1, 2. Olsem wanem sindaun bilong famili bilong yumi i narapela narapela? Yumi kisim tok i tru long wanem narapela narapela rot?

 JEHOVA yet i bin stretim rot na bai i gat famili. (Efe. 3:14, 15) Maski sapos yumi kam long wankain famili, pasin na sindaun bilong yumi olgeta wan wan i narapela narapela. Ating yu bin stap wantaim papamama bilong yu kirap long taim yu bon i go inap long taim yu kamap bikpela. Long sampela, ating papamama i dai, long wanem, ol i sik, kisim eksiden, o sampela narapela hevi i painim ol. Ating sampela narapela i no save long papamama bilong ol.

² Insait long bikpela famili i lotuim Jehova, olgeta wan wan man i bin kisim save long tok i tru long narapela narapela rot. Ating yu kamap bikpela insait long tok i tru, na papamama i skulim yu gut long ol stiatok bilong Baibel. (Lo 6:6, 7) O, ating yu wanpela bilong planti tausen manmeri husat i kisim save long tok i tru taim ol wokman bilong Jehova i autim tok long yu.—Rom 10:13-15; 1 Tim. 2:3, 4.

3. Wanem samting i wankain long laip bilong yumi olgeta?

³ Sampela samting long laip bilong yumi olgeta i narapela narapela, tasol sampela samting i wankain. Adam i bin sakim tok bilong God, olsem na yumi olgeta i kisim sin long em, na yumi save dai. (Rom 5:12)  Maski i olsem, yumi bihainim lotu i tru, olsem na yumi inap kolim Jehova olsem “papa bilong [yumi].” Lain bilong God long bipo i mekim dispela tok i stap long Aisaia 64:8, olsem: “Bikpela, yu papa bilong mipela.” Na tu, Jisas i kirapim beten olsem: “Papa bilong mipela long heven, nem bilong yu i mas i stap holi.”—Mat. 6:9.

4, 5. Bilong strongim pasin bilong yumi long laikim tru Papa bilong yumi, Jehova, yumi bai skelim wanem ol samting?

⁴ Yumi bilip na singaut long nem bilong Papa bilong yumi long heven, olsem na em i lukautim yumi na givim ol samting yumi nidim. Man bilong raitim song i tok: “Bai mi kisim bek ol man [i bihainim lotu i tru na ol] i laikim mi tru, na bai mi lukautim gut ol man i save tru long [“nem bilong,” NW] mi.” (Sng. 91:14) Yumi stap olsem ol manmeri bilong God Jehova, olsem na Em i save kisim bek yumi na lukautim yumi na bai ol birua i no ken bagarapim na pinisim lain bilong yumi.

⁵ Bilong strongim pasin bilong yumi long laikim tru Papa bilong yumi, yumi ken skelim 3-pela bikpela samting: (1) Papa bilong yumi em Man Bilong Givim ol samting long yumi. (2) Jehova em Man Bilong Lukautim yumi. (3) God em i nambawan gutpela Pren bilong yumi. Taim yumi skelim ol dispela samting, yumi ken tingim tingim long bel pasin bilong yumi long pas gut wantaim God, na tingim tu olsem wanem yumi inap givim biknem long em olsem Papa bilong yumi. Na tu, yumi ken tingim tingim ol blesing em Jehova bai givim long ol man husat i go klostu long em.—Jems 4:8.

6. Jehova i givim wanem samting na dispela i soim olsem em Man Bilong Givim “olgeta gutpela presen”?

⁶ Disaipel Jems i tok: “Olgeta gutpela presen na olgeta presen i nambawan tru i kam long ples antap. Em i kam long Papa bilong ol lait bilong skai.” (Jems 1:17) Laip em gutpela presen tru i kam long Jehova. (Sng. 36:9) Sapos yumi yusim laip bilong yumi long mekim wok bilong God, yumi bai kisim planti blesing long nau, na yumi inap kisim laip oltaim long nupela taim. (Snd. 10:22; 2 Pita 3:13) Tasol yumi olgeta i gat sin na yumi save dai, olsem na hau bai yumi inap kisim laip oltaim?

7. Olsem wanem Jehova i opim rot long yumi inap pas gut wantaim em?

⁷ Jehova em Nambawan Man Bilong Givim ol samting long planti kain kain rot. Olsem: Em i soim bikpela pasin helpim long yumi. Yumi olgeta i kisim sin long Adam, em namba 1 papa bilong yumi. (Rom 3:23) Tasol Jehova i gat pasin laikim, olsem na em i opim rot long yumi inap pas gut wantaim em. Aposel Jon i tok: “Pasin laikim bilong God i kamap ples klia long yumi olsem: God i salim Pikinini bilong en, em pikinini tru bilong en, i kam long dispela graun bai yumi inap kisim laip long rot bilong em. I no olsem yumi laikim God na em i mekim dispela samting, nogat. Em olsem, God i laikim yumi na salim Pikinini bilong en i kam olsem sakrifais long ol sin bilong yumi bilong mekim yumi kamap wanbel wantaim God.”—1 Jon 4:9, 10.

8, 9. Long taim bilong Abraham na Aisak, olsem wanem Jehova i stap olsem Nambawan Man Bilong Givim ol samting? (Lukim piksa long kirap bilong stadi.)

⁸ Long yia 1893 B.C.E. samting, Abraham i mekim wanpela samting we i stap olsem piksa bilong makim pasin laikim Jehova bai mekim bilong givim laip oltaim long olgeta man husat i bihainim tok bilong em. Hibru 11:17-19 i tok: “Abraham i bilip, olsem na taim God i traim em, em i redi long givim Aisak olsem ofa. Na dispela man husat i bin amamas long kisim tok promis, em i redi long ofaim dispela wanpela pikinini bilong en, maski em i bin kisim tok olsem: ‘Dispela man em ol bai kolim olsem “pikinini bilong yu,” em bai kamap long rot bilong Aisak.’ Abraham i gat tingting olsem maski sapos Aisak i dai, God inap kirapim em bek. Na Abraham i bin kisim bek pikinini bilong en long indai, na dispela em i piksa bilong wanpela samting.” Abraham i redi long givim pikinini bilong em, Aisak olsem ofa, na olsem tasol, Jehova tu i redi long givim  pikinini bilong em, Jisas Krais olsem ofa bilong baim bek olgeta lain man.—Ritim Jon 3:16, 36.

⁹ Ating Aisak i bin amamas tru olsem Papa i no kilim em i dai! Na tu, ating em i tenkyu tru long God i givim wanpela sipsip man long ol i ken givim olsem ofa. (Stt. 22:10-13) Olsem na ol i kolim dispela ples olsem “Jehova-jaire,” mining bilong en, “Jehova Bai Givim.”—Stt. 22:14, NW.

10, 11. Husat i go pas long “tokaut long pasin bilong kamap wanbel”? Olsem wanem ol i mekim dispela wok?

¹⁰ Taim yumi tingim olgeta samting Jehova i bin givim long yumi, yumi pilim tru bikpela wok Jisas Krais i mekim bilong helpim yumi, olsem Pol i tok: “Pasin laikim bilong Krais i kirapim mipela, long wanem, mipela i save pinis olsem wanpela man i dai bilong helpim olgeta man. Dispela i mas kamap, long wanem, olgeta man i bin dai pinis. Em i bin i dai bilong helpim olgeta man. Em i mekim olsem bai ol man i stap laip ol i no ken bihainim laik bilong ol yet, nogat. Ol i mas bihainim laik bilong dispela man husat i kisim ples bilong ol na i dai na i kirap bek tu.”—2 Kor. 5:14, 15.

¹¹ Ol Kristen long taim bilong ol aposel i laikim tru God na ol i tenkyu olsem ol inap mekim wok bilong em, olsem na ol i amamas long “tokaut long pasin bilong kamap wanbel.” Ol i autim tok na kamapim ol disaipel, na dispela i opim rot long ol man i gat gutpela bel inap kamap wanbel wantaim God, stap pren bilong em, na ol inap kamap ol pikinini bilong em. Long nau, ol Kristen God i bin makim, ol tu i mekim wankain wok. Ol i stap olsem ol ambasada bilong God na Krais, na dispela i opim rot long ol man i gat gutpela bel inap i go klostu long Jehova na kamap ol bilipman.—Ritim 2 Korin 5:18-20; Jon 6:44; Apo. 13:48.

12, 13. Olsem wanem yumi ken soim olsem yumi tenkyu tru long Jehova long olgeta samting em i givim long yumi?

¹² Olgeta Kristen husat i bilip na wet long kisim laip long graun, ol i pilim tru pasin bilong Jehova long givim ol samting, olsem na ol i wok wantaim ol Kristen God i bin makim na autim tok bilong Kingdom. Taim yumi autim tok, yumi save yusim Baibel, em narapela gutpela presen tru i kam long God. (2 Tim. 3:16, 17) Taim yumi yusim gut Baibel long autim tok, yumi helpim ol narapela long kisim laip oltaim. Jehova i givim tu holi spirit long helpim yumi long mekim dispela wok. (Sek. 4:6; Luk 11:13) Planti gutpela samting i save kamap long dispela wok, olsem yumi save lukim long yiabuk bilong ol Witnes Bilong Jehova. Yumi kisim biknem long mekim dispela wok bilong litimapim nem bilong Papa bilong yumi na Man Bilong Givim ol samting!

¹³ God i givim planti samting long yumi, olsem na yumi ken askim yumi yet olsem: ‘Mi mekim olgeta samting mi inap mekim long wok autim tok bilong soim Jehova olsem mi tenkyu tru long ol samting em i givim mi? Olsem wanem mi inap mekim gut moa wok bilong autim gutnius?’ Sapos yumi tenkyu tru long ol gutpela samting God i givim long yumi, orait yumi ken putim wok bilong Kingdom i stap namba 1 samting long laip bilong yumi. Taim yumi mekim olsem, Jehova bai givim yumi ol samting yumi nidim. (Mat. 6:25-33) God i gat pasin laikim, olsem na yumi laik mekim olgeta samting yumi inap mekim na bai yumi ken mekim em i belgut.—Snd. 27:11.

14. Olsem wanem Jehova i bin kisim bek lain bilong em?

¹⁴ Devit i tok: “Mi no gat strong, na mi no inap helpim mi yet. Tasol yu, Bikpela, yu save tingting long mi. God, yu yet yu man bilong helpim mi, na yu save kisim bek mi.” (Sng. 40:17) Planti taim Jehova i bin kisim bek lain bilong em taim ol birua i mekim nogut tru long ol na daunim ol. Yumi tenkyu tru olsem oltaim God i save givim planti samting yumi nidim bilong helpim yumi long stap gut long em long kain taim olsem!

15. Stori long olsem wanem gutpela papa i save lukautim pikinini bilong em.

¹⁵ Gutpela papa i save givim ol samting long ol  pikinini bilong em, na tu, em i save lukautim ol. Wantu em bai helpim ol taim hevi i laik painim ol. Wanpela brata i tingim samting i bin painim em taim em i stap liklik boi. Em na papa bilong em i go autim tok pinis na taim ol i laik go bek long haus, ol i mas brukim wanpela liklik wara. Bikpela ren i bin pundaun long moning, olsem na wara i tait. Wanpela rot tasol bilong brukim wara em olsem, ol i mas kalap long wanpela ston i go long narapela ston. Pikinini i go paslain long papa na em i no krungutim gut ston, olsem na em i pundaun na 2-pela taim het bilong em i go aninit long wara. Dispela pikinini i tenkyu tru olsem kwiktaim papa bilong em i putim han i go na holim sol bilong em na apim em i kam antap long wara! Olsem tasol, Papa bilong yumi long heven i lukautim yumi, na pasin nogut bilong dispela graun em Satan i bosim i no daunim yumi. Jehova em nambawan Man Bilong Lukautim lain bilong em.—Mat. 6:13; 1 Jon 5:19.

16, 17. Olsem wanem Jehova i helpim na lukautim lain Israel taim ol i pait long lain Amalek?

¹⁶ Jehova i bin kisim bek lain Israel long kalabus long Isip, na em i wokim mirakel bilong lukautim ol taim ol i brukim solwara Retsi long 1513 B.C.E. Dispela i soim klia olsem Jehova i save lukautim gut lain bilong em. Lain Israel i laik i go olsem long maunten Sainai, olsem na ol i wokabaut long ples drai nating na ol i go kamap long Refidim.

¹⁷ Ating tok profet bilong God long Stat 3:15 i mekim na Satan i belhat nogut tru na em i laik bagarapim lain Israel. Lain Israel i no stap redi yet long pait. Satan i yusim lain Amalek, em lain husat i birua long lain bilong God. (Nam. 24:20) Tingim samting Jehova i bin mekim long rot bilong 4-pela bilipman, em Josua, Moses, Aron, na Hur. Josua i bringim ol soldia bilong em i go pait long lain Amalek, na Moses, Aron, na Hur i sanap antap long wanpela maunten i stap klostu.  Lain Israel i pait strong moa na daunim ol birua taim Moses i apim 2-pela han bilong em. Taim han bilong Moses i dai na em i no inap apim moa, Aron na Hur i helpim em na apim ol han bilong em i go antap. Jehova i helpim na lukautim lain bilong em, olsem na “Josua wantaim ol Israel i winim ol Amalek na bagarapim ol nogut tru.” (Kis. 17:8-13) Moses i sanapim wanpela alta long dispela hap na kolim nem bilong en olsem, Jehova-nisi, mining bilong en “Bikpela em i olsem plak bilong mi.”—Ritim Kisim Bek 17:14, 15.

18, 19. Olsem wanem Jehova i lukautim ol wokman bilong em long nau?

¹⁸ Jehova i save lukautim ol man husat i laikim em na bihainim tok bilong em. Olsem lain Israel i bin mekim taim ol i stap long Refidim, yumi tu i save askim God long lukautim yumi taim ol man i laik birua long yumi. Planti taim Jehova i save lukautim yumi olsem wanpela lain olgeta, na em i no save larim Satan i bagarapim yumi. Olsem: Planti taim God i save lukautim ol brata bilong yumi taim ol man i mekim nogut long ol, long wanem, ol i no laik insait long ami. Dispela samting i bin kamap long Jemani na ol narapela kantri long ol yia namel long 1930 na 1945 samting, taim lain Natsi i mekim wok bos. Taim yumi ritim na tingim tingim ol laip stori na ol ekspiriens i stap long yiabuk long olsem wanem God i lukautim lain bilong em taim ol birua i mekim nogut long ol, dispela bai strongim bilip bilong yumi long Jehova, olsem em i Ples Hait bilong yumi.—Sng. 91:2.

¹⁹ Na tu, Jehova i save yusim oganaisesen bilong em na ol buk na nius bilong Baibel long givim ol gutpela tok bilong helpim yumi long abrusim ol hevi. Tingim olsem wanem ol dispela tok i helpim yumi long nau. Long nau, ol manmeri i tingting tasol long maritpasin, alkohol, na ponografi, tasol Jehova i givim ol tok lukaut long taim stret na helpim yumi long abrusim ol pasin we inap bagarapim yumi. Olsem: Papa bilong yumi long heven i save givim yumi ol tok kaunsel bilong helpim yumi long abrusim ol poroman nogut long rot bilong Intenet. a—1 Kor. 15:33.

20. Long kongrigesen, olsem wanem yumi save kisim ol tok bilong lukautim na stiaim yumi?

²⁰ Olsem wanem yumi inap soim olsem tru tru Jehova i save “skulim” yumi? Yumi mekim olsem taim yumi bihainim ol lo bilong em. (Ais. 54:13) Long kongrigesen, i gat ol elda em ol i save yusim tok bilong Baibel long helpim na stretim yumi, na dispela i save lukautim na stiaim yumi. (Gal. 6:1) Jehova i “givim ol man olsem ol presen,” na em i yusim ol long lukautim yumi. (Efe. 4:7, 8) Yumi mas mekim wanem taim ol i givim tok kaunsel long yumi? Yumi mas redi long stap aninit long ol na bihainim tok, na long dispela rot God bai blesim yumi.—Hib. 13:17.

21. (a) Yumi mas tingting strong long mekim wanem samting? (b) Stadi i kamap bihain long dispela bai stori long wanem samting?

²¹ Yumi mas tingting strong long larim holi spirit i stiaim yumi. Long dispela rot, i olsem yumi larim Papa bilong yumi long heven i stiaim yumi. Na tu, yumi mas tingim tingim long bel ol samting em Jisas Krais i bin mekim, na yumi mas wok strong long bihainim pasin bilong em. Jisas i kisim bikpela pe tru, long wanem, em i “bihainim tok i go inap long em i dai.” (Fili. 2:5-11) Olsem Jisas, yumi tu inap kisim blesing sapos yumi bilip strong long Jehova long bel olgeta. (Snd. 3:5, 6) Olsem na oltaim yumi mas bilip olsem Jehova bai givim ol samting yumi nidim na em bai lukautim yumi. Taim yumi mekim wok bilong em, dispela em wanpela gutpela samting tru we i givim bikpela amamas long yumi! Pasin bilong yumi long laikim Jehova bai kamap strong moa taim yumi tingim tingim namba 3 samting—pasin pren bilong em. Stadi i kamap bihain long dispela bai stori long olsem wanem Jehova i stap nambawan gutpela Pren bilong yumi.