1, 2. Ne a kese‵kesega o tatou i loto i kāiga mo te putiakaga i te feitu faka-te-agaga?

NE FAI ne Ieova a te fakatokaga i te kāiga. (Efe. 3:14, 15) Kafai foki ne o‵mai tatou i se kāiga e tasi, e kese‵kese ‵tou uiga totino mo ‵tou fakanofonofoga. Kāti ne ‵nofo tasi koe mo ou mātua mai tau fanaumaiga ke oko eiloa ki tou matua. Kāti ko oti ne ‵mate atu a mātua o nisi tino, e se taumate ona ko masaki, se fakalavelave tupu fakafuasei, io me ko nisi fakalavelave aka. Kae ko nisi e se iloa ne latou olotou mātua.

² I loto i te kāiga o tino tapuaki o Ieova, e kese‵kese foki a te putiakaga i te feitu faka-te-agaga. Kāti ‘ne puti aka koe i loto i te munatonu’ e pelā mo pati a nisi tino, kae akoako atu ne ou mātua ki a koe a fakatakitakiga fakavae mai te Atua. (Teu. 6:6, 7) Io me kāti a koe se tokotasi o te fia afe o tino kolā ne tauloto ki te munatonu e auala i te galuega talai a nisi tavini a Ieova.​—Loma 10:13-15; 1 Timo. 2:3, 4.

3. Ne a mea e ‵pau ei a tatou katoa?

³ Faitalia a kese‵kesega kolā ne fatoā taku atu, e isi eiloa ne mea mautinoa kolā e ‵pau ei tatou katoa. E logo‵mae a tatou katoa i te sē fakalogo o Atamu kae ne togi mai i ei ki a tatou a te tulaga se ‵lei katoatoa,  te agasala, mo te mate. (Loma 5:12) Tela la, e pelā me ne tino tapuaki ‵tonu, e mafai ne tatou o fai‵pati atu ki a Ieova e pelā me ko ‵tou “Tamana.” E fai mai te Isaia 64:8 e uiga ki tino filifilia o te Atua i taimi mua: “Te Aliki [Ieova], a koe ko te motou tamana.” E se gata i ei, ne kamata ne Iesu a tena ‵talo fakaakoako ki pati konei: “Te motou Tamana telā i te lagi: ke tapu tou igoa.”​—Mata. 6:9.

4, 5. I te taimi e iloilo ei ne tatou a te ‵poko o ‵tou loto fakafetai ki ‵tou Tamana ko Ieova, ne a mea tāua ke mafau‵fau ki ei?

⁴ E tuku mai ne ‵tou Tamana faka-te-lagi a te tausiga mo te puipuiga e manakogina ne tatou e pelā me ne tino kolā e ka‵laga ki tena igoa i te fakatuanaki. E fai mai te faisalamo e uiga ki a ia: “Ka faka‵sao ne au a tino e a‵lofa ki a au, e puipui foki ne au a latou kolā e iloa ne latou i au ko te Aliki [Ieova].” (Sala. 91:14) Ao, e alofa eiloa a Ieova te Atua o faka‵sao tatou mai i ‵tou fili kae puipui tatou e pelā me ne ana tino, ko te mea ke sē fakaseai tatou.

⁵ Ko te mea ke ‵poko ‵tou loto fakafetai ki ‵tou Tamana faka-te-lagi, ke mafau‵fau tatou ki vaega tāua e tolu: (1) A ‵tou Tamana ko ‵tou Faka‵saoga. (2) A Ieova ko ‵tou Puipuiga. (3) Kae ko te Atua ko ‵tou Taugasoa pele. Kafai e mafau‵fau tatou ki manatu konei, ka fesoasoani mai eiloa ke mafaufau ‵loto tatou ki ‵tou fesokotakiga mo te Atua mo te auala e mafai ei o fakaaloalo atu tatou ki ‵tou Tamana. Ka aoga foki ke mafaufau tatou ki fakamanuiaga kolā e tuku atu ne Ieova ki tino kolā e fakapili‵pili atu ki a ia.​—Iako. 4:8.

6. Se a te auala e tasi e fakatalitonu mai i ei i a Ieova ko te Tino telā e tuku mai ne ia “a meaalofa ‵lei katoatoa”?

⁶ Ne tusi mai a te soko ko Iakopo: “A meaalofa ‵lei katoatoa e maua katoa mai luga, e aumai katoa mai te Tamana o mainaga i te lagi.” (Iako. 1:17) A te ola se meaalofa fakaofoofogia mai i a Ieova. (Sala. 36:9) Kafai e fakaaoga ne tatou ‵tou ola o fai te loto o te Atua, e maua eiloa ne tatou a fakamanuiaga e uke i te taimi nei kae maua a te fakamoemoega ke ola ki te se-gata-mai i te lalolagi fou. (Faata. 10:22; 2 Pe. 3:13) Kae e mafai pefea o tupu a te mea tenei māfai e mafau‵fau tatou ki ikuga matagā o te sē fakalogo o Atamu?

7. Ne ‵tala pefea ne te Atua a te auala ke maua ne tatou se fesokotakiga ‵pili mo ia?

⁷ A Ieova ko te Tino Sili i te Faka‵sao tino i auala e uke. Pelā me se fakaakoakoga, e ‵sao eiloa tatou i tena alofa tauanoa. Ao, a tatou katoa ne agasala kae sē ‵lei katoatoa mai i ‵tou tamana muamua. (Loma 3:23) Kae ona ko te alofa o Ieova, ne mua a ia o ‵tala te auala ke maua ne tatou se fesokotakiga ‵pili mo ia. “Ne fakaasi mai te alofa o te Atua ki a tatou e auala i te mea tenei,” ne tusi mai te apositolo ko Ioane, “ne uga mai ne te Atua a tena Tama eiloa e tokotasi ki te lalolagi ko te mea ke mafai o maua ne tatou te ola e auala i a ia. Tenei eiloa te alofa, e se ona ko tatou ne a‵lofa ki te Atua, kae ko ia tenā ne alofa mai ki a tatou kae uga mai ne ia tena Tama ke fai mo fai te taulaga mō ‵tou agasala ke faka‵lei aka ei tatou mo te Atua.”​—1 Ioa. 4:9, 10.

8, 9. Ne fakatalitonu mai pefea i a Ieova ko te Tino Sili i te Faka‵sao tino i te taimi o Apelaamo mo Isaako? (Ke onoono ki te ata i te kamataga.)

⁸ I te 19 senitenali T.L.M., ne fakamatala mai i ei se mea fakavaloaga ne tupu telā e fakaasi mai i ei a te lasi o te fakatokaga alofa a Ieova mō tino faka‵logo ke maua ne latou te ola se-gata-mai. E fakamatala mai a te Epelu 11:17-19: “Ona ko te fakatuanaki, ne ofo atu ei ne Apelaamo a Isaako, i te taimi ne tofotofogina ei a ia, kae ne taumafai te tino telā ne maua ne ia a te folafolaga mo te fiafia, ke ofo atu tena tama eiloa e tokotasi, e tiga eiloa ko oti ne fakailoa atu ki a ia penei: “A te tino telā ka fakaigoa ki tau fanau ka vau eiloa e auala i a Isaako.” Kae ne talitonu a ia me e mafai ne te Atua o toe fakatu mai a Isaako mai te mate, kae ne toe maua eiloa ne ia a Isaako i konā i se auala fakatusa.” E se faigata ke ‵kilo tatou ki se mea e tai ‵pau. Ne ofo ne Ieova a tena Tama, ko Iesu Keliso, e sui ei a te lalolagi o tino.—Faitau te Ioane 3:16, 36.

 ⁹ Ne talia eiloa ne Isaako a tena fakasaoga mai i te mate pelā me se taulaga! E seai se fakalotolotolua me ne loto fakafetai a ia ki te fakatokaga a te Atua ke sui a te mea e fai ei te taulaga​—se mamoe tagata e lavelave i se vaolakau e pili mai. (Kene. 22:10-13) E setioa o fakaigoa a te koga tenā “E aumai ne te Aliki [Ieova].”​—Kene. 22:14.

10, 11. Ko oi ne fai ne latou te takitakiga i “te galuega o te faka‵leiga,” kae ne fai pefea ne latou?

¹⁰ Kafai e mafaufau ‵loto tatou ki te auala e fai ei a Ieova mo Tino Sili i te Faka‵sao tino, e fia‵fia eiloa tatou o fakailoa atu a te tusaga tāua ne fai ne Iesu Keliso, e pelā mo te mea ne fai ne Paulo i te taimi ne tusi mai ei a ia: “Ona ko te fakaikuga tenei ko oti ne fai ne matou, me ne mate te tagata e tokotasi mō tino katoa; ona ko te mea ko ‵mate a tino katoa; kae ne mate a ia mō tino katoa ko te mea ko tino kolā e ola ke se toe ola mō latou eiloa, kae mō ia telā ne mate mō latou kae toe fakatu aka.”​—2 Koli. 5:14, 15.

¹¹ Ona ko te a‵lofa o latou ki te Atua kae loto fakafetai ki te tauliaga o tavini atu ki a ia, ne fia‵fia eiloa a Kelisiano mua o talia a “te galuega o te faka‵leiga.” Ne ‵tala ne te lotou galuega talai mo te faiga o soko a te auala mō tino loto fakamaoni taki tokotasi ke maua se va filemu mo te Atua, se va fakataugasoa mo ia, kae fai fakamuli mo fai ana tamaliki faka-te-agaga. I aso nei, e fai foki ne tavini fakaekegina a Ieova a te galuega tenā. A mea kolā ne fakataunu ne latou e pelā me ne sui o te Atua mo Keliso ne fai ei ke mafai ne Ieova o ‵futi mai a tino loto ‵lei kae fai mo tino tali‵tonu.​—Faitau te 2 Kolinito 5:18-20; Ioa. 6:44; Galu. 13:48.

12, 13. E mafai pefea o fakaasi atu ne tatou a ‵tou loto fakafetai ki fakatokaga e uke a Ieova?

¹² Ona ko te loto fakafetai ki a Ieova e pelā me ko te Tino Sili i te Faka‵sao tino, ne ‵kau atu ei a Kelisiano katoa kolā e fakamoe‵moe ke ola i te lalolagi ki te kau fakaekegina i te talaiga o te Malo. I te galuega tenei, e fakaaoga ne tatou a te Tusi Tapu, ko te suā fakatokaga se fuafuagina a te Atua. (2 Timo. 3:16, 17) Mai te apo i te fakaaogaga o te Muna fakaosofia a te Atua i ‵tou galuega talai, e tuku atu ei ne tatou ki nisi tino a te avanoaga ke maua ne latou a te ola se-gata-mai. Ko te mea ke fesoasoani mai ki a tatou i te galuega tenei, e fakalagolago eiloa tatou taki tokotasi ki te suā fakatokaga mai i a Ieova​—ko tena agaga tapu. (Saka. 4:6; Luka 11:13) E fakamalosi loto a ikuga e maua mai i ei, e pelā mo mea ne fakaasi mai i lōmiga takitasi o te Yearbook of Jehovah’s Witnesses. Mafāga o tauliaga ke kau atu ki te galuega tenei e tavae atu ei ki ‵tou Tamana mo te tino Faka‵sao tino!

¹³ I te kilo atu ki mea katoa ne tuku mai ne te Atua, se mea ‵lei ke ‵sili ifo ki a tatou eiloa: ‘E mata, e fai ne au a te ‵toe mea e mafai ne au i taku galuega talai ke fakaasi atu ki a Ieova a te ‵poko o toku loto fakafetai ki ana fakatokaga? Ne a auala e mafai ei au o gasolo ki mua kae fai mo tino talai magoi o te tala ‵lei?’ E mafai ne tatou o fakaasi atu a ‵tou loto fakafetai ki fakatokaga ‵gali a Ieova mai i te fakamuamua faeloa o mea o te Malo i ‵tou olaga. Kafai e fai tatou penā, e mautinoa me ka tuku mai ne Ieova a mea e ma‵nako tatou ki ei. (Mata. 6:25-33) Ona ko te alofa o te Atua, e ma‵nako eiloa tatou o fai a mea e uke ke fakafiafia atu ki a ia kae fai tena loto ke fiafia.​—Faata. 27:11.

14. Ne fai pefea a Ieova mo tino Faka‵sao o ana tino?

¹⁴ Ne usu mai a te faisalamo ko Tavita: “Te Aliki [Ieova], au ko vāivāi kae mativa, kae seki fakapuli eiloa a au ne koe. A koe ko toku fakaola mo toku Atua, fakavave mai o fesoasoani mai ki a au.” (Sala. 40:17) Ne fai faeloa a Ieova mo tino Faka‵sao o ana tino e pelā me se potukau, maise eiloa māfai e fakasauāgina malosi kae fai masei faeloa ne olotou fili. Ko oko eiloa te loto fakafetai o tatou ki te fesoasoani o te Atua i taimi penā mo fakatokaga faka-te-agaga e uke kolā e fai faeloa ne ia mō tatou!

15. Fakamatala mai te auala e taumafai ei se tamana alofa o puipui a tena tamaliki.

¹⁵ A te tamana alofa e se tuku atu fua ne ia mea ki ana tamaliki kae e puipui foki ne ia latou. E taumafai eiloa a ia o faka‵sao latou māfai ko ‵tu latou i se tulaga fakamataku. E masaua ne te taina e tokotasi se mea ne tupu i te taimi koi tamaliki ei a ia. I te taimi ne toe ‵foki mai ei a ia mo tena tamana mai te galuega talai o olo ki te fale, a te lā auala ko fano i loto i te vai. Ne fai ne vaiua ‵to ‵lotu i te taeao tenā ke ‵fonu maligiligi te vaitafe kae ‵sofi ki tua. A te auala fua e tasi ki te suā feitu o te vai ko te eva mai te fatu lasi e tasi ki te suā fatu. Ona ko ia ne mua i tena tamana, ne ‵seke ana vae i se fatu e tasi, siga ki loto i te vai, kae galo fakalua ki lalo. Ko oko eiloa te loto fakafetai o te tamaliki tagata me ne vave a tena tamana o puke atu ki a ia i te tuauma o fakasao a ia ke mo a e malemu! E faka‵sao tatou ne ‵tou Tamana faka-te-lagi mai i mea kolā e ‵kilo atu tatou ki ei e pelā me ne vaiua ‵to ‵lotu o te lalolagi masei tenei mo tena pule, ko Satani. E mautinoa eiloa i a Ieova ko te ‵toe tino Puipui sili e mafai o fakamoemoe ki ei so se tino.​—Mata. 6:13; 1 Ioa. 5:19.

16, 17. Ne fesoasoani kae puipui pefea ne Ieova a tino Isalaelu i te taimi ne taua ei mo te kau Amaleka?

¹⁶ Ne fakamatala faka‵lei mai a te puipuiga alofa telā ne fai ne Ieova, i mea kolā ne ‵tupu mai tua o te faka‵saoga ne ia a tino Isalaelu mai te ‵nofo pologa i Aikupito mo te puipuiga fakavavega ne ia latou i te taimi ne olo ei i loto i te Tai ‵Kula i te 1513 T.L.M. Mai tua o te sa‵salega leva i loto i te koga lavaki ki te Mauga o Sinai, ne oko atu ei latou ki Lefiti.

¹⁷ I te kilo atu ki te valoaga i te Kenese 3:15, kāti ne manavase a Satani i te taimi ne salasala ei a ia ki se avanoaga ke oso atu ki tino Isalaelu kolā e foliga mai me seai se puipuiga. Ne fai ne ia te mea tenei e auala i te kau Amaleka kolā ko fili o tino o te Atua. (Nume. 24:20) Ke mafau‵fau ki te mea ne fai ne Ieova e auala i tāgata fakamaoni e tokofa​—ko Iosua, Mose,  Alona, mo Hulo. I te taimi ne taua atu ei a Iosua ki te kau Amaleka, kae ko Mose, Alona, mo Hulo e ‵nofo i se mauga e pili mai. Kafai e sisi a lima o Mose, e mautinoa me e manumalo te kau Isalaelu i te taua. I taimi ne ‵vale ei a lima o Mose, ne fesoasoani a Alona mo Hulo o sau. Tela la, ona ko te fesoasoani mo te puipuiga a Ieova, “ne fakatakavale masei ei ne Iosua a tino Amaleka.” (Eso. 17:8-13) Ne faite ne Mose se fatafaitaulaga i konā kae fakaigoa ne ia “Ko te Aliki [Ieova] ko Taku Fuka.”​—Faitau te Esoto 17:14, 15.

18, 19. Se a te puipuiga ne tuku mai ne te Atua mō ana tavini i ‵tou taimi nei?

¹⁸ E puipui ne Ieova a tino kolā e a‵lofa kae faka‵logo ki a ia. E ‵sala atu tatou ki te Atua mō se faka‵saoga māfai e taua mai a fili, e pelā mo te kau Isalaelu i Lefiti. E masani o puipui tatou ne Ieova e pelā me se potukau, kae fakasao ne ia tatou mai i lima o te Tiapolo. Mafaufau ki taimi e uke ne faka‵sao ei ne te Atua a ‵tou taina kolā ne tumau i te sē ‵kau ki se feitu ona ko olotou tulaga e pelā me ne Kelisiano. Pelā me se fakaakoakoga, ke mafaufau ki te vaitaimi o te kau Nazi i Siamani mo nisi atufenua i te 1930 o fano ki mua mo te kamataga o te 1940. A te faitau kae mafaufau ki tala tonu o tino mo tala i Yearbook e uiga ki te puipuiga a te Atua i taimi o fakasauaga ka fakamalosi aka i ei a ‵tou tali‵tonu ki a Ieova e pelā me ko ‵tou Lafiga.​—Sala. 91:2.

¹⁹ E auala i te fakapotopotoga a Ieova mo ana lōmiga, e maua ne tatou a fakamasauaga a‵lofa e puipui ei tatou. Ke mafau‵fau tatou ki te auala ne aoga ei a te fakatokaga tenei i taimi fakamuli nei. Ona ko te lalolagi tenei ko gasolo ifo eiloa o ‵goto ki lalo i te faiga o amioga lai‵lai mo te onoono ki ata ma‵sei, ne tuku mai ne Ieova a fakamasauaga tāua kae aoga o fesoasoani mai ke matapula‵pula tatou ki te fakamataku o te tulaga o mea tau amioga. Pelā me e maua ne tatou a pati fakatonutonu a‵lofa mai i se tamana ke ‵kalo kea‵tea mai i taugasoa ma‵sei e auala i te fakaaoga ‵se o te itaneti. *​—1 Koli. 15:33.

20. Se a te puipuiga mo te takitakiga e mafai o maua e auala i te fakapotopotoga Kelisiano?

²⁰ E mafai pefea o fakaasi atu ne tatou me ne ‘akoako eiloa tatou ne Ieova’? Mai te tau‵tali faka‵lei i ana fakatonuga. (Isa. 54:13) I loto i ‵tou fakapotopotoga, e maua ne tatou a te takitakiga mo te puipuiga telā e manakogina, me e tuku mai i konā ne tāgata fakamaoni kolā e tavini pelā me ne toeaina a te fesoasoani mo pati fakatonutonu mai te Tusi Tapu. (Kala. 6:1) A te lasi o te tausiga alofa a Ieova ki a tatou, e auala mai i “tāgata e pelā me ne meaalofa.” (Efe. 4:7, 8) E ‵saga atu pefea tatou ki ei? A te loto fia‵fia o tau‵tali kae faka‵logo ki ei e maua i ei te fakamanuiaga a te Atua.​—Epe. 13:17.

21. (a) Se a te mea e ‵tau o fakaiku aka ne tatou ke fai? (e) Se a te mea ka fai‵pati tatou ki ei i te suā mataupu?

²¹ Ke na fakaiku aka ne tatou ke takitakigina tatou ne te agaga tapu kae tau‵tali i te takitakiga a ‵tou Tamana faka-te-lagi. E manakogina foki ke mafaufau ‵loto tatou ki te olaga ne ola ei tena Tama, ko Iesu Keliso, i tena fakaakoakoga sē fuafuagina telā ne taumafai tatou o tau‵tali i ei. Me e auala i tena fakalogo ke oko eiloa ki tena mate, ne maua ei ne Iesu se taui fakaofoofogia. (Fili. 2:5-11) E pelā mo ia, ka maua eiloa ne tatou te fakamanuiaga ona ko te tali‵tonu ki a Ieova mo ‵tou loto kātoa. (Faata. 3:5, 6) Tela la, ke ‵kilo atu faeloa tatou ki a Ieova e pelā me se Faka‵saoga mo te Puipuiga sē fuafuagina. Mafāga o tauliaga lasi kae fakafiafia ke tavini atu ki a ia! Ka gasolo aka eiloa ki luga a ‵tou a‵lofa ki a ia māfai e mafau‵fau tatou ki te tolu o vaega o te tausiga a ‵tou Tamana ki a tatou​—ko tena fai taugasoa. E faipati eiloa a te suā mataupu ki te auala e fai ei a Ieova mo fai ‵tou Taugasoa sili.