita-nia inan-aman hanorin Bíblia nia matadalan ba ita. (Deuteronômio [Ulangan] 6:6, 7) Ka, ita hanesan ema rihun ba rihun neʼebé hetan lia-loos tanba Testemuña ba Jeová haklaken ba ita.—Roma 10:13-15; 1 Timóteo 2:3, 4.

3. Saida mak hanesan kona-ba ita hotu?

³ Maski ita ida-idak mai husi situasaun neʼebé la hanesan, maibé iha buat neʼebé hanesan kona-ba ita hotu. Tanba Adão la halo tuir Maromak, ita hotu simu sala husi nia no ikusmai mate. (Roma 5:12) Maski nuneʼe, ita neʼebé halaʼo adorasaun neʼebé loos, iha direitu atu temi Jeová nuʼudar ita-nia “Aman”. Iha tempu antigu, Isaías koʼalia kona-ba Jeová nia povu neʼebé Nia hili hodi dehan: “Oh Jeová, Ita mak ami-nia Aman.” (Isaías  [Yesaya] 64:8) No mós, kuandu Jesus hanorin ninia dixípulu sira atu halo orasaun, nia hatete: “Ami Aman iha lalehan, halo Ita naran sai santu.”—Mateus 6:9.

4, 5. Ita sei koʼalia kona-ba saida deʼit neʼebé bele ajuda ita atu haburas liután domin ba ita-nia Aman iha lalehan?

⁴ Ita-nia Aman iha lalehan tau matan ba ninia povu no proteje kuandu presiza. Tuir Salmo [Mazmur] 91:14, Jeová hatete: “Tanba nia [ema neʼebé adora Jeová] hadomi haʼu, haʼu sei salva nia. Haʼu sei proteje nia tanba agora nia hatene ona haʼu-nia naran.” Sin, ho domin Jeová salva ninia povu husi sira-nia inimigu no fó protesaun ba sira hodi sira la bele lakon.—Roma 10:11-13.

⁵ Hodi bele haburas liután domin ba ita-nia Aman iha lalehan, mai ita koʼalia kona-ba oinsá Maromak halo buat tolu tuirmai neʼe: (1) Fó ba ita buat neʼebé ita presiza, (2) proteje ita, no (3) sai ita-nia belun diʼak liu hotu. Nuʼudar ita koʼalia kona-ba buat sira-neʼe, diʼak mós atu hanoin kleʼan kona-ba ita rasik nia relasaun ho Maromak no oinsá ita bele hahiʼi nia nuʼudar ita-nia Aman. Diʼak mós atu hanoin kona-ba bensaun sira neʼebé Jeová sei fó ba sira neʼebé hakbesik ba nia.—Tiago 4:8.

6. Tanbasá mak ita bele dehan katak “prezente diʼak ida-ida” mai husi Jeová?

⁶ Dixípulu Tiago hakerek: “Prezente diʼak ida-ida no kmanek loloos ida-ida mai husi lalehan, husi Maromak neʼebé hakiak naroman lalehan nian.” (Tiago 1:17) Prezente kapás ida husi Jeová mak moris. (Salmo [Mazmur] 36:9) Hodi uza ita-nia moris atu halo Maromak nia hakarak, ita hetan bensaun barak ohin loron, no iha aban bainrua moris ba nafatin iha mundu foun. (Provérbios [Amsal] 10:22; 2 Pedro 3:13) Maibé tanba Adão halo sala, oinsá mak ita bele hetan bensaun sira-neʼe?

7. Oinsá mak Maromak loke dalan ba ita atu iha relasaun diʼak ho nia?

⁷ Jeová mak Ida neʼebé fó buat barak ba ninia povu. Porezemplu, ninia laran-diʼak book nia atu salva ita. Hanesan ita aprende tiha ona, ita hotu simu sala husi ita-nia aman primeiru iha rai, Adão. (Roma 3:23) Maski nuneʼe, Jeová hatudu nia domin hodi loke dalan ba ita atu iha relasaun diʼak ho nia. Apóstolu João hatete: “Maromak hatudu nia domin mai ita wainhira nia haruka nia Oan mesak ba mundu, atu ita bele hetan moris husi nia. Neʼe mak domin: laʼós katak ita hadomi Maromak, maibé katak nia hadomi ita no nia haruka nia Oan mesak atu husi nia ita-nia sala bele hetan perdaun.”—1 João 4:9, 10.

8, 9. Saida mak Jeová halo iha Abraão no Isaac nia tempu hodi hatudu katak nia mak Ida neʼebé fó buat neʼebé nia povu presiza? (Haree dezeñu iha pájina 16.)

⁸ Maizumenus tinan 1.900 molok Kristu moris iha rai, buat ruma akontese iha Abraão nia moris hodi hatudu oinsá Jeová sei fó moris rohan-laek ba ema neʼebé halo tuir nia. Ebreu 11:17-19 hatete: “Hodi fiar mak Abraão, wainhira Maromak koko nia, hasaʼe Isaac. Maski Maromak halo promesa ba nia, nia hakarak hasaʼe nia oan-mane mesak. Kona-ba oan neʼe Maromak dehan ba nia, ‘Husi Isaac mak ó-nia bei-oan sira sei simu naran.’ Nia laran-metin katak Maromak iha kbiit atu halo ema mate moris hiʼas fali; neʼe duni, hodi koʼalia ho ai-knanoik ida, nia simu fali Isaac husi ema mate sira leet.” Hanesan Abraão prontu atu fó ninia oan Isaac nuʼudar sakrifísiu, Jeová fó ninia Oan, Jesus Kristu hodi salva ema iha mundu.—Lee João 3:16, 36.

⁹ Hanoin toʼok kona-ba Isaac, oinsá mak nia sente kuandu nia hatene katak  nia la presiza mate! Ita bele fiar katak nia sente agradese tanba Maromak fó bibi-aman ida nuʼudar sakrifísiu hodi troka ninia fatin. (Gênesis [Kejadian] 22:10-13) Tan neʼe, Abraão hanaran fatin neʼe “Jeová-Jiré”, katak “Jeová sei fó buat neʼebé presiza”.—Gênesis (Kejadian) 22:14.

10, 11. Sé mak halaʼo “knaar hadame malu nian” no atu halo nuneʼe, sira halo saida?

¹⁰ Kuandu ita hanoin kleʼan kona-ba buat neʼebé Jeová fó ona mai ita, ita hafolin liután Jesus nia sakrifísiu, tanba liuhusi ida-neʼe mak ita bele sai Maromak nia belun. Apóstolu Paulo hakerek: “Ami hatene loloos katak ida mate tiha tan ema hotu nia diʼak, no tan neʼe ema hotu mate. Kristu mate duni tan ema hotu-hotu, atu sira neʼebé moris, la moris tan ba sira an rasik, maibé moris ba ida neʼebé mate no moris hiʼas tanba sira.”—2 Korinto 5:14, 15.

¹¹ Ema kristaun sira iha apóstolu sira-nia tempu hadomi Maromak no hafolin knaar neʼebé furak atu serbí Maromak. Tan neʼe sira ho laran-kontente simu “knaar hadame malu nian” katak haklaken. Serbisu haklaken neʼe loke dalan ba ema atu hakbesik ba Maromak, sai ninia belun, no sai ninia oan iha lalehan. Ohin loron, ema kose-mina halaʼo knaar ida-neʼe. Sira serbí nuʼudar ema neʼebé reprezenta Maromak no Kristu. Liuhusi sira-nia serbisu haklaken, ema neʼebé haraik-an no laran-moos bele hakbesik ba Jeová no sai ninia atan.—Lee 2 Korinto 5:18-20; João 6:44; Apóstolu 13:48.

12, 13. Oinsá mak ita bele hatudu katak ita agradese ba buat neʼebé Jeová fó ba ita?

¹² Ema kristaun sira neʼebé iha esperansa atu hela iha rai mós hafolin Jeová nuʼudar Ida neʼebé fó buat barak. Tan neʼe, sira hola parte atu haklaken liafuan diʼak hamutuk ho ema kose-mina sira. Hodi halo serbisu neʼe, ita uza buat neʼebé Maromak fó mai ita, neʼe mak Bíblia. (2 Timóteo 3:16, 17) Kuandu ita uza didiʼak Bíblia nuʼudar ita haklaken, ita bele fó ba ema seluk oportunidade atu moris ba nafatin. Jeová mós fó ita ida-idak ninia espíritu santu. Ita presiza espíritu santu neʼe atu ajuda ita haklaken. (Zacarias [Zakharia] 4:6; Lucas 11:13) Iha Buku Tahunan Saksi-Saksi Yehuwa ita haree rezultadu kapás husi serbisu neʼe. Sin, serbisu haklaken mak knaar espesiál tebes neʼebé ita halo hodi fó hahiʼi ba ita-nia Aman nuʼudar Ida neʼebé fó buat barak ba ninia povu.

¹³ Bainhira ita hanoin-hetan buat neʼebé Maromak fó ona ba ita, diʼak atu husu: ‘Haʼu hakaʼas an iha serbisu haklaken hodi hatudu katak haʼu hafolin buat neʼebé Maromak fó ka lae? Oinsá mak haʼu bele hadiʼa dalan neʼebé haʼu haklaken hodi hetan rezultadu diʼak liután?’ Ita bele hatudu katak ita agradese ba buat hotu neʼebé Maromak fó hodi tau Maromak ulukliu iha ita-nia moris. Se ita halo nuneʼe, Jeová sei fó buat neʼebé ita presiza. (Mateus 6:25-33) Tanba Jeová hadomi ita, ita hakarak hakaʼas an atu halo nia kontente, loos ka lae?—Provérbios (Amsal) 27:11.

14. Oinsá mak Jeová hatudu ninia an nuʼudar salvadór ba ninia povu?

¹⁴ Iha David nia salmo ida, nia hakerek: “Haʼu mesak no kiak. Jeová bele tau matan ba haʼu. Ita mak haʼu-nia ajuda-naʼin no salvadór.” (Salmo [Mazmur] 40:17) Dala barak, Jeová salva ninia povu nuʼudar grupu, liuliu kuandu sira-nia inimigu fó-terus ba sira. Ita agradese tebes tanba Jeová sempre fó buat neʼebé ita presiza hodi ita bele tahan hasoru tempu susar no laran-metin nafatin ba nia.

15. Konta toʼok kona-ba oinsá aman ida proteje ninia oan.

¹⁵ Aman neʼebé hadomi ninia oan,  laʼós deʼit fó buat neʼebé ninia oan sira presiza, maibé nia mós proteje sira. Se nia oan iha perigu laran, nia sei hakaʼas an atu salva kedas sira. Irmaun ida hanoin-hetan tempu neʼebé nia sei kiʼik no ninia aman proteje nia. Loron ida, nia no ninia aman fila husi serbisu haklaken no presiza hakur mota. Tanba udan boot iha loron neʼe, mota sai boot, no atu hakur mota, sira presiza haksoit fatuk sira. Labarik neʼe monu ba mota laran no atu mout ba dala rua, maibé ninia aman kaer nia liman no salva nia. Hanesan neʼe mós, ita-nia Aman iha lalehan proteje ita husi perigu sira iha mundu aat neʼe, no husi mundu nia ukun-naʼin Satanás. Jeová mak ida neʼebé bele fó protesaun diʼak liu.—Mateus 6:13; 1 João 5:19.

16, 17. Oinsá mak Jeová ajuda no proteje ema Izraél kuandu sira funu hela hasoru ema Amalec?

¹⁶ Jeová, ho domin, proteje ninia povu iha tinan 1513 molok Kristu. Antes neʼe, nia hasai sira husi moris nuʼudar atan no proteje sira kuandu sira hakur Tasi Mean. Laʼo tiha iha rai-fuik maran atu bá Foho Sinai, sira toʼo iha Refidim.

¹⁷ Tanba profesia iha Gênesis (Kejadian) 3:15 seidauk sai loos, ita bele fiar katak Satanás hakarak tebes atu ataka ema Izraél neʼebé haree hanesan povu neʼebé mesak. Nia halo ida-neʼe hodi uza Maromak nia povu nia inimigu sira, ema Amalec. (Números [Bilangan] 24:20) Jeová proteje ninia povu hodi uza Josué, Moisés, Aarão, no Hur. Nuʼudar Josué no ninia soldadu sira funu hela hasoru ema Amalec, Moisés, Aarão no Hur hamriik iha foho ida besik iha neʼebá. Se Moisés foti nia liman ba leten, Jeová ajuda ema Izraél atu sai forte liu hodi domina sira-nia inimigu. Kuandu Moisés la bele ona tanba kole, Aarão no Hur ajuda hodi hiʼit nia liman. Ikusmai, “Josué manán  Amalec no ninia povu” ho Jeová nia ajuda no protesaun. (Êxodo [Keluaran] 17:8-13) Depois neʼe, Moisés harii altár iha fatin neʼe, no bolu nuʼudar “Jeová-Nissi”, neʼebé iha arti katak “Jeová mak haʼu-nia ai-riin sinál nian”.—Lee Êxodo (Keluaran) 17:14, 15. a

18, 19. Oinsá mak Jeová proteje ita iha ita-nia tempu?

¹⁸ Jeová proteje ema neʼebé hadomi nia no halo tuir. Hanesan ema Izraél iha Refidim, ita mós hein ba Jeová atu proteje ita husi inimigu sira. Dala barak ona, Jeová proteje ita nuʼudar grupu, hodi kuidadu ita husi Diabu nia ataka. Porezemplu, Jeová proteje ita-nia irmaun-irmán sira neʼebé hetan terus tanba sira hili atu neutrál nafatin iha buat polítiku. Ida-neʼe akontese iha rai-Alemaña, iha tempu neʼebé governu Nazi mak ukun. Kuandu ita lee esperiénsia sira iha Buku Tahunan kona-ba oinsá Jeová proteje ninia povu durante tempu susar, ita bele hametin liután ita-nia fiar ba Jeová.—Salmo (Mazmur) 91:2.

¹⁹ Jeová mós proteje ita hodi fó konsellu liuhusi ninia organizasaun no ita-nia livru sira. Hanoin toʼok kona-ba oinsá ita rasik hetan protesaun durante tinan balu liubá. Ema iha mundu neʼe hanoin liu kona-ba buat seksuál nian, kona-ba hemu lanu no pornografia. Maibé Jeová ajuda ita hodi ita la halo buat neʼebé bele estraga ita-nia relasaun ho nia. Porezemplu, foin daudauk, ita simu konsellu husi ita-nia Aman Jeová atu hasees an husi ema neʼebé la diʼak neʼebé ita hasoru liuhusi sítiu sira iha internét. b (Haree nota iha kraik.)—1 Korinto 15:33.

20. Oinsá mak ita hetan protesaun no matadalan iha kongregasaun?

²⁰ Oinsá mak ita bele hatudu katak ita “sai ema neʼebé simu hanorin husi Jeová”? Hodi halo tuir ninia ukun-fuan sira. (Isaías [Yesaya] 54:13) Ita-nia kongregasaun sira mak fatin neʼebé seguru no fó protesaun no matadalan ba ita. Katuas kongregasaun nian ajuda ita hodi fó konsellu husi Bíblia. (Galásia 6:1) Jeová uza ema sira-neʼe atu tau matan ba ita ho domin. (Éfeso 4:7, 8) Se nuneʼe, ita tenke halo saida se katuas sira fó konsellu mai ita? Ita presiza halo tuir, tanba se ita halo nuneʼe, Jeová sei fó bensaun ba ita.—Ebreu 13:17.

21. (a) Ita presiza halo saida deʼit? (b) Ita sei koʼalia kona-ba saida iha lisaun tuirmai?

²¹ Entaun, mai ita sadere ba espíritu santu no simu matadalan husi ita-nia Aman iha lalehan. Ita mós presiza hanoin kleʼan kona-ba Jesus nia moris no hakaʼas an atu halo tuir ninia ezemplu diʼak. Jesus simu kolen neʼebé kapás tanba nia halo tuir Maromak toʼo nia mate. (Filipe 2:5-11) Ita mós sei hetan bensaun se ita tau fiar tomak ba Jeová. (Provérbios [Amsal] 3:5, 6) Mai ita sadere ba Jeová, ida neʼebé fó buat neʼebé ita presiza no ida neʼebé proteje ita iha dalan neʼebé ema seluk la bele. Hodi serbí Jeová mak buat neʼebé espesiál tebes no ida-neʼe halo ita kontente tebes. Maibé oinsá mak Jeová bele sai ita-nia belun neʼebé diʼak liu hotu? Iha lisaun tuirmai ita sei hetan resposta ba pergunta neʼe, neʼebé sei hametin liután ita-nia domin ba Jeová.